“Kaum Hli Ntuj 26–Kaum Ib Hlis Ntuj 1. Maumoos 1–6: ‘Kheev Lam Kuv Muaj Peev Xwm Yaum Tau Txhua Tus … Hloov Siab Lees Txim,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Kaum Hli Ntuj 26–Kaum Ib Hlis Ntuj 1. Maumoos 1–6”, Los, Nrog Kuv Mus—Rau Ib Leeg thiab Tsev Neeg: 2020
Maumoos Sau Ntsiab Lus txog cov Phiaj, los ntawm Tom Lovell
Kaum Hli Ntuj 26–Kaum Ib Hlis Ntuj 1
Maumoos 1:6
“Kheev Lam Kuv Muaj Peev Xwm Yaum Tau Txhua Tus … Hloov Siab Lees Txim”
Thaum koj nyeem Maumoos 1–6, cia li xav txog tej yam uas koj kawm los ntawm Maumoos tus yam ntxwv. Cia li sau ntawv txog tej yam uas koj txais kev tshoov siab ua.
Sau Ntawv txog Koj tej Kev Tshoov Siab
Maumoos tsis tau sau “ib zaj txog tag nrho” tej kev “phem heev” thiab tej ntshav uas nws pom nyob hauv cov Neeg Nifais (Maumoos 2:18; 5:8). Tiam sis tej yam uas nws sau tseg nyob hauv Maumoos 1–6 yeej txaus qhia rau peb paub tias cov neeg ncaj nceeg yuav poob npaum li cas. Thaum muaj kev phem thoob plaws, tsis muaj leej twg uas yuav liam Maumoos vim nws nkees thiab poob siab. Tiam sis txawm yog nws pom thiab raug tag nrho tej no, nws yeej paub txog Vajtswv txoj kev hlub tshua loj heev thiab nws paub tias yuav tsum hloov siab lees txim kom txais tau Vajtswv txoj kev hlub ntawd. Thiab txawm yog Maumoos cov neeg tau xyeej nws tej lus thov kom lawv hloov siab lees txim los, nws paub tias nws muaj ib co neeg coob dua ntxiv uas nws yuav tsum hais rau lawv thiab. Nws hais tias, “Saib seb, kuv sau rau tag nrho cov neeg thoob ntiaj teb.” Los yog hais tias, nws tau sau rau koj (saib Maumoos 3:17–20). Thiab nws zaj lus rau koj niaj hnub no, yeej yog tib zaj uas cawm tau cov Neeg Nifais dim hauv lawv lub caij nyoog: “Ntseeg Yexus Khetos txoj moo zoo” … Hloov siab lees txim thiab npaj tos mus sawv ntawm Khetos lub rooj txiav txim” (Maumoos 3:21–22).
Tej lub Tswv Yim Kawm Vaj Lug Kub ntawm Yus Ib Leeg
Kuv txawj ua neej ncaj ncees txawm muaj kev phem nyob ib puag ncig kuv.
Pib hauv tshooj ib ntawm phau Maumoos, koj yuav pom ntau yam ntawm Maumoos thiab cov neeg ib puag ncig nws uas sib txawv. Thaum koj nyeem Maumoos 1, xav seb koj puas muab Maumoos tej cwj pwm thiab tej kev xav piv rau nws cov neeg tej kev xav. Cia li nco txog tej yam uas nws thiab lawv raug (koj yuav pom ib tug yam ntxwv nyob hauv nqe 14–15). Koj kawm dab tsi uas tshoov koj lub siab xav ua ncaj ncees hauv ib lub ntiaj teb uas phem?
Thaum koj nyeem Maumoos 2–6, nrhiav seb Maumoos tau ua li cas qhia txog nws txoj kev ntseeg Leej Txiv Saum Ntuj Ceeb Tsheej thiab Yexus Khetos txawm yog muaj kev phem nyob ib puag ncig nws.
Ntaus Rog, los ntawm Jorge Cocco
Kev tu siab uas Vajtswv pom zoo yeej ua rau tib neeg hloov siab tiag tiag thiab hloov kav ntev.
Thaum Maumoos pom tias nws cov neeg tu siab, nws cia siab tias lawv yuav hloov siab lees txim. Tiam sis “lawv txoj kev tu siab twb tsis yog rau txoj kev hloov siab lees txim” (Maumoos 2:13)—tsis yog kev tu siab uas Vajtswv pom zoo uas ua rau tib neeg hloov siab tiag (saib 2 Kauleethaus 7:8–11). Tiam sis, cov Neeg Nifais muaj kev tu siab li neeg ntiaj teb muaj (saib Maumoos 2:10–11). Xwv kom to taub tias kev tu siab uas Vajtswv pom zoo thiab neeg ntiaj teb txoj kev tu siab txawv li cas, xav seb koj puas xav ua ib daim phiaj rau koj sau ntawv txog tej yam uas koj kawm los ntawm Maumoos 2:10–15 txog ob hom kev tu siab no. Tej zaum koj daim phiaj yuav zoo li no:
|
Kev tu siab uas Vajtswv pom zoo |
Neeg ntiaj teb txoj kev tu siab |
|---|---|
Kev tu siab uas Vajtswv pom zoo Los cuag Yexus (nqe 14) | Neeg ntiaj teb txoj kev tu siab Foom phem rau Vajtswv (nqe 14) |
Kev tu siab uas Vajtswv pom zoo | Neeg ntiaj teb txoj kev tu siab |
Kev tu siab uas Vajtswv pom zoo | Neeg ntiaj teb txoj kev tu siab |
Thaum koj xav txog tej yam uas koj tau kawm, cia li xav seb tej ntawd puas pab koj kov yeej kev phem thiab hloov los ua neeg zoo li Leej Txiv Saum Ntuj Ceeb Tsheej thiab tus Cawm Seej.
