“ວັນທີ 7–13 ເດືອນກັນຍາ. 3 ນີໄຟ 1–7: ‘ຈົ່ງເງີຍໜ້າ ແລະ ເບີກບານເຖີດ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 7–13 ເດືອນກັນຍາ. 3 ນີໄຟ 1–7,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
One Day, One Night, and One Day [ມື້ໜຶ່ງ, ຄືນໜຶ່ງ, ແລະ ອີກມື້ໜຶ່ງ], ໂດຍ ໂຮເຮ ໂກໂກ
ວັນທີ 7–13 ເດືອນກັນຍາ
3 ນີໄຟ 1–7
“ຈົ່ງເງີຍໜ້າ ແລະ ເບີກບານເຖີດ”
ຊາວນີໄຟໄດ້ເປັນພະຍານເຖິງເຄື່ອງໝາຍທີ່ມະຫັດສະຈັນ, ແຕ່ເມື່ອເວລາຜ່ານໄປ ພວກເຂົາໄດ້ລືມສິ່ງທີ່ພວກເຂົາໄດ້ປະສົບ (ເບິ່ງ 3 ນີໄຟ 2:1). ການບັນທຶກຄວາມປະທັບໃຈຂອງທ່ານ ຈະຊ່ວຍທ່ານໃຫ້ຈື່ຈຳປະສົບການທາງວິນຍານຂອງທ່ານ ຂະນະທີ່ສຶກສາ 3 ນີໄຟ 1–7.
ບັນທຶກຄວາມປະທັບໃຈຂອງທ່ານ
ໃນບາງວິທີ, ມັນເປັນເວລາທີ່ໜ້າຕື່ນເຕັ້ນ ທີ່ໄດ້ເປັນຜູ້ເຊື່ອໃນພຣະເຢຊູຄຣິດ. ການທຳນາຍໄດ້ເກີດເປັນຈິງ—ເຄື່ອງໝາຍ ແລະ ສິ່ງມະຫັດສະຈັນທີ່ຍິ່ງໃຫຍ່ໃນບັນດາຜູ້ຄົນ ໄດ້ເປັນສິ່ງຊີ້ບອກວ່າ ບໍ່ດົນພຣະຜູ້ຊ່ວຍໃຫ້ລອດຈະມາກຳເນີດ. ກົງກັນຂ້າມ, ມັນກໍເປັນເວລາທີ່ກັງວົນໃຈສຳລັບຜູ້ທີ່ເຊື່ອ ເພາະ, ເຖິງແມ່ນສິ່ງມະຫັດສະຈັນທັງໝົດນັ້ນ, ຜູ້ທີ່ບໍ່ເຊື່ອກໍຍັງໝັ້ນໃຈວ່າ “ເວລາໄດ້ຜ່ານພົ້ນໄປແລ້ວ” ສຳລັບພຣະຜູ້ຊ່ວຍໃຫ້ລອດທີ່ຈະມາກຳເນີດ (3 ນີໄຟ 1:5). ຜູ້ຄົນເຫລົ່ານີ້ໄດ້ກໍ່ໃຫ້ເກີດມີການ “ຮ້ອງປ່າວໄປຕະຫລອດທົ່ວແຜ່ນດິນ” (3 ນີໄຟ 1:7) ກໍຍັງໄດ້ຕັ້ງວັນທີ່ຈະຂ້າຜູ້ທີ່ເຊື່ອທັງໝົດ ຖ້າຫາກເຄື່ອງໝາຍທີ່ໄດ້ທຳນາຍໄວ້ໂດຍຊາມູເອນຄົນເລມັນ—ຄືນທີ່ບໍ່ມີຄວາມມືດ—ບໍ່ປະກົດຂຶ້ນ.
ໃນສະຖານະການທີ່ຫຍຸ້ງຍາກເຫລົ່ານີ້, ສາດສະດານີໄຟໄດ້ “ຮ້ອງທູນຕໍ່ພຣະເຈົ້າຂອງເພິ່ນຢ່າງສຸດກຳລັງເພື່ອຜູ້ຄົນຂອງເພິ່ນ” (3 ນີໄຟ 1:11). ຄຳຕອບຂອງພຣະຜູ້ເປັນເຈົ້າໃຫ້ການດົນໃຈຕໍ່ທຸກຄົນທີ່ປະເຊີນກັບການຂົ່ມເຫັງ ຫລື ສົງໃສ ແລະ ຕ້ອງການທີ່ຈະຮູ້ຈັກວ່າ ແສງສະຫວ່າງຈະເອົາຊະນະຄວາມມືດຫລືບໍ່: “ຈົ່ງເງີຍໜ້າ ແລະ ເບີກບານເຖີດ; … ເຮົາຈະເຮັດໃຫ້ທຸກສິ່ງຢ່າງຊຶ່ງເຮົາໄດ້ເວົ້າໄວ້ໂດຍປາກຂອງສາດສະດາຜູ້ບໍລິສຸດຂອງເຮົາສຳເລັດ” (3 ນີໄຟ 1:13).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະຜູ້ເປັນເຈົ້າຈະສຳເລັດພຣະຄຳທັງໝົດຂອງພຣະອົງ.
