“ວັນທີ 27 ເດືອນກໍລະກົດ–ວັນທີ 2 ເດືອນສິງຫາ. ແອວມາ 39–42: ‘ແຜນແຫ່ງຄວາມສຸກອັນຍິ່ງໃຫຍ່,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 27 ເດືອນກໍລະກົດ–ວັນທີ 2 ເດືອນສິງຫາ. ແອວມາ 39–42,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ພຣະເຢຊູ ແລະ ນາງມາຣີ

Woman, Why Weepest Thou? [ນາງເອີຍ, ເປັນຫຍັງເຈົ້າຈຶ່ງຮ້ອງໄຫ້?] ໂດຍ ມາກ ອາ ພິວ

ວັນທີ 27 ເດືອນກໍລະກົດ–ວັນທີ 2 ເດືອນສິງຫາ

ແອວມາ 39–42

“ແຜນແຫ່ງຄວາມສຸກອັນຍິ່ງໃຫຍ່”

ຂະນະທີ່ທ່ານສຶກສາ ແອວມາ 39–42, ພຣະວິນຍານບໍລິສຸດສາມາດໃຫ້ຄວາມຮູ້ແກ່ທ່ານ ກ່ຽວກັບສິ່ງທີ່ກຳລັງເກີດຂຶ້ນຢູ່ໃນຊີວິດຂອງທ່ານ.

ບັນທຶກຄວາມປະທັບໃຈຂອງທ່ານ

ເມື່ອບາງຄົນທີ່ເຮົາຮັກໄດ້ເຮັດຄວາມຜິດທີ່ຮ້າຍແຮງ, ມັນອາດເປັນເລື່ອງຍາກທີ່ຈະຕອບຮັບ. ພາກສ່ວນໜຶ່ງທີ່ເຮັດໃຫ້ ແອວມາ 39–42 ມີຄ່າຫລາຍແມ່ນ ມັນເປີດເຜີຍວິທີທີ່ແອວມາ—ສານຸສິດຂອງພຣະຄຣິດຜູ້ຄັ້ງໜຶ່ງເຄີຍເປັນທຸກເພາະບາບຂອງເພິ່ນເອງທີ່ຕ້ອງກັບໃຈ—ໄດ້ຈັດການກັບສະຖານະການເຊັ່ນນັ້ນ. ໂຄຣິອານທັນ ລູກຊາຍຂອງແອວມາໄດ້ເຮັດບາບເລື່ອງການຮ່ວມເພດ, ແລະ ແອວມາ, ດັ່ງທີ່ເຄີຍເຮັດເລື້ອຍໆ, ໄດ້ໄວ້ວາງໃຈໃນພະລັງ ແລະ ຄວາມຈິງຂອງຄຳສອນ ເພື່ອຊຸກຍູ້ການກັບໃຈ (ເບິ່ງ ແອວມາ 4:19; 31:5). ໃນບົດເຫລົ່ານີ້, ເຮົາສັງເກດເຫັນຄວາມກ້າຫານຂອງແອວມາ ໃນການກ່າວໂທດບາບ ແລະ ຄວາມໂນ້ມອ່ຽງ ແລະ ຄວາມຮັກຂອງເພິ່ນສຳລັບ ໂຄຣິອານທັນ. ແລະ ໃນທີ່ສຸດ, ເຮົາຮູ້ສຶກເຖິງຄວາມໝັ້ນໃຈຂອງແອວມາ ວ່າພຣະຜູ້ຊ່ວຍໃຫ້ລອດ “ຈະສະເດັດມາເພື່ອເອົາ [ບາບ ແລະ] ເພື່ອປະກາດຂ່າວອັນໜ້າຊື່ນຊົມແຫ່ງຄວາມລອດ” ຕໍ່ຜູ້ທີ່ກັບໃຈ (ແອວມາ 39:15). ຄວາມຈິງທີ່ໂຄຣິອານທັນ ໃນທີ່ສຸດໄດ້ກັບຄືນມາສູ່ວຽກງານຂອງການປະຕິບັດສາດສະໜາຈັກ (ເບິ່ງ ແອວມາ 49:30) ສາມາດໃຫ້ຄວາມຫວັງແກ່ເຮົາ ທີ່ຈະໄດ້ຮັບການໃຫ້ອະໄພ ແລະ ການໄຖ່ ເມື່ອເຮົາ “ກັງວົນ” (ແອວມາ 42:29) ກ່ຽວກັບບາບຂອງເຮົາເອງ ຫລື ບາບຂອງບາງຄົນທີ່ເຮົາຮັກ.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ແອວມາ 39

