ວັນທີ 8–14 ເດືອນມິຖຸນາ. ແອວມາ 8–12: ພຣະເຢຊູຄຣິດຈະສະເດັດມາໄຖ່ຜູ້ຄົນຂອງພຣະອົງ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 8–14 ເດືອນມິຖຸນາ. ແອວມາ 8–12,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
Teaching True Doctrine [ການສິດສອນຄຳສອນທີ່ແທ້ຈິງ], ໂດຍ ໄມໂກ ທີ ມອມ
ວັນທີ 8–14 ເດືອນມິຖຸນາ
ແອວມາ 8–12
ພຣະເຢຊູຄຣິດຈະສະເດັດມາໄຖ່ຜູ້ຄົນຂອງພຣະອົງ
ການສຶກສາພຣະຄຳພີເຊື້ອເຊີນການເປີດເຜີຍ. ສະນັ້ນ ຂະນະທີ່ທ່ານອ່ານ ແອວມາ 8–12, ໃຫ້ບັນທຶກຄວາມປະທັບໃຈເລື່ອງພຣະວິນຍານ ຂະນະທີ່ພຣະອົງສິດສອນທ່ານ ຈາກຂ່າວສານຂອງແອວມາ ແລະ ແອມມິວເລັກ.
ບັນທຶກຄວາມປະທັບໃຈຂອງທ່ານ
ວຽກງານຂອງພຣະເຈົ້າຈະບໍ່ລົ້ມເຫລວ. ແຕ່ຄວາມພະຍາຍາມຂອງເຮົາທີ່ຈະຊ່ວຍໃນວຽກງານຂອງພຣະອົງ ບາງເທື່ອກໍເບິ່ງຄືວ່າລົ້ມເຫລວ—ຢ່າງໜ້ອຍ, ເຮົາບໍ່ເຫັນຜົນທີ່ເຮົາຄາດໝາຍໃນທັນທີທັນໃດ. ບາງເທື່ອເຮົາອາດຮູ້ສຶກຄືກັນກັບແອວມາ ເມື່ອເພິ່ນສິດສອນພຣະກິດຕິຄຸນຢູ່ເມືອງອຳໂມນໄນຮາ—ຖືກປະຕິເສດ, ຖືກຖົ່ມນ້ຳລາຍໃສ່, ແລະ ຖືກຂັບໄລ່ໜີ. ແຕ່ເມື່ອທູດອົງໜຶ່ງໄດ້ແນະນຳເພິ່ນໃຫ້ກັບຄືນໄປ ແລະ ພະຍາຍາມເຮັດອີກ, ແອວມາກໍໄດ້ “ກັບຄືນໄປຢ່າງວ່ອງໄວ” ດ້ວຍຄວາມກ້າຫານ (ແອວມາ 8:18), ແລະ ພຣະເຈົ້າໄດ້ກະກຽມວິທີທາງໄວ້ໃຫ້ເພິ່ນ. ບໍ່ພຽງແຕ່ພຣະອົງໄດ້ຈັດຫາອາຫານ ແລະ ທີ່ພັກອາໄສໃຫ້ແອວມາເທົ່ານັ້ນ, ແຕ່ພຣະອົງຍັງໄດ້ກະກຽມແອມມິວເລັກໃຫ້ເພິ່ນນຳອີກ, ຜູ້ທີ່ໄດ້ກາຍເປັນເພື່ອນຮ່ວມງານຂອງເພິ່ນ, ເປັນຜູ້ປົກປ້ອງພຣະກິດຕິຄຸນທີ່ມີພະລັງ, ແລະ ເປັນເພື່ອນທີ່ຊື່ສັດ. ເມື່ອເຮົາປະເຊີນກັບຄວາມຫຍຸ້ງຍາກ ແລະ ຄວາມຜິດຫວັງ ຂະນະທີ່ເຮົາຮັບໃຊ້ຢູ່ໃນອານາຈັກຂອງພຣະຜູ້ເປັນເຈົ້າ, ເຮົາສາມາດຈື່ຈຳວິທີທີ່ພຣະເຈົ້າຄ້ຳຈູນ ແລະ ນຳພາແອວມາ, ແລະ ເຮົາສາມາດໄວ້ວາງໃຈວ່າພຣະເຈົ້າຈະຄ້ຳຈູນ ແລະ ນຳພາເຮົາຄືກັນ, ແມ່ນແຕ່ໃນສະຖານະການທີ່ຫຍຸ້ງຍາກກໍຕາມ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ຄວາມພະຍາຍາມຂອງເຮົາທີ່ຈະແບ່ງປັນພຣະກິດຕິຄຸນ ຮຽກຮ້ອງຄວາມບໍ່ລົດລະ ແລະ ຄວາມອົດທົນ.
