“Cuaj Hlis Ntuj 28–Kaum Hli Ntuj 11. 3 Nifais 17–19: ‘Saib Seb, Kuv txoj Kev Xyiv Fab Twb Puv Npo,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Cuaj Hlis Ntuj 28–Kaum Hli Ntuj 11. 3 Nifais 17–19”, Los, Nrog Kuv Mus—Rau Ib Leeg thiab Tsev Neeg: 2020
Txoj Kev Kaj ntawm Nws lub Ntsej Muag Tau Ci rau Lawv, los ntawm Gary L. Kapp
Cuaj Hlis Ntuj 28–Kaum Hli Ntuj 11
3 Nifais 17–19
“Saib Seb, Kuv txoj Kev Xyiv Fab Twb Puv Npo”
Txawm tej tshooj nyob hauv 3 Nifais ua ntej tau hais ntau txog tus Cawm Seej tej lus, tshooj 17–19 piav txog Nws txoj kev qhuab qhia thiab tej lus qhia rau cov neeg. Thaum koj nyeem tej tshooj no, tus Ntsuj Plig qhia dab tsi rau koj txog tus Cawm Seej?
Sau Ntawv txog Koj tej Kev Tshoov Siab
Yexus Khetos twb tau siv ib hnub qhuab qhia nyob hauv thaj av Huaj Vam, qhia txog Nws txoj moo zoo, cia cov neeg muaj sij hawm pom thiab xuas tej qhov ntsia hlau hauv Nws lub cev uas tau sawv rov los, thiab ua tim khawv tias Nws yog tus Cawm Seej uas cov yaj saub cog lus tias yuav los. Tiam sis twb txog lub sij hawm rau Nws mus. Nws yuav tsum rov qab mus cuag Nws Leej Txiv, thiab Nws paub tias cov neeg yuav tsum muaj sij hawm xav txog tej yam uas Nws tau qhia. Yog li ntawd vim nws cog lus tias Nws yuav rov qab los tag kis, Nws xa cov neeg mus rau lawv tej tsev. Tiam sis tsis muaj leej twg mus. Lawv tsis tau hais tias lawv xav li cas, tiam sis Yexus paub lawm: lawv cia siab tias Nws yuav “nrog lawv nyob ib nyuag ntev me ntsis” (3 Nifais 17:5). Nws twb muaj tej yam tseem ceeb ntxiv ua, tiam sis lub cib fim kom qhia tias yus hlub neeg los yeej tsis yog thaum ib lub sij hawm yooj yim, yog li ntawd Yexus twb tau nrog cov neeg nyob ib nyuag ntev me ntsis. Qhov uas muaj tom qab ntawd los tej zaum yog kev txhawb pab zoo tshaj plaws uas tau sau hauv vaj lug kub. Cov uas nyob ntawd tsuas paub hais tias yog ib lub sij hawm uas piav tsis tau (saib 3 Nifais 17:16–17). Yexus twb hais txog lub sij hawm uas muaj tus Ntsuj Plig nplua mias no li no hais tias: “Nim no saib seb, kuv txoj kev xyiv fab twb puv npo” (3 Nifais 17:20)
Tej lub Tswv Yim Kawm Vaj Lug Kub ntawm Yus Ib Leeg
Tus Cawm Seej yog tus yam ntxwv zoo tag nrho txog kev txhawb pab.
Peb paub tias muaj kwv yees li 2,500 tug neeg (saib 3 Nifais 17:25) uas tau pom Khetos txoj kev los zaum thib ib, raws li qhia nyob hauv 3 Nifais 11–18. Tiam sis tus Cawm Seej twb nrhiav kev txhawb pab lawv ib leeg zuj zus. Kawm kawm dab tsi txog kev txhawb pab los ntawm tus Cawm Seej tus yam ntxwv nyob hauv tshooj no? Nws txoj kev txhawb pab tau pab lawv li cas? Cia li xav seb Nws tus yam ntxwv yuav pab koj li cas kom txhawb pab lwm tus.
Saib Seb Nej cov Me Nyuam Yaus, los ntawm Gary L. Kapp
3 Nifais 17:13–22; 18:15–25; 19:6–9, 15–36
Tus Cawm Seej tau qhia peb kom peb paub thov Vajtswv li cas.
Cia li xav seb yuav zoo li cas yog koj hnov tus Cawm Seej thov Vajtswv pab koj. Koj xav tias Nws yuav hais li cas kom pab tau koj? Nws tej lus qhia thiab tej lus thov nyob hauv tej tshooj no tej zaum yuav pab koj muaj tswv yim. Thaum koj kawm, koj kawm dab tsi los ntawm Khetos tus yam ntxwv uas yuav pab koj tej lus thov Vajtswv muaj nqis dua li qub? Koj twb tau txais tej koob hmoov twg los ntawm kev thov Vajtswv hauv koj lub neej?
Kuv sab ntsuj plig yuav tsau plab thaum kuv noj lub cim nco txog.
Thaum koj nyeem 3 Nifais 18:1–12, cia li xav seb lub cim nco txog yuav ua li cas kom pab koj “tsau” ntawm sab ntsuj plig (3 Nifais 18:3–5, 9; kuj saib 3 Nifais 20:1–9). Piv txwv hais tias, tej zaum koj yuav xav sau ib cov lus nug kom koj xav txog koj lub neej thaum koj txais lub cim nco txog, xws li “Kuv xav li cas txog tus Cawm Seej thiab Nws txoj kev txi rau kuv?” “Nws txoj kev txi pab kuv lub neej txhua hnub li cas?” los sis “Kuv ua tej yam zoo twg, thiab kuv txawj ua tej yam twg zoo dua ntxiv?”
