“ວັນທີ 31 ເດືອນສິງຫາ–ວັນທີ 6 ເດືອນກັນຍາ. ຮີລາມັນ 13–16: ‘ຂ່າວອັນໜ້າຊື່ນຊົມແຫ່ງຄວາມປິຕິຍິນດີອັນຍິ່ງໃຫຍ່,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 31 ເດືອນສິງຫາ–ວັນທີ 6 ເດືອນກັນຍາ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
Samuel the Lamanite on the Wall [ຊາມູເອນຄົນເລມັນຢູ່ເທິງກຳແພງ], ໂດຍ ອາໂນລ໌ ຟຣີເບີກ
ວັນທີ 31 ເດືອນສິງຫາ–ວັນທີ 6 ເດືອນກັນຍາ
ຮີລາມັນ 13–16
“ຂ່າວອັນໜ້າຊື່ນຊົມແຫ່ງຄວາມປິຕິຍິນດີອັນຍິ່ງໃຫຍ່”
ຂະນະທີ່ທ່ານບັນທຶກຄວາມປະທັບໃຈຂອງທ່ານໃນອາທິດນີ້, ໃຫ້ຄິດກ່ຽວກັບວິທີທີ່ຫລັກທຳ ຢູ່ໃນ ຮີລາມັນ 13–16 ສ້າງສັນ ແລະ ເສີມກຳລັງໃຫ້ແກ່ສິ່ງອື່ນໆທີ່ທ່ານໄດ້ຮຽນຮູ້ຢູ່ໃນພຣະຄຳພີແນວໃດ.
ບັນທຶກຄວາມປະທັບໃຈຂອງທ່ານ
ເທື່ອທຳອິດທີ່ຊາມູເອນຄົນເລມັນໄດ້ພະຍາຍາມແບ່ງປັນ “ຂ່າວອັນໜ້າຊື່ນຊົມ” ຢູ່ໃນເມືອງເຊຣາເຮັມລາ (ຮີລາມັນ 13:7), ເພິ່ນໄດ້ຖືກປະຕິເສດ ແລະ ຖືກຂັບໄລ່ອອກໄປ ໂດຍຊາວນີໄຟທີ່ໃຈແຂງກະດ້າງ. ທ່ານສາມາດເວົ້າໄດ້ ຄືກັບວ່າພວກເຂົາໄດ້ສ້າງກຳແພງທີ່ບໍ່ຍອມຮັບອ້ອມຮອບໃຈຂອງພວກເຂົາ ທີ່ກີດກັນພວກເຂົາຈາກການຮັບເອົາຂ່າວສານຂອງຊາມູເອນ. ຊາມູເອນໄດ້ເຂົ້າໃຈເຖິງຄວາມສຳຄັນຂອງຂ່າວສານ ທີ່ເພິ່ນໄດ້ກ່າວ ແລະ ໄດ້ສະແດງສັດທາໂດຍການເຮັດຕາມພຣະບັນຍັດຂອງພຣະເຈົ້າ “ວ່າເພິ່ນຄວນກັບຄືນໄປອີກ, ແລະ ທຳນາຍ” (ຮີລາມັນ 13:3). ຄືກັນກັບດັ່ງທີ່ຊາມູເອນໄດ້ປະເຊີນ, ເຮົາທຸກຄົນກໍປະເຊີນກັບກຳແພງ ຂະນະທີ່ເຮົາ “ຕຽມທາງຂອງພຣະຜູ້ເປັນເຈົ້າ” (ຮີລາມັນ 14:9) ແລະ ພະຍາຍາມທີ່ຈະເຮັດຕາມສາດສະດາຂອງພຣະອົງ. ແລະ ຄືກັນກັບຊາມູເອນ, ເຮົາກໍເປັນພະຍານເຖິງພຣະເຢຊູຄຣິດຄືກັນ, “ຜູ້ຈະສະເດັດມາ … ຢ່າງແນ່ນອນ,” ແລະ ເຊື້ອເຊີນທຸກຄົນໃຫ້ “ເຊື່ອໃນພຣະນາມຂອງພຣະອົງ” (ຮີລາມັນ 13:6; 14:13). ບໍ່ແມ່ນທຸກຄົນທີ່ຈະຮັບຟັງ, ແລະ ບາງຄົນອາດຕໍ່ຕ້ານເຮົາຢ່າງຮຸນແຮງ. ແຕ່ຜູ້ທີ່ເຊື່ອໃນຂ່າວສານນີ້ດ້ວຍສັດທາໃນພຣະຄຣິດ ຈະພົບວ່າມັນເປັນ “ຂ່າວອັນໜ້າຊື່ນຊົມແຫ່ງຄວາມປິຕິຍິນດີອັນຍິ່ງໃຫຍ່” ແທ້ໆ (ຮີລາມັນ 16:14).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະຜູ້ເປັນເຈົ້າໃຫ້ຄຳເຕືອນຜ່ານທາງສາດສະດາຂອງພຣະອົງ.