ບາບເລື່ອງການຮ່ວມເພດເປັນສິ່ງໜ້າກຽດຊັງໃນສາຍພຣະເນດຂອງພຣະຜູ້ເປັນເຈົ້າ.

ເພື່ອຊ່ວຍລູກຊາຍຂອງເພິ່ນໃຫ້ເຂົ້າໃຈເຖິງຄວາມຮ້າຍແຮງຂອງບາບເລື່ອງການຮ່ວມເພດ, ແອວມາໄດ້ສິດສອນ “ວ່າສິ່ງເຫລົ່ານີ້ເປັນໜ້າກຽດຊັງໃນສາຍພຣະເນດຂອງພຣະຜູ້ເປັນເຈົ້າ” (ແອວມາ 39:5). ເປັນຫຍັງພົມມະຈັນຈຶ່ງສຳຄັນຕໍ່ທ່ານ? ເປັນຫຍັງມັນຈຶ່ງສຳຄັນຕໍ່ພຣະຜູ້ເປັນເຈົ້າ? ຄຳອະທິບາຍດັ່ງຕໍ່ໄປນີ້ ຈາກແອວເດີ ແຈັບຟະຣີ ອາ ຮໍແລນ ອາດເປັນປະໂຫຍດ:

“ເຫັນໄດ້ຢ່າງແຈ່ມແຈ້ງວ່າ ຄວາມເປັນຫ່ວງຂອງພຣະອົງກ່ຽວກັບຄວາມເປັນມະຕະ ແມ່ນວິທີທີ່ບຸກຄົນໄດ້ເຂົ້າມາສູ່ໂລກນີ້ ແລະ ວິທີທີ່ເຂົາອອກໄປຈາກມັນ. ພຣະອົງໄດ້ຈັດຕັ້ງຂອບເຂດທີ່ເຄັ່ງຄັດໄວ້ ໃນເລື່ອງເຫລົ່ານີ້.

“… ຄວາມສຳພັນທາງເພດຂອງມະນຸດ ໄດ້ຖືກສະຫງວນໄວ້ສຳລັບຄູ່ຜົວເມຍທີ່ແຕ່ງງານ ເພາະມັນເປັນເຄື່ອງໝາຍສູງສຸດຂອງການສົມລົດຢ່າງໝົດຈົດ, ເປັນຄວາມໝົດຈົດ ແລະ ເປັນການສົມລົດທີ່ຖືກແຕ່ງຕັ້ງ ແລະ ຖືກກຳນົດໂດຍພຣະເຈົ້າ. … ການແຕ່ງງານແມ່ນມີເຈດຕະນາ ໃຫ້ໝາຍເຖິງການລວມຕົວກັນຢ່າງສົມບູນຂອງຊາຍ ແລະ ຍິງ. … ນີ້ແມ່ນການສົມລົດທີ່ສົມບູນແບບດັ່ງກ່າວ ຊຶ່ງເຮົາໃຊ້ຄຳວ່າ ຜະນຶກ ເພື່ອຖ່າຍທອດຄຳສັນຍານິລັນດອນຂອງມັນ” (“Personal Purity,” Ensign, Nov. 1998, 76).

