“ວັນທີ 21–27 ເດືອນກັນຍາ. 3 ນີໄຟ 12-16: ‘ເຮົາຄືກົດ, ແລະ ຄວາມສະຫວ່າງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 21–27 ເດືອນກັນຍາ. 3 ນີໄຟ 12-16,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
Third Nephi: These Twelve Whom I Have Chosen [ນີໄຟສະບັບທີສາມ: ສິບສອງຄົນນີ້ ຊຶ່ງເຮົາໄດ້ເລືອກ], ໂດຍ ແກຣີ ແອວ ແຄບ
ວັນທີ 21–27 ເດືອນກັນຍາ
3 ນີໄຟ 12–16
“ເຮົາຄືກົດ, ແລະ ຄວາມສະຫວ່າງ”
ມັນມີຫລັກທຳຫລາຍຢ່າງທີ່ຈະຊອກຫາ ຢູ່ໃນ 3 ນີໄຟ 12–16. ບາງຫລັກທຳຖືກເນັ້ນຢູ່ໃນໂຄງຮ່າງນີ້, ແຕ່ທ່ານກໍສາມາດຊອກຫາຫລັກທຳຂໍ້ອື່ນໆໄດ້. ໃຫ້ພຣະບິດາເທິງສະຫວັນ, ຜ່ານທາງພຣະວິນຍານຂອງພຣະອົງ, ສິດສອນທ່ານ ເຖິງສິ່ງທີ່ທ່ານຕ້ອງການໃນເວລານີ້.
ບັນທຶກຄວາມປະທັບໃຈຂອງທ່ານ
ຄືກັນກັບສານຸສິດຂອງພຣະເຢຊູ ທີ່ໄດ້ເຕົ້າໂຮມກັນຢູ່ຄ້ອຍພູໃນແຂວງຄາລີເລ, ຜູ້ຄົນທີ່ເຕົ້າໂຮມກັນຢູ່ໃນພຣະວິຫານເມືອງອຸດົມສົມບູນ ໄດ້ດຳລົງຊີວິດຕາມກົດຂອງໂມເຊ. ພວກເຂົາໄດ້ເຮັດຕາມກົດນັ້ນ ເພາະມັນຊີ້ນຳຈິດວິນຍານຂອງພວກເຂົາໃຫ້ໄປຫາພຣະຄຣິດ (ເບິ່ງ ຢາໂຄບ 4:5), ແລະ ບັດນີ້ພຣະຄຣິດໄດ້ມາຢືນຢູ່ຕໍ່ໜ້າພວກເຂົາ, ປະກາດເຖິງກົດທີ່ສູງກວ່າ. ແຕ່ ແມ່ນແຕ່ຜູ້ຄົນເຫລົ່ານັ້ນໃນພວກເຮົາຜູ້ທີ່ບໍ່ເຄີຍດຳລົງຊີວິດຕາມກົດຂອງໂມເຊ ກໍສາມາດຮັບຮູ້ວ່າ ມາດຕະຖານທີ່ພຣະເຢຊູໄດ້ຕັ້ງໄວ້ສຳລັບສານຸສິດຂອງພຣະອົງ ແມ່ນກົດທີ່ສູງກວ່ານັ້ນ. “ເຮົາຈຶ່ງຢາກໃຫ້ເຈົ້າດີພ້ອມ,” ພຣະອົງໄດ້ປະກາດ (3 ນີໄຟ 12:48). ຖ້າເລື່ອງນີ້ເຮັດໃຫ້ທ່ານຮູ້ສຶກບໍ່ພຽບພ້ອມ, ໃຫ້ຈື່ຈຳວ່າພຣະເຢຊູໄດ້ກ່າວອີກວ່າ, “ຄົນຍາກຈົນທາງວິນຍານທີ່ມາຫາເຮົາຍ່ອມເປັນສຸກ, ເພາະວ່າອານາຈັກສະຫວັນຈະເປັນຂອງຜູ້ນັ້ນ” (3 