ເຖິງແມ່ນວ່າບາງຄົນອາດປະຕິເສດປະຈັກພະຍານຂອງທ່ານເລື່ອງພຣະກິດຕິຄຸນ, ແຕ່ກໍບໍ່ໄດ້ໝາຍຄວາມວ່າ ທ່ານສິ້ນຫວັງ—ເຖິງແນວໃດ, ພຣະຜູ້ເປັນເຈົ້າກໍບໍ່ປະຖິ້ມບຸກຄົນນັ້ນ, ແລະ ພຣະອົງຈະນຳພາທ່ານໃຫ້ຮູ້ຈັກວິທີທີ່ຈະກະທຳ. ໃນກໍລະນີຂອງແອວມາ, ທູດອົງໜຶ່ງໄດ້ສັ່ງໃຫ້ເພິ່ນກັບຄືນໄປເມືອງອຳໂມນໄນຮາ ເພື່ອສັ່ງສອນພຣະກິດຕິຄຸນ ເຖິງແມ່ນຜູ້ຄົນໄດ້ປະຕິເສດເພິ່ນຢ່າງຮຸນແຮງແລ້ວກໍຕາມ (ເບິ່ງ ແອວມາ 8:14–16). ທ່ານຮຽນຮູ້ຫຍັງແດ່ຈາກຕົວຢ່າງຂອງແອວມາ ເລື່ອງການແບ່ງປັນພຣະກິດຕິຄຸນ ເຖິງແມ່ນຈະມີການທ້າທາຍ ແລະ ການຕໍ່ຕ້ານກໍຕາມ? ມີຂໍ້ໃດແດ່ໃນ ແອວມາ 8 ທີ່ເຮັດໃຫ້ທ່ານມີຄວາມປາດຖະໜາທີ່ຈະແບ່ງປັນພຣະກິດຕິຄຸນຫລາຍກວ່າເກົ່າ?
ເບິ່ງ 3 ນີໄຟ 18:30–32; Jeffrey R. Holland, “The Cost—and Blessings—of Discipleship,” Ensign ຫລື Liahona, May 2014, 6–9 ນຳອີກ.
ພຣະເຈົ້າຕັດສິນລູກໆຂອງພຣະອົງ ອີງຕາມຄວາມສະຫວ່າງ ແລະ ຄວາມຮູ້ທີ່ພວກເຂົາມີ.
ເມື່ອອ່ານກ່ຽວກັບວິທີທີ່ຊາວນີໄຟ ຢູ່ໃນເມືອງອຳໂມນໄນຮາ ກະທຳຕໍ່ຜູ້ຮັບໃຊ້ຂອງພຣະຜູ້ເປັນເຈົ້າ, ມັນງ່າຍທີ່ຈະລືມໄປວ່າ ຄັ້ງໜຶ່ງພວກເຂົາເຄີຍດຳລົງຊີວິດຕາມພຣະກິດຕິຄຸນ ແລະ “ເປັນຄົນທີ່ໂປດປານທີ່ສຸດຂອງພຣະຜູ້ເປັນເຈົ້າ” (ແອວມາ 9:20). ຕາມຈິງແລ້ວ, ພາກສ່ວນໜຶ່ງຂອງຂ່າວສານຂອງແອວມາຕໍ່ຜູ້ຄົນຢູ່ໃນເມືອງອຳໂມນໄນຮາ ແມ່ນວ່າເປັນເພາະພວກເຂົາໄດ້ເຮັດໃຈແຂງກະດ້າງ ເຖິງແມ່ນໄດ້ຮັບພອນຢ່າງຫລວງຫລາຍກໍຕາມ, ສະພາບຂອງພວກເຂົາແມ່ນຮ້າຍແຮງກວ່າຊາວເລມັນອີກຊ້ຳ, ຜູ້ໄດ້ເຮັດການບາບ ສ່ວນຫລາຍເພາະຄວາມໂງ່ຈ້າ. ສິ່ງກົງກັນຂ້າມນີ້ໄດ້ສິດສອນເຮົາຫຍັງແດ່ ກ່ຽວກັບວິທີທີ່ພຣະເຈົ້າຕັດສິນລູກໆຂອງພຣະອົງ?
