“ວັນທີ 1–7 ເດືອນມິຖຸນາ. ແອວມາ 5–7: ‘ພວກທ່ານເຄີຍປະສົບການປ່ຽນແປງອັນຍິ່ງໃຫຍ່ນີ້ໃນໃຈຂອງພວກທ່ານແລ້ວບໍ?’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 1–7 ເດືອນມິຖຸນາ. ແອວມາ 5–7,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ພຣະເຢຊູອູ້ມແກະນ້ອຍ

Ye Are Not Forgotten [ທ່ານບໍ່ໄດ້ຖືກລືມ], ໂດຍ ຈອນ ມິກນໍທັນ

ວັນທີ 1–7 ເດືອນມິຖຸນາ

ແອວມາ 5–7

“ພວກທ່ານເຄີຍປະສົບການປ່ຽນແປງອັນຍິ່ງໃຫຍ່ນີ້ໃນໃຈຂອງພວກທ່ານແລ້ວບໍ?”

ແອວມາ 5–7 ສາມາດຊ່ວຍທ່ານໃຫ້ສະທ້ອນຄິດເຖິງການປ່ຽນໃຈເຫລື້ອມໃສຕໍ່ພຣະເຢຊູຄຣິດ ທີ່ກຳລັງເກີດຂຶ້ນຢູ່. ຂະນະທີ່ທ່ານອ່ານ, ໃຫ້ບັນທຶກສິ່ງທີ່ພຣະວິນຍານສິດສອນທ່ານ.

ບັນທຶກຄວາມປະທັບໃຈຂອງທ່ານ

ແອວມາບໍ່ຮູ້ກ່ຽວກັບການຜ່າຕັດປ່ຽນຫົວໃຈໃນປະຈຸບັນນີ້, ຊຶ່ງເປັນການເອົາຫົວໃຈທີ່ດີ ມາໃສ່ແທນຫົວໃຈທີ່ບໍ່ດີ ຫລື ເປັນພະຍາດ. ແຕ່ເພິ່ນຮູ້ກ່ຽວກັບສິ່ງທີ່ມະຫັດສະຈັນຫລາຍກວ່າ ນັ້ນຄື “ການປ່ຽນແປງໃນໃຈ” (ແອວມາ 5:26)—ຊຶ່ງໂດຍທາງນັ້ນ ພຣະເຢຊູໄດ້ປະທານຊີວິດໃໝ່ທາງວິນຍານໃຫ້ເຮົາ, ຄືກັນກັບການ “ເກີດໃໝ່” (ເບິ່ງ ແອວມາ 5:14, 49). ແອວມາສາມາດເຫັນໄດ້ວ່າ ການປ່ຽນແປງໃນໃຈນີ້ ເປັນສິ່ງທີ່ຊາວນີໄຟຢ່າງຫລວງຫລາຍຕ້ອງການ. ບາງຄົນຮັ່ງມີ ແລະ ບາງຄົນຍາກຈົນ, ບາງຄົນທະນົງຕົວ ແລະ ບາງຄົນຖ່ອມຕົວ, ບາງຄົນຂົ່ມເຫັງ ແລະ ບາງຄົນຖືກຂົ່ມເຫັງ (ເບິ່ງ ແອວມາ 4:6–15). ແຕ່ທຸກຄົນໃນພວກເຂົາຕ້ອງໄດ້ມາຫາພຣະເຢຊູຄຣິດ ເພື່ອຮັບການປິ່ນປົວ—ຄືກັນກັບທີ່ເຮົາທຸກຄົນຕ້ອງເຮັດ. ບໍ່ວ່າເຮົາຈະສະແຫວງຫາທີ່ຈະເອົາຊະນະຄວາມທະນົງຕົວ ຫລື ອົດທົນກັບຄວາມທຸກທໍລະມານ, ຂ່າວສານຂອງແອວມາກໍຍັງເໝືອນເດີມ ທີ່ວ່າ: “ຈົ່ງມາເຖີດ, ຢ່າສູ່ຢ້ານ” (ແອວມາ 7:15). ຈົ່ງໃຫ້ພຣະຜູ້ຊ່ວຍໃຫ້ລອດປ່ຽນແປງໃຈທີ່ແຂງກະດ້າງ, ເປັນບາບ, ແລະ ເຈັບປວດ ເປັນໃຈທີ່ຖ່ອມ, ບໍລິສຸດ, ແລະ ໃໝ່.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ແອວມາ 5:14–33

ເຮົາຕ້ອງປະສົບກັບ—ແລະ ສືບຕໍ່ຮູ້ສຶກ—ການປ່ຽນແປງອັນຍິ່ງໃຫຍ່ໃນໃຈ.

