“Kaum Ib Hlis Ntuj 23–29. Ethaws 12–15: ‘Yuav Muaj Raws Li Txhua Yam Los ntawm Kev Ntseeg,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Kaum Ib Hlis Ntuj 23–29. Ethaws 12–15”, Los, Nrog Kuv Mus—Rau Ib Leeg thiab Tsev Neeg: 2020
Ethaws Nkag hauv lub Qhov Tsua, los ntawm Gary Ernest Smith
Kaum Ib Hlis Ntuj 23–29
Ethaws 12–15
“Yuav Muaj Raws Li Txhua Yam Los ntawm Kev Ntseeg”
Kev sau ntawv txog koj tej kev tshoov siab yuav pab koj txais tau kev tshwm sim ntxiv thiab txhawb nqa koj zaj lus tim khawv. Kuj yuav pab koj nco txog koj tej kev tshoov siab thiab qhia rau lwm tus thaum yav tom ntej.
Sau Ntawv txog Koj tej Kev Tshoov Siab
Ethaws cov lus qhia tej yuav muaj raws li yav tom ntej yeej “tseem ceeb thiab zoo kawg nkaus” rau cov Neeg Yales (Ethaws 12:5). Nws “qhia rau lawv tseeb txog txhua yam, txij thaum chiv keeb los” (Ethaws 13:2). Nws pom “Khetos lub caij” thiab lub Yeluxalees Tshiab hauv hnub nyoog kawg (Ethaws 13:4). Thiab nws hais txog “kev cia siab rau ib lub ntiaj teb uas zoo dua, muaj tseeb tiag, twb yog ib qho chaw nyob ntawm Vajtswv sab tes xis” (Ethaws 12:4). Tiam sis cov Neeg Yales tau xyeej nws tej lus, vim lawv zoo ib yam li cov neeg uas pheej xyeej Vajtswv cov tub qhe tej lus qhia niaj hnub no—yog “vim lawv tsis pom” (Ethaws 12:5). Peb yuav tsum ntseeg tej lus cog tseg los sis tej lus ceeb toom txog tej yam uas peb tsis pom, ib yam li Ethaws yuav tsum muaj kev ntseeg hais txog “tej yam tseem ceeb thiab zoo kawg nkaus” uas yuav muaj los yav tom ntej rau ib co neeg uas tsis ntseeg. Maulaunais yuav tsum ntseeg tus Tswv hais tias Nws yuav pab muab Maulaunais txoj kev “tsis tshua txawj sau ntawv” hloov los ua ib yam uas nws muaj zog (saib Ethaws 12:23–27). Kev ntseeg li no ua rau peb “ruaj thiab khov kho, ua tej yam uas zoo tas mus li, uas coj lawv mus qhuas Vajtswv” (Ethaws 12:4). Thiab los ntawm kev ntseeg li no ces “yuav muaj raws li txhua yam los” (Ethaws 12:3).
Tej lub Tswv Yim Kawm Vaj Lug Kub ntawm Yus Ib Leeg
Kev ntseeg Yexus Khetos yuav ua rau peb txais tau tej txuj ci tseem ceeb heev.
Niaj hnub no neeg coob, zoo li cov Neeg Yales hauv Ethaws lub caij nyoog, lawv xav pom puav pheej ua ntej lawv yuav ntseeg Vajtswv thiab Nws lub hwj chim. Tiam sis, Maulaunais qhia tias “kev ntseeg yog tej uas yus cia siab rau tiam sis tsis pom” thiab yus “yuav tsis txais kev ua tim khawv kom txog thaum twb sim [yus] txoj kev ntseeg lawm tso” (Ethaws 12:6).
Cia li nco qab txhua zaus koj pom lo lus “kev ntseeg” nyob hauv Ethaws 12, thiab sau ntawv txog tej yam koj kawm txog kev ntseeg. Nrhiav kev teb cov lus nug zoo li no: Kev ntseeg yog dab tsi? Yuav muaj dab tsi los vim yus ua neej nrog kev ntseeg? Tej zaum koj kuj yuav sau ntawv txog koj tej kev xav txog tej lus tim khawv uas koj txais tau “txog thaum twb sim [koj] txoj kev ntseeg lawm” (Ethaws 12:6).
Kuj saib Henplais 11; Amas 32.
Yexus Khetos ua rau peb muaj “kev cia siab zoo dua.”
Ntxiv rau tej lus qhia tseem ceeb txog kev ntseeg, Ethaws 12 kuj qhia ntau txog kev cia siab—tej zaum koj yuav xav sau ib lub cim txhua zaus koj pom lo lus “kev cia siab.” Kev cia siab muaj lub ntsiab zoo li cas rau koj? Vim li cas Ethaws muaj kev “cia siab rau ib lub ntiaj teb uas zoo dua”? (saib Ethaws 12:2–5). Yexus Khetos txoj moo zoo ua li cas muab koj “kev cia siab zoo dua”? (Ethaws 12:32).
Kuj saib Maulaunais 7:40–41; Dieter F. Uchtdorf, “The Infinite Power of Hope,” Ensign los sis Liahona, Kaum Ib Hlis Ntuj 2008, 21–24; Preach My Gospel, 117.
Yexus Khetos yuav ua rau tej uas qaug zog hloov kom muaj zog.
Thaum peb nyeem Maulaunais tej lus, yeej yooj yim rau peb nco qab tias nws txhawj txog nws txoj kev “tsis txawj sau ntawv” thiab ntshai hais tias neeg yuav thuam nws tej lus (saib Ethaws 12:23–25). Tiam sis Vajtswv tau cog lus tias Nws yuav “yuav ua kom tej uas qaug zog los ua tej uas muaj zog” rau cov uas txo hwj chim (nqe 27), thiab lub hwj chim ntawm sab ntsuj plig nyob hauv Maulaunais cov lus yeej qhia tias tus Tswv tau ua raws li Nws cog lus lawm.
Tom qab koj nyeem Ethaws 12:23–29, cia li xav txog tej lub sij hawm thaum Vajtswv tau pab koj paub txog koj tej kev qaug zog thiab pab koj muaj zog txawm muaj li ntawd los. Tej zaum nov yog ib lub sij hawm zoo xav txog tej kev qaug zog uas koj muaj tam sim no. Koj xav tias koj yuav tsum ua dab tsi kom txo koj lub hwj chim rau tus Tswv thiab ntseeg Nws kom thiaj txais tau Nws cov lus cog tseg kom “tej uas qaug zog los ua tej uas muaj zog”? (Ethaws 12:27).
Thaum koj xav txog tej nqe no, tej lus qhia nram qab no los ntawm Txwj Laug Neal A. Maxwell los tej zaum yuav pab: “Thaum peb nyeem hauv vaj lug kub txog tib neeg ‘tej kev qaug zog,’ ces cov lus kuj hais txog … kev qaug zog uas muaj vim peb yog neeg uas muaj sab cev nqaij daim tawv uas tab kaum peb sab ntsuj plig (saib Ethaws 12:28–29). Kev qaug zog kuj yog tej kev qaug zog uas nyias muaj nyias, uas peb yuav tsum kov yeej (saib Lus Qhuab Qhia thiab Kev Khi Lus 66:3; Yakhauj 4:7)” (Lord, Increase Our Faith [1994], 84).
Kuj saib “Grace,” Gospel Topics, topics.ChurchofJesusChrist.org.
Kev xyeej cov yaj saub yuav ua rau peb raug kev ntshai ntawm sab ntsuj plig.
Tus uas ua vaj ntxwv rau cov Neeg Yales yeej yog ib tug uas raug xwm txheej ntau. Qhov no yeej muaj tseeb rau Khauli-athumaws, vim “neeg muaj zog [ntau] … nrhiav kev ua kom nws puas tsuaj” (Ethaws 13:15–16). Nyob hauv Ethaws 13:15–22, cia li saib hais tias Khauli-athumaws tau ua dab tsi kom pov hwm nws tus kheej thiab tus yaj saub Ethaws ntuas nws kom ua dab tsi. Thaum koj nyeem phau ntawv Ethaws tiav lawm, cia li xav txog tej uas yus raug thaum yus xyeej cov yaj saub tej lus. Muaj li cas thaum “tus Tswv tus Ntsuj Plig twb tsum tsis nrog [tib neeg] nyob lawm”? (Ethaws 15:19).
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Ethaws 12:7–22
Thaum nej nyeem tej nqe no ua ke, tej zaum nej yuav xav kawm txog cov neeg muaj kev ntseeg heev uas nej tau nyeem hauv Phau Ntawv Maumoos. Tej zaum qhov no yuav ua rau nej xav sib tham txog cov neeg hauv nej tsev neeg zaj keeb kwm los sis hauv nej lub neej cov uas muaj kev ntseeg—xav seb nej puas yuav sau ntawv txog tej xwm txheej no yog tias nej tsis tau ua.
Ethaws 12:27
Vim li cas tus Tswv muab kev qaug zog rau peb? Peb yuav tsum ua dab tsi kom “tej uas qaug zog los ua tej uas muaj zog”? Tus Cawm Seej yuav ua li cas pab peb?
Ethaws 12:41
Puas muaj ib txoj kev lom zem uas nej siv tau qhia nej cov me nyuam kom “nrhiav Yexus”? Tej zaum ib txoj kev yog kom muab ib daim duab txog Yexus zais thiab caw nej tsev neeg “nrhiav” daim duab ntawd. Peb ua li cas thiaj li nrhiav Yexus, thiab peb tau koob hmoov li cas thaum peb nrhiav tau Nws?
Ethaws 13:13–14; 15:19, 33–34
Tej zaum nej tsev neeg yuav nyiam muab Ethaws zaj lus piv rau Maumoos thiab Maulaunais zaj (saib Maumoos 6; 8:1–10). Ob zag no zoo sib xws li cas? Cov Neeg Nifais txoj kev raug puas tsuaj zoo li cov Neeg Yales txoj kev raug puas tsuaj li cas? (muab Ethaws 15:19 piv rau Maulaunais 8:28). Peb kawm tej yam tseeb twg uas yuav pab peb tsis txhob raug tej yam uas lawv raug lawm?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Yaum kom lawv nug tej yam. Cov me nyuam yeej xav paub ntau yam. Tej lub sij hawm nej yuav xav tias lawv tej lus nug ua rau nej tsis txawj qhia qhov uas nej xav qhia. Tiam sis, cia li saib lawv tej lus nug yog tej lub cib fim. Tej lus nug qhia tias nej cov me nyuam npaj siab kawm—tej lus nug ua rau nej paub tias nej cov me nyuam txhawj txog dab tsi thiab lawv xav li cas txog tej yam lawv kawm (saib Teaching in the Savior’s Way, 25–26).
Ethaws tej Kev Qhia tej Yuav Muaj Los Yav Tom Ntej Yeej Zoo Kawg Nkaus, los ntawm Walter Rane