ຂະນະທີ່ທ່ານອ່ານກ່ຽວກັບພອນທີ່ຍິ່ງໃຫຍ່ທີ່ພຣະເຈົ້າປະທານໃຫ້ຜູ້ຄົນຂອງນີໄຟ (ເບິ່ງ ໂດຍສະເພາະ ແອວມາ 9:19–23), ໃຫ້ໄຕ່ຕອງກ່ຽວກັບພອນທີ່ຍິ່ງໃຫຍ່ທີ່ພຣະອົງໄດ້ປະທານໃຫ້ທ່ານ. ທ່ານໄດ້ເຮັດຫຍັງແດ່ເພື່ອຈະໄດ້ຊື່ສັດຕໍ່ພອນເຫລົ່ານີ້? ມີສິ່ງໃດແດ່ທີ່ທ່ານຮູ້ສຶກວ່າຕ້ອງປ່ຽນແປງ?
ເບິ່ງ ຄຳສອນ ແລະ ພັນທະສັນຍາ 82:3 ນຳອີກ.
ແຜນຂອງພຣະເຈົ້າເປັນແຜນແຫ່ງການໄຖ່.
ສາດສະດາໃນພຣະຄຳພີມໍມອນໄດ້ໃຊ້ຫລາຍຊື່ ເພື່ອບັນຍາຍກ່ຽວກັບແຜນຂອງພຣະເຈົ້າສຳລັບລູກໆຂອງພຣະອົງ, ເຊັ່ນແຜນແຫ່ງຄວາມລອດ ຫລື ແຜນແຫ່ງຄວາມສຸກ. ຢູ່ໃນ ແອວມາ 11–12, ແອວມາ ແລະ ແອມມິວເລັກ ອ້າງເຖິງມັນວ່າເປັນແຜນແຫ່ງການໄຖ່. ຂະນະທີ່ທ່ານອ່ານບົດເຫລົ່ານີ້, ໃຫ້ໄຕ່ຕອງເຖິງວິທີທີ່ຄຳວ່າ “ການໄຖ່” ຖືກໃຊ້ເພື່ອບັນຍານເຖິງແຜນແນວໃດ. ທ່ານກໍສາມາດຂຽນບົດສະຫລຸບທີ່ສັ້ນໆກໍໄດ້ ເຖິງສິ່ງທີ່ແອວມາ ແລະ ແອມມິວເລັກ ໄດ້ສິດສອນກ່ຽວກັບພາກສ່ວນຂອງແຜນດັ່ງຕໍ່ໄປນີ້.
ການຕົກ:
ພຣະຜູ້ໄຖ່:
ການກັບໃຈ:
ຄວາມຕາຍ:
ການຟື້ນຄືນຊີວິດ:
ການພິພາກສາ:
ໃຫ້ສັງເກດເບິ່ງຜົນກະທົບຂອງຖ້ອຍຄຳຂອງແອມມິວເລັກ ທີ່ມີຕໍ່ຜູ້ຄົນ (ເບິ່ງ ແອວມາ 11:46). ທ່ານຄິດວ່າເປັນຫຍັງຫລັກທຳເຫລົ່ານີ້ຈຶ່ງມີອິດທິພົນທີ່ມີພະລັງຫລາຍແທ້ໆ? ມັນໄດ້ເປັນອິດທິພົນຕໍ່ຊີວິດຂອງທ່ານແນວໃດ?