ໃຫ້ພິຈາລະນາຄຳແນະນຳທີ່ແອວມາໄດ້ມອບໃຫ້ແກ່ໂຄຣິອານທັນ ຢູ່ໃນ ແອວມາ 39:8–15. ມັນຊ່ວຍທ່ານໃຫ້ເຂົ້າໃຈຫລາຍກວ່າເກົ່າ ເຖິງຄວາມສຳຄັນຂອງກົດພົມມະຈັນ ແລະ ເຖິງວິທີທີ່ຈະເອົາຊະນະການລໍ້ລວງແນວໃດ? ຄຳສອນຂອງແອວມາກໍສະແດງໃຫ້ເຫັນເຖິງຄວາມວ່ອງໄວຂອງພຣະຜູ້ເປັນເຈົ້າທີ່ຈະໃຫ້ອະໄພເຮົາ ເມື່ອເຮົາກັບໃຈ ແລະ ວ່າມັນມີຄວາມຫວັງສຳລັບເຮົາທຸກຄົນ. ຂະນະທີ່ທ່ານອ່ານ ແອວມາ 39–42 ໃນອາທິດນີ້, ໃຫ້ຊອກຫາຫລັກຖານຂອງຄວາມເມດຕາຂອງພຣະເຈົ້າ. ຄວາມເມດຕາຂອງພຣະເຈົ້າເປັນພອນໃຫ້ທ່ານແນວໃດ?

ເບິ່ງ “ຄວາມບໍລິສຸດທາງເພດ,” ສຳລັບຄວາມເຂັ້ມແຂງຂອງຊາວໜຸ່ມ, 35–37 ນຳອີກ.

ແອວມາ 40–41

ເຮົາຈະຟື້ນຄືນຊີວິດ ແລະ ຢືນຢູ່ຕໍ່ພຣະພັກຂອງພຣະເຈົ້າ ເພື່ອຮັບການພິພາກສາ.

ເມື່ອແອວມາໄດ້ສັງເກດເຫັນວ່າ ໂຄຣິອານທັນມີຄຳຖາມກ່ຽວກັບການຟື້ນຄືນຊີວິດ, ເພິ່ນຈຶ່ງໄດ້ສິດສອນລາວກ່ຽວກັບສິ່ງທີ່ຈະເກີດຂຶ້ນຫລັງຈາກເຮົາຕາຍ. ຄວາມຈິງໃດແດ່ທີ່ແອວມາໄດ້ສິດສອນ ຢູ່ໃນ ບົດທີ 40–41 ທີ່ເປັນປະໂຫຍດຕໍ່ໂຄຣິອານທັນ—ແລະ ຜູ້ທີ່ໄດ້ເຮັດການບາບ—ໃຫ້ເຂົ້າໃຈ? ທ່ານສາມາດຈັດລະບຽບສິ່ງທີ່ທ່ານໄດ້ຮຽນຮູ້ ໂດຍການຊີ້ບອກຫົວຂໍ້ທີ່ແອວມາໄດ້ກ່າວ (ດັ່ງເຊັ່ນ ໂລກວິນຍານ, ການຟື້ນຄືນຊີວິດ, ແລະ ການຟື້ນຟູ) ແລະ ແລ້ວໃຫ້ຂຽນສິ່ງທີ່ແອວມາໄດ້ສິດສອນກ່ຽວກັບແຕ່ລະຢ່າງ. ການຈື່ຈຳຄວາມຈິງເຫລົ່ານີ້ສາມາດຊ່ວຍທ່ານຕອນທີ່ທ່ານຮູ້ສຶກຢາກຂໍການໃຫ້ອະໄພ ຫລື ສະແຫວງຫາການໃຫ້ອະໄພແນວໃດ?

ແອວມາ 40

ເຮົາສາມາດສະແຫວງຫາຄຳຕອບຕໍ່ຄຳຖາມເລື່ອງພຣະກິດຕິຄຸນ ດ້ວຍສັດທາ.

ບາງເທື່ອເຮົາອາດຄິດວ່າ ສາດສະດາຮູ້ຈັກຄຳຕອບຕໍ່ຄຳຖາມເລື່ອງພຣະກິດຕິຄຸນທຸກຂໍ້. ແຕ່ໃຫ້ສັງເກດເບິ່ງວ່າ ຕະຫລອດທົ່ວ ບົດທີ 40, ແອວມາບໍ່ມີຄຳຕອບຕໍ່ຄຳຖາມຫລາຍຂໍ້ ກ່ຽວກັບຊີວິດຫລັງຈາກຄວາມຕາຍ. ເພິ່ນໄດ້ເຮັດສິ່ງໃດ ເພື່ອຊອກຫາຄຳຕອບ? ເພິ່ນໄດ້ເຮັດສິ່ງໃດ ເມື່ອເພິ່ນບໍ່ມີຄຳຕອບ? ໃຫ້ພິຈາລະນາຕົວຢ່າງຂອງແອວມາ ທີ່ອາດຊ່ວຍທ່ານກັບຄຳຖາມເລື່ອງພຣະກິດຕິຄຸນທີ່ທ່ານມີ.

