“ວັນທີ 3–9 ເດືອນສິງຫາ. ແອວມາ 43–52: ‘ຍຶດໝັ້ນຢູ່ໃນສັດທາເຖິງພຣະຄຣິດ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 3–9 ເດືອນສິງຫາ. ແອວມາ 43–52,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
For the Blessings of Liberty [ສຳລັບພອນແຫ່ງເສລີພາບ], ໂດຍ ສະກາດ ເອັມ ສະໂນ
ວັນທີ 3–9 ເດືອນສິງຫາ
ແອວມາ 43–52
“ຍຶດໝັ້ນຢູ່ໃນສັດທາເຖິງພຣະຄຣິດ”
ມັນອາດເບິ່ງຄືວ່າ ເຫດການທີ່ບັນຍາຍຢູ່ໃນ ແອວມາ 43–52 ບໍ່ກ່ຽວຂ້ອງກັບທ່ານໂດຍສະເພາະ. ແຕ່ດັ່ງທີ່ຢູ່ໃນພຣະຄຳພີທັງໝົດ, ພຣະຜູ້ເປັນເຈົ້າມີຂ່າວສານສຳລັບທ່ານ. ຈົ່ງສະແຫວງຫາມັນດ້ວຍການອະທິຖານ.
ບັນທຶກຄວາມປະທັບໃຈຂອງທ່ານ
ເມື່ອເຮົາອ່ານຂໍ້ຄວາມເຫລົ່ານີ້ ຢູ່ໃນຕອນຕົ້ນຂອງ ແອວມາ ບົດທີ 43—“ແລະ ບັດນີ້ຂ້າພະເຈົ້າຈະກັບມາເວົ້າກ່ຽວກັບສົງຄາມລະຫວ່າງຊາວນີໄຟ ແລະ ຊາວເລມັນ”—ມັນເປັນເລື່ອງທຳມະດາທີ່ຈະສົງໃສວ່າ ເປັນຫຍັງມໍມອນຈຶ່ງລວມເລື່ອງລາວກ່ຽວກັບສົງຄາມເຫລົ່ານີ້ ເມື່ອເພິ່ນມີບ່ອນຫວ່າງທີ່ຈຳກັດຢູ່ໃນແຜ່ນຈາລຶກ (ເບິ່ງ ຄຳຂອງມໍມອນ 1:5). ມັນເປັນຄວາມຈິງທີ່ເຮົາກໍມີສົງຄາມຄືກັນໃນວັນເວລາຂອງເຮົາ, ແຕ່ມັນມີຄ່າຢູ່ໃນຖ້ອຍຄຳຂອງເພິ່ນ ທີ່ເກີນກວ່າຈະບັນຍາຍໄດ້ ເຖິງຍຸດທະວິທີ ແລະ ເລື່ອງເສົ້າຂອງສົງຄາມ. ຖ້ອຍຄຳຂອງເພິ່ນກໍຍັງກະກຽມເຮົາສຳລັບສົງຄາມ ຊຶ່ງໃນນັ້ນ “ເຮົາທຸກຄົນຖືກເກນ” (Hymns, no. 250), ສົງຄາມທີ່ເຮົາຕໍ່ສູ້ໃນແຕ່ລະວັນແມ່ນຕໍ່ຕ້ານອິດທິພົນທີ່ຊົ່ວຮ້າຍ. ສົງຄາມນີ້ແມ່ນເປັນເລື່ອງຈິງ, ແລະ ຜົນສະທ້ອນຈະກະທົບກະເທືອນກັບຊີວິດນິລັນດອນຂອງເຮົາ. ເຊັ່ນດຽວກັບຊາວນີໄຟ, ເຮົາໄດ້ຮັບ “ກຳລັງໃຈດ້ວຍອຸດົມການທີ່ດີກວ່າ,” ຊຶ່ງເປັນ “ພຣະເຈົ້າຂອງພວກເຮົາ, ສາດສະໜາຂອງພວກເຮົາ, ອິດສະລະພາບຂອງພວກເຮົາ, ແລະ ສັນຕິສຸກຂອງພວກເຮົາ, [ຄອບຄົວ] ຂອງພວກເຮົາ.” ໂມໂຣໄນໄດ້ເອີ້ນສິ່ງນີ້ວ່າ “ອຸດົມການຂອງຄຣິດສະຕຽນ,” ເປັນອຸດົມການດຽວກັນທີ່ເຮົາກຳລັງຕໍ່ສູ້ຢູ່ໃນທຸກວັນນີ້ (ແອວມາ 43:45; 46:12, 16).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ການຕໍ່ສູ້ຢູ່ໃນພຣະຄຳພີມໍມອນສິດສອນເຮົາກ່ຽວກັບການຕໍ່ສູ້ກັບຄວາມຊົ່ວຮ້າຍ.