ເບິ່ງ D. Todd Christofferson, “The Resurrection of Jesus Christ,” Ensign ຫລື Liahona, May 2014, 111–14 ນຳອີກ.
ຖ້າຫາກເຮົາບໍ່ເຮັດໃຈແຂງກະດ້າງ, ເຮົາຈະສາມາດຮັບເອົາພຣະຄຳຂອງພຣະເຈົ້າໄດ້ຫລາຍກວ່າເກົ່າ.
ບາງຄົນອາດສົງໃສວ່າ ເປັນຫຍັງພຣະບິດາເທິງສະຫວັນຈຶ່ງບໍ່ເຮັດໃຫ້ທຸກສິ່ງເປັນທີ່ຮູ້ຈັກແກ່ເຮົາ. ໃນ ແອວມາ 12:9–14, ແອວມາໄດ້ອະທິບາຍເຖິງເຫດຜົນທີ່ເປັນໄປໄດ້ຢ່າງໜຶ່ງທີ່ບາງເທື່ອຄວາມລຶກລັບຂອງພຣະເຈົ້າຖືກປິດບັງຈາກເຮົາ. ຄຳຖາມເຫລົ່ານີ້ສາມາດຊ່ວຍທ່ານໄຕ່ຕອງກ່ຽວກັບສິ່ງທີ່ເພິ່ນໄດ້ສິດສອນ:
-
ການເຮັດໃຈແຂງກະດ້າງໝາຍຄວາມວ່າແນວໃດ? ທ່ານເຄີຍສັງເກດເຫັນຄວາມໂນ້ມອ່ຽງນີ້ບໍ ຢູ່ໃນຕົວທ່ານເອງ?
-
ເປັນຫຍັງພຣະຜູ້ເປັນເຈົ້າຈຶ່ງປິດບັງພຣະຄຳຂອງພຣະອົງ ຈາກຜູ້ທີ່ເຮັດໃຈແຂງກະດ້າງ?
-
ທ່ານເຄີຍປະສົບກັບຄຳສັນຍາຂອງການໄດ້ຮັບ “ສ່ວນໃຫຍ່ຂອງພຣະຄຳ” ແນວໃດ? (ແອວມາ 12:10). ປະສົບການນັ້ນເປັນຈັ່ງໃດ?
-
ທ່ານສາມາດເຮັດຫຍັງໄດ້ແດ່ ເພື່ອໃຫ້ແນ່ໃຈວ່າ ພຣະຄຳຂອງພຣະເຈົ້າ “ພົບໃນຕົວ [ທ່ານ]”? (ແອວມາ 12:13). ຖ້າຫາກທ່ານມີພຣະຄຳຂອງພຣະເຈົ້າຢູ່ໃນຕົວທ່ານ, ມັນມີຜົນກະທົບຫຍັງແດ່ຕໍ່ “ຄຳເວົ້າ,” “ການກະທຳ,” ແລະ “ຄວາມນຶກຄິດ” ຂອງທ່ານ? (ແອວມາ 12:14).
ສຳລັບຕົວຢ່າງໜຶ່ງຂອງຫລັກທຳເຫລົ່ານີ້, ໃຫ້ປຽບທຽບແອມມິວເລັກ ໃສ່ກັບຜູ້ຄົນອື່ນໆຂອງເມືອງອຳໂມນໄນຮາ. ປະສົບການຂອງແອມມິວເລັກ (ເບິ່ງ ໂດຍສະເພາະ ແອວມາ 10:1–11) ສະແດງໃຫ້ເຫັນສິ່ງທີ່ແອວມາໄດ້ສິດສອນຢູ່ໃນຂໍ້ເຫລົ່ານີ້ແນວໃດ?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
ແອວມາ 8:10–18
ເຮົາສາມາດຮຽນຮູ້ຫຍັງແດ່ຈາກແອວມາກ່ຽວກັບການເຊື່ອຟັງພຣະຜູ້ເປັນເຈົ້າ “ຢ່າງວ່ອງໄວ” (ຂໍ້ທີ 18) ເຖິງແມ່ນມັນອາດເປັນການຍາກທີ່ຈະເຮັດກໍຕາມ? ເພື່ອເນັ້ນໜັກຫລັກທຳນີ້ກັບເດັກນ້ອຍ, ທ່ານສາມາດຫລິ້ນເກມແບບທີ່ທ່ານໃຫ້ຄຳແນະນຳໃຫ້ເຮັດບາງຢ່າງ ແລະ ເບິ່ງວ່າສະມາຊິກໃນຄອບຄົວເຮັດມັນໄດ້ໄວປານໃດ. ຍົກຕົວຢ່າງ, ທ່ານອາດເຫັນວ່າ ໃຜພັບເຄື່ອງແລ້ວໄວກວ່າໝູ່.