ກນອະທິຖານເປັນວິທີໜຶ່ງທີ່ເຮົາສາມາດພົບເຫັນຄຳຕອບຕໍ່ຄຳຖາມເລື່ອງພຣະກິດຕິຄຸນ.

ແອວມາ 42

ການຊົດໃຊ້ຂອງພຣະເຢຊູຄຣິດເຮັດໃຫ້ແຜນແຫ່ງການໄຖ່ເປັນໄປໄດ້.

ໂຄຣິອານທັນໄດ້ເຊື່ອວ່າການລົງໂທດສຳລັບບາບ ບໍ່ຍຸດຕິທຳ (ເບິ່ງ ແອວມາ 42:1). ແຕ່ແອວມາໄດ້ສິດສອນວ່າ ມັນມີວິທີທາງທີ່ຈະໜີຈາກ “ສະພາບແຫ່ງຄວາມທຸກທໍລະມານ” ທີ່ບາບນຳເຮົາໄປສູ່: ວິທີທາງແມ່ນການກັບໃຈ ແລະ ການມີສັດທາໃນການຊົດໃຊ້ຂອງພຣະເຢຊູຄຣິດ, ຊຶ່ງທັງສອງເປັນຄວາມເມດຕາ ແລະ ຄວາມທ່ຽງທຳ (ເບິ່ງ ແອວມາ 42:15). ຂະນະທີ່ທ່ານອ່ານ ແອວມາ 42, ໃຫ້ຊອກຫາວິທີທີ່ການຊົດໃຊ້ຂອງພຣະຜູ້ຊ່ວຍໃຫ້ລອດ ເຮັດໃຫ້ເປັນໄປໄດ້ສຳລັບເຮົາທີ່ຈະໄດ້ຮັບຄວາມເມດຕາປາດສະຈາກ “[ການ] ຂະໂມຍຄວາມຍຸດຕິທຳ” ແນວໃດ (ຂໍ້ທີ 25). ຄວາມຈິງໃດແດ່ທີ່ທ່ານພົບເຫັນຢູ່ໃນບົດນີ້ ທີ່ຊ່ວຍທ່ານໃຫ້ຮູ້ສຶກເຖິງຄວາມເມດຕາຂອງພຣະອົງ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

ແອວມາ 39:1–9

ຄອບຄົວຂອງທ່ານຈະໄດ້ຮັບຜົນປະໂຫຍດຈາກການສົນທະນາກ່ຽວກັບກົດພົມມະຈັນບໍ? ຖ້າຈະໄດ້, ໃຫ້ພິຈາລະນາທີ່ຈະໃຊ້ແຫລ່ງຊ່ວຍເຫລືອດັ່ງຕໍ່ໄປນີ້ ອີງຕາມຄວາມຕ້ອງການຂອງຄອບຄົວຂອງທ່ານ: ແອວມາ 39:1–9; “ຄວາມບໍລິສຸດທາງເພດ,” ສຳລັບຄວາມເຂັ້ມແຂງຂອງຊາວໜຸ່ມ, 35–37. ໃຫ້ໄຕ່ຕອງວິທີທີ່ທ່ານສາມາດຊ່ວຍຄອບຄົວຂອງທ່ານໃຫ້ເຂົ້າໃຈພອນຂອງກົດພົມມະຈັນ ແລະ ຄວາມສະໜິດສະໜົມໃນການແຕ່ງງານ (ສຳລັບຕົວຢ່າງ, ໃຫ້ເບິ່ງວິດີໂອ “How to Talk to Your Kids about Intimacy” ຢູ່ທີ່ ChurchofJesusChrist.org).

