“Kaum Hli Ntuj 19–25. 3 Nifais 27–4 Nifais: ‘Tsis Tau Muaj Ib co Neeg uas Zoo Siab Tshaj,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Kaum Hli Ntuj 19–25. 3 Nifais 27–4 Nifais,” Los, Nrog Kuv Mus—Rau Ib Leeg thiab Tsev Neeg: 2020
Khetos zaj Lus Thov, los ntawm Derek Hegsted
Kaum Hli Ntuj 19–25
3 Nifais 27–4 Nifais
“Tsis Tau Muaj Ib co Neeg uas Zoo Siab Tshaj”
Tus Tswv txib Nws cov thwj tim sau ntawv txog tej yam uas lawv kawm (saib 3 Nifais 27:23–24). Thaum koj kawm ntawv, cia li sau ntawv txog tej yam uas tus ntsuj plig qhia koj.
Sau Ntawv txog Koj tej Kev Tshoov Siab
Yexus Khetos tej lus qhia tsis yog laj lim tswv yim zoo rau koj xav txog xwb. Nws tej lus qhia yeej muaj nqis ntxiv—Nws tej lus qhia yuav hloov peb lub neej. Phau 4 Nifais qhia ib tug yam ntxwv txog qhov no, nws qhia tias tus Cawm Seej txoj moo zoo txawj hloov tib neeg lub siab tag nrho. Tom qab Yexus txoj kev qhuab qhia, cov Neeg Nifais thiab cov Neeg Lamas txoj kev sib ntxub twb tiav tas lawm. Ob haiv neeg no uas dhau los sib cav thiab muab hlob heev twb los “ua ib pab, uas yog Khetos cov me nyuam” (4 Nifais 1:17), thiab lawv twb pib “muaj txhua yam zoo sib xws nyob hauv lawv” (4 Nifais 1:3). “Vajtswv txoj kev hlub [twb] nyob hauv cov neeg lub siab” thiab “twb tsis tau muaj ib co neeg uas yuav zoo siab tshaj nyob hauv tag nrho cov neeg uas Vajtswv txhais tes tau tsim los” (4 Nifais 1:15–16). Tus Cawm Seej tej lus qhia twb tau hloov cov Neeg Nifais thiab cov Neeg Lamas lub siab li no. Nws tej lus qhia tab tom hloov koj lub siab li cas?
Tej lub Tswv Yim Kawm Vaj Lug Kub ntawm Yus Ib Leeg
Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog hu raws li Nws lub npe.
Thaum tus Cawm Seej cov thwj tim pib tsa Nws lub Koom Txoos nyob thoob plaws thaj av, pib muaj lus nug, uas ib txhia xav tias tsis tshua tseem ceeb—lawv yuav tsum hu Nws lub Koom Txoos li cas? (saib 3 Nifais 27:1–3). Koj kawm dab tsi txog qhov uas lub npe tseem ceeb heev los ntawm tus Cawm Seej tej lus teb nyob hauv 3 Nifais 27:4–12? Thaum xyoo 1838 tus Tswv tau qhia Nws lub Koom Txoos lub npe niaj hnub no (saib Lus Qhuab Qhia thiab Kev Khi Lus 115:4). Cia li xav txog txhua lo lus ntawm lub npe ntawd. Tej lus no pab peb li cas kom paub tias peb yog leej twg, peb ntseeg dab tsi, thiab peb yuav tsum ua dab tsi?
Kuj saib Russell M. Nelson, “Lub Koom Txoos lub Npe uas Raug Lawm,” Ensign los sis Liahona, Kaum Ib Hlis Ntuj 2018, 87–80; M. Russell Ballard, “The Importance of a Name,” Ensign los sis Liahona, Kaum Ib Hlis Ntuj 2011, 79–82.
Thaum kuv hloov kuv lub siab kom ua dawb huv, kuv hloov los ua ib tug thwj tim rau siab ntseeg ntxiv.
Koj yuav hais li cas yog tus Cawm Seej nug koj, ib yam li Nws tau nug Nws cov thwj tim tias, “Nej xav tau dab tsi ntawm kuv?” (3 Nifais 28:1). Cia li xav txog qhov no thaum koj nyeem txog tus Cawm Seej cov thwj tim nyob hauv 3 Nifais 28:1–11. Koj kawm dab tsi txog cov thwj tim lub siab xav los ntawm lawv txoj kev teb Nws tej lus nug? Thawj Tswj Hwm Dallin H. Oaks qhia tias: “Yog peb yuav tau txoj sia nyob mus ib txhis, peb yuav tsum muaj siab xav thiab ua hauj lwm kom hloov los ua ib tug neeg nyob mub ib txhis. … Peb yuav xav hloov los ua neeg zoo li [Yexus Khetos]” (“Desire,” Ensign los sis Liahona, Tsib Hlis Ntuj 2011, 44–45). Koj yuav ua li cas kom koj lub siab xav ua ncaj ncees? (Yog xav paub ntxiv txog “txoj kev hloov … rau [peb tug thwj tim] lub cev,” cia li saib 3 Nifais 28:37 thiab “Neeg uas Muab Plhis,” Phau Qhia txog Vaj Lug Kub, scriptures.ChurchofJesusChrist.org.)