ນີໄຟ 12:3). ກົດທີ່ສູງກວ່າແມ່ນຄຳເຊື້ອເຊີນ—ວິທີໜຶ່ງອີກຂອງການກ່າວວ່າ “ຈົ່ງມາຫາເຮົາ ແລະ ເຈົ້າຈະລອດ” (3 ນີໄຟ 12:20). ຄືກັນກັບກົດຂອງໂມເຊ, ກົດນີ້ຊີ້ນຳເຮົາໄປຫາພຣະຄຣິດ—ພຣະອົງດຽວເທົ່ານັ້ນທີ່ສາມາດຊ່ວຍເຮົາໃຫ້ລອດ ແລະ ໃຫ້ດີພ້ອມທຸກຢ່າງ. “ຈົ່ງເບິ່ງ,” ພຣະອົງໄດ້ກ່າວ, “ເຮົາຄືກົດ, ແລະ ຄວາມສະຫວ່າງ. ຈົ່ງເບິ່ງທີ່ເຮົາ, ແລະ ອົດທົນຈົນເຖິງທີ່ສຸດ, ແລະ ເຈົ້າຈະມີຊີວິດ” (3 ນີໄຟ 15:9).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ຄຳສອນຂອງພຣະຜູ້ຊ່ວຍໃຫ້ລອດສະແດງໃຫ້ເຮົາເຫັນເຖິງການເປັນສານຸສິດທີ່ແທ້ຈິງ.
ມັນມີຄວາມຈິງຫລາຍຢ່າງ, ຖ້ອຍຄຳແນະນຳ, ແລະ ຄຳເຕືອນ ຢູ່ໃນ 3 ນີໄຟ 12–14. ຕໍ່ໄປນີ້ແມ່ນວິທີໜຶ່ງທີ່ຈະສຶກສາ ແລະ ນຳໃຊ້ສິ່ງທີ່ພຣະຜູ້ຊ່ວຍໃຫ້ລອດໄດ້ສິດສອນ ຢູ່ໃນບົດເຫລົ່ານີ້: ໃຫ້ເລືອກເອົາຂໍ້ຕ່າງໆກຸ່ມໜຶ່ງ, ແລະ ໃຫ້ເບິ່ງວ່າທ່ານຈະສາມາດສະຫລຸບສິ່ງທີ່ຂໍ້ເຫລົ່ານັ້ນສິດສອນ ໃນປະໂຫຍກໜຶ່ງໄດ້ຫລືບໍ່ ທີ່ເລີ່ມຕົ້ນດ້ວຍຄຳວ່າ “ສານຸສິດທີ່ແທ້ຈິງຂອງພຣະເຢຊູຄຣິດ …” ຍົກຕົວຢ່າງ, ຄຳສະຫລຸບໜຶ່ງຂອງ 3 ນີໄຟ 14:1–5 ອາດເປັນວ່າ “ສານຸສິດທີ່ແທ້ຈິງຂອງພຣະເຢຊູຄຣິດຈະບໍ່ຕັດສິນ.” ທ່ານອາດຢາກເລືອກຂໍ້ໜຶ່ງຈາກບົດເຫລົ່ານີ້ ທີ່ມີຄວາມໝາຍຕໍ່ທ່ານໂດຍສະເພາະ ແລະ ທ່ອງຈຳມັນ ຫລື ກ່າຍເອົາມັນ ແລ້ວວາງມັນໄວ້ຢູ່ໃນບ່ອນທີ່ທ່ານຈະຫລຽວເຫັນມັນເລື້ອຍໆ. ໃຫ້ໄຕ່ຕອງວິທີທີ່ທ່ານສາມາດນຳໃຊ້ສິ່ງທີ່ທ່ານຮຽນຮູ້ ໃນຄວາມພະຍາຍາມສ່ວນຕົວຂອງທ່ານ ເພື່ອໃຫ້ເປັນສານຸສິດຂອງພຣະເຢຊູຄຣິດ ທີ່ດີກວ່າເກົ່າ.
ເບິ່ງ ມັດທາຍ 5–7; ລູກາ 6:20–49 ນຳອີກ.
