“ວັນທີ 17–23 ເດືອນສິງຫາ. ຮີລາມັນ 1–6: ‘ດານຫີນຂອງພຣະຜູ້ໄຖ່ຂອງພວກເຮົາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 17–23 ເດືອນສິງຫາ. ຮີລາມັນ 1–6,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ວັນທີ 17–23 ເດືອນສິງຫາ

ຮີລາມັນ 1–6

“ດານຫີນຂອງພຣະຜູ້ໄຖ່ຂອງພວກເຮົາ”

ຫລັກທຳຢູ່ໃນໂຄງຮ່າງນີ້ ສາມາດຊ່ວຍນຳພາການສຶກສາຂອງທ່ານຢູ່ໃນ ຮີລາມັນ 1–6, ແຕ່ຢ່າໃຫ້ມັນຈຳກັດທ່ານ. ພຣະວິນຍານບໍລິສຸດຈະນຳພາທ່ານໄປຫາຄວາມຈິງທີ່ທ່ານຕ້ອງການທີ່ຈະຮຽນຮູ້.

ບັນທຶກຄວາມປະທັບໃຈຂອງທ່ານ

ໜັງສືຮີລາມັນ ບັນທຶກທັງໄຊຊະນະ ແລະ ຄວາມໂສກເສົ້າ ຢູ່ໃນບັນດາຊາວນີໄຟ ແລະ ຊາວເລມັນ. ມັນເລີ່ມຕົ້ນດ້ວຍ “ຄວາມຫຍຸ້ງຍາກຢ່າງຮ້າຍແຮງເກີດຂຶ້ນໃນບັນດາຜູ້ຄົນຂອງນີໄຟ” (ຮີລາມັນ 1:1), ແລະ ຄວາມຫຍຸ້ງຍາກກໍຫລັ່ງໄຫລມາຕະຫລອດທົ່ວບັນທຶກ. ຢູ່ໃນໜັງສືນີ້ ເຮົາອ່ານກ່ຽວກັບກົນອຸບາຍທາງດ້ານການເມືອງ, ພວກໂຈນ, ການປະຕິເສດສາດສະດາ, ແລະ ຄວາມທະນົງຕົວ ແລະ ຄວາມບໍ່ເຊື່ອຖື ຕະຫລອດທົ່ວແຜ່ນດິນ. ແຕ່ເຮົາກໍຍັງພົບເຫັນຕົວຢ່າງ ເຊັ່ນ ນີໄຟ ແລະ ລີໄຮ ແລະ “ຜູ້ຄົນທີ່ຖ່ອມຕົວຢ່າງຫລວງຫລາຍ,” ຜູ້ທີ່ບໍ່ພຽງແຕ່ລອດມາໄດ້ ແຕ່ຍັງຈະເລີນກ້າວໜ້າທາງວິນຍານນຳອີກ (ຮີລາມັນ 3:34). ພວກເຂົາເຮັດແນວນັ້ນໄດ້ແນວໃດ? ພວກເຂົາຍັງຄົງເຂັ້ມແຂງຢູ່ໄດ້ແນວໃດ ຂະນະທີ່ຄວາມສີວິໄລຂອງພວກເຂົາເລີ່ມເສື່ອມໂຊມ ແລະ ພັງທະລາຍໄປ? ໃນທາງດຽວກັນກັບທີ່ເຮົາຍັງຄົງເຂັ້ມແຂງຢູ່ໃນ “ລົມພະຍຸຮ້າຍ” ທີ່ມານສົ່ງມາ “ຕີ [ເຮົາ]”—ໂດຍການສ້າງຊີວິດຂອງເຮົາ “ຢູ່ເທິງດານຫີນຂອງພຣະຜູ້ໄຖ່, ຄືພຣະຄຣິດ, ພຣະບຸດຂອງພຣະເຈົ້າ, … ເປັນຮາກຖານຊຶ່ງຫາກມະນຸດສ້າງຂຶ້ນເທິງມັນ ພວກເຂົາຈະຕົກໄປບໍ່ໄດ້” (ຮີລາມັນ 5:12).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຮີລາມັນ 1–6

ຄວາມທະນົງຕົວແຍກເຮົາຈາກພຣະວິນຍານ ແລະ ພະລັງຂອງພຣະຜູ້ເປັນເຈົ້າ.

