“Kaum Ib Hlis Ntuj 16–22. Ethaws 6–11: ‘Xwv Kom Kev Phem Yuav Ploj Mus,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Kaum Ib Hlis Ntuj 16–22. Ethaws 6–11”, Los, Nrog Kuv Mus—Rau Ib Leeg thiab Tsev Neeg: 2020
Kuv Mam Coj Nej Tawm hauv Qab Thu Dej Hiav Txwv Rov Los los ntawm Jonathan Arthur Clarke
Kaum Ib Hlis Ntuj 16–22
Ethaws 6–11
“Xwv Kom Kev Phem Yuav Ploj Mus”
Hais txog cov Neeg Yales cov ceev xwm txheej, Maumoos hais tias “twb tsim nyog rau txhua tus neeg paub txog tej uas tau muab sau cia rau hauv zaj no” (Mauxiyas 28:19). Cia li xav txog qhov no thaum koj nyeem Ethaws 6–11. Vim li cas muaj tej yam uas tsim nyog—los sis zoo—rau koj thiab cov ua koj hlub ua?
Sau Ntawv txog Koj tej Kev Tshoov Siab
Ntau pua xyoo tom qab cov Neeg Yales raug puas tsuaj, cov Neeg Nifais nrhiav tau tej tsev rhuav ntawm lawv haiv neeg puag thaum ub. Nyob hauv tej tsev rhuav no yog ib co ceev xwm txheej—cov phiaj uas yog “tseem kub” uas “ntim cov lus sau puv nkaus” (Mauxiyas 8:9). Cov Neeg Nifais tus vaj ntxwv, Leehais, paub tias cov ceev xwm txheej no tseem ceeb: “Paub tseeb hais tias yeej muaj ib qho txuj ci tseem ceeb uas neeg paub tsis txog nyob hauv cov phiaj no” (Mauxiyas 8:19). Hnub no koj muaj ib txoj kev sau ntsiab lus txog cov ceev xwm txheej no, uas tau txhais rau koj yam lus, thiab phau no hu ua phau ntawv Ethaws. Phau no yog los ntawm tib co ceev xwm txheej uas cov Neeg Nifais “xav paub heev,” thiab thaum lawv tau nyeem, “lawv muaj kev tu siab puv npo; txawm li ntawd los kuj ua rau lawv muaj kev txawj ntse ntau, uas ua rau lawv zoo siab” (Mauxiyas 28:12, 18). Thaum koj nyeem txog cov Neeg Yales txoj kev vam meej thiab txoj kev poob, koj yuav muaj kev tu siab thiab. Tiam sis tsis txhob tso kev xyiv fab tseg uas los ntawm kev kawm zaj keeb kwm no. Vim Maulaunais sau hais tias, “twb yog Vajtswv lub tswv yim kom yuav tsum muab tej no ua rau nej paub” (Ethaws 8:23), vim yog peb kawm los ntawm cov Neeg Yales tej kev poob mus thiab tej kev vam meej, ces “kev phem yuav ploj mus, thiab … lub sij hawm yuav los uas Dab Ntxwg Nyoog yuav tsis muaj hwj chim kov yeej noob neej lub siab” (Ethaws 8:26).
Tej lub Tswv Yim Kawm Vaj Lug Kub ntawm Yus Ib Leeg
Tus Tswv yuav coj kuv mus rau kuv thaj av uas cog lus tseg.
Tej zaum koj yuav txais tswv yim ntawm sab ntsuj plig yog koj muab cov Neeg Yales txoj kev hla dej hiav txwv piv rau koj txoj kev ua neej hauv ntiaj teb no. Piv txwv hais tias, tus Tswv tau npaj dab tsi kom ci ntsa iab rau koj zoo li cov pob zeb hauv cov Neeg Yales cov nkoj? Cov nkoj piv txog dab tsi, los sis cov cua uas “tshuab … mus rau tim thaj av uas cog lus cia”? (Ethaws 6:8). Koj kawm dab tsi los ntawm tej yam cov Neeg Yales ua thaum lub sij hawm ua ntej, thaum tab tom mus, thiab tom qab ntawd? Tus Tswv coj koj li cas mus rau koj thaj av uas cog lus tseg?
Minerva•K. Teichert (1888–1976), Cov Neeg Yales Hla Exias, 1935, pleev roj rau cov ntaub saum pob zeb, 35 x 48 yas tes. Brigham Young University Museum of Art.
Ethaws 6:5–18, 30; 9:28–35; 10:1–2
Tus Tswv foom koob hmoov rau kuv thaum kuv txo hwj chim.
Txawm yog muaj kev muab hlob thiab kev phem nyob hauv cov Neeg Yales zaj keeb kwm, kuj muaj cov neeg uas coj yam ntxwv txo hwj chim nyob hauv tej tshoov no—qhov tseem ceeb nyob hauv Ethaws 6:5–18, 30; 9:28–35; thiab 10:1–2. Qhov uas koj xav txog tej lus nug no yuav pab koj kawm los ntawm lawv tus yam ntxwv no: Vim li cas cov Neeg Yales tau txo lawv lub hwj chim thaum muaj xwm txheej no? Lawv tau ua li cas kom qhia tias lawv tau txo hwj chim? Lawv thiaj li tau koob hmoov dab tsi? Cia li saib hais tias muaj tej lub sij hawm uas cov neeg raug txhib kom txo hwj chim vim lawv raug tej xwm txheej. Cia li xav seb koj txaus siab ua dab tsi kom “txo hwj chim taug kev rau tus Tswv pom” (Ethaws 6:17) thiab tsis txhob raug txhib kom txo hwj chim (saib Mauxiyas 4:11–12; Amas 32:14–18).