ຄຳຖາມທີ່ໃຫ້ພິຈາລະນາຕົວເອງ ທີ່ແອວມາໄດ້ຖາມຜູ້ຄົນຂອງເຊຣາເຮັມລາ, ມີຢູ່ໃນ ແອວມາ 5:14–33, ສາມາດຊ່ວຍທ່ານໃຫ້ຄົ້ນຫາຈິດວິນຍານຂອງທ່ານເອງ ແລະ ເຂົ້າໃຈຄວາມໝາຍຂອງການປະສົບກັບ “ການປ່ຽນແປງອັນຍິ່ງໃຫຍ່ໃນໃຈ” ຕະຫລອດຊົ່ວຊີວິດຂອງທ່ານ. ປະທານເອັມ ຣະໂຊ ບາເລີດ ໄດ້ອະທິບາຍເຖິງຄຸນຄ່າຂອງຄຳຖາມເຫລົ່ານີ້: “ເຮົາຕ້ອງໃຊ້ເວລາຖາມຕົວເອງເປັນປະຈຳວ່າ, ‘ເຮົາເປັນຈັ່ງໃດ?’ ມັນກໍເປັນເໝືອນກັບການສຳພາດຢ່າງເປັນສ່ວນຕົວກັບຕົວເອງ. … ເພື່ອຈະໃຫ້ມີການຊີ້ນຳສຳລັບຕົວຂ້າພະເຈົ້າລະຫວ່າງການສຳພາດສ່ວນຕົວນີ້, ຂ້າພະເຈົ້າມັກອ່ານ ແລະ ໄຕ່ຕອງຖ້ອຍຄຳທີ່ກໍ່ໃຫ້ເກີດການທົບທວນເຖິງຊີວິດຂອງຕົນ ທີ່ພົບເຫັນຢູ່ໃນບົດທີຫ້າຂອງ ແອວມາ” (“Return and Receive,” Ensign ຫລື Liahona, May 2017, 64).

ໃຫ້ຄິດທີ່ຈະອ່ານຄຳຖາມຂອງແອວມາ ຄືກັບວ່າທ່ານກຳລັງສຳພາດຕົວເອງ ແລະ ສຳຫລວດໃຈຂອງທ່ານ. ທ່ານກໍຄວນບັນທຶກຄຳຕອບຂອງທ່ານ ຕໍ່ຄຳຖາມເຫລົ່ານັ້ນໄວ້. ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ຕາມຜົນຂອງການສຳພາດຂອງທ່ານ?

ເບິ່ງ Dale G. Renlund, “Preserving the Heart’s Mighty Change,” Ensign ຫລື Liahona, Nov. 2009, 97–99.

ສານຸສິດແຕ່ລະຄົນຂອງພຣະຄຣິດ ຈະຕ້ອງປະສົບກັບ “ການປ່ຽນແປງໃນໃຈ.”

ແອວມາ 5:33–62

ເຮົາສາມາດມີປະຈັກພະຍານຫລາຍຂຶ້ນເຖິງພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນຂອງພຣະອົງ ຜ່ານທາງພຣະວິນຍານບໍລິສຸດ.

