“ວັນທີ 14–20 ເດືອນກັນຍາ. 3 ນີໄຟ 8–11: ‘ຈົ່ງລຸກຂຶ້ນ ແລະ ອອກມາຫາເຮົາເຖີດ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 14–20 ເດືອນກັນຍາ. 3 ນີໄຟ 8–11,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
I Am the Light of the World [ເຮົາເປັນຄວາມສະຫວ່າງຂອງໂລກ], ໂດຍ ເຈມສ໌ ຟູເມີ
ວັນທີ 14–20 ເດືອນກັນຍາ
3 ນີໄຟ 8–11
“ຈົ່ງລຸກຂຶ້ນ ແລະ ອອກມາຫາເຮົາເຖີດ”
ໃນ 3 ນີໄຟ 8–11, ຜູ້ຄົນໄດ້ຍິນສຸລະສຽງຂອງພຣະເຈົ້າກ່າວກັບພວກເຂົາ. ຂະນະທີ່ທ່ານອ່ານບົດເຫລົ່ານີ້, ໃຫ້ເອົາໃຈໃສ່ຕໍ່ສິ່ງທີ່ສຸລະສຽງຂອງພຣະອົງກ່າວກັບທ່ານ.
ບັນທຶກຄວາມປະທັບໃຈຂອງທ່ານ
“ຈົ່ງເບິ່ງ, ເຮົາຄືພຣະເຢຊູຄຣິດ, ຜູ້ທີ່ສາດສະດາໄດ້ໃຫ້ຖ້ອຍຄຳວ່າຈະມາຍັງໂລກນີ້” (3 ນີໄຟ 11:10). ດ້ວຍຖ້ອຍຄຳເຫລົ່ານີ້, ພຣະຜູ້ຊ່ວຍໃຫ້ລອດທີ່ຟື້ນຄືນພຣະຊົນໄດ້ແນະນຳພຣະອົງເອງ, ເຮັດໃຫ້ຄຳທຳນາຍຫລາຍກວ່າ 600 ປີ ຂອງພຣະຄຳພີມໍມອນເກີດເປັນຈິງ. “ການປະກົດນັ້ນ ແລະ ການປະກາດນັ້ນ,” ແອວເດີ ແຈັບຟະຣີ ອາ ຮໍແລນ ໄດ້ຂຽນ, “ໄດ້ກໍ່ຕັ້ງຈຸດສູນກາງ, ຊ່ວງເວລາທີ່ສຸດຍອດ, ໃນປະຫວັດສາດທັງໝົດຂອງພຣະຄຳພີມໍມອນ. ມັນເປັນການສະແດງໃຫ້ປະຈັກ ແລະ ເປັນຄຳສັ່ງທີ່ບອກໃຫ້ຮູ້ ແລະ ດົນໃຈສາດສະດາຊາວນີໄຟທຸກຄົນ. … ທຸກຄົນໄດ້ເວົ້າເຖິງພຣະອົງ, ໄດ້ຮ້ອງເພງກ່ຽວກັບພຣະອົງ, ໄດ້ຝັນເຖິງພຣະອົງ, ແລະ ໄດ້ອະທິຖານຂໍໃຫ້ພຣະອົງມາປະກົດ—ແຕ່ໃນທີ່ສຸດພຣະອົງກໍໄດ້ສະເດັດມາ. ວັນແຫ່ງການລໍຄອຍ! ພຣະເຈົ້າທີ່ປ່ຽນຄ່ຳຄືນທີ່ມືດມົວເປັນເຊົ້າແຫ່ງຄວາມສະຫວ່າງໄດ້ສະເດັດມາແລ້ວ” (Christ and the New Covenant [1997], 250–51).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະເຢຊູຄຣິດເປັນຄວາມສະຫວ່າງຂອງໂລກ.
ທ່ານອາດສັງເກດເຫັນວ່າ ຫົວຂໍ້ນັ້ນກ່ຽວຂ້ອງກັບຄວາມມືດ ແລະ ຄວາມສະຫວ່າງ—ທັງຮ່າງກາຍ ແລະ ວິນຍານ—ຖືກເນັ້ນຕະຫລອດທົ່ວ 3 ນີໄຟ 8–11. ທ່ານຮຽນຮູ້ຫຍັງແດ່ຈາກບົດເຫລົ່ານີ້ກ່ຽວກັບຄວາມມືດ ແລະ ຄວາມສະຫວ່າງທາງວິນຍານ? ແມ່ນຫຍັງທີ່ນຳຄວາມມືດມາສູ່ຊີວິດຂອງທ່ານ? ແມ່ນຫຍັງທີ່ນຳຄວາມສະຫວ່າງມາໃຫ້? ທ່ານຄິດວ່າເປັນຫຍັງພຣະຜູ້ຊ່ວຍໃຫ້ລອດຈຶ່ງເລືອກທີ່ຈະແນະນຳພຣະອົງເອງວ່າ “ເປັນຄວາມສະຫວ່າງ ແລະ ເປັນຊີວິດຂອງໂລກ”? (3 ນີໄຟ 9:18; 11:11). ພຣະເຢຊູຄຣິດໄດ້ເປັນຄວາມສະຫວ່າງໃນຊີວິດຂອງທ່ານແນວໃດ?