ການອ່ານກ່ຽວກັບສົງຄາມລະຫວ່າງຊາວນີໄຟ ແລະ ຊາວເລມັນ ອາດມີຄວາມໝາຍຫລາຍກວ່າເກົ່າຕໍ່ທ່ານ ຖ້າຫາກທ່ານຊອກຫາສິ່ງທີ່ສາມາດປຽບທຽບໃສ່ກັບການຕໍ່ສູ້ສ່ວນຕົວທາງວິນຍານຂອງທ່ານ. ຂະນະທີ່ທ່ານອ່ານ ແອວມາ 43–52, ໃຫ້ສັງເກດເບິ່ງສິ່ງທີ່ຊາວນີໄຟໄດ້ເຮັດ ທີ່ເຮັດໃຫ້ພວກເຂົາປະສົບຄວາມສຳເລັດ (ຫລື ບໍ່ສຳເລັດ). ແລ້ວໃຫ້ໄຕ່ຕອງວິທີທີ່ທ່ານສາມາດໃຊ້ສິ່ງທີ່ທ່ານໄດ້ຮຽນຮູ້ເພື່ອຊ່ວຍທ່ານເອົາຊະນະການຕໍ່ສູ້ທາງວິນຍານຂອງທ່ານ. ຂະນະທີ່ທ່ານສຶກສາຂໍ້ເຫລົ່ານີ້ ເຊັ່ນດັ່ງຕໍ່ໄປນີ້, ໃຫ້ຂຽນຄວາມຄິດຂອງທ່ານກ່ຽວກັບວິທີທີ່ທ່ານສາມາດເຮັດຕາມຕົວຢ່າງຂອງຊາວນີໄຟ:
-
ແອວມາ 43:19 ຊາວນີໄຟໄດ້ຕຽມພ້ອມດ້ວຍເຄື່ອງປ້ອງກັນ. (ເຮົາສາມາດພະຍາຍາມກະກຽມຕົວເຮົາເອງ ດ້ວຍເຄື່ອງປ້ອງກັນທາງວິນຍານ.)
-
ແອວມາ 43:23–24 ພວກເຂົາໄດ້ສະແຫວງຫາການຊີ້ນຳຂອງສາດສະດາ.
ພ້ອມນີ້ກໍໃຫ້ສັງເກດເບິ່ງວິທີທີ່ຊາວເລມັນ ແລະ ພວກທີ່ແຍກອອກໄປຈາກຊາວນີໄຟ ໄດ້ພະຍາຍາມເອົາຊະນະຊາວນີໄຟແນວໃດ. ສິ່ງເຫລົ່ານີ້ສາມາດເຕືອນທ່ານກ່ຽວກັບວິທີທີ່ຜູ້ປໍລະປັກອາດພະຍາຍາມໂຈມຕີທ່ານ. ຂະນະທີ່ທ່ານສຶກສາ, ໃຫ້ຂຽນວິທີທີ່ຊາຕານອາດໂຈມຕີທ່ານ ໃນວິທີທາງທີ່ຄ້າຍຄືກັນເຫລົ່ານີ້:
-
ແອວມາ 43:8 ເຊຣາເຮັມນາໄດ້ພະຍາຍາມເຮັດໃຫ້ຜູ້ຄົນຂອງລາວຄຽດແຄ້ນ ເພື່ອວ່າລາວຈະມີອຳນາດເໜືອພວກເຂົາ. (ເມື່ອເຮົາມີຄວາມຄຽດແຄ້ນກັບຄົນອື່ນ, ເຮົາໄດ້ໃຫ້ຊາຕານມີອຳນາດເໜືອເຮົາ.)
