“Kaum Hli Ntuj 12–18 3 Nifais 20–26: ‘Nej Yog cov Me Nyuam ntawm txoj Kev Khi Lus,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Kaum Hli Ntuj 12–18 3 Nifais 20–26”, Los, Nrog Kuv Mus—Rau Ib Leeg thiab Tsev Neeg: 2020
Kev kos duab txog Khetos txoj kev tshwm sim rau cov Neeg Nifais los ntawm Andrew Bosley
Kaum Hli Ntuj 12–18
3 Nifais 20–26
“Nej Yog cov Me Nyuam ntawm txoj Kev Khi Lus”
Thaum Nws hais txog cov vaj lug kub, Yexus tau siv lo lus tshawb xyuas ntau (saib 3 Nifais 20:11; 23:1, 5). Thaum koj nyeem 3 Nifais 20–26, koj yuav tshawb xyuas dab tsi?
Sau Ntawv txog Koj tej Kev Tshoov Siab
Thaum koj hnov tib neeg hais tej lus xws li tsev neeg Ixayees, koj puas xav tias lawv hais txog koj? Cov Neeg Nifais thiab cov Neeg Lamas yog neeg Ixayees cov xeeb ntxwv tiag tiag—lawv zaj pib thaum lawv nyob hauv Yeluxalees—tiam sis ib txhia xav tias Yeluxalees yog ib “ib thaj av uas nyob deb, ib thaj av uas peb tsis paub” (Hilamas 16:20). Lawv yog “ib ceg ntawm tsob ntoo Ixayees,” tiam sis lawv kuj “tau ploj ncaim ntawm nws lub cev” (Amas 26:36; kuj saib 1 Nifais 15:12). Tiam sis thaum tus Cawm Seej tshwm sim rau lawv pom, Nws xav kom lawv paub tias lawv tsis tau ploj lawm. Nws hais tias, “Nej yog los ntawm tsev neeg Ixayees; thiab nej yog los ntawm txoj kev khi lus” (3 Nifais 20:25). Tej zaum Nws yuav hais li ntawd rau nej hnub no, nej cov uas ua kev cai raus dej thiab ua kev khi lus nrog Nws kuj yog los ntawm tsev neeg Ixayees, “los ntawm txoj kev khi lus,” tsis hais nej yog leej twg tus xeeb ntxwv los yog nej nyob qhov twg los yog. Los yog hais tias, thaum Yexus hais txog tsev neeg Ixayees, Nws hais txog koj. Nws tej lus qhia kom foom koob hmoov rau “cov tub ki txhua pab neeg ntawm lub ntiaj teb” los Nws hais rau koj (3 Nifais 20:27). Nws tej lus caw kom “cia li tsim dheev, cia li muab nej lub zog los coj” los Nws hais rau koj (3 Nifais 20:36). Thiab Nws tej lus cog tseg uas muaj nqis heev, “kuv txoj kev hlub yuav tsis ncaim koj mus, thiab yuav tsis tshem txoj kev khi lus ntawm kuv txoj kev kaj siab lug” los Nws hais rau koj thiab (3 Nifais 22:10).
Tej lub Tswv Yim Kawm Vaj Lug Kub ntawm Yus Ib Leeg
Nyob hauv hnub nyoog kawg, Vajtswv yuav ua ib txoj hauj lwm tseem ceeb thiab zoo kawg nkaus.
Tus Cawm Seej tau cog lus thiab hais txog tej uas yuav muaj los yav tom ntej rau Nws cov neeg khi lus—Nws kuj hais txog koj thiab. Ib yam li Thawj Tswj Hwm Russell M. Nelson hais tias: “Peb yog tus Tswv cov neeg khi lus. Peb muaj cib fim koom tes ua kom muaj raws li tej lus cog tseg no. Yeej yog ib lub sij hawm zoo kawg rau peb ua neej nyob!” (“The Gathering of Scattered Israel,” Ensign los sis Liahona, Kaum Ib Hlis Ntuj 2006, 79).
Nrhiav tej lus uas hais txog hnub nyoog kawg los ntawm tus Cawm Seej tej lus nyob hauv 3 Nifais 20–22. Tej kev qhia txog tej uas yuav muaj los yav tom ntej twg ua rau koj zoo siab heev? Koj ua tau dab tsi kom muaj raws li tej lus qhia tej yuav muaj los yav tom ntej hauv tej tshooj no?
Saib tias 3 Nifais 21:1–7 qhia tias qhov uas Phau Ntawv Maumoos los (“tej no” nyob hauv nqe 2 thiab 3) yog ib lub cim uas qhia tias twb pib muaj raws li Vajtswv cov lus cog tseg. Tej lus cog tseg no yog dab tsi, thiab Phau Ntawv Maumoos pab li cas kom muaj raws li ntawd?
Kuj saib Russell M. Nelson, “Hope of Israel” (kev tshaj tawm rau cov neeg hluas thoob ntiaj teb, Rau Hli Ntuj 3, 2018), broadcasts.ChurchofJesusChrist.org.
3 Nifais 20:10–12; 23; 26:1–12
Tus Cawm Seej xav kom kuv tshawb xyuas cov yaj saub tej lus.
Yexus tej lus thiab tej yam Nws ua hauv tej tshooj no qhia tias Nws xav li cas txog cov vaj lug kub. Koj kawm dab tsi txog cov vaj lug kub nyob hauv 3 Nifais 20:10–12; 23; and 26:1–12? Koj kawm dab tsi hauv tej nqe no uas pab koj xav “rau siab ntso tshawb xyuas tej yam no”? (3 Nifais 23:1).