ຖ້າຫາກເຮົາກັບໃຈ, ພຣະຜູ້ຊ່ວຍໃຫ້ລອດຈະເຕົ້າໂຮມ, ປົກປ້ອງ, ແລະ ປິ່ນປົວເຮົາ.
ທ່ານຄິດວ່າຜູ້ຄົນຈະຮູ້ສຶກແນວໃດຫລັງຈາກໄດ້ປະສົບກັບຄວາມພິນາດ ແລະ ຄວາມມືດທີ່ບັນຍາຍ ຢູ່ໃນ 3 ນີໄຟ 8? ທ່ານຄິດວ່າພວກເຂົາອາດຮູ້ສຶກແນວໃດ ເມື່ອພວກເຂົາໄດ້ຍິນສຸລະສຽງຂອງພຣະຜູ້ຊ່ວຍໃຫ້ລອດ ກ່າວກ່ຽວກັບຄວາມສະຫວ່າງ, ຄວາມເມດຕາ, ແລະ ການໄຖ່ ຢູ່ໃນ ບົດທີ 9 ແລະ 10?
ເຖິງແມ່ນວ່າພຣະຜູ້ຊ່ວຍໃຫ້ລອດໄດ້ປະກາດວ່າ ຄວາມພິນາດທີ່ເປັນຕາຢ້ານ ເປັນຜົນຂອງຄວາມບາບຂອງຜູ້ຄົນ, ພຣະອົງກໍໄດ້ສັນຍາວ່າ ພຣະອົງຈະປິ່ນປົວຜູ້ທີ່ກັບມາຫາພຣະອົງ ແລະ ກັບໃຈ (ເບິ່ງ 3 ນີໄຟ 9:2, 13). ແອວເດີ ນຽວ ແອວ ແອນເດີເຊັນ ໄດ້ກ່າວວ່າ: “ຂ້າພະເຈົ້າປະທັບໃຈຫລາຍກັບອ້ອມແຂນແຫ່ງຄວາມເມດຕາຂອງພຣະຜູ້ຊ່ວຍໃຫ້ລອດ ແລະ ຄວາມຮັກສຳລັບການກັບໃຈນັ້ນ ບໍ່ວ່າບາບນັ້ນຈະເປັນແບບໃດກໍຕາມ. ຂ້າພະເຈົ້າເປັນພະຍານວ່າ ພຣະຜູ້ຊ່ວຍໃຫ້ລອດສາມາດ ແລະ ພ້ອມແລ້ວທີ່ຈະອະໄພບາບໃຫ້ເຮົາ” (“Repent … That I May Heal You,” Ensign ຫລື Liahona, Nov. 2009, 40).
ໃຫ້ຄົ້ນຄວ້າ 3 ນີໄຟ 9–10 ເພື່ອຊອກຫາຫລັກຖານເຖິງຄວາມເມດຕາຂອງພຣະຄຣິດ ແລະ ຄວາມວ່ອງໄວຂອງພຣະອົງທີ່ຈະໃຫ້ອະໄພ. ຍົກຕົວຢ່າງ, ທ່ານພົບເຫັນຫຍັງແດ່ ຢູ່ໃນ 3 ນີໄຟ 9:13–22 ແລະ 10:1–6 ທີ່ຊ່ວຍທ່ານໃຫ້ຮູ້ສຶກເຖິງຄວາມຮັກ ແລະ ຄວາມເມດຕາຂອງພຣະຜູ້ຊ່ວຍໃຫ້ລອດ? ໃຫ້ໄຕ່ຕອງປະສົບການ ຕອນທີ່ທ່ານຮູ້ສຶກວ່າພຣະອົງ “ເຕົ້າໂຮມ” ແລະ “ບຳລຸງລ້ຽງ” ທ່ານ (ເບິ່ງ 3 ນີໄຟ 10:4). ໃຫ້ຄິດທີ່ຈະບັນທຶກປະສົບການເຫລົ່ານີ້ໄວ້ໃນປຶ້ມບັນທຶກສ່ວນຕົວ ຫລື ແບ່ງປັນມັນໃຫ້ກັບຄົນທີ່ທ່ານຮັກ.
ເຮົາສາມາດຮຽນທີ່ຈະຮັບຟັງ ແລະ ເຂົ້າໃຈສຸລະສຽງຂອງພຣະເຈົ້າ.