ຂະນະທີ່ທ່ານອ່ານ ຮີລາມັນ 1–6—ແລະ ຕະຫລອດທົ່ວພຣະຄຳພີມໍມອນ—ທ່ານອາດສັງເກດເຫັນແບບແຜນການປະພຶດຂອງຊາວນີໄຟ: ເວລາຊາວນີໄຟຊອບທຳ, ພຣະເຈົ້າອວຍພອນພວກເຂົາ ແລະ ພວກເຂົາຈະເລີນຮຸ່ງເຮືອງ. ບາງຄັ້ງ, ພວກເຂົາໄດ້ກາຍເປັນຄົນທະນົງຕົວ ແລະ ຊົ່ວຮ້າຍ, ຕັດສິນໃຈເຮັດສິ່ງທີ່ພາໄປສູ່ຄວາມພິນາດ ແລະ ຄວາມທຸກທໍລະມານ. ແລ້ວພວກເຂົາກໍຖ່ອມຕົວລົງ ແລະ ຖືກດົນໃຈໃຫ້ກັບໃຈ, ແລະ ພຣະເຈົ້າກໍອວຍພອນພວກເຂົາຄືນອີກ. ແບບແຜນດັ່ງກ່າວໄດ້ເກີດຂຶ້ນເລື້ອຍໆ ຈົນວ່າບາງຄົນເອີ້ນມັນວ່າ “ວົງວຽນຂອງຄວາມທະນົງຕົວ.”

ໃຫ້ຊອກຫາຕົວຢ່າງຂອງວົງວຽນນີ້ ຂະນະທີ່ທ່ານອ່ານ. ທ່ານຄວນໝາຍຕົວຢ່າງເຫລົ່ານັ້ນ ເມື່ອທ່ານພົບເຫັນມັນ. ຕໍ່ໄປນີ້ແມ່ນຄຳຖາມ ທີ່ຊ່ວຍທ່ານໃຫ້ເຂົ້າໃຈແບບແຜນນີ້ ແລະ ເຫັນວິທີທີ່ມັນອາດກ່ຽວຂ້ອງກັບຕົວທ່ານ:

ມີຫລັກຖານໃດແດ່ຂອງຄວາມທະນົງຕົວ ທີ່ທ່ານເຫັນຢູ່ໃນບັນດາຊາວນີໄຟ? (ເບິ່ງ, ຍົກຕົວຢ່າງ, ຮີລາມັນ 3:33–34; 4:11–13). ທ່ານເຫັນຕົວຢ່າງທີ່ຄ້າຍຄືກັນຂອງຄວາມທະນົງຕົວ ຢູ່ໃນຕົວທ່ານເອງບໍ?
ມີຜົນສະທ້ອນຢ່າງໃດແດ່ຂອງຄວາມທະນົງຕົວ ແລະ ຄວາມຊົ່ວຮ້າຍ? (ເບິ່ງ ຮີລາມັນ 4:23–26). ມີຜົນສະທ້ອນຢ່າງໃດແດ່ຂອງຄວາມຖ່ອມຕົວ ແລະ ການກັບໃຈ? (ເບິ່ງ ຮີລາມັນ 3:27–30, 35; 4:14–16).
ຮີລາມັນຢາກໃຫ້ພວກລູກຊາຍຂອງເພິ່ນຈື່ຈຳສິ່ງໃດແດ່? (ເບິ່ງ ຮີລາມັນ 5:4–12). ການຈື່ຈຳຄວາມຈິງເຫລົ່ານີ້ຊ່ວຍທ່ານຫລີກເວັ້ນຈາກການກາຍເປັນຄົນທະນົງຕົວແນວໃດ?

ເບິ່ງ Dieter F. Uchtdorf, “Pride and the Priesthood,” Ensign ຫລື Liahona, Nov. 2010, 55–58 ນຳອີກ.