3 ນີໄຟ 12:1–2; 15:23–24; 16:1–6
ຜູ້ທີ່ເຊື່ອປາດສະຈາກການໄດ້ເຫັນຍ່ອມເປັນສຸກ.
ເມື່ອປຽບທຽບໃສ່ກັບຈຳນວນທັງໝົດຂອງລູກໆຂອງພຣະເຈົ້າແລ້ວ, ໜ້ອຍຄົນເຄີຍໄດ້ເຫັນພຣະຜູ້ຊ່ວຍໃຫ້ລອດ ແລະ ໄດ້ຍິນສຸລະສຽງຂອງພຣະອົງ, ຄືກັນກັບຜູ້ຄົນຢູ່ເມືອງອຸດົມສົມບູນໄດ້ເຫັນ. ພວກເຮົາສ່ວນຫລາຍຄົງເປັນເໝືອນດັ່ງຜູ້ຄົນທີ່ບັນຍາຍ ຢູ່ໃນ 3 ນີໄຟ 12:2; 15:23; ແລະ 16:4–6. ມີຄຳສັນຍາໃດແດ່ທີ່ໄດ້ເຮັດໄວ້ກັບຜູ້ຄົນເຊັ່ນນັ້ນ ຢູ່ໃນຂໍ້ເຫລົ່ານີ້? ຄຳສັນຍາເຫລົ່ານີ້ໄດ້ເກີດເປັນຈິງໃນຊີວິດຂອງທ່ານແນວໃດ?
ເບິ່ງ ໂຢຮັນ 20:26–29; 2 ນີໄຟ 26:12–13; ແອວມາ 32:16–18 ນຳອີກ.
3 ນີໄຟ 12:21–30; 13:1–8, 16–18; 14:21–23
ການກະທຳທີ່ຊອບທຳແມ່ນບໍ່ພຽງພໍ; ໃຈຂອງເຮົາກໍຕ້ອງບໍລິສຸດນຳອີກ.
ຫົວຂໍ້ໜຶ່ງທີ່ທ່ານອາດສັງເກດເຫັນຢູ່ໃນບົດເຫລົ່ານີ້ ແມ່ນຄຳເຊື້ອເຊີນຂອງພຣະຜູ້ຊ່ວຍໃຫ້ລອດ ໃຫ້ດຳລົງຊີວິດຕາມກົດທີ່ສູງກວ່າ—ໃຫ້ຊອບທຳ ບໍ່ພຽງແຕ່ໃນການກະທຳພາຍນອກເທົ່ານັ້ນ ແຕ່ຢູ່ໃນໃຈຂອງເຮົານຳອີກ. ໃຫ້ຊອກຫາຫົວຂໍ້ນີ້ ຕອນທີ່ພຣະຜູ້ຊ່ວຍໃຫ້ລອດກ່າວກ່ຽວກັບການຂັດແຍ້ງ (3 ນີໄຟ 12:21–26), ການຜິດສິນທຳ (3 ນີໄຟ 12:27–30), ການອະທິຖານ (3 ນີໄຟ 13:5–8), ແລະ ການຖືສິນອົດເຂົ້າ (3 ນີໄຟ 13:16–18). ມີຕົວຢ່າງໃດແດ່ອື່ນອີກທີ່ທ່ານພົບເຫັນ? ທ່ານຈະເຮັດສິ່ງໃດເພື່ອເຮັດໃຫ້ຄວາມປາດຖະໜາແຫ່ງໃຈຂອງທ່ານບໍລິສຸດ ແທນທີ່ຈະເອົາໃຈໃສ່ຕໍ່ການກະທຳພາຍນອກເທົ່ານັ້ນ?
ຖ້າຫາກເຮົາສະແຫວງຫາ “ສິ່ງທີ່ດີ” ຈາກພຣະບິດາເທິງສະຫວັນ, ເຮົາຈະໄດ້ຮັບ.