ແອວມາໄດ້ສະແດງປະຈັກພະຍານທີ່ມີພະລັງເຖິງພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນຂອງພຣະອົງ, ແລະ ເພິ່ນກໍໄດ້ອະທິບາຍນຳອີກ ເຖິງວິທີທີ່ເພິ່ນໄດ້ຮັບປະຈັກພະຍານນັ້ນ. ຂະນະທີ່ເພິ່ນກ່າວເປັນພະຍານ, ເພິ່ນບໍ່ໄດ້ກ່າວເຖິງປະສົບການຂອງເພິ່ນ ຕອນເພິ່ນໄດ້ເຫັນ ແລະ ໄດ້ຍິນທູດອົງໜຶ່ງ (ເບິ່ງ ໂມໄຊຢາ 27:10–17) ແຕ່ເພິ່ນໄດ້ບັນຍາຍເຖິງສິ່ງທີ່ເພິ່ນໄດ້ເຮັດ ເພື່ອຈະໄດ້ຮູ້ຈັກຄວາມຈິງດ້ວຍຕົວເອງ. ທ່ານຮຽນຮູ້ຫຍັງແດ່ຈາກ ແອວມາ 5:44–51 ກ່ຽວກັບວິທີທີ່ແອວມາ ໄດ້ມາຮູ້ຈັກຄວາມຈິງ? ທ່ານຈະສາມາດເຮັດຕາມຕົວຢ່າງຂອງເພິ່ນໄດ້ແນວໃດ ໃນຄວາມພະຍາຍາມຂອງທ່ານ ທີ່ຈະມີ ຫລື ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງທ່ານ? ທ່ານຮຽນຮູ້ຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ ຈາກການສິດສອນຂອງແອວມາ ຢູ່ໃນ ແອວມາ 5:33–35, 48–50, ແລະ 57–60?

ແອວມາ 7

ການເຊື່ອຟັງຢ່າງພາກພຽນ ຈະຊ່ວຍເຮົາໃຫ້ຢູ່ໃນ “ທາງຊຶ່ງຈະນຳໄປສູ່ອານາຈັກຂອງພຣະເຈົ້າ.”

ຜູ້ຄົນຂອງກີເດໂອນບໍ່ໄດ້ທົນທຸກກັບສະຖານະການແບບດຽວກັນກັບຜູ້ຄົນຢູ່ໃນເມືອງເຊຣາເຮັມລາ, ສະນັ້ນພຣະວິນຍານຈຶ່ງໄດ້ຊ່ວຍແອວມາຫລິງເຫັນຄວາມຕ້ອງການຂອງພວກເຂົາ ແລະ ສິດສອນພວກເຂົາໃນທາງທີ່ແຕກຕ່າງ (ເບິ່ງ ແອວມາ 7:17, 26). ທ່ານອາດຫລິງເຫັນຄວາມແຕກຕ່າງບາງຢ່າງ ລະຫວ່າງຂ່າວສານຂອງແອວມາ ຢູ່ໃນເມືອງເຊຣາເຮັມລາ (ເບິ່ງ ແອວມາ 5) ແລະ ໃນເມືອງກີເດໂອນ (ເບິ່ງ ແອວມາ 7). ຍົກຕົວຢ່າງ, ແອວມາໄດ້ສັງເກດເຫັນວ່າຜູ້ຄົນຂອງກີເດໂອນ “ຢູ່ໃນທາງຊຶ່ງຈະນຳໄປສູ່ອານາຈັກຂອງພຣະເຈົ້າ” (ແອວມາ 7:19). ຕະຫລອດທົ່ວຄຳເທດສະໜາຂອງເພິ່ນ, ແອວມາໄດ້ສິດສອນພວກເຂົາຫລາຍຢ່າງກ່ຽວກັບວິທີທີ່ຈະຢູ່ໃນເສັ້ນທາງ (ເບິ່ງ ແອວມາ 7). ເພິ່ນໄດ້ແນະນຳສິ່ງໃດກັບພວກເຂົາ? ທ່ານສາມາດນຳໃຊ້ສິ່ງໃດ ໃນຊີວິດຂອງທ່ານໃນເວລານີ້?

ແອວມາ 7:7–16

ພຣະຜູ້ຊ່ວຍໃຫ້ລອດໄດ້ຮັບເອົາບາບ, ຄວາມເຈັບປວດ, ແລະ ຄວາມທຸກທໍລະມານຂອງເຮົາໄປ.