ທ່ານເຄີຍຮູ້ສຶກວ່າທ່ານມີບັນຫາເລື່ອງຄວາມເຂົ້າໃຈຂ່າວສານທີ່ພຣະເຈົ້າໄດ້ສື່ສານກັບທ່ານບໍ? ບາງທີປະສົບການຂອງຜູ້ຄົນ ຢູ່ໃນ 3 ນີໄຟ 11:1–8 ສາມາດຊ່ວຍທ່ານໃຫ້ເຂົ້າໃຈຫລັກທຳບາງຢ່າງເລື່ອງການຮັບຟັງ ແລະ ເຂົ້າໃຈສຸລະສຽງຂອງພຣະເຈົ້າ. ທ່ານຄວນສັງເກດເບິ່ງຈຸດພິເສດຂອງສຸລະສຽງຂອງພຣະເຈົ້າ ທີ່ຜູ້ຄົນໄດ້ຍິນ ແລະ ສິ່ງທີ່ພວກເຂົາໄດ້ເຮັດ ເພື່ອຈະໄດ້ເຂົ້າໃຈສຸລະສຽງໄດ້ດີກວ່າເກົ່າ. ເລື່ອງນີ້ກ່ຽວຂ້ອງກັບຄວາມພະຍາຍາມຂອງທ່ານ ທີ່ຈະຮັບຟັງ ແລະ ຮັບຮູ້ສຸລະສຽງຂອງພຣະເຈົ້າ ໃນຊີວິດຂອງທ່ານ ຜ່ານທາງການເປີດເຜີຍສ່ວນຕົວແນວໃດ?
ພຣະເຢຊູຄຣິດເຊື້ອເຊີນເຮົາໃຫ້ມີປະຈັກພະຍານສ່ວນຕົວເຖິງພຣະອົງ.
ມີຜູ້ຄົນປະມານ 2,500 ຄົນ ໄດ້ເຕົ້າໂຮມກັນຢູ່ໃນເມືອງອຸດົມສົມບູນ ຕອນພຣະເຢຊູຄຣິດໄດ້ປະກົດ (ເບິ່ງ 3 ນີໄຟ 17:25). ເຖິງແມ່ນມີຜູ້ຄົນຢ່າງຫລວງຫລາຍ, ແຕ່ພຣະຜູ້ຊ່ວຍໃຫ້ລອດໄດ້ເຊື້ອເຊີນໃຫ້ແຕ່ລະຄົນມາສຳພັດຮອຍຕະປູຢູ່ທີ່ພຣະຫັດ ແລະ ພຣະບາດຂອງພຣະອົງ “ເທື່ອລະຄົນ” (3 ນີໄຟ 11:14–15). ສິ່ງນີ້ບອກທ່ານແນວໃດກ່ຽວກັບຄວາມສຳຄັນຂອງປະສົບການສ່ວນຕົວ ທີ່ສ້າງສັດທາໃນພຣະເຢຊູຄຣິດ? ໃນທາງໃດແດ່ທີ່ພຣະຜູ້ຊ່ວຍໃຫ້ລອດເຊື້ອເຊີນທ່ານໃຫ້ “ລຸກຂຶ້ນ ແລະ ອອກມາຫາ” ພຣະອົງ? (3 ນີໄຟ 11:14). ປະສົບການໃດແດ່ທີ່ໄດ້ຊ່ວຍທ່ານໃຫ້ມີປະຈັກພະຍານວ່າ ພຣະອົງເປັນພຣະຜູ້ຊ່ວຍໃຫ້ລອດຂອງທ່ານ? ທ່ານກໍຄວນພິຈາລະນານຳອີກເຖິງວິທີທີ່ຕົວຢ່າງຂອງພຣະຜູ້ຊ່ວຍໃຫ້ລອດ ຢູ່ໃນຂໍ້ເຫລົ່ານີ້ສາມາດດົນໃຈຄວາມພະຍາຍາມຂອງທ່ານ ໃຫ້ປະຕິບັດສາດສະໜາກິດຕໍ່ຄົນອື່ນແນວໃດ.
One by One [ເທື່ອລະຄົນ], ໂດຍ ວາວເຕີ ເຣນ
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
3 ນີໄຟ 8–9
ເພື່ອຊ່ວຍຄອບຄົວຂອງທ່ານໃຫ້ຮູ້ສຶກເຖິງປະສົບການທີ່ບັນຍາຍ ຢູ່ໃນ 3 ນີໄຟ 8–9, ທ່ານສາມາດເລົ່າລຶ້ມຄືນ ຫລື ຟັງການບັນທຶກບາງພາກສ່ວນຂອງບົດເຫລົ່ານີ້ ຢູ່ໃນຫ້ອງມືດ. ສົນທະນາກ່ຽວກັບວ່າ ມັນຊິເປັນຈັ່ງໃດ ຖ້າຫາກໄດ້ຢູ່ໃນຄວາມມືດເຖິງສາມວັນ. ແລ້ວພວກທ່ານສາມາດເວົ້າລົມກັນກ່ຽວກັບວິທີທີ່ພຣະເຢຊູຄຣິດເປັນ “ຄວາມສະຫວ່າງ … ຂອງໂລກ” ແນວໃດ (3 ນີໄຟ 9:18).
