ວັນທີ 24–30 ເດືອນສິງຫາ ຮີລາມັນ 7–12: ‘ລະນຶກເຖິງພຣະຜູ້ເປັນເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

ວັນທີ 24–30 ເດືອນສິງຫາ ຮີລາມັນ 7–12,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ນີໄຟອະທິຖານຢູ່ເທິງຫໍສູງຢູ່ໃນສວນ

ຮູບພາບນີໄຟຢູ່ເທິງຫໍສູງຢູ່ໃນສວນ ໂດຍ ແຈຣີ ທອມສັນ

ວັນທີ 24–30 ເດືອນສິງຫາ

ຮີລາມັນ 7–12

“ລະນຶກເຖິງພຣະຜູ້ເປັນເຈົ້າ”

ນີໄຟ, ລີໄຮ, ແລະ ຄົນອື່ນໆ ໄດ້ຮັບ “ການເປີດເຜີຍຫລາຍຢ່າງທຸກໆມື້” (ຮີລາມັນ 11:23). ການເປີດເຜີຍເລື້ອຍໆ ບໍ່ແມ່ນສຳລັບສາດສະດາເທົ່ານັ້ນ—ມັນມີໃຫ້ທ່ານຄືກັນ. ການບັນທຶກຄວາມປະທັບໃຈຂອງທ່ານ ສາມາດຊ່ວຍທ່ານໃຫ້ໄດ້ຮັບການເປີດເຜີຍເປັນປະຈຳຫລາຍກວ່າເກົ່າ.

ບັນທຶກຄວາມປະທັບໃຈຂອງທ່ານ

ຮີລາມັນ ບິດາຂອງນີໄຟ ໄດ້ຊັກຊວນພວກລູກຊາຍຂອງເພິ່ນໃຫ້ “ຈື່ຈຳໄວ້, ຈື່ຈຳໄວ້”: ເພິ່ນຢາກໃຫ້ພວກເພິ່ນຈື່ຈຳບັນພະບຸລຸດຂອງພວກເພິ່ນ, ຈື່ຈຳຖ້ອຍຄຳຂອງສາດສະດາ, ແລະ ເໜືອສິ່ງອື່ນໃດ ໃຫ້ຈື່ຈຳ “ພຣະຜູ້ໄຖ່ຂອງພວກເຮົາ, ຄື ພຣະຄຣິດ” (ເບິ່ງ ຮີລາມັນ 5:5–14). ມັນແຈ່ມແຈ້ງວ່າ ນີໄຟໄດ້ຈື່ຈຳ, ເພາະນີ້ແມ່ນຂ່າວສານຢ່າງດຽວກັນກັບທີ່ເພິ່ນໄດ້ປະກາດຫລາຍປີຈາກນັ້ນ ຢ່າງ “ບໍ່ຮູ້ຈັກອິດເມື່ອຍ” (ຮີລາມັນ 10:4) ຕໍ່ຜູ້ຄົນ. “ພວກທ່ານລືມພຣະເຈົ້າຂອງພວກທ່ານໄດ້ແນວໃດ?” (ຮີລາມັນ 7:20), ເພິ່ນໄດ້ຖາມ. ຄວາມພະຍາຍາມທັງໝົດຂອງນີໄຟ—ການສັ່ງສອນ, ການອະທິຖານ, ການກະທຳການມະຫັດສະຈັນ, ແລະ ການອ້ອນວອນຕໍ່ພຣະເຈົ້າທູນຂໍຄວາມອຶດຢາກ—ແມ່ນຄວາມພະຍາຍາມທີ່ຈະຊ່ວຍຜູ້ຄົນໃຫ້ຫັນມາຫາພຣະເຈົ້າ ແລະ ຈື່ຈຳພຣະອົງ. ໃນຫລາຍວິທີທາງ, ການລືມພຣະເຈົ້າເປັນບັນຫາທີ່ໃຫຍ່ກວ່າການບໍ່ຮູ້ຈັກພຣະອົງເລີຍ, ແລະ ມັນງ່າຍທີ່ຈະລືມພຣະອົງ ເມື່ອຄວາມຄິດຂອງເຮົາຖືກລົບກວນໂດຍ “ສິ່ງທີ່ບໍ່ມີປະໂຫຍດຂອງໂລກ” ແລະ ປົກຄຸມດ້ວຍບາບ (ຮີລາມັນ 7:21; ເບິ່ງ ຮີລາມັນ 12:2 ນຳອີກ). ແຕ່, ດັ່ງທີ່ການປະຕິບັດສາດສະໜາກິດຂອງນີໄຟ ສະແດງໃຫ້ເຫັນ, ມັນບໍ່ເຄີຍສາຍເກີນໄປ ທີ່ຈະຈື່ຈຳ ແລະ “ຫັນ … ມາຫາພຣະຜູ້ເປັນເຈົ້າອົງເປັນພຣະເຈົ້າຂອງພວກທ່ານ” (ຮີລາມັນ 7:17).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຮີລາມັນ 7–11