Kev hloov siab los ntseeg Yexus Khetos thiab Nws txoj moo zoo ua rau tib neeg koom siab koom ntsws thiab muaj kev zoo siab.
Koj puas txawj xav tias yog koj tau ua neej nyob tom qab tus Cawm Seej tuaj xyuas ces yuav zoo li cas? Cov neeg tau ua li cas kom muaj kev kaj siab lug tau ntev—yuav luag 200 xyoo? Thaum koj kawm 4 Nifais 1:1–18, cia li xav seb koj puas yuav sau lub cim rau tej yam uas cov neeg xaiv kom muaj lub neej zoo li no.
Xav seb koj yuav ua li cas kom pab koj tsev neeg, pawg ntseeg, los sis zej zog ua neej nyob koom siab thiab muaj kev zoo siab, ib yam li cov neeg nyob hauv 4 Nifais. Koj puas yuav ua raws li Yexus Khetos tej lus qhia twg kom ua raws li lub hom phiaj no? Koj yuav ua li cas kom pab lwm tus to taub thiab ua raws li tej lus qhia no?
Kev ua phem ua rau tib neeg sib faib thiab muaj kev tu siab.
Yog ib qho nyuaj siab uas cov neeg Xi-oos nyob hauv 4 Nifais (kuj saib Mauxes 7:18) tau ploj mus thaum kawg. Thaum koj nyeem 4 Nifais 1:19–49, nrhiav tej cwj pwm thiab tej yam ntxwv uas ua rau cov neeg no ploj mus. Koj puas pom tej lub cim twg txog tej cwj pwm los sis tej yam ntxwv li no nyob hauv koj tus kheej?
Kuj saib “Chapter 18: Beware of Pride,” Teachings of Presidents of the Church: Ezra Taft Benson (2014), 229–40.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
3 Nifais 27:13–21
Tej nqe no yuav pab nej tsev neeg to taub zoo dua txog qhov uas tus Cawm Seej hais thaum Nws hais txog “kuv txoj moo zoo.” Tom qab nej nyeem thiab sib tham txog tej nqe no, tej zaum nej yuav xav hais kom txhua tus hauv nej tsev neeg hais ib kab lus hais tias lub ntsiab ntawm txoj moo zoo yog dab tsi.
3 Nifais 27:23–26
Peb ua zoo li cas sau ntawv txog tej yam uas peb tau “pom thiab tau hnov”—nyias sau nyias los sis ib tsev neeg sau ua ke? Vim li cas qhov uas peb sau ntawv txog tej yam ntawm sab ntsuj plig yog ib qho tseem ceeb?
3 Nifais 27:30–31
Xwv kom pab nej tsev neeg to taub kev xyiv fab uas tus Cawm Seej hais txog nyob hauv tej nqe no, tej zaum nej yuav xav ua si cia ib tug mus nkaum thiab cia lwm tus mus nrhiav nws. Tej zaum qhov no yuav ua rau nej xav sib tham seb vim li cas yog ib qho tseem ceeb nrhiav txhua tus hauv nej tsev neeg thiaj li “tsis muaj ib tug uas ploj mus.” Peb yuav ua li cas pab peb tsev neeg muaj zog ntseeg txoj moo zoo los sis pab lawv rov qab los yog tias lawv twb ncaim mus lawm?
3 Nifais 28:17–18, 36–40
Peb kawm dab tsi los ntawm Maumoos tus yam ntxwv thaum nws tsis to taub txhua yam txog qhov uas peb tus thwj tim uas yog Neeg Nifais tau hloov li cas? Peb yuav ua li cas thaum peb tsis to taub txhua yam txog txoj moo zoo ib lub ntsiab cai? Thawj Tswj Hwm Dieter F. Uchtdorf qhia hais tias: “Vajtswv yeej hlub nej. Nws yuav mloog, thiab Nws yuav teb nej tej lus nug. Raws li txoj kev thiab lub sij hawm uas Nws pom zoo, Nws yuav teb nej tej lus thov, thiab yog li ntawd, nej yuav tsum kawm mloog Nws lub suab” (“Txais Lus Tim Khawv txog Qhov Kaj thiab Qhov Tseeb,” Ensign los sis Liahona, Kaum Ib Hlis Ntuj 2014, 21).
4 Nifais 1:15
Xwv kom pab nej tsev neeg tsis txhob sib cav sib ceg, tej zaum nej yuav xav cuab hom phiaj sib hlub lub lim tiam no. Tom qab lim tiam no tas lawm, cia li sib tham ua ke seb qhov uas nej sib hlub ntxiv tau pab nej tsev neeg li cas.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Nrhiav kev kom txais kev tshwm sim txhua hnub. Feem ntau peb txais kev tshwm sim “ib nqe lus ntxiv rau ib nqe lus” (2 Nifais 28:30). Tom qab koj xav txog tej nqe uas koj kawm, tej zaum tej lub tswv yim thiab kev tshoov siab yuav los rau koj hnub ntawd. Tsis txhob xav tias kev kawm txoj moo zoo yog ib yam uas koj yuav tsum teem sij hawm ua xwb tiam sis yog cia li xav tias yog ib yam uas koj ua tas li (saib Teaching in the Savior’s Way, 12).
Khetos nrog Peb tug Thwj Tim uas Yog Neeg Nifais, los ntawm Gary L. Kapp