Tej zaum tej lus no los ntawm Thawj Tswj Hwm Henry B. Eyring yuav pab koj xav txog ib txoj kev uas lub cim nco txog yuav pab koj tsau lawm ntawm sab ntsuj plig: “Thaum nej xav txog nej lub neej thaum ua kab ke txais lub cim nco txog, kuv cia siab hais tias nej yuav tsis xav txog tej yam uas nej ua tsis yog lawm xwb tiam sis kuj xav txog tej yam uas nej tau ua yog lawm—tej lub sij hawm thaum nej xav tias Leej Txiv Saum Ntuj Ceeb Tsheej thiab tus Cawm Seej zoo siab rau nej. Tej zaum nej yuav xav siv ib me pliag thaum nej txais lub cim nco txog kom thov Vajtswv pab nej pom tej yam no. … Thaum kuv tau ua li no, tus Ntsuj Plig tau tshoov kuv lub siab qhia kuv tias txawm yog tshuav ntev heev kuv thiaj yuav ua neeg zoo tag nrho los, hnub no kuv twb ua zoo dua li nag hmo. Thiab qhov no yeej ua rau kuv ntseeg hais tias, vim muaj tus Cawm Seej, kuv ua tau zoo dua tag kis” (“Always Remember Him,” Ensign, Ob Hlis Ntuj 2018, 5).
Yexus Khetos cov thwj tim yeej nrhiav lub txiaj ntsim Vaj Ntsuj Plig Dawb Huv.
Cia li xav txog ib zaug thaum koj tau thov Vajtswv tsis ntev tas los. Koj tej kev thov Vajtswv qhia dab tsi rau koj txog tej yam uas koj lub siab xav? Tom qab lawv nrog tus Cawm Seej nyob tas ib hnub, cov neeg twb “thov rau qhov uas lawv xav tau tshaj plaws”—lub txiaj ntsim Vaj Ntsuj Plig Dawb Huv (3 Nifais 19:9). Thaum koj nyeem tej nqe no, cia li xav txog qhov uas koj xav tau tus Vaj Ntsuj Plig Dawb Huv npaum li cas. Koj kawm dab tsi txog txoj kev xav muaj tus Vaj Ntsuj Plig Dawb Huv nrog koj nyob?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
3 Nifais 17
Thaum nej tsev neeg nyeem tshooj no ua ke, xav seb nej puas nres tej lub sij hawm kom caw nej tsev neeg xav txog tej yam uas muaj haud zoo li lawv nyob ntawd. Piv txwv hais tias, nej nug tau hais tias “Nej yuav thov kom tus Cawm Seej kho tej yam twg?” “Nej yuav xav kom nws thov Vajtswv pab koj li cas?” los sis “Nej yuav xav kom Nws foom koob hmoov rau leej twg?” Tej zaum tshooj no yuav tshoov nej lub siab kom nej thov Vajtswv rau nej tsev neeg, ib leeg zuj zus, li Yexus tau ua.
3 Nifais 18:1–12
Qhov uas yus “tsau” lawm thaum yus txais lub cim nco txog txhais li cas, thiab peb yuav ua li cas kom tsau li ntawd? Peb kawm dab tsi los ntawm nqe 5–7 txog qhov uas vim li cas Yexus muab kab ke ua lub cim nco txog rau peb?
3 Nifais 18:17–21
Peb kawm dab tsi los ntawm tej nqe no txog qhov uas vim li cas peb thov Vajtswv? Peb yuav ua li cas kom peb tej kev thov Vajtswv muaj hwj chim ntawm sab ntsuj plig, thaum peb thov ib leeg xwb thiab thaum peb tsev neeg thov Vajtswv ua ke?
3 Nifais 18:25; 19:1–3
Peb tsev neeg tau txais dab tsi los ntawm txoj moo zoo uas peb xav kom txhua leej txhua tus txais tau? Peb yuav ua li cas kom coj raws li cov neeg hauv tej nqe no tus yam ntxwv thiab “ua hauj lwm heev” (3 Nifais 19:3) kom coj lwm tus los cuag Khetos, kom lawv kuj yuav “xuas thiab pom” (3 Nifais 18:25) tej yam uas peb kawm los ntawm txoj moo zoo?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Cia tus Ntsuj Plig coj koj txoj kev kawm vaj lug kub. Tus Vaj Ntsuj Plig Dawb Huv yuav coj koj kawm txog tej yam uas koj xav tau txhua hnub. Cia li ua tib zoo mloog Nws tej kev tshoov siab, txawm yog ua rau koj xav kawm ib lub ntsiab lus txawv los sis ua rau koj siv ib txoj kev txawv kawm vaj lug kub uas koj tsis tau siv dua. Piv txwv hais tias, thaum koj nyeem txog lub cim nco txog hauv 3 Nifais 18, tej zaum tus Ntsuj Plig yuav tshoov koj lub siab kom siv sij hawm ntxiv kawm lub ntsiab lus ntawd tshaj qhov koj tau npaj siab koj yuav kawm.
Lawv Pom Rooj Ntug Qhib, los ntawm Walter Rane