ຮີລາມັນ 3:24–35

ເຮົາສາມາດຖືກຊຳລະໃຫ້ບໍລິສຸດໄດ້ ເມື່ອເຮົາມອບໃຈຂອງເຮົາໃຫ້ແກ່ພຣະເຈົ້າ.

ຢູ່ໃນ ຮີລາມັນ 3, ມໍມອນໄດ້ບັນຍາຍເຖິງເວລາທີ່ສາດສະໜາຈັກຈະເລີນກ້າວໜ້າ ແລະ ໄດ້ຮັບພອນ ຈົນແມ່ນແຕ່ພວກຜູ້ນຳປະຫລາດໃຈ (ເບິ່ງ ຂໍ້ທີ 24–32). ໃນທີ່ສຸດບາງຄົນໄດ້ກາຍເປັນຄົນທະນົງຕົວ, ຂະນະທີ່ຄົນອື່ນໆ “ໄດ້ເຂັ້ມແຂງຂຶ້ນໄປເລື້ອຍໆ ໃນຄວາມຖ່ອມຕົວຂອງພວກເຂົາ, … ຈົນຊຳລະໃຈຂອງພວກເຂົາໃຫ້ບໍລິສຸດ ແລະ ສັກສິດ” (ຮີລາມັນ 3:35). ໃຫ້ສັງເກດເບິ່ງ ຢູ່ໃນ ຂໍ້ທີ 34–35 ເຖິງສິ່ງທີ່ຄົນຖ່ອມຕົວໄດ້ເຮັດ ເພື່ອຈະກັບກາຍບໍລິສຸດ. ສິ່ງເຫລົ່ານີ້ຊ່ວຍທ່ານໃຫ້ກັບກາຍບໍລິສຸດຫລາຍກວ່າເກົ່າແນວໃດ? ມັນອາດເປັນປະໂຫຍດທີ່ຈະຮູ້ວ່າ ຄູ່ມືພຣະຄຳພີ (scriptures.ChurchofJesusChrist.org) ແປຄວາມໝາຍຂອງຄຳວ່າ ການຊຳລະໃຫ້ບໍລິສຸດ ໝາຍເຖິງ “ຂັ້ນຕອນຂອງການກາຍເປັນອິດສະລະຈາກບາບ, ບໍລິສຸດ, ສະອາດ, ແລະ ສັກສິດ ຜ່ານທາງການຊົດໃຊ້ຂອງພຣະເຢຊູຄຣິດ.” ທ່ານຮູ້ສຶກໄດ້ຮັບການດົນໃຈໃຫ້ເຮັດຫຍັງແດ່ ເພື່ອເຮັດຕາມຕົວຢ່າງຂອງສານຸສິດເຫລົ່ານີ້? ທ່ານກຳລັງເຮັດສິ່ງໃດເພື່ອຈະໄດ້ມອບໃຈຂອງທ່ານໃຫ້ແກ່ພຣະເຈົ້າ?

ຮີລາມັນ 5:14–52

ສັດທາຂອງເຮົາໄດ້ຮັບຄວາມເຂັ້ມແຂງ ໂດຍ “ຄວາມຍິ່ງໃຫຍ່ຂອງຫລັກຖານທີ່ [ເຮົາ] ໄດ້ຮັບ.”