ສາດສະດາເປີດເຜີຍພຣະປະສົງຂອງພຣະເຈົ້າ.

ມີສາດສະດາຫລາຍທ່ານ ທີ່ບັນຍາຍຕະຫລອດທົ່ວພຣະຄຳພີມໍມອນ, ແຕ່ ຮີລາມັນ 7–11 ແມ່ນບ່ອນໜຶ່ງທີ່ດີເລີດໂດຍສະເພາະ ທີ່ຈະຮຽນຮູ້ວ່າສາດສະດາຄືຫຍັງ, ສິ່ງທີ່ເພິ່ນເຮັດ, ແລະ ວິທີທີ່ເຮົາຄວນຮັບເອົາຖ້ອຍຄຳຂອງເພິ່ນ. ຂະນະທີ່ທ່ານອ່ານບົດເຫລົ່ານີ້, ໃຫ້ເອົາໃຈໃສ່ຕໍ່ການກະທຳ, ຄວາມຄິດ, ແລະ ປະຕິກິລິຍາຂອງນີໄຟຕໍ່ພຣະຜູ້ເປັນເຈົ້າ. ການປະຕິບັດສາດສະໜາກິດຂອງນີໄຟ ຊ່ວຍທ່ານໃຫ້ເຂົ້າໃຈຫລາຍກວ່າເກົ່າ ເຖິງບົດບາດຂອງສາດສະດາ ຢູ່ໃນວັນເວລາຂອງເຮົາແນວໃດ? ຕໍ່ໄປນີ້ແມ່ນຕົວຢ່າງຈຳນວນໜຶ່ງ: ທ່ານພົບເຫັນຫຍັງອີກແດ່?

ຮີລາມັນ 7:17–22.ສາດສະດາເອີ້ນປ່າວການກັບໃຈ ແລະ ເຕືອນເຖິງຜົນສະທ້ອນຂອງບາບ.

ຮີລາມັນ 7:29; 9:21–36.ສາດສະດາຮູ້ຈັກໂດຍການເປີດເຜີຍຈາກພຣະເຈົ້າ ເຖິງສິ່ງທີ່ຜູ້ຄົນຕ້ອງໄດ້ຍິນ.

ຮີລາມັນ 10:7.ສາດສະດາໄດ້ຮັບອຳນາດໃຫ້ຜະນຶກຢູ່ໃນໂລກ ແລະ ຢູ່ໃນສະຫວັນ (ເບິ່ງ ມັດທາຍ 16:19; ຄຳສອນ ແລະ ພັນທະສັນຍາ 132:46).

ຮີລາມັນ 10:4–7, 11–12.

ຂໍ້ເຫລົ່ານີ້ມີຜົນກະທົບຕໍ່ຄວາມຮູ້ສຶກຂອງທ່ານ ກ່ຽວກັບສາດສະດາທີ່ມີຊີວິດຢູ່ແນວໃດ? ເພິ່ນໄດ້ສິດສອນຫຍັງແດ່ເມື່ອບໍ່ດົນມານີ້? ທ່ານກຳລັງເຮັດສິ່ງໃດໃນການຮັບຟັງ ແລະ ເຮັດຕາມການຊີ້ນຳຂອງເພິ່ນ?