ແອວມາ 10:1-12
ເຮົາສາມາດຮຽນຮູ້ຫຍັງແດ່ຈາກປະສົບການຂອງແອມມິວເລັກ ຢູ່ໃນຂໍ້ເຫລົ່ານີ້? ປະຈັກພະຍານຂອງເພິ່ນມີຜົນກະທົບຕໍ່ຜູ້ທີ່ຮັບຟັງແນວໃດ? ໃຫ້ເຊື້ອເຊີນສະມາຊິກໃນຄອບຄົວຂອງທ່ານ ໃຫ້ວາງແຜນທີ່ຈະເຮັດສິ່ງໜຶ່ງໃນອາທິດນີ້ ອີງຕາມສິ່ງທີ່ເຂົາເຈົ້າໄດ້ຮຽນຮູ້ຈາກຕົວຢ່າງຂອງແອມມິວເລັກ.
ແອວມາ 10:22–23
ເຮົາຮຽນຮູ້ຫຍັງແດ່ຈາກຂໍ້ເຫລົ່ານີ້ກ່ຽວກັບກຸ່ມຜູ້ຄົນທີ່ຊອບທຳ ສາມາດມີອິດທິພົນຢູ່ໃນເມືອງທີ່ຊົ່ວຮ້າຍໄດ້?
ແອວມາ 11:34–37
ແມ່ນຫຍັງຄືຄວາມແຕກຕ່າງລະຫວ່າງພຣະເຢຊູຄຣິດ ຈະໄຖ່ເຮົາ ໃນ ບາບຂອງເຮົາ ແລະ ຈາກ ບາບຂອງເຮົາ? (ເບິ່ງ ຮີລາມັນ 5:10; ເບິ່ງ 1 ໂຢຮັນ 1:9–10) ນຳອີກ. ເພື່ອສະແດງສິ່ງທີ່ແອມມິວເລັກໄດ້ສິດສອນ, ທ່ານອາດແບ່ງປັນເລື່ອງເລົ່າຈາກຕອນເລີ່ມຕົ້ນຂອງຂ່າວສານຂອງແອວເດີ ອາເລັນ ດີ ເຮນີ “Remembering in Whom We Have Trusted” (Ensign ຫລື Liahona, Nov. 2015, 121–23). ພຣະເຢຊູຄຣິດໄຖ່ເຮົາຈາກບາບຂອງເຮົາແນວໃດ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສຶກສາສ່ວນຕົວ
ສຶກສາຖ້ອຍຄຳຂອງສາດສະດາ ແລະ ອັກຄະສາວົກຂອງຍຸກສຸດທ້າຍ. ອ່ານສິ່ງທີ່ສາດສະດາ ແລະ ອັກຄະສາວົກຂອງຍຸກສຸດທ້າຍ ໄດ້ສິດສອນກ່ຽວກັບຄວາມຈິງທີ່ພົບເຫັນຢູ່ໃນພຣະຄຳພີ. ຍົກຕົວຢ່າງ, ທ່ານສາມາດຊີ້ບອກຫົວຂໍ້ ຢູ່ໃນ ແອວມາ 8–12 ແລະ ຊອກຫາຫົວຂໍ້ນັ້ນ ຢູ່ໃນກອງປະຊຸມໃຫຍ່ສາມັນເທື່ອລ່າສຸດ (ເບິ່ງ Teaching in the Savior’s Way, 21).
ຮູບພາບແອວມາກຳລັງກິນເຂົ້າກັບແອມມິວເລັກ ໂດຍ ແດນ ເບີ