ທ່ານວາດພາບເຫັນໄດ້ບໍວ່າ ທ່ານຈະຮູ້ສຶກແນວໃດ ຖ້າຫາກທ່ານໄດ້ເປັນຜູ້ໜຶ່ງໃນກຸ່ມຜູ້ທີ່ເຊື່ອ ລະຫວ່າງເວລາທີ່ບັນຍາຍ ຢູ່ໃນ 3 ນີໄຟ 1–7? ທ່ານຈະຮູ້ສຶກແນວໃດກັບການລໍຖ້າ, ຍົກຕົວຢ່າງ, ການລໍຖ້າຄືນທີ່ບໍ່ມີຄວາມມືດ ທີ່ຈະປະກາດເຖິງການກຳເນີດຂອງພຣະຜູ້ຊ່ວຍໃຫ້ລອດ, ໂດຍທີ່ຮູ້ວ່າ ທ່ານຈະຖືກຂ້າຖ້າຫາກມັນບໍ່ເກີດຂຶ້ນ? ຂະນະທີ່ທ່ານອ່ານ 3 ນີໄຟ 1:4–21 ແລະ 5:1–3, ໃຫ້ຊອກຫາສິ່ງທີ່ນີໄຟ ແລະ ຜູ້ທີ່ເຊື່ອຄົນອື່ນໆໄດ້ເຮັດ ເພື່ອຮັກສາສັດທາຂອງພວກເຂົາ ລະຫວ່າງເວລາທີ່ຫຍຸ້ງຍາກເຫລົ່ານີ້. ພຣະຜູ້ເປັນເຈົ້າໄດ້ອວຍພອນພວກເຂົາໃນທາງໃດ? ທ່ານຮຽນຮູ້ຫຍັງແດ່ທີ່ສາມາດຊ່ວຍໃນຕອນທີ່ທ່ານພົບເຫັນຕົວເອງກຳລັງລໍຖ້າພອນທີ່ສັນຍາໄວ້ ໂດຍພຣະຜູ້ເປັນເຈົ້າ?
ການລືມປະສົບການທາງວິນຍານເຮັດໃຫ້ເຮົາມີຄວາມສ່ຽງຕໍ່ການລໍ້ລວງຂອງຊາຕານ.
ທ່ານອາດຄິດວ່າ ການເປັນພະຍານເຖິງບາງສິ່ງທີ່ມະຫັດສະຈັນຫລາຍທີ່ສຸດ ເຊັ່ນຄ່ຳຄືນທີ່ປາດສະຈາກຄວາມມືດ ຈະຢູ່ກັບທ່ານເປັນເວລາດົນນານ ແລະ ເປັນຮາກຖານໃຫ້ແກ່ປະຈັກພະຍານຂອງທ່ານ. ແຕ່ຄວາມຊົງຈຳເຖິງເຄື່ອງໝາຍ ແລະ ສິ່ງມະຫັດສະຈັນ ທີ່ຊາວນີໄຟໄດ້ເປັນພະຍານ ໄດ້ຈາງຫາຍໄປເມື່ອເວລາຜ່ານໄປ. ແມ່ນຫຍັງທີ່ເຮັດໃຫ້ພວກເຂົາລືມ, ແລະ ແມ່ນຫຍັງຄືຜົນສະທ້ອນຂອງການລືມ? (ເບິ່ງ 3 ນີໄຟ 1:22; 2:1–3).
ທ່ານກຳລັງເຮັດສິ່ງໃດ ເພື່ອຈື່ຈຳ ແລະ ຕໍ່ການເປັນພະຍານຂອງທ່ານ ເຖິງຄວາມຈິງທາງວິນຍານ? ຍົກຕົວຢ່າງ, ໃຫ້ຄິດກ່ຽວກັບການບັນທຶກປະສົບການທາງວິນຍານຂອງທ່ານ ສາມາດຊ່ວຍທ່ານແນວໃດ. ທ່ານຈະແບ່ງປັນການເປັນພະຍານຂອງທ່ານກັບຄົນທີ່ຢູ່ໃກ້ຊິດທ່ານຫລາຍທີ່ສຸດ ເພື່ອຊ່ວຍເຂົາເຈົ້າໃຫ້ເຊື່ອໄດ້ແນວໃດ?