ຮີລາມັນ 9–10

ເຄື່ອງໝາຍ ແລະ ສິ່ງມະຫັດສະຈັນ ມີປະໂຫຍດຫລາຍ ແຕ່ບໍ່ພຽງພໍທີ່ຈະສ້າງສັດທາອັນທົນທານໄດ້.

ຖ້າຫາກເຄື່ອງໝາຍ ແລະ ສິ່ງມະຫັດສະຈັນແມ່ນພຽງພໍທີ່ຈະປ່ຽນໃຈຂອງບຸກຄົນ, ແລ້ວຊາວນີໄຟທຸກຄົນ ຄົງໄດ້ປ່ຽນໃຈເຫລື້ອມໃສ ໂດຍເຄື່ອງໝາຍທີ່ໜ້າອັດສະຈັນໃຈ ທີ່ນີໄຟໄດ້ມອບໃຫ້ ຢູ່ໃນ ຮີລາມັນ 9. ກົງກັນຂ້າມ, “ມັນມີການແບ່ງແຍກເກີດຂຶ້ນໃນບັນດາຜູ້ຄົນ” (ຮີລາມັນ 10:1) ເພາະວ່າຫລາຍຄົນໃນພວກເຂົາ “ຍັງເຮັດໃຈແຂງກະດ້າງຢູ່” (ຮີລາມັນ 10:15). ຄົນຊົ່ວມີປະຕິກິລິຍາແນວໃດຕໍ່ເຄື່ອງໝາຍ ແລະ ສິ່ງມະຫັດສະຈັນ? (ເບິ່ງ ຮີລາມັນ 10:12–15; ເບິ່ງ 3 ນີໄຟ 2:1–2 ນຳອີກ). ການໃຫ້ເຄື່ອງໝາຍເປັນຮາກຖານຂອງປະຈັກພະຍານ ເປັນສິ່ງອັນຕະລາຍແນວໃດ?

ຮີລາມັນ 10:2–4

ການໄຕ່ຕອງພາໃຫ້ເກີດການເປີດເຜີຍ.

ຖ້າຫາກທ່ານຮູ້ສຶກຖືກຢຽບຍ່ຳ, ກັງວົນ, ຫລື ສັບສົນ, ທ່ານສາມາດຮຽນຮູ້ບົດຮຽນທີ່ສຳຄັນ ຈາກຕົວຢ່າງຂອງນີໄຟ ຢູ່ໃນ ຮີລາມັນ 10:2–4. ເພິ່ນໄດ້ເຮັດຫຍັງ ເວລາເພິ່ນຮູ້ສຶກ “ເສົ້າສະຫລົດໃຈ”? (ຂໍ້ທີ 3).

ປະທານເຮັນຣີ ບີ ໄອຣິງ ໄດ້ສິດສອນວ່າ, “ເມື່ອເຮົາໄຕ່ຕອງ, ເຮົາຈະເຊື້ອເຊີນການເປີດເຜີຍໂດຍພຣະວິນຍານ. ສຳລັບຂ້າພະເຈົ້າ, ການໄຕ່ຕອງຄືການຄິດ ແລະ ການອະທິຖານທີ່ຂ້າພະເຈົ້າເຮັດຫລັງຈາກການອ່ານ ແລະ ການສຶກສາພຣະຄຳພີຢ່າງລະມັດລະວັງ” (“Serve with the Spirit,” Ensign ຫລື Liahona, Nov. 2010, 60). ທ່ານຈະສ້າງນິໄສທີ່ມັກໄຕ່ຕອງໄດ້ແນວໃດ? ເພື່ອອ່ານກ່ຽວກັບວິທີໜຶ່ງທີ່ຈະໄຕ່ຕອງພຣະຄຳຂອງພຣະເຈົ້າເປັນປະຈຳ, ໃຫ້ເບິ່ງຂ່າວສານຂອງ ບຣາເດີ ເດວິນ ຈີ ເດີແຣ້ນ “My Heart Pondereth Them Continually” (Ensign ຫລື Liahona, Nov. 2015, 112–15).