ທ່ານເຄີຍຮູ້ສຶກວ່າ ບໍ່ມີໃຜເຂົ້າໃຈການດີ້ນລົນ ຫລື ການທ້າທາຍຂອງທ່ານຢູ່ບໍ? ຖ້າເຄີຍ, ຄວາມຈິງທີ່ສິດສອນຢູ່ໃນ ແອວມາ 7:7–16 ສາມາດຊ່ວຍໄດ້. ແອວເດີ ເດວິດ ເອ ແບ໊ດນາ ໄດ້ເປັນພະຍານວ່າ: “ພຣະບຸດຂອງພຣະເຈົ້າຮູ້ຈັກ ແລະ ເຂົ້າໃຈຢ່າງສົມບູນຄົບຖ້ວນ, ເພາະພຣະອົງໄດ້ຮູ້ສຶກ ແລະ ໄດ້ອົນທົນຕໍ່ພາລະຂອງເຮົາ. ແລະ ເປັນເພາະການເສຍສະລະອັນເປັນນິດ ແລະ ນິລັນດອນຂອງພຣະອົງ (ເບິ່ງ ແອວມາ 34:14), ພຣະອົງຈຶ່ງມີຄວາມເຫັນອົກເຫັນໃຈຢ່າງເຕັມທີ ແລະ ສາມາດເອື້ອມອອກມາຫາເຮົາດ້ວຍຄວາມເມດຕາ” (“Bear Up Their Burdens with Ease,” Ensign ຫລື Liahona, May 2014, 90).

ຂະນະທີ່ທ່ານອ່ານ ແອວມາ 7:7–16, ໃຫ້ສະທ້ອນຄິດກ່ຽວກັບສິ່ງທີ່ຂໍ້ເຫລົ່ານີ້ຊ່ວຍເຮົາໃຫ້ເຂົ້າໃຈກ່ຽວກັບຈຸດປະສົງຂອງການເສຍສະລະຂອງພຣະຜູ້ຊ່ວຍໃຫ້ລອດແນວໃດ. ເຮົາຈະເຂົ້າເຖິງອຳນາດຂອງພຣະອົງໃນຊີວິດຂອງເຮົາໄດ້ແນວໃດ? ໃຫ້ຄິດທີ່ຈະບັນທຶກຄວາມຄິດຂອງທ່ານໄວ້.

ເບິ່ງ ເອຊາຢາ 53:3–5 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

ແອວມາ 5:6–13

ເປັນຫຍັງແອວມາຈຶ່ງຢາກໃຫ້ຜູ້ຄົນຂອງເພິ່ນຈື່ຈຳຄວາມເມດຕາຂອງພຣະຜູ້ເປັນເຈົ້າ ຕໍ່ບັນພະບຸລຸດຂອງພວກເຂົາ? ເລື່ອງລາວໃດແດ່ຈາກປະຫວັດຄອບຄົວຂອງພວກທ່ານ ທີ່ສິດສອນພວກທ່ານກ່ຽວກັບຄວາມເມດຕາຂອງພຣະອົງ? ບາງທີພວກທ່ານຄວນເຂົ້າຫາ familysearch.org/myfamily ເພື່ອບັນທຶກເລື່ອງລາວເຫລົ່ານີ້.

ແອວມາ 5:14–33

ສະມາຊິກໃນຄອບຄົວຂອງທ່ານອາດຮູ້ວ່າ ການກະກຽມແມ່ນຮູ້ສຶກແນວໃດ—ຫລື ການບໍ່ກະກຽມຮູ້ສຶກແນວໃດ—ສຳລັບການໄປນອນປ່າ, ການສອບເສັງຢູ່ໂຮງຮຽນ, ຫລື ການສຳພາດສະໝັກງານ. ປະສົບການເມື່ອບໍ່ດົນມານີ້ຢ່າງໃດແດ່ທີ່ເຂົາເຈົ້າສາມາດແບ່ງປັນ ເພື່ອສາທິດເຖິງຄວາມສຳຄັນຂອງການກະກຽມ? ທ່ານສາມາດເຊື້ອເຊີນສະມາຊິກໃນຄອບຄົວໃຫ້ສຳພາດ ແອວມາ 5:14–33 ແລະ ຊອກຫາຄຳຖາມທີ່ແອວມາໄດ້ຖາມ ເພື່ອກະກຽມຜູ້ຄົນຂອງເພິ່ນເພື່ອພົບພຣະເຈົ້າ. ບາງທີສະມາຊິກໃນຄອບຄົວແຕ່ລະຄົນສາມາດເລືອກເອົາຄຳຖາມຂໍ້ໜຶ່ງ ແລະ ແບ່ງປັນມັນເຖິງວິທີທີ່ມັນສາມາດຊ່ວຍເຮົາໃຫ້ກະກຽມເພື່ອພົບພຣະເຈົ້າ. ຄອບຄົວຂອງທ່ານກໍສາມາດຕິດຄຳຖາມຫລາຍຂໍ້ຂອງແອວມາ ໄວ້ຢູ່ຫລາຍບ່ອນໃນເຮືອນຂອງທ່ານ ເພື່ອໃຫ້ສະມາຊິກໃນຄອບຄົວໄຕ່ຕອງ.