Kuj saib “Humility,” Gospel Topics, topics.ChurchofJesusChrist.org.
Cov thawj coj ncaj ncees foom koob hmoov rau cov neeg uas lawv coj.
Tshooj 7–11 ntawm phau Ethaws hais txog 28 tiam neeg. Vim tsis muaj chaw sau ntau yam txog cov neeg no, peb yeej pom tau ib tug yam ntxwv: cov thawj coj ncaj ncees ua rau cov neeg tau koob hmoov thiab txais kev vam meej, es cov thawj coj phem ua rau cov neeg raug kev poob cev qhev thiab kev puas tsuaj.
Nram qab no yog ob peb yam uas cov vaj ntxwv hais hauv tej tshooj no. Cia li nyeem tej nqe ntawd, thiab saib koj yuav kawm dab tsi los ntawm lawv tus yam ntxwv—uas zoo thiab tsis zoo—txog kev ua ib tug thawj coj. Thaum koj ua li ntawd, cia li xav txog tej lub cib fim uas koj muaj kom coj lwm tus los sis pab lwm tus hauv koj lub tsev, koj zej zog, lub Koom Txoos, thiab li ntawd.
-
Aulaihas—Ethaws 6:30–7:1
-
Sulas—Ethaws 7:23–27
-
Yales—Ethaws 8:1–7, 11–15
-
Emaws thiab Khauli-atoos—Ethaws 9:21–23
-
Hethes—Ethaws 9:26–30
-
Ses—Ethaws 10:1–2
-
Lilakis—Ethaws 10:5–8
-
Mauli-atoos—Ethaws 10:10–11
-
Lis—Ethaws 10:19–28
-
Eethas—Ethaws 11:11–13
Tej kev tuav hauv ntsiag to yog dab tsi?
Thaum ob peb tug neeg koom tes nyiag ua kom tsis muaj leej twg paub lawv ua phem, ces lawv tuav hauv ntsiag to. Feem ntau lawv xav tau hwj chim los sis nyiaj txiag. Ntxiv rau tej kev tuav hauv ntsiag to uas piav txog nyob hauv Ethaws 8:7–18, muaj lwm tus yam ntxwv nyob hauv Hilamas 1:9–12; 2:2–11; 6:16–30; thiab Mauxes 5:29–33. Nyob hauv Ethaws 8:18–26, Maulaunais piav txog tej xwm txheej uas los ntawm tej kev tuav hauv ntsiag to (kuj saib Ethaws 9:4–12) thiab ceeb toom peb kom txhob txhawb nqa tej ntawd.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Ethaws 6:2–12
Nej tsev neeg puas nyiam ua yeeb yam txog cov Neeg Yales txoj kev mus rau thaj av uas cog lus tseg? Tej zaum nej yuav xav nyob hauv ib chav tsaus nti kom zoo li nej nyob hauv ib lub nkoj thiab siv tej teeb tsom kom piv txog tej lub pob zeb uas ci ci. Tej zaum nej yuav xav sib tham seb cov Neeg Yales tau qhia tias lawv ntseeg tus Tswv li cas thaum lawv nkag hauv cov nkoj, txawm yog lawv paub tias lawv yuav “raug faus mus tob tob hauv dej hiav txwv” (Ethaws 6:6). Tom qab nej nyeem nqe 9, tej zaum nej tsev neeg yuav xav hu tej zaj nkauj qhuas Vajtswv uas nej nyiam. Peb tej lub tsev puas zoo li cov Neeg Yales tej nkoj? Tus Tswv coj peb tsev neeg mus rau thaj av uas cog lus tseg twg?
Ethaws 6:22–23
Lub lim tiam no, tej zaum nej tsev neeg yuav xav saib tau muaj raws li Yales tus tij laug tej lus ceeb toom txog qhov uas lawv yuav raug poob cev qhev. Peb lub Koom Txoos cov thawj coj tau ceeb toom dab tsi rau peb? Vim li cas qhov uas peb tsis mloog lawv tej lus ntuas yuav ua rau peb raug poob cev qhev?
Ethaws 8:23–26
Raws li tej nqe no qhia, vim li cas tus Tswv txib Maulaunais sau “tej no” txog tej kev tuav hauv? (Ethaws 8:23). Peb tau kawm dab tsi los ntawm phau ntawv Ethaws uas yuav pab peb tau koob hmoov raws li piav nyob hauv nqe 26?
Ethaws 9:11
Tej yam uas peb xav ua rau peb xaiv tej yam twg? Peb tsev neeg yuav ua li cas kom ua tib zoo xav tau tej yam uas los ntawm Vajtswv?
Ethaws 11:8
Xwv kom kawm ntxiv txog tus Tswv txoj kev siab hlub rau cov uas hloov siab lees txim, tej zaum nej yuav xav nyeem Mauxiyas 26:29–30; 29:18–20; Amas 34:14–16; los sis Maulaunais 6:8. Tej zaum nej tsev neeg yuav xav qhia txog tej lub sij hawm uas pom Vajtswv txoj kev siab hlub nyob hauv vaj lug kub los sis nyob hauv lawv lub neej.
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Cia li ua raws li koj kawm. Kev kawm txog txoj moo zoo tsis yog kev nyeem ntawv thiab kev xav xwb. Feem ntau peb kawm los ntawm qhov uas peb ua raws li tej lus tseeb hauv cov vaj lug kub (saib Yauhas 7:17). Koj yuav ua li cas kom ua raws li tej yam koj nyeem nyob hauv Ethaws 6–11?
Cov Neeg Yales tej Nkoj, los ntawm Gary Ernest Smith