ເບິ່ງ ສຸພາສິດ 4:26; ລູກາ 2:19; 1 ນີໄຟ 11:1; 2 ນີໄຟ 4:15–16; 3 ນີໄຟ 17:3; ໂມໂຣໄນ 10:3; ຄຳສອນ ແລະ ພັນທະສັນຍາ 88:62 ນຳອີກ.

ຮີລາມັນ 12

ພຣະຜູ້ເປັນເຈົ້າປະສົງໃຫ້ເຮົາຈື່ຈຳພຣະອົງ.

ຢູ່ໃນ ຮີລາມັນ 12, ມໍມອນ, ຜູ້ໄດ້ຫຍໍ້ແຜ່ນຈາລຶກ, ໄດ້ສະຫລຸບບົດຮຽນບາງຢ່າງ ທີ່ເຮົາສາມາດຮຽນຮູ້ຈາກເລື່ອງລາວຂອງນີໄຟ ຢູ່ໃນບົດຕ່າງໆທີ່ຜ່ານມາ. ໃຫ້ຄິດທີ່ຈະໃຊ້ຄຳສະຫລຸບຂອງເພິ່ນ ເພື່ອເປັນໂອກາດສຳຫລວດໃຈຂອງທ່ານເອງ. ທ່ານຄວນຄິດທີ່ຈະຂຽນສິ່ງຕ່າງໆທີ່ມໍມອນກ່າວເຖິງ ອັນທີ່ເຮັດໃຫ້ຜູ້ຄົນລືມພຣະຜູ້ເປັນເຈົ້າ. ສິ່ງໃດຊ່ວຍທ່ານໃຫ້ຈື່ຈຳພຣະອົງ? ທ່ານໄດ້ຮັບການດົນໃຈໃຫ້ປ່ຽນແປງສິ່ງໃດແດ່ ອີງຕາມສິ່ງທີ່ທ່ານໄດ້ຮຽນຮູ້?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

ຮີລາມັນ 7–9

ມີສິ່ງທີ່ຄ້າຍຄືກັນແນວໃດແດ່ ລະຫວ່າງສິ່ງທີ່ນີໄຟໄດ້ເຮັດ ແລະ ສິ່ງທີ່ສາດສະດາເຮັດຢູ່ໃນທຸກວັນນີ້? ສາດສະດາຂອງເຮົາສິດສອນຫຍັງແດ່ໃນທຸກວັນນີ້? ບາງທີທ່ານຄວນເລືອກຄຳແນະນຳບາງຢ່າງ ທີ່ສາດສະດາໄດ້ມອບໃຫ້ເມື່ອບໍ່ດົນມານີ້ ແລະ ສົນທະນາເປັນຄອບຄົວ ເຖິງວິທີທີ່ພວກທ່ານສາມາດເຮັດຕາມຄຳແນະນຳນັ້ນໄດ້ດີກວ່າເກົ່າແນວໃດ.

ຮີລາມັນ 10:4–5, 11–12

ນີໄຟສະແດງໃຫ້ເຫັນໃນວິທີໃດ ວ່າເພິ່ນສະແຫວງຫາທີ່ຈະເຮັດຕາມພຣະປະສົງຂອງພຣະຜູ້ເປັນ ແທນທີ່ຈະເຮັດຕາມຄວາມປະສົງຂອງຕົວເອງ? ເຮົາຈະເຮັດຕາມຕົວຢ່າງຂອງພຣະອົງໄດ້ແນວໃດ? ມີທາງໃດແດ່ທີ່ຄອບຄົວຂອງເຮົາສາມາດສະແຫວງຫາທີ່ຈະເຮັດຕາມພຣະປະສົງຂອງພຣະຜູ້ເປັນເຈົ້າໃຫ້ດີກວ່າເກົ່າ?