3 ນີໄຟ 10:1–6
ການວາດພາບເຫັນແມ່ໄກ່ເຕົ້າໂຮມລູກຂອງມັນ ສາມາດເປັນເຄື່ອງມືສິດສອນທີ່ມີພະລັງ ເພື່ອຊ່ວຍເດັກນ້ອຍໃຫ້ເຂົ້າໃຈລັກສະນະ ແລະ ພາລະກິດຂອງພຣະຜູ້ຊ່ວຍໃຫ້ລອດ. ທ່ານສາມາດອ່ານຂໍ້ເຫລົ່ານີ້ ຂະນະທີ່ຄອບຄົວຂອງທ່ານເບິ່ງຮູບແມ່ໄກ່ ແລະ ລູກຂອງມັນ. ເປັນຫຍັງແມ່ໄກ່ຈຶ່ງຈຳເປັນຕ້ອງເຕົ້າໂຮມລູກຂອງມັນ? ເປັນຫຍັງພຣະຜູ້ຊ່ວຍໃຫ້ລອດຈຶ່ງປະສົງທີ່ຈະເຕົ້າໂຮມເຮົາໃຫ້ຢູ່ໃກ້ພຣະອົງ? ຈະມີຫຍັງເກີດຂຶ້ນ ຖ້າຫາກລູກໄກ່ເລືອກບໍ່ໄປຫາແມ່ຕອນເອີ້ນ?
3 ນີໄຟ 11:1–7
ບາງທີທ່ານສາມາດອ່ານບາງຂໍ້ເຫລົ່ານີ້ ດ້ວຍ, “ສຽງ [ແຜ່ວ] ເບົາ” (3 ນີໄຟ 11:3). ຜູ້ຄົນຕ້ອງເຮັດສິ່ງໃດ ເພື່ອຈະເຂົ້າໃຈສຸລະສຽງຈາກສະຫວັນ? ເຮົາຮຽນຮູ້ຫຍັງແດ່ຈາກປະສົບການຂອງພວກເຂົາ?
3 ນີໄຟ 11:21–38
ມີຄົນໃດບໍໃນຄອບຄົວຂອງທ່ານ ທີ່ກຳລັງກະກຽມຮັບບັບຕິສະມາ? ການອ່ານ 3 ນີໄຟ 11:21–38 ສາມາດຊ່ວຍເຂົາເຈົ້າກະກຽມ. ການໄຕ່ຕອງກ່ຽວກັບຄຳສອນຂອງພຣະຜູ້ຊ່ວຍໃຫ້ລອດ ຢູ່ໃນຂໍ້ເຫລົ່ານີ້ ຊ່ວຍສະມາຊິກໃນຄອບຄົວຂອງທ່ານ ຜູ້ທີ່ໄດ້ຮັບບັບຕິສະມາແລ້ວແນວໃດ?
3 ນີໄຟ 11:29–30
ຂໍ້ເຫລົ່ານີ້ສິດສອນເຮົາຫຍັງແດ່ກ່ຽວກັບການຂັດແຍ້ງກັນ? ເຮົາຈະສາມາດກຳຈັດການຂັດແຍ້ງຢູ່ໃນບ້ານເຮືອນຂອງເຮົາໃຫ້ “ໝົດໄປ” ໄດ້ແນວໃດ? (3 ນີໄຟ 11:30).
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສຶກສາສ່ວນຕົວ
ບັນທຶກຄວາມປະທັບໃຈ. ແອວເດີ ຣິເຈີດ ຈີ ສະກາດ ໄດ້ກ່າວວ່າ, “ຄວາມຮູ້ທີ່ຖືກບັນທຶກໄວ້ຢ່າງລະມັດລະວັງ ເປັນຄວາມຮູ້ທີ່ມີໃຫ້ໃນເວລາທີ່ມີຄວາມຕ້ອງການ. … [ການບັນທຶກຄວາມປະທັບໃຈທາງວິນຍານໄວ້] ຈະສົ່ງເສີມຄວາມເປັນໄປໄດ້ຂອງການໄດ້ຮັບຄວາມສະຫວ່າງເພີ່ມເຕີມ” (“Acquiring Spiritual Knowledge,” Ensign, Nov. 1993, 88).
One Shepherd [ຜູ້ລ້ຽງແຕ່ພຽງຜູ້ດຽວ], ໂດຍ ຮາວເວີດ ລີອອນ