ແອວມາ 6:4–6

ມີເຫດຜົນບາງຢ່າງໃດແດ່ທີ່ເຮົາໄປເຕົ້າໂຮມກັນ ໃນຖານະໄພ່ພົນ? ເຮົາຈະເຮັດໃຫ້ເວລາຂອງເຮົາຢູ່ທີ່ໂບດເປັນປະໂຫຍດຕໍ່ຕົວເຮົາເອງ ແລະ ຄົນອື່ນໄດ້ແນວໃດ?

ແອວມາ 7:9–16

ເຮົາຮຽນຮູ້ຫຍັງແດ່ໃນຂໍ້ເຫລົ່ານີ້ ທີ່ຊ່ວຍເຮົາ “[ບໍ່ໃຫ້] ຢ້ານ” (ແອວມາ 7:15) ເມື່ອເຮົາຕ້ອງໄດ້ກັບໃຈ ແລະ ປ່ຽນແປງ? ຂໍ້ເຫລົ່ານີ້ສິດສອນເຮົາຫຍັງແດ່ກ່ຽວກັບການຫັນມາຫາພຣະຜູ້ຊ່ວຍໃຫ້ລອດ ເມື່ອເຮົາຕ້ອງການຄວາມຊ່ວຍເຫລືອ? ສິ່ງອື່ນອີກຢ່າງໃດແດ່ທີ່ເຮົາໄດ້ເຮັດ ເພື່ອຈະໄດ້ຮັບຄວາມຊ່ວຍເຫລືອຈາກພຣະອົງ? ພຣະອົງໄດ້ຊ່ວຍເຫລືອເຮົາໃນວິທີໃດ?

ແອວມາ 7:23

ເຮົາຮູ້ໃຜແດ່ ຜູ້ທີ່ເປັນຕົວຢ່າງທີ່ດີ ຂອງຄຸນສົມບັດຢ່າງໜຶ່ງ ຫລື ຫລາຍກວ່ານັ້ນ ທີ່ລະບຸຢູ່ໃນຂໍ້ນີ້? ເປັນຫຍັງຈຶ່ງສຳຄັນທີ່ຈະພັດທະນາຄຸນສົມບັດເຫລົ່ານີ້?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສິດສອນຂອງເຮົາ

ຖາມຄຳຖາມທີ່ເຊື້ອເຊີນສະມາຊິກໃນຄອບຄົວໃຫ້ປະຕິບັດ. ໃຫ້ຄິດທີ່ຈະຖາມສິ່ງທີ່ກະຕຸ້ນສະມາຊິກໃນຄອບຄົວຂອງທ່ານ ໃຫ້ສະທ້ອນຄິດເຖິງວິທີທີ່ເຂົາເຈົ້າສາມາດດຳລົງຊີວິດຕາມພຣະກິດຕິຄຸນໃຫ້ເຕັມປ່ຽມຫລາຍກວ່າເກົ່າ. “ຄຳຖາມເຫລົ່ານີ້ ຕາມປົກກະຕິແລ້ວ ບໍ່ແມ່ນສຳລັບການສົນທະນາ; ມັນແມ່ນສຳລັບການສະທ້ອນຄິດສ່ວນຕົວ” (Teaching in the Savior’s Way, 31).