-
ແອວມາ 43:29 ຊາວເລມັນຢາກນຳຊາວນີໄຟ ມາເປັນທາດ.
ມິເນີວາ ເຄ ໄທເກີດ (1888–1976), Defense of a Nephite City [ການປົກປ້ອງເມືອງນີໄຟ], 1935, ສີນ້ຳມັນ ເທິງແຜ່ນໄມ້ອັດ, 36 x 48 ນິ້ວ. ຫໍພິພິດທະພັນສິລະປະຂອງມະຫາວິທະຍາໄລບຣິກຳ ຢັງ.
ເມື່ອເຮົາພະຍາຍາມເປັນຄົນຊື່ສັດຄືກັນກັບໂມໂຣໄນ, ເຮົາຈະກາຍເປັນເໝືອນດັ່ງພຣະຜູ້ຊ່ວຍໃຫ້ລອດຫລາຍກວ່າເກົ່າ.
ທ່ານຢາກສາມາດກາຍເປັນເໝືອນດັ່ງພຣະຜູ້ຊ່ວຍໃຫ້ລອດບໍ ແລະ ເຮັດໃຫ້ອຳນາດຂອງຜູ້ປໍລະປັກມີໜ້ອຍລົງຢູ່ໃນຊີວິດຂອງທ່ານ? ວິທີໜຶ່ງແມ່ນການເຮັດຕາມການຕັກເຕືອນ ຢູ່ໃນ ແອວມາ 48:17 ທີ່ຈະກາຍເປັນ “ເໝືອນດັ່ງໂມໂຣໄນ.” ໃຫ້ເອົາໃຈໃສ່ຕໍ່ຄຸນສົມບັດ ແລະ ການກະທຳຂອງໂມໂຣໄນ ທີ່ບັນຍາຍຕະຫລອດທົ່ວ ແອວມາ 43–52 ແຕ່ໂດຍສະເພາະ ຢູ່ໃນ 46:11–28 ແລະ 48:7–17. ແມ່ນຫຍັງທີ່ປະທັບໃຈທ່ານກ່ຽວກັບ “ຄົນແຂງແຮງ” ຜູ້ນີ້? ຄຸນສົມບັດ ແລະ ການກະທຳທີ່ຄືກັນກັບຂອງເພິ່ນ ຈະເຮັດໃຫ້ອຳນາດຂອງມານອ່ອນແອລົງໃນຊີວິດຂອງທ່ານແນວໃດ? ໃຫ້ໄຕ່ຕອງສິ່ງທີ່ທ່ານຮູ້ສຶກໄດ້ຮັບການດົນໃຈໃຫ້ເຮັດຕາມຕົວຢ່າງຂອງໂມໂຣໄນ ແລະ ກາຍເປັນເໝືອນດັ່ງພຣະຜູ້ຊ່ວຍໃຫ້ລອດຫລາຍກວ່າເກົ່າ.
ຊາຕານລໍ້ລວງ ແລະ ຫລອກລວງເຮົາ ເທື່ອລະເລັກເທື່ອລະໜ້ອຍ.
ຊາຕານຮູ້ວ່າ ເຮົາສ່ວນຫລາຍຈະບໍ່ເຮັດບາບທີ່ຮ້າຍແຮງ ຫລື ເຊື່ອຄວາມຕົວະທີ່ໃຫຍ່ໂຕ. ສະນັ້ນ, ມັນຈຶ່ງໃຊ້ຄວາມຕົວະ ແລະ ການລໍ້ລວງທີ່ເຫັນໄດ້ຍາກ ເພື່ອນຳພາເຮົາໄປຫາບາບທີ່ເບິ່ງຄືວ່າເລັກນ້ອຍ—ຫລາຍເທົ່າທີ່ມັນຄິດວ່າ ເຮົາຈະຮັບເອົາ. ມັນສືບຕໍ່ເຮັດສິ່ງນີ້ ຈົນກວ່າເຮົາໄດ້ຢູ່ຫ່າງໄກຈາກບ່ອນປອດໄພ ຂອງການດຳລົງຊີວິດຢ່າງຊອບທຳ.