ປະທານຣະໂຊ ເອັມ ແນວສັນ ໄດ້ກ່າວວ່າ: “ພຣະເຈົ້າ ຢາກ ກ່າວກັບທ່ານແທ້ໆບໍ? ແມ່ນແລ້ວ! … ໂອ້, ມັນມີຫລາຍສິ່ງຫລາຍຢ່າງທີ່ພຣະບິດາຜູ້ສະຖິດຢູ່ໃນສະຫວັນຢາກໃຫ້ທ່ານຮູ້ຈັກ” (“Revelation for the Church, Revelation for Our Lives,” Ensign ຫລື Liahona, May 2018, 95). ຂະນະທີ່ທ່ານອ່ານຄຳເຊື້ອເຊີນຂອງພຣະຜູ້ເປັນເຈົ້າ ຢູ່ໃນ 3 ນີໄຟ 14:7–11 ມີການຂໍ, ການຊອກ, ແລະ ການເຄາະ, ການໄຕ່ຕອງ “ສິ່ງທີ່ດີ” ອັນໃດແດ່ທີ່ພຣະອົງຢາກໃຫ້ທ່ານທູນຂໍ. ຂໍ້ພຣະຄຳພີເພີ່ມເຕີມດັ່ງຕໍ່ໄປນີ້ ສາມາດຊ່ວຍທ່ານໃຫ້ເຂົ້າໃຈເຖິງວິທີທີ່ຈະທູນຂໍ, ຊອກ, ແລະ ເຄາະ. ຂໍ້ພຣະຄຳພີເຫລົ່ານີ້ອາດຊ່ວຍອະທິບາຍເຫດຜົນທີ່ຄຳອະທິຖານບາງຢ່າງ ບໍ່ໄດ້ຮັບຄຳຕອບໃນທາງທີ່ທ່ານຄາດໝາຍ: ເອຊາຢາ 55:8–9; ຮີລາມັນ 10:5; ໂມໂຣໄນ 7:26–27, 33, 37; ແລະ ຄຳສອນ ແລະ ພັນທະສັນຍາ 9:7–9.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
3 ນີໄຟ 12:48
ຂ່າວສານຂອງແອວເດີ ແຈັບຟະຣີ ອາ ຮໍແລນ “Be Ye Therefore Perfect—Eventually” (Ensign ຫລື Liahona, Nov. 2017, 40–42) ຊ່ວຍເຮົາໃຫ້ເຂົ້າໃຈພຣະຄຳຂອງພຣະຜູ້ຊ່ວຍໃຫ້ລອດຢູ່ໃນຂໍ້ນີ້ແນວໃດ? ທ່ານສາມາດຫາຄວາມຊ່ວຍເຫລືອ ຢູ່ໃນ ໂມໂຣໄນ 10:32–33 ນຳອີກ.
3 ນີໄຟ 12:9, 38–42; 14:3–5, 12
ຂໍ້ເຫລົ່ານີ້ກ່ຽວຂ້ອງກັບຄວາມປະຕິສຳພັນລະຫວ່າງສະມາຊິກໃນຄອບຄົວແນວໃດ? ບາງທີຄອບຄົວຂອງທ່ານສາມາດຕັ້ງເປົ້າໝາຍທີ່ຈະດຳລົງຊີວິດຕາມຫລັກທຳເຫລົ່ານີ້ດ້ວຍຄວາມຊື່ສັດຫລາຍກວ່າເກົ່າ.
3 ນີໄຟ 13:19–21
ຂໍ້ເຫລົ່ານີ້ສາມາດກະຕຸ້ນການສົນທະນາກ່ຽວກັບສິ່ງທີ່ຄອບຄົວຂອງທ່ານຖືວ່າມີຄ່າ. ມັນແມ່ນຊັບສົມບັດຂອງໂລກບໍ ທີ່ກີດກັນພວກທ່ານຈາກການສະສົມຊັບສົມບັດໄວ້ໃນສະຫວັນ? ທ່ານສາມາດສະໜັບສະໜູນຈຸດນີ້ ໂດຍການນຳພາຄອບຄົວຊອກຫາຊັບສົມບັດບາງຢ່າງຢູ່ໃນເຮືອນຂອງທ່ານ ເພື່ອເຕືອນສະມາຊິກໃນຄອບຄົວຂອງທ່ານເຖິງຊັບສົມບັດທີ່ມີຄ່ານິລັນດອນ.