ເບິ່ງ ແອວມາ 5:6; Henry B. Eyring, “O Remember, Remember,” Ensign ຫລື Liahona, Nov. 2007, 66–69; Neil L. Andersen, “Faith Is Not by Chance, but by Choice,” Ensign ຫລື Liahona, Nov. 2015, 65–68 ນຳອີກ.
3 ນີໄຟ 2:11–12; 3:1–26; 5:24–26
ພຣະຜູ້ເປັນເຈົ້າເພີ່ມຄວາມເຂັ້ມແຂງໃຫ້ແກ່ໄພ່ພົນຂອງພຣະອົງ ເພື່ອຕ້ານກັບສິ່ງອັນຕະລາຍທາງວິນຍານ.
ໃນວັນເວລາຂອງເຮົາ, ຕາມປົກກະຕິແລ້ວ ເຮົາຈະບໍ່ປະເຊີນກັບພວກໂຈນທີ່ບັງຄັບເຮົາໃຫ້ໜີຈາກບ້ານເຮືອນຂອງເຮົາ ແລະ ເຕົ້າໂຮມຢູ່ໃນບ່ອນດຽວ. ແຕ່ເຮົາປະເຊີນກັບສິ່ງອັນຕະລາຍທາງວິນຍານ, ແລະ ປະສົບການຂອງຊາວນີໄຟອາດບັນຈຸບົດຮຽນທີ່ສາມາດຊ່ວຍເຮົາໄດ້. ໃຫ້ຊອກຫາບົດຮຽນເຫລົ່ານີ້ ຂະນະທີ່ທ່ານອ່ານ 3 ນີໄຟ 2:11–12 ແລະ 3:1–26.
ໃນ 3 ນີໄຟ 5:24–26 ເຮົາອ່ານເຖິງການເຕົ້າໂຮມຂອງຜູ້ຄົນຂອງພຣະຜູ້ເປັນເຈົ້າ ຢູ່ໃນຍຸກສຸດທ້າຍ. ຂໍ້ເຫລົ່ານີ້ສິດສອນວິທີທີ່ພຣະຜູ້ເປັນເຈົ້າກຳລັງເຕົ້າໂຮມຜູ້ຄົນຂອງພຣະອົງໃນທຸກວັນນີ້ແນວໃດ?
ເບິ່ງ “Worldwide Devotional for Youth: Messages from President Russell M. Nelson and Sister Wendy W. Nelson,” June 3, 2018, ChurchofJesusChrist.org; “ອິດສະຣາເອນ—ການເຕົ້າໂຮມຊາວອິດສະຣາເອນ,” ຄູ່ມືພຣະຄຳພີ, scriptures.ChurchofJesusChrist.org ນຳອີກ.
ເຮົາເປັນສານຸສິດຂອງພຣະເຢຊູຄຣິດ.
ທ່ານຄິດວ່າ ການເປັນສານຸສິດຂອງພຣະເຢຊູຄຣິດ ໝາຍຄວາມວ່າແນວໃດ? (ເບິ່ງ ຄຳສອນ ແລະ ພັນທະສັນຍາ 41:5). ຢູ່ໃນ 3 ນີໄຟ 5:12–26, ມໍມອນໄດ້ຂັດຈັງຫວະການຫຍໍ້ບັນທຶກຂອງຊາວນີໄຟ ແລະ ໄດ້ປະກາດວ່າ ເພິ່ນເປັນສານຸສິດຂອງພຣະເຢຊູຄຣິດ. ແລ້ວ, ຢູ່ໃນ 3 ນີໄຟ 7:15–26, ເພິ່ນໄດ້ບັນຍາຍເຖິງການປະຕິບັດສາດສະໜາກິດຂອງສານຸສິດອີກຄົນໜຶ່ງ—ສາດສະດາ ນີໄຟ. ທ່ານພົບເຫັນສິ່ງໃດແດ່ຢູ່ໃນຂໍ້ຄວາມສອງບ່ອນເຫລົ່ານີ້ ທີ່ຊ່ວຍທ່ານໃຫ້ເຂົ້າໃຈວ່າ ການເປັນສານຸສິດຂອງພຣະຄຣິດ ໝາຍຄວາມວ່າແນວໃດ?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
3 ນີໄຟ 3:13–14, 25–26
ຊາວນີໄຟໄດ້ເຮັດຫຍັງເພື່ອປົກປ້ອງຕົວເອງຈາກສັດຕູທີ່ພວກເຂົາໄດ້ປະເຊີນ? ເຮົາກຳລັງເຮັດຫຍັງ ເພື່ອເຮັດໃຫ້ບ້ານເຮືອນຂອງເຮົາເປັນບ່ອນປອດໄພ ແລະ ໃຫ້ການປົກປ້ອງຈາກຄວາມຊົ່ວຮ້າຍຢູ່ໃນໂລກ?