ແອວມາ 39:9–15

ເຮົາຮຽນຮູ້ຫຍັງແດ່ຈາກຂໍ້ເຫລົ່ານີ້ ກ່ຽວກັບການຫລີກເວັ້ນຈາກບາບ?

ແອວມາ 42:4

ທ່ານສາມາດຫລິ້ນເກມ ຊຶ່ງໃນເຈ້ຍມີຄຸນລັກສະນະຂອງການເປັນເໝືອນດັ່ງພຣະຄຣິດ ຫລື ຫລັກທຳພຣະກິດຕິຄຸນຂຽນໃສ່ຢູ່ໃນນັ້ນ ຢາຍຢູ່ທົ່ວຫ້ອງ. ທ່ານສາມາດເຫັນໄດ້ວ່າ ສະມາຊິກໃນຄອບຄົວສາມາດເກັບເຈ້ຍເຫລົ່ານັ້ນໄດ້ຫລາຍປານໃດ ຕາມເວລາທີ່ກຳນົດໄວ້, ແລ້ວໃຫ້ສົນທະນາກັນກ່ຽວກັບສິ່ງທີ່ຂຽນໄວ້ຢູ່ໃນເຈ້ຍ ຊ່ວຍເຮົາກາຍເປັນເໝືອນດັ່ງພຣະເຈົ້າຫລາຍກວ່າເກົ່າແນວໃດ. “ເວລາທີ່ປະທານໃຫ້” ແກ່ເຮົາຢູ່ໃນໂລກນີ້ ເປັນຄືກັນກັບເວລາທີ່ກຳນົດໄວ້ຢູ່ໃນເກມນີ້ແນວໃດ? ເຮົາຈະໃຊ້ “ເວລາແຫ່ງການທົດລອງ” ຂອງເຮົາຢູ່ເທິງແຜ່ນດິນໂລກ ເພື່ອກາຍເປັນເໝືອນດັ່ງພຣະຜູ້ຊ່ວຍໃຫ້ລອດຫລາຍກວ່າເກົ່າແນວໃດ?

ແອວມາ 42:12–15, 22–24

ບາງທີທ່ານສາມາດສະແດງຄວາມສຳພັນລະຫວ່າງຄວາມທ່ຽງທຳ ແລະ ຄວາມເມດຕາ ໂດຍການໃຊ້ຮູບພາບຕາຊັ່ງທີ່ລຽບງ່າຍ ເພື່ອສົນທະນາກ່ຽວກັບຄຳຖາມ ຄືກັນກັບດັ່ງຕໍ່ໄປນີ້: ຕາຊັ່ງຈະເປັນຈັ່ງໃດເມື່ອເຮົາເຮັດການບາບ? ຄວາມຍຸດຕິທຳຮຽກຮ້ອງສິ່ງໃດ ເພື່ອໃຫ້ຕາຊັ່ງສົມດູນ? ພຣະຜູ້ຊ່ວຍໃຫ້ລອດສະໜອງຄວາມຮຽກຮ້ອງຂອງຄວາມຍຸດຕິທຳ ແລະ ເຮັດໃຫ້ຄວາມເມດຕາເປັນໄປໄດ້ແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສິດສອນຂອງເຮົາ

ເອົາໃຈໃສ່ຕໍ່ຫລັກທຳທີ່ຈະເປັນພອນໃຫ້ແກ່ຄອບຄົວຂອງທ່ານ. ຂະນະທີ່ທ່ານສຶກສາພຣະຄຳຂອງພຣະເຈົ້າດ້ວຍການອະທິຖານ, ໃຫ້ຖາມຕົວເອງວ່າ, “ເຮົາພົບເຫັນຫຍັງແດ່ຢູ່ບ່ອນນີ້ ທີ່ຈະມີຄວາມໝາຍຕໍ່ຄອບຄົວຂອງເຮົາໂດຍສະເພາະ?” ໃຫ້ສະແຫວງຫາການຊີ້ນຳຈາກພຣະວິນຍານ ຂະນະທີ່ທ່ານໄຕ່ຕອງວິທີທີ່ຈະຊ່ວຍຄອບຄົວຂອງທ່ານໃຫ້ຄົ້ນພົບຄວາມຈິງເຫລົ່ານີ້.