ໃນພຣະຄຳພີ, ບາງເທື່ອສາດສະດາໄດ້ຖືກປຽບທຽບກັບນາຍຍາມຢູ່ເທິງກຳແພງ ຫລື ຫໍສູງ ຜູ້ເຕືອນບອກສິ່ງອັນຕະລາຍ (ເບິ່ງ ເອຊາຢາ 62:6; ເອເຊກຽນ 33:1–7).
ປະທານເອັມ ຣະໂຊ ບາເລີດ ໄດ້ສິດສອນວ່າ: “ຕະຫລອດຫລາຍສັດຕະວັດ, ສາດສະດາໄດ້ບັນລຸໜ້າທີ່ຂອງພວກເພິ່ນ ເມື່ອພວກເພິ່ນໄດ້ເຕືອນຜູ້ຄົນເຖິງສິ່ງອັນຕະລາຍທີ່ມີຢູ່ຕໍ່ໜ້າພວກເຂົາ. ອັກຄະສາວົກຂອງພຣະຜູ້ເປັນເຈົ້າ ໄດ້ຖືກມອບໝາຍໃຫ້ເຝົ້າດູແລ, ເຕືອນ, ແລະ ເອື້ອມອອກໄປຊ່ວຍເຫລືອຄົນທີ່ສະແຫວງຫາຄຳຕອບໃຫ້ກັບຄຳຖາມໃນຊີວິດ” (“God Is at the Helm,” Ensign ຫລື Liahona, Nov. 2015, 25).
ຂະນະທີ່ທ່ານສຶກສາ ແລະ ໄຕ່ຕອງ ຮີລາມັນ 13, ທ່ານສາມາດໝາຍຄຳເຕືອນຫລາຍຢ່າງທີ່ຊາມູເອນໄດ້ບອກ. ຍົກຕົວຢ່າງ, ເພິ່ນໄດ້ສິດສອນຫຍັງແດ່ກ່ຽວກັບການກັບໃຈ? ກ່ຽວກັບຄວາມຖ່ອມຕົວ ແລະ ຄວາມຮັ່ງມີ? ຄຳເຕືອນເຫລົ່ານີ້ກ່ຽວຂ້ອງກັບທ່ານແນວໃດ? ສາດສະດາໃນສະໄໝໃໝ່ໄດ້ເຕືອນຫຍັງແດ່ເມື່ອບໍ່ດົນມານີ້, ແລະ ທ່ານຮູ້ສຶກວ່າ ທ່ານຄວນເຮັດສິ່ງໃດກ່ຽວກັບຄຳເຕືອນເຫລົ່ານັ້ນ?
ສາດສະດາຊີ້ທາງໃຫ້ເຮົາໄປຫາພຣະເຢຊູຄຣິດ.
ພຣະຜູ້ເປັນເຈົ້າມີເມດຕາຕໍ່ຜູ້ທີ່ກັບໃຈ.