ແອວເດີ ແຈັບຟະຣີ ອາ ຮໍແລນ ຄັ້ງໜຶ່ງໄດ້ກ່າວຕໍ່ຜູ້ທີ່ດີ້ນລົນກັບສັດທາຂອງເຂົາເຈົ້າວ່າ: “ທ່ານມີສັດທາຫລາຍກວ່າທີ່ທ່ານຄິດ ເພາະພຣະຄຳພີມໍມອນໄດ້ເອີ້ນສິ່ງນີ້ວ່າ ‘ຄວາມຍິ່ງໃຫຍ່ຂອງຫລັກຖານ’ [ຮີລາມັນ 5:50]. … ຜົນຂອງການດຳລົງຊີວິດຕາມພຣະກິດຕິຄຸນຈະເປັນຫລັກຖານໃນຊີວິດຂອງໄພ່ພົນຍຸກສຸດທ້າຍ ໃນທຸກແຫ່ງຫົນ” (“Lord, I Believe,” Ensign ຫລື Liahona, May 2013, 94). ຂະນະທີ່ທ່ານອ່ານຂໍ້ເຫລົ່ານີ້, ໃຫ້ຄິດກ່ຽວກັບຫລັກຖານທີ່ພຣະຜູ້ເປັນເຈົ້າໄດ້ມອບໃຫ້ທ່ານ. ຍົກຕົວຢ່າງ, ບາງທີທ່ານອາດບໍ່ເຄີຍໄດ້ຍິນສຸລະສຽງຂອງພຣະຜູ້ເປັນເຈົ້າໂດຍກົງ, ແຕ່ທ່ານເຄີຍຮູ້ສຶກ “ສຽງສື່ມ” ຈາກພຣະວິນຍານບໍລິສຸດ ທີ່ “ໄດ້ສຽບແທງເຂົ້າໄປໃນຈິດວິນຍານທຸກດວງ”? (ຮີລາມັນ 5:30; ເບິ່ງ ຄຳສອນ ແລະ ພັນທະສັນຍາ 88:66 ນຳອີກ). ບາງທີທ່ານຍັງຢູ່ໃນຄວາມມືດ, ເອີ້ນຫາພຣະເຈົ້າເພື່ອຂໍໃຫ້ມີສັດທາຫລາຍກວ່າເກົ່າ, ແລະ “ເຕັມໄປດ້ວຍຄວາມສຸກ ຈົນບໍ່ອາດຈະພັນລະນາໄດ້” (ຮີລາມັນ 5:40–47). ມີປະສົບການໃດແດ່ອື່ນອີກ ທີ່ເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານ ໃນພຣະຄຣິດ ແລະ ພຣະກິດຕິຄຸນຂອງພຣະອົງ?

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

ຮີລາມັນ 3:27–30

ຂະນະທີ່ສາດສະດາມໍມອນໄດ້ຫຍໍ້ບັນທຶກທີ່ສັກສິດນີ້, ບາງເທື່ອເພິ່ນກໍໄດ້ໃຊ້ຄຳວ່າ “ພວກເຮົາຈຶ່ງເຫັນດັ່ງນັ້ນ” ເພື່ອເນັ້ນຄວາມຈິງທີ່ສຳຄັນ. ເພິ່ນຢາກໃຫ້ເຮົາເຫັນຫຍັງຢູ່ໃນ ຮີລາມັນ 3:27–30? ຕະຫລອດທົ່ວການສຶກສາຂອງທ່ານໃນອາທິດນີ້, ທ່ານຄວນຢຸດເປັນບາງຄັ້ງ ເພື່ອຖາມສະມາຊິກໃນຄອບຄົວເຖິງວິທີທີ່ເຂົາເຈົ້າຈະປະກອບສຳນວນ ທີ່ວ່າ “ແລະ ພວກເຮົາຈຶ່ງເຫັນດັ່ງນັ້ນ” ໃຫ້ສົມບູນແນວໃດ ກ່ຽວກັບສິ່ງທີ່ເຂົາເຈົ້າໄດ້ອ່ານ. ຄວາມຈິງໃດແດ່ທີ່ເຂົາເຈົ້າຢາກເນັ້ນ?