ທ່ານສາມາດເຫັນແບບແຜນນີ້ຢູ່ໃນເລື່ອງລາວຂອງ ອະມາລີໄຄຢາ ທີ່ຫລອກລວງ ລີຮອນໄທ, ມີຢູ່ໃນ ແອວມາ 47. ຂະນະທີ່ທ່ານສຶກສາ, ໃຫ້ໄຕ່ຕອງວິທີທີ່ຊາຕານອາດພະຍາຍາມຫລອກລວງທ່ານ, ດັ່ງທີ່ໄດ້ບັນຍາຍໂດຍ ແອວເດີ ຣໍເບີດ ດີ ແຮວສ໌:
“ອະມາລີໄຄຢາຜູ້ທໍລະຍົດຍົວະຍົງໃຫ້ລີຮອນໄທ ‘ລົງມາ’ ແລະ ພົບກັບລາວໃນຮ່ອມພູ. ແຕ່ເມື່ອລີຮອນໄທໄປຈາກທີ່ໝັ້ນຄົງຂອງພູສູງນັ້ນ, ເພິ່ນກໍຖືກວາງຢາພິດ ‘ເທື່ອລະເລັກເທື່ອລະໜ້ອຍ’ ຈົນວ່າເພິ່ນຕາຍ, ແລະ ກອງທັບຂອງເພິ່ນຕົກຢູ່ໃນກຳມືຂອງອະມາລີໄຄຢາ (ເບິ່ງ ແອວມາ 47). ໂດຍການໂຕ້ຖຽງ ແລະ ການກ່າວຫາ, ຄົນບາງຄົນຈະລໍ້ລວງໃຫ້ເຮົາອອກໄປຈາກທີ່ໝັ້ນຄົງ ຂອງພູສູງ. ທີ່ໝັ້ນຄົງຂອງພູສູງເປັນບ່ອນທີ່ມີແສງສະຫວ່າງ. … ມັນເປັນບ່ອນທີ່ປອດໄພ” (“Christian Courage: The Price of Discipleship,” Ensign ຫລື Liahona, Nov. 2008, 74).
ເບິ່ງ 2 ນີໄຟ 26:22; 28:21–22 ນຳອີກ.
ຄວາມເປັນອັນໜຶ່ງອັນດຽວກັນນຳຄວາມປອດໄພມາໃຫ້.
ໃນສະຖານະການທີ່ບັນທຶກຢູ່ໃນຕອນຕົ້ນຂອງ ແອວມາ 50, ມັນເບິ່ງຄືວ່າ ຊາວເລມັນບໍ່ມີໂອກາດທີ່ຈະເອົາຊະນະຊາວນີໄຟໄດ້ເລີຍ. ເຄື່ອງປ້ອງກັນ, ການເສີມກຳລັງ, ແລະ ຄວາມພະຍາຍາມທີ່ຈະເປັນອັນໜຶ່ງດຽວກັນຂອງຊາວນີໄຟ ເຮັດໃຫ້ພວກເຂົາເບິ່ງຄືວ່າ ຈະບໍ່ສາມາດເອົາຊະນະໄດ້ (ເບິ່ງ ແອວມາ 49:28–30 ແລະ 50:17–20). ແຕ່ບໍ່ດົນຊາວເລມັນກໍໄດ້ຍຶດເອົາຫລາຍຫົວເມືອງຂອງພວກເຂົາ—ລວມທັງຫົວເມືອງເຫລົ່ານັ້ນທີ່ໂມໂຣໄນໄດ້ປົກປ້ອງ (ເບິ່ງ ແອວມາ 51:26–27). ສິ່ງນັ້ນເກີດຂຶ້ນໄດ້ແນວໃດ? ໃຫ້ຊອກຫາຄຳຕອບ ຂະນະທີ່ທ່ານອ່ານບົດເຫລົ່ານີ້ (ເບິ່ງ ໂດຍສະເພາະ ແອວມາ 51:1–12). ໄຕ່ຕອງເຖິງຄຳເຕືອນຢູ່ໃນເລື່ອງນີ້ສຳລັບທ່ານ ແລະ ຄອບຄົວຂອງທ່ານ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
ແອວມາ 45:2–8
ການອ່ານຂໍ້ເຫລົ່ານີ້ນຳກັນອາດດົນໃຈຄອບຄົວຂອງທ່ານໃຫ້ມີການສົນທະນາສອງຕໍ່ສອງເລື່ອງພຣະກິດຕິຄຸນກັບສະມາຊິກໃນຄອບຄົວ, ດັ່ງທີ່ແອວມາໄດ້ເຮັດກັບຮີລາມັນ.