ທຳອິດ, ຊາມູເອນໄດ້ຖືກສົ່ງໄປຫາຊາວນີໄຟ ເພື່ອແບ່ງປັນຂ່າວສານທີ່ໜ້າປິຕິຍິນດີເຖິງການສະເດັດມາຂອງພຣະຜູ້ຊ່ວຍໃຫ້ລອດ (ເບິ່ງ ຮີລາມັນ 13:7). ເພາະພວກເຂົາໄດ້ປະຕິເສດເພິ່ນ, ເພິ່ນຈຶ່ງໄດ້ກັບຄືນໄປພ້ອມດ້ວຍຄຳເຕືອນທີ່ເຂັ້ມງວດເຖິງການພິພາກສາຂອງພຣະເຈົ້າ. ແຕ່ຄຳເຕືອນເຫລົ່ານັ້ນ ແມ່ນຮ່ວມດ້ວຍຄຳເຊື້ອເຊີນດ້ວຍຄວາມເມດຕາສະເໝີ ເພື່ອໃຫ້ກັບໃຈ; ໃຫ້ຊອກຫາຄຳເຊື້ອເຊີນເຫລົ່ານີ້ ຕະຫລອດທົ່ວ ຮີລາມັນ 13–15 (ເບິ່ງ ໂດຍສະເພາະ ຮີລາມັນ 13:6, 11; 14:15–19; 15:7–8). ຄຳເຊື້ອເຊີນເຫລົ່ານີ້ກ່ຽວຂ້ອງກັບທ່ານແນວໃດ? ທ່ານຮູ້ຫຍັງແດ່ ຈາກຂໍ້ພຣະຄຳພີເຫລົ່ານີ້ ກ່ຽວກັບການກັບໃຈ? ຕອນໃດທີ່ທ່ານໄດ້ປະສົບກັບຄວາມເມດຕາຂອງພຣະເຈົ້າ ທີ່ມາຈາກການກັບໃຈ?
ເຄື່ອງໝາຍ ແລະ ສິ່ງມະຫັດສະຈັນ ສາມາດເພີ່ມຄວາມເຂັ້ມແຂງໃຫ້ແກ່ສັດທາຂອງຜູ້ທີ່ບໍ່ເຮັດໃຈແຂງກະດ້າງ.
ຢູ່ໃນ ຮີລາມັນ 14, ຊາມູເອນໄດ້ອະທິບາຍເຫດຜົນທີ່ພຣະຜູ້ເປັນເຈົ້າໄດ້ຈັດໃຫ້ມີເຄື່ອງໝາຍເຖິງການກຳເນີດ ແລະ ການສິ້ນພຣະຊົນຂອງພຣະຜູ້ຊ່ວຍໃຫ້ລອດ: “ດ້ວຍເຈດຕະນານີ້ ພວກທ່ານຈະໄດ້ເຊື່ອໃນພຣະນາມຂອງພຣະອົງ” (ຮີລາມັນ 14:12). ຂະນະທີ່ທ່ານສຶກສາ ຮີລາມັນ 14, ໃຫ້ສັງເກດເບິ່ງເຄື່ອງໝາຍຂອງການກຳເນີດຂອງພຣະຜູ້ຊ່ວຍໃຫ້ລອດ ຢູ່ໃນ ຂໍ້ທີ 1–8 ແລະ ເຄື່ອງໝາຍຂອງການສິ້ນພຣະຊົນຂອງພຣະອົງ ຢູ່ໃນ ຂໍ້ທີ 20–28. ທ່ານຄິດວ່າ ເປັນຫຍັງເຄື່ອງໝາຍເຫລົ່ານີ້ຈຶ່ງເປັນວິທີທີ່ມີປະສິດທິພາບ ໃນການໃຫ້ຄວາມສຳຄັນແກ່ການກຳເນີດ ແລະ ການສິ້ນພຣະຊົນຂອງພຣະເຢຊູຄຣິດ?
ທ່ານສາມາດຄິດເຫັນເຄື່ອງໝາຍໃດບໍ ທີ່ພຣະຜູ້ເປັນເຈົ້າໄດ້ມອບໃຫ້ ເພື່ອຊ່ວຍທ່ານເຊື່ອໃນພຣະອົງ? ຍົກຕົວຢ່າງ, ສາດສະດາໄດ້ບອກລ່ວງໜ້າກ່ຽວກັບເຄື່ອງໝາຍທີ່ຈະປະກົດຂຶ້ນກ່ອນການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ (ເບິ່ງ “ເຄື່ອງໝາຍແຫ່ງການເວລາ,” ຄູ່ມືພຣະຄຳພີ, scriptures.ChurchofJesusChrist.org). ມີອັນໃດບໍໃນເຄື່ອງໝາຍເຫລົ່ານີ້ທີ່ໄດ້ເກີດເປັນຈິງແລ້ວ ໃນວັນເວລາຂອງເຮົາ? ເຄື່ອງໝາຍຢ່າງອື່ນໆທີ່ນຳພາໄປສູ່ສັດທາໃນພຣະເຢຊູຄຣິດ ອາດເປັນເລື່ອງສ່ວນຕົວ ແລະ ບໍ່ຕື່ນເຕັ້ນຫລາຍ. ໃຫ້ໃຊ້ເວລາບຶດໜຶ່ງເພື່ອໄຕ່ຕອງວິທີທີ່ທ່ານໄດ້ເປັນພະຍານເຖິງພຣະຫັດຂອງພຣະອົງ ຢູ່ໃນຊີວິດຂອງທ່ານ.