ຮີລາມັນ 5:6–7

ພໍ່ຕູ້ປູ່ຂອງປະທານໂຈດ ອາເບີດ ສະມິດ ຊື່ ໂຈດ ເອ ສະມິດ ທີ່ລ່ວງລັບໄປແລ້ວ ໄດ້ມາປະກົດຢູ່ໃນຄວາມຝັນຂອງເພິ່ນ ແລະ ໄດ້ຖາມວ່າ, “ພໍ່ຕູ້ຢາກຮູ້ວ່າ ເຈົ້າໄດ້ເຮັດຫຍັງກັບຊື່ຂອງພໍ່ຕູ້.” ປະທານສະມິດ ໄດ້ຕອບວ່າ, “ຫລານບໍ່ໄດ້ເຮັດສິ່ງໃດກັບຊື່ຂອງພໍ່ຕູ້ ທີ່ພໍ່ຕູ້ຕ້ອງອັບອາຍ” (ໃນ Teachings of Presidents of the Church: George Albert Smith [2011], xxvi). ຫລັງຈາກການອ່ານ ຮີລາມັນ 5:6–7, ບາງທີທ່ານຄວນເວົ້າລົມກັບສະມາຊິກໃນຄອບຄົວກ່ຽວກັບການຈື່ຈຳ ແລະ ການໃຫ້ກຽດແກ່ຊື່ທີ່ເຮົາໄດ້ຮັບ, ລວມທັງພຣະນາມຂອງພຣະຜູ້ຊ່ວຍໃຫ້ລອດ.

ຮີລາມັນ 5:12

ເພື່ອຊ່ວຍຄອບຄົວຂອງທ່ານໃຫ້ວາດພາບເຫັນຄວາມໝາຍຂອງການມີ “ຮາກຖານທີ່ແໜ້ນໜາ,” ບາງທີທ່ານຄວນສ້າງໂຄງຮ່າງນ້ອຍໃດໜຶ່ງນຳກັນ ແລະ ວາງມັນໄວ້ເທິງຮາກຖານທີ່ແຕກຕ່າງກັນ. ແລ້ວ ໃຫ້ທ່ານສ້າງ “ລົມພະຍຸຮ້າຍ” ໂດຍການສີດນ້ຳໃສ່ເທິງມັນ ແລະ ໃຊ້ພັດລົມ ຫລື ໃຊ້ເຄື່ອງໄດຜົມ ເພື່ອສ້າງລົມ. ມີຫຍັງເກີດຂຶ້ນກັບໂຄງຮ່າງດັ່ງກ່າວ ເວລາມັນຕັ້ງຢູ່ເທິງຮາກຖານທີ່ແຕກຕ່າງກັນ? ພຣະເຢຊູຄຣິດ ເປັນເໝືອນດັ່ງ “ຮາກຖານທີ່ແໜ້ນໜາ” ຢູ່ໃນຊີວິດຂອງເຮົາແນວໃດ?

ຮີລາມັນ 5:29–33

ປະສົບການໃດແດ່ທີ່ເຮົາເຄີຍມີ ກ່ຽວກັບການຮັບຮູ້ສຸລະສຽງຂອງພຣະເຈົ້າ ໃນຊີວິດຂອງເຮົາ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສຶກສາສ່ວນຕົວ

ມີຄວາມອົດທົນກັບຕົວເອງ. ຮາກຖານຂອງສັດທາແມ່ນຖືກສ້າງຂຶ້ນເທື່ອລະເລັກເທື່ອລະນ້ອຍ. ຖ້າຫາກທ່ານພົບເຫັນຄຳສອນໃດໜຶ່ງ ຍາກທີ່ຈະເຂົ້າໃຈໃນເວລານີ້, ໃຫ້ມີຄວາມອົດທົນ. ໃຫ້ໄວ້ວາງໃຈວ່າ ຄວາມເຂົ້າໃຈຈະມີມາ ຂະນະທີ່ທ່ານສ້າງຮາກຖານຢູ່ເທິງພຣະເຢຊູຄຣິດ ໂດຍການໃຊ້ສັດທາ ແລະ ການສຶກສາຢ່າງພາກພຽນ.

ນີໄຟ ແລະ ລີໄຮ ຢູ່ໃນຄຸກ — © The Book of Mormon for Young Readers [ພຣະຄຳພີມໍມອນສຳລັບຜູ້ອ່ານທີ່ອາຍຸນ້ອຍ], Nephi and Lehi Encircled by a Pillar of Fire [ນີໄຟ ແລະ ລີໄຮ ຖືກລ້ອມດ້ວຍເລົາໄຟ], ໂດຍ ບຣິອານາ ຊໍຄຣອບ; ຫ້າມລອກແບບ