Vajtswv hlub tshua cov uas rov qab los cuag Nws.
Nyob hauv 3 Nifais 22 thiab 24, tus Cawm Seej hais Yaxayas thiab Malakis tej lus piv txwv uas ua rau yus pom meej—tej lub pob zeb uas muaj xim ntau, cov hluav ncaig hauv hluav taws, cov tseem nyiaj, tej rooj ntug. Tej zaum koj yuav xav sau ntawv txog tej no. Tej no qhia dab tsi rau koj txog Vajtswv txoj kev hlub Nws cov neeg? Piv txwv hais tias, 3 Nifais 22:4–8 muab Vajtswv piv rau ib tug txiv tsev thiab Nws cov neeg piv rau ib tug niam tsev. Kev nyeem txog tej no tej zaum yuav tshoov koj lub siab kom koj xav txog tus Tswv txoj kev hlub koj. Tau muaj li cas hauv koj lub neej thiaj muaj raws li tej lus cog tseg hauv tej tshooj no? (qhov tseem ceeb saib 3 Nifais 22:7–8, 10–17; 24:10–12, 17–18).
Kuv lub siab yuav tsum tig mus rau kuv cov poj koob yawm txwv.
Cov Neeg Yudais nyob thoob plaws ntiaj teb twb tos Eilyas txoj kev rov qab los tau ntau xyoo. Tsoom Haiv Neeg Ntseeg hauv Hnub Nyoog Kawg paub tias Eliyas tau rov qab los, nws tau tshwm sim rau Joseph Smith pom nyob hauv lub Tuam Tsev Kirtland thaum 1836 (saib Lus Qhuab Qhia thiab Kev Khi Lus 110:13–16). Txoj hauj lwm kom muab peb lub siab tig mus rau peb tej txiv yawg—kev ua hauj lwm hauv lub tuam tsev thiab nrhiav tsev neeg zaj keeb kwm—los twb pib lawm. Muaj dab tsi uas tau pab koj lub siab tig mus rau koj cov poj koob yawm txwv?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
3 Nifais 22:2
Tom qab nej nyeem nqe no, tej zaum nej yuav xav tsa ib lub tsev pheeb suab thiab sib tham txog qhov uas vim li cas lub Koom Txoos zoo li ib lub tsev pheeb suab hauv roob moj sab qhua. Qhov uas nqe no hais tias peb yuav tsum “txuas [nws] tej hlua kom ntev” thiab “txhos [nws] tej tswg kom khov” txhais li cas? Peb yuav ua li cas kom caw lwm tus nrhiav chaw “tiv thaiv” nyob hauv lub Koom Txoos? (saib daim video “Welcome” nyob ntawm ComeuntoChrist.org).
3 Nifais 23:6–13
Yog tias tus Cawm Seej tau nyeem cov ceev xwm txheej uas peb tsev neeg tau sau, ces Nws yuav nug peb txog dab tsi? Puas muaj tej yam tseem ceeb los sis tej xwm txheej ntawm sab ntsuj plig uas peb yuav tsum sau? Tej zaum lub sij hawm no yog ib lub sij hawm zoo tsim los sis sau ntawv ntxiv rau tsev neeg cov ceev xwm txheej thiab sib tham ua ke seb yuav sau dab tsi. Tej zaum cov hluas hauv nej tsev neeg yuav nyiam kos duab rau ntawm nej cov ceev xwm txheej. Vim li cas yog ib yam tseem ceeb kom ceev nej tsev neeg tej xwm txheej ntawm sab ntsuj plig?
3 Nifais 24:7–18
Peb tau cov koob hmoov twg los ntawm kev them ib feem kaum raws li tus Tswv tau cog lus hauv tej nqe no? Txwj Laug David A. Bednar zaj lus “Tej Rooj Ntug” (Ensign los sis Liahona, Kaum Ib Hlis Ntuj 2013, 17–20) tej zaum yuav pab nej tsev neeg paub txog cov koob hmoov no.
3 Nifais 25:5–6
Nej yuav ua li cas kom pab nej tsev neeg muab lawv lub siab tig mus rau lawv cov txiv yawg? Tej zaum nej yuav xav hais kom nej tsev neeg kawm txog nej ib tug poj koob yawm txwv thiab qhia rau nej tsev neeg txog tej yam uas lawv tau kawm (saib FamilySearch.org). Tej zaum nej yuav xav ua hauj lwm ua ke kawm txog ib tug poj koob yawm txwv uas xav tau cov kab ke thiab npaj ua cov kab ke ntawd nyob hauv lub tuam tsev.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Ua raws li koj zaj lus tim khawv. Txwj Laug Neal A. Maxwell tau qhia hais tias, “‘Yus yeej qhia raws li yus yog neeg zoo li cas. Qhov uas koj zoo li cas yog qhov uas lawv yuav nco ntsoov … nco dua li ib yam tseeb uas koj qhia hauv ib zaj lus qhia” (“But a Few Days” [zaj lus rau lub Koom Txoos cov kws qhia Kev Teev Ntuj, Cuaj Hlis Ntuj 10, 1982], 2). Yog koj xav qhia ib lub ntsiab cai ntawm txoj moo zoo, ua zoo npaum li koj ua tau kom ua raws li lub ntsiab cai ntawd.
Muab Phau Ceev Xwm Txheej Los, los ntawm Gary L. Kapp