Kuj saib Dieter F. Uchtdorf, “You Can Do It Now!” Ensign los sis Liahona, Kaum Ib Hlis Ntuj 2013, 55–57.
Kuv yeej yuav tsum lees paub tias Vajtswv yeej pab kuv lub neej.
Maulaunais tau sau ntawv txog ib yam kev qaug zog uas nws pom nyob ntawm cov Neeg Nifais: lawv tsis tau lees paub txog tej uas tus Tswv tau foom koob hmoov rau lawv. Thawj Tswj Hwm Henry B. Eyring tau hais peb “nrhiav kev kom paub thiab nco txog Vajtswv txoj kev ua siab zoo. … Cia li thov Vajtswv thiab xav xav, nug tej lus no: Vajtswv puas tau xa ib zaj lus rau kuv ib leeg xwb? Kuv puas tau pom Nws txhais tes pab kuv los sis pab kuv cov me nyuam lub neej? … Kuv ua tim khawv tias Nws hlub peb thiab foom koob hmoov rau peb, ntau tshaj qhov peb pom tau” (“O Remember, Remember,” Ensign los sis Liahona, Kaum Ib Hlis Ntuj 2007, 67, 69).
Thaum koj nyeem Maumoos 3:3, 9, tej zaum koj yuav xav txog qhov uas koj lees paub Vajtswv lub hwj huam hauv koj lub neej li cas. Koj tau cov koob hmoov twg thaum koj lees paub Nws lub hwj huam? Yus raug li cas thaum yus tsis lees paub Nws? (saib Maumoos 2:26).
Yexus Khetos qhib nws ncaj npab lug tos txais kuv.
Cov Neeg Nifais tau xyeej Maumoos tej lus qhia, tiam sis nws cia siab tias nws cov ceev xwm txheej yuav tshoov koj lub siab. Thaum koj nyeem Maumoos 5:8–24 thiab 6:16–22, ces koj kawm dab tsi txog tej yam yus raug thaum yus ua txhaum? Koj kawm dab tsi los ntawm tej zaj lus no txog Leej Txiv Saum Ntuj Ceeb Tsheej thiab Yexus tej kev xav txog koj, tsis hais thaum koj ua txhaum los yog? Koj tau hnov Yexus Khetos txoj kev ncav tes rau koj li cas? Koj thiaj li txais kev tshoov siab ua dab tsi?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Maumoos 1:2
Cov lus “to taub sai heev” txhais li cas? Tej zaum nej yuav kawm tej yam zoo los ntawm David A. Bednar zaj lus “Quick to Observe” (Ensign, Kaum Ob Hlis Ntuj 2006, 30–36). Qhov uas Maumoos to taub sai heev tau pab nws li cas? Qhov ntawd yuav pab peb li cas?
Maumoos 1:1–6, 15; 2:1–2
Cov me nyuam hauv nej tsev neeg puas to taub tias lawv txawj muaj txuj ci thiab hwj chim ntawm sab ntsuj plig txawm lawv tseem hluas los? Tej zaum Maumoos tus yam ntxwv yuav pab lawv. Xav seb nej puas sau ib txoj kab uas qhia txog tej lub sij hawm thaum Maumoos yog ib tug me nyuam thiab tub hluas, es cia li siv hnub nyoog thiab tej xwm txheej uas qhia nyob hauv Maumoos 1:1–6, 15 thiab 2:1–2. Thaum nej sib tham txog Maumoos tej cwj pwm thiab tej xwm txheej, cia li qhia txog tej yam uas tshoov nej lub siab thiab lwm tus nyob ib puag ncig nej.
Maumoos 2:18–19
Maumoos tau hais tej lus twg kom piav txog nws lub neej? Nws tau ua li cas kom muaj kev cia siab ruaj nrees thaum muaj kev phem nyob txhua qhov chaw? Peb tsev neev yuav ua li cas kom ua zoo ib yam li nws tau ua?
Maumoos 3:12
Txawm yog cov neeg uas nyob Maumoos ib puag ncig yog neeg phem los, Maumoos tau xav li cas txog lawv? Peb yuav ua li cas kom muaj kev hlub li nws?
Maumoos 5:2
Vim li cas tej lub sij hawm peb tsis yeem hu Leej Txiv Saum Ntuj Ceeb Tsheej thaum peb raug teeb meem? Peb yuav ua li cas kom cia siab rau Leej Txiv Saum Ntuj Ceeb Tsheej ntxiv?
Maumoos 5:16–18
Xwv kom pab nej tsev neeg xav txog qhov uas “raug muab raws khiav ib yam li tej npluag nplej raug cua ntsawj mus” (nqe 16) txhais li cas, cia li muab ib daim ntawv dua ua tej daim me me thiab cia nej tsev neeg tshuab mus ub mus no. Piav rau lawv tias tej npluag nplej yog daim tawv ntawm ib lub noob, thiab nws sib heev thiaj li yooj yim raug nplawm mus. Vim li cas qhov uas yus “tsis muaj Khetos thiab Vajtswv nrog [yus] nyob hauv lub ntiaj teb” (nqe 16) yeej zoo li yus raug cua ntsawj mus?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Qhia cov lus qhuab qhia uas meej thiab yooj yim. Tus Tswv txoj moo zoo yeej zoo nkauj vim yog ib qho yooj yim (saib Lus Qhuab Qhia thiab Kev Khi Lus 133:57). Nej tsis tas ua kom nej tsev neeg muaj kev lom zem vim nej ua tej zaj lus kawm zoo dhau, cia li ua tib zoo qhia tej lus qhuab qhia dawb huv thiab yooj yim xwb.
Maumoos Phau Ntawv Tseem Ceeb, los ntawm Joseph Brickey