ມີຄຳເຕືອນແນວໃດທີ່ມອບໃຫ້ກ່ຽວກັບເຄື່ອງໝາຍ ຢູ່ໃນ ຮີລາມັນ 16:13–23? ທ່ານຈະຫລີກເວັ້ນຈາກທັດສະນະຄະຕິຂອງຜູ້ຄົນທີ່ບັນຍາຍຢູ່ໃນຂໍ້ເຫລົ່ານີ້ໄດ້ແນວໃດ?
ເບິ່ງ ແອວມາ 30:43–52; Ronald A. Rasband, “By Divine Design,” Ensign ຫລື Liahona, Nov. 2017, 55–57 ນຳອີກ.
ການເຮັດຕາມຄຳແນະນຳຂອງສາດສະດາ ນຳພາເຮົາໃຫ້ເຂົ້າໃກ້ຊິດພຣະຜູ້ເປັນເຈົ້າຫລາຍກວ່າເກົ່າ.
ແອວເດີ ນຽວ ແອວ ແອນເດີເຊັນ ໄດ້ສິດສອນວ່າ: “ຂ້າພະເຈົ້າເຫັນວ່າ ຂ້າພະເຈົ້າໄດ້ສຶກສາຖ້ອຍຄຳຂອງສາດສະດາຂອງພຣະເຈົ້າ ຢ່າງລະມັດລະວັງ, ດ້ວຍຄວາມອົດທົນ, ແລະ ເຮັດໃຫ້ຊີວິດຂອງຂ້າພະເຈົ້າສອດຄ່ອງກັບຄຳສອນທີ່ດົນໃຈຂອງເພິ່ນ, ແລ້ວສັດທາຂອງຂ້າພະເຈົ້າໃນອົງພຣະເຢຊູຄຣິດເຈົ້າ ຈະເພີ່ມທະວີຂຶ້ນເລື້ອຍໆ. ຖ້າຫາກເຮົາບໍ່ເຮັດຕາມຄຳແນະນຳຂອງເພິ່ນ ແລະ ຄິດວ່າເຮົາຮູ້ຫລາຍກວ່າ, ແລ້ວສັດທາຂອງເຮົາຈະໝົດໄປ ແລະ ຄວາມກ້າວໜ້ານິລັນດອນຂອງເຮົາ ຈະມືດມົວ” (“The Prophet of God,” Ensign ຫລື Liahona, May 2018, 26–27). ຖ້ອຍຄຳ ແລະ ການກະທຳຂອງຊາວນີໄຟ ຢູ່ໃນ ຮີລາມັນ 16 ຢືນຢັນສິ່ງທີ່ແອວເດີ ແອນເດີເຊັນ ໄດ້ສິດສອນແນວໃດ? ຄຳໝັ້ນສັນຍາສ່ວນຕົວຢ່າງໃດແດ່ທີ່ທ່ານຮູ້ສຶກວ່າຄວນເຮັດ ກ່ຽວກັບສາດສະດາຂອງພຣະຜູ້ເປັນເຈົ້າ ແລະ ຂ່າວສານຂອງພວກເພິ່ນ?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
ຮີລາມັນ 13:3–4
ແມ່ນຫຍັງທີ່ດົນໃຈຄອບຄົວຂອງທ່ານກ່ຽວກັບການຕອບຮັບຂອງຊາມູເອນ ຕໍ່ພຣະບັນຊາຂອງພຣະຜູ້ເປັນເຈົ້າ ຢູ່ໃນ ຮີລາມັນ 13:3–4? ລະຫວ່າງທີ່ຄອບຄົວຂອງທ່ານສຶກສາໃນອາທິດນີ້, ບາງທີທ່ານສາມາດຊຸກຍູ້ສະມາຊິກໃນຄອບຄົວໃຫ້ແບ່ງປັນຄວາມປະທັບໃຈ ທີ່ “ເຂົ້າມາໃນໃຈ [ຂອງເຂົາເຈົ້າ].”