3 ນີໄຟ 2:1–3; 6:15–17
ເພື່ອຊ່ວຍຄອບຄົວຂອງທ່ານໃຫ້ຮຽນຮູ້ວິທີທີ່ຊາຕານສາມາດຫລອກລວງເຮົາ, ໃຫ້ແຕ້ມຮູບຮ່າງກາຍ, ແລະ ຂະນະທີ່ຄອບຄົວຂອງທ່ານອ່ານ 3 ນີໄຟ 2:1–3 ແລະ 6:15–17, ໃຫ້ໝາຍພາກສ່ວນຕ່າງໆຂອງຮ່າງກາຍທີ່ຖືກກ່າວເຖິງ. ອີງຕາມຂໍ້ເຫລົ່ານີ້, ມີວິທີໃດແດ່ທີ່ຊາຕານພະຍາຍາມລໍ້ລວງເຮົາໃຫ້ລືມພຣະເຈົ້າ ແລະ ຫັນໄປຫາບາບ?
3 ນີໄຟ 4:7–12, 30–33
ຊາວນີໄຟໄດ້ເຮັດຫຍັງເມື່ອພວກເຂົາໄດ້ເຫັນພວກໂຈນແກດີອານທັນກຳລັງມາ? ຄອບຄົວຂອງເຮົາສາມາດຮຽນຮູ້ຫຍັງແດ່ຈາກຊາວນີໄຟ ເມື່ອເຮົາປະເຊີນກັບສະຖານະການທີ່ຫຍຸ້ງຍາກ? ເຮົາສາມາດຮຽນຮູ້ຫຍັງແດ່ຈາກຖ້ອຍຄຳຂອງຊາວນີໄຟ ຫລັງຈາກພຣະຜູ້ເປັນເຈົ້າໄດ້ຊ່ວຍພວກເຂົາ ໃນເວລາທີ່ພວກເຂົາມີຄວາມຫຍຸ້ງຍາກ?
3 ນີໄຟ 5:13; ຄຳສອນ ແລະ ພັນທະສັນຍາ 41:5
ໃຫ້ອ່ານ 3 ນີໄຟ 5:13 ແລະ ຄຳສອນ ແລະ ພັນທະສັນຍາ 41:5, ແລະ ສົນທະນາກ່ຽວກັບວ່າ ການເປັນສານຸສິດຂອງພຣະຄຣິດ ໝາຍຄວາມວ່າແນວໃດ. ບາງທີສະມາຊິກໃນຄອບຄົວສາມາດເວົ້າລົມກັນກ່ຽວກັບຕອນທີ່ເຂົາເຈົ້າໄດ້ສັງເກດເຫັນກັນແລະກັນ ເປັນສານຸສິດ. ຖ້າຫາກທ່ານມີລູກນ້ອຍ, ທ່ານສາມາດເຮັດປ້າຍຊື່ ທີ່ມີຄຳວ່າ, “ເຮົາເປັນສານຸສິດຂອງພຣະເຢຊູຄຣິດ,” ແລະ ປ່ອຍໃຫ້ເຂົາໃສ່ປ້າຍນ້ອຍນັ້ນ ເມື່ອທ່ານສັງເກດເຫັນເຂົາຕິດຕາມພຣະຜູ້ຊ່ວຍໃຫ້ລອດ.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສິດສອນຂອງເຮົາ
ຊ່ວຍຄອບຄົວຂອງທ່ານ ປຽບທຽບພຣະຄຳພີກັບຕົວເອງ. ນີໄຟໄດ້ກ່າວວ່າ “ຂ້າພະເຈົ້າປຽບທຽບພຣະຄຳພີທັງໝົດກັບຕົວຂອງພວກເຮົາ, ເພື່ອມັນຈະໄດ້ເປັນຜົນປະໂຫຍດ ແລະ ເປັນການຮຽນຮູ້ຂອງພວກເຮົາ” (1 ນີໄຟ 19:23). ເພື່ອຊ່ວຍຄອບຄົວຂອງທ່ານໃຫ້ປຽບທຽບພຣະຄຳພີກັບຕົວເອງ, ທ່ານສາມາດເຊື້ອເຊີນເຂົາເຈົ້າໃຫ້ໄຕ່ຕອງສິ່ງທີ່ເຂົາເຈົ້າອາດເຮັດ ຖ້າຫາກເຂົາເຈົ້າໄດ້ຢູ່ໃນບັນດາຜູ້ທີ່ເຊື່ອ ທີ່ບັນຍາຍຢູ່ໃນ 3 ນີໄຟ 1:4–9. (ເບິ່ງ Teaching in the Savior’s Way, 21.)
A Day, a Night, and a Day [ມື້ໜຶ່ງ, ຄືນໜຶ່ງ, ແລະ ອີກມື້ໜຶ່ງ], ໂດຍ ວາວເຕີ ເຣນ