ຮີລາມັນ 11:1–16

ນີໄຟປະສົງສິ່ງໃດ ແລະ ເພິ່ນໄດ້ເຮັດແນວໃດກັບມັນ? ເຮົາຮຽນຮູ້ຫຍັງແດ່ກ່ຽວກັບການອະທິຖານຈາກຕົວຢ່າງຂອງນີໄຟ?

ຮີລາມັນ 11:17–23

ເຮົາຮຽນຮູ້ຫຍັງແດ່ກ່ຽວກັບລີໄຮ ນ້ອງຊາຍຂອງນີໄຟ ຢູ່ໃນ ຮີລາມັນ 11:17–23? ເຮົາຮູ້ໃຜແດ່ທີ່ດຳລົງຊີວິດຢ່າງຊອບທຳ ປາດສະຈາກການຖືກຮັບຮູ້ຫລາຍ?

ຮີລາມັນ 12:1–6

ທ່ານຮູ້ຈັກບົດຮຽນໃດບໍທີ່ໃຊ້ສິ່ງຂອງ ທີ່ທ່ານສາມາດໃຊ້ເພື່ອຊ່ວຍຄອບຄົວຂອງທ່ານ ໃຫ້ເຂົ້າໃຈຄຳວ່າ “ຄວາມບໍ່ໜັກແໜ້ນ” ໝາຍຄວາມວ່າແນວໃດ? ຍົກຕົວຢ່າງ, ທ່ານສາມາດເຊື້ອເຊີນສະມາຊິກໃນຄອບຄົວໃຫ້ລອງເອົາສິ່ງຂອງບາງຢ່າງຢອງໃສ່ເທິງຫົວຂອງຕົນ ແລະ ພະຍາຍາມບໍ່ໃຫ້ມັນຕົກ. ແລ້ວ ທ່ານສາມາດເຊື້ອເຊີນສະມາຊິກໃນຄອບຄົວໃຫ້ເບິ່ງຢູ່ໃນ ຮີລາມັນ 12:1–6 ເພື່ອຊອກຫາເຫດຜົນທີ່ຜູ້ຄົນບໍ່ມີຄວາມໜັກແໜ້ນ ໃນການຕິດຕາມພຣະຜູ້ເປັນເຈົ້າ. ເຮົາຈະມີຄວາມໜັກແໜ້ນທາງວິນຍານຢູ່ຄືເກົ່າໄດ້ແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສິດສອນຂອງເຮົາ

ທົບທວນ. ຕໍ່ໄປນີ້ແມ່ນແນວຄິດໜຶ່ງທີ່ຊ່ວຍສະມາຊິກໃນຄອບຄົວໃຫ້ຈື່ຈຳຂໍ້ພຣະຄຳພີ ທີ່ເຂົາເຈົ້າກຳລັງຮຽນ: ໃຫ້ເລືອກເອົາຂໍ້ໜຶ່ງທີ່ທ່ານຄິດວ່າມີຄວາມໝາຍ, ແລະ ສະແດງມັນໄວ້ຢູ່ໃນເຮືອນຂອງທ່ານ ໃນບ່ອນທີ່ສະມາຊິກໃນຄອບຄົວຈະຫລຽວເຫັນມັນເລື້ອຍໆ. ໃຫ້ເຊື້ອເຊີນສະມາຊິກໃນຄອບຄົວຄົນອື່ນໆໃຫ້ປ່ຽນຜຽນກັນເລືອກຂໍ້ພຣະຄຳພີເພື່ອສະແດງ, ແລະ ສົນທະນາກ່ຽວກັບມັນເມື່ອຄອບຄົວຢູ່ນຳກັນ, ດັ່ງເຊັ່ນຕອນກິນເຂົ້າ ຫລື ຕອນອະທິຖານເປັນຄອບຄົວ.