ຮີລາມັນ 13:38
ແນວຄິດທີ່ວ່າ ສາມາດພົບເຫັນຄວາມສຸກໄດ້ ຢູ່ “ໃນການສ້າງຄວາມຊົ່ວຮ້າຍ” ເປັນເລື່ອງທຳມະດາຢູ່ໃນວັນເວລາຂອງເຮົາ. ໃນທາງໃດແດ່ທີ່ການດຳລົງຊີວິດຕາມພຣະກິດຕິຄຸນໄດ້ນຳຄວາມສຸກທີ່ແທ້ຈິງມາໃຫ້ເຮົາ?
ຮີລາມັນ 15:3
ການຕີສອນຂອງພຣະເຈົ້າສະແດງໃຫ້ເຫັນເຖິງຄວາມຮັກຂອງພຣະອົງຕໍ່ເຮົາແນວໃດ? ເຊື້ອເຊີນສະມາຊິກໃນຄອບຄົວໃຫ້ທູນຖາມພຣະຜູ້ເປັນເຈົ້າດ້ວຍຄວາມຖ່ອມຕົວ ວ່າເຂົາເຈົ້າສາມາດເຮັດສິ່ງໃດເພື່ອປັບປຸງ.
ຮີລາມັນ 15:5–8
ເຮົາຮຽນຮູ້ຫຍັງແດ່ກ່ຽວກັບການປ່ຽນໃຈເຫລື້ອມໃສຈາກຊາວເລມັນ ທີ່ບັນຍາຍຢູ່ໃນຂໍ້ເຫລົ່ານີ້? ທ່ານຈະເຮັດຕາມຕົວຢ່າງຂອງພວກເຂົາແນວໃດ?
ຮີລາມັນ 16:1–3
ຄອບຄົວຂອງທ່ານຈະມ່ວນຊື່ນກັບການສະແດງຕາມເລື່ອງຂອງ ຊາມູເອນຄົນເລມັນບໍ? ຫລັງຈາກໄດ້ອ່ານເລື່ອງລາວ, ບາງທີສະມາຊິກໃນຄອບຄົວຄວນປ່ຽນຜຽນກັນຢືນຢູ່ເທິງຕັ່ງ ແລະ ອ່ານຄຳທຳນາຍບາງຢ່າງຂອງຊາມູເອນ ຂະນະທີ່ສະມາຊິກຄົນອື່ນໆທຳທ່າຍິງລູກທະນູ ຫລື ແກວ່ງກ້ອນຫີນໃສ່. ສິ່ງນີ້ອາດຊ່ວຍຄອບຄົວຂອງທ່ານໃຫ້ເຂົ້າໃຈວິທີທີ່ຊາມູເອນ ແລະ ຊາວນີໄຟໄດ້ຮູ້ສຶກ. ເດັກນ້ອຍອາດມັກແຕ້ມຮູບກ່ຽວກັບເລື່ອງລາວ. ເຮົາຈະເປັນເໝືອນດັ່ງຊາມູເອນ ແລະ ແບ່ງປັນພຣະກິດຕິຄຸນໃຫ້ກັບຄົນອື່ນໄດ້ແນວໃດ ເຖິງແມ່ນຈະມີຄວາມຢ້ານກົວກໍຕາມ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສຶກສາສ່ວນຕົວ
ຊອກຫາແບບແຜນ. ແບບແຜນ ຄືແຜນການ ຫລື ແບບຢ່າງທີ່ສາມາດໃຊ້ເປັນສິ່ງນຳພາໃຫ້ບັນລຸວຽກງານໃດໜຶ່ງ. ໃນພຣະຄຳພີ, ເຮົາພົບເຫັນແບບແຜນທີ່ສະແດງໃຫ້ເຫັນວິທີທີ່ພຣະຜູ້ເປັນເຈົ້າ ບັນລຸວຽກງານຂອງພຣະອົງ, ດັ່ງເຊັ່ນການສົ່ງຜູ້ຮັບໃຊ້ຂອງພຣະອົງໄປເຕືອນຜູ້ຄົນ.
© The Book of Mormon for Young Readers [ພຣະຄຳພີມໍມອນສຳລັບຜູ້ອ່ານທີ່ອາຍຸນ້ອຍ], Samuel the Lamanite [ຊາມູເອນຄົນເລມັນ], ໂດຍ ບຣິອານາ ຊໍຄຣອບ; ຫ້າມລອກແບບ