ແອວມາ 46:12–22
ປ້າຍແຫ່ງເສລີພາບ ໄດ້ດົນໃຈຊາວນີໄຟໃຫ້ຮັກສາພຣະບັນຍັດຂອງພຣະເຈົ້າ ແລະ ປົກປ້ອງສັດທາຂອງພວກເຂົາ. ແມ່ນຫຍັງທີ່ດົນໃຈເຮົາໃຫ້ເຮັດຄືກັນນັ້ນ? ບາງທີຄອບຄົວຂອງທ່ານອາດຢາກເຮັດ ປ້າຍແຫ່ງເສລີພາບ ຂອງພວກທ່ານເອງ—ເຮັດທຸງ ຫລື ປ້າຍ ທີ່ມີຖ້ອຍຄຳ ຫລື ຮູບພາບທີ່ເຕືອນພວກທ່ານໃຫ້ຮັກສາພຣະບັນຍັດຂອງພຣະເຈົ້າ ໃນແຕ່ລະວັນ.
ແອວມາ 48:7–9; 49:1–9; 50:1–6
ຂະນະທີ່ຄອບຄົວຂອງທ່ານ ອ່ານກ່ຽວກັບການເສີມກຳລັງຂອງຊາວນີໄຟ, ພວກທ່ານສາມາດສົນທະນາກ່ຽວກັບວິທີທີ່ພວກທ່ານຈະເສີມກຳລັງໃຫ້ບ້ານເຮືອນຂອງພວກທ່ານ ເພື່ອຕ້ານກັບຜູ້ປໍລະປັກ. ເດັກນ້ອຍອາດມັກທີ່ຈະສ້າງຄ້າຍ ດ້ວຍສິ່ງຂອງເຊັ່ນຕັ່ງ ແລະ ຜ້າຫົ່ມ, ຫລື ພວກເຂົາສາມາດແຕ້ມຮູບຕາມຄວາມນຶກຄິດຂອງພວກເຂົາ ວ່າຊາວນີໄຟສ້າງສິ່ງປ້ອງກັນໃນແບບໃດ.
ແອວມາ 51:1–12
ຂໍ້ເຫລົ່ານີ້ສິດສອນຫຍັງແດ່ກ່ຽວກັບສິ່ງທີ່ສາມາດເກີດຂຶ້ນໄດ້ ພາຍໃນຄອບຄົວຂອງເຮົາ ເມື່ອພວກເຮົາມີການຂັດແຍ້ງກັນ? ພວກເຮົາຈະສາມາດເປັນອັນໜຶ່ງອັນດຽວກັນໄດ້ແນວໃດ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສຶກສາສ່ວນຕົວ
ຖາມຄຳຖາມຂະນະທີ່ທ່ານສຶກສາ. ຂະນະທີ່ທ່ານສຶກສາພຣະຄຳພີ, ໃຫ້ຖາມຕົວເອງ ສິ່ງທີ່ສາມາດຊ່ວຍທ່ານໄຕ່ຕອງວ່າ ທ່ານດຳລົງຊີວິດຕາມສິ່ງທີ່ທ່ານອ່ານ ໄດ້ດີປານໃດ.
Title of Liberty [ປ້າຍແຫ່ງເສລີພາບ], ໂດຍ ແລຣີ ຄອນແຣດ ວິນບອກ