3 ນີໄຟ 14:7–11
ເດັກນ້ອຍອາດມັກຫລິ້ນເກມ, ທີ່ດົນໃຈໂດຍ 3 ນີໄຟ 14:8–9, ຊຶ່ງໃນເກມນັ້ນພວກເຂົາຂໍບາງສິ່ງ ແລະ ໄດ້ຮັບບາງສິ່ງແຕກຕ່າງຈາກທີ່ຂໍ. ພຣະຜູ້ຊ່ວຍໃຫ້ລອດປະສົງໃຫ້ເຮົາຮູ້ຈັກຫຍັງ ກ່ຽວກັບພຣະບິດາຜູ້ສະຖິດຢູ່ໃນສະຫວັນ ເມື່ອພຣະອົງແບ່ງປັນຕົວຢ່າງນີ້?
3 ນີໄຟ 14:15–20
“ໝາກຜົນດີ” ອັນໃດ ທີ່ຊ່ວຍເຮົາໃຫ້ຮູ້ຈັກວ່າໂຈເຊັບ ສະມິດ, ຫລື ປະທານຂອງສາດສະໜາຈັກໃນປະຈຸບັນ, ເປັນສາດສະດາທີ່ແທ້ຈິງ?
3 ນີໄຟ 14:24–27
ໃຫ້ຄິດຫາວິທີທາງທີ່ຈະຊ່ວຍຄອບຄົວຂອງທ່ານໃຫ້ວາດພາບຄຳອຸປະມາ ຢູ່ໃນຂໍ້ເຫລົ່ານີ້. ບາງທີສະມາຊິກໃນຄອບຄົວສາມາດແຕ້ມຮູບ, ສະແດງທ່າ, ຫລື ສ້າງບາງສິ່ງໃສ່ເທິງຮາກຖານທີ່ແໜ້ນໜາ ແລະ ໃນບ່ອນທີ່ເປັນດິນຊາຍ.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສິດສອນຂອງເຮົາ
ໃຊ້ບົດຮຽນທີ່ໃຊ້ສິ່ງຂອງ. ພຣະຜູ້ຊ່ວຍໃຫ້ລອດໄດ້ສິດສອນຄວາມຈິງທີ່ເລິກຊຶ້ງ ໂດຍການອ້າງເຖິງສິ່ງຂອງທີ່ຄຸ້ນເຄີຍ. ທ່ານສາມາດເຮັດບາງສິ່ງທີ່ຄ້າຍຄືກັນ ຂະນະທີ່ຄອບຄົວຂອງທ່ານອ່ານ 3 ນີໄຟ 12–16. ຍົກຕົວຢ່າງ, ເມື່ອທ່ານອ່ານ ບົດທີ 12, ທ່ານສາມາດສະແດງເກືອ, ທຽນ, ແລະ ເສື້ອຊັ້ນນອກ. ສິ່ງນີ້ອາດນຳໄປສູ່ກິດຈະກຳທົບທວນທີ່ດີເລີດ. ຫລັງຈາກທ່ານໄດ້ອ່ານບົດເຫລົ່ານີ້ແລ້ວ, ໃຫ້ສະແດງສິ່ງຂອງຄືນອີກ, ແລະ ຖາມສະມາຊິກໃນຄອບຄົວກ່ຽວກັບສິ່ງທີ່ພຣະຜູ້ຊ່ວຍໃຫ້ລອດໄດ້ສິດສອນກ່ຽວກັບແຕ່ລະຢ່າງ.
The Savior’s Visit to the People in America [ການຢ້ຽມຢາມຂອງພຣະຜູ້ຊ່ວຍໃຫ້ລອດຕໍ່ຜູ້ຄົນຢູ່ອາເມຣິກາ], ໂດຍ ກະເລັນ ແອັສ ຮອບຄິນສັນ