1 Thiab nim no tau pib muaj ib qho kev foom loj heev rau saum tag nrho thaj av vim yog txoj kev tsis ncaj ntawm cov neeg, nyob rau hauv tej ntawd, yog ib tug neeg yuav tso nws tej cuab yeej tes los sis nws rab ntaj rau saum nws lub txee, los sis rau saum qhov chaw uas nws yuav ceev tej ntawd, saib seb, nyob rau tag kis, nws tsis muaj peev xwm nrhiav tau tej ntawd, qhov phem heev yog txoj kev foom uas nyob saum thaj av.

2 Yog li ntawd txhua tus neeg tau tuav rawv rau tej uas nws tau muaj, nrog nws tej tes, thiab tsis kam qiv los sis nws tsis kam txais; thiab txhua tus neeg tau ceev nws rab ko ntaj rau ntawm nws sab tes xis, tiv thaiv nws tej cuab tam thiab nws txoj sia thiab nws tej poj niam thiab me nyuam.

3 Thiab nim no, tom qab uas tau ncua ob xyoos, thiab tom qab uas Seles tuag, saib seb, Seles ib tug kwv tij tau sawv thiab ua rog rau Khauli-athumaws, nyob hauv qhov ntawd Khauli-athumaws tau kov yeej nws thiab tau raws nws mus txog lub hav zoov Akis.

4 Thiab tau muaj tias Seles tus kwv tij tau ua rog rau nws nyob hauv lub hav zoov Akis; thiab npluav rog tau rais los mus mob heev, thiab ntau txhiab leej tau vau los ntawm ntaj.

5 Thiab tau muaj tias Khauli-athumaws tau mus vij lub hav zoov; thiab Seles tus kwv tij tau tawm hauv hav zoov thaum tsaus ntuj tuaj thiab tau tua ib feem ntawm Khauli-athumaws cov tub rog, thaum lawv tseem tab tom qaug cawv.

6 Thiab nws tau los rau thaj av Mauloos, thiab tau tso nws tus kheej rau saum Khauli-athumaws lub rooj zaum.

7 Thiab tau muaj tias Khauli-athumaws tau nyob nrog nws cov tub rog hauv hav zoov tau ncua ob xyoos, nyob hauv qhov ntawd nws tau txais zog loj heev rau nws cov tub rog.

8 Nim no Seles tus kwv tij, uas npe yog Nkiliyas, kuj tau txais zog loj heev rau nws cov tub rog, vim yog tej kev ua kev tuav hauv.

9 Thiab tau muaj tias nws tus pov thawj hlob tau tua nws thaum nws zaum saum nws lub rooj zaum.

10 Thiab tau muaj tias ib tug ntawm cov neeg ua ke tuav hauv tau tua nws nyob hauv ib txoj kev uas tsis muaj neeg paub, thiab txeeb tau lub teb chaws rau nws tus kheej; thiab nws lub npe yog Lis; thiab Lis tau yog ib tug neeg muaj lub cev loj, loj dua li lwm tus neeg uas nyob hauv cov neeg sawv daws.

11 Thiab tau muaj tias nyob hauv thawj xyoos ntawm Lis, Khauli-athumaws tau los rau hauv thaj av Mauloos, thiab tau ua rog rau Lis.

12 Thiab tau muaj tias nws tau tua nrog Lis, nyob hauv qhov ntawd Lis tau tua raug nws txhais caj npab ua rau nws raug mob; txawm li ntawd los, Khauli-athumaws cov tub rog tau txiv mus rau tom Lis, ua rau nws tau khiav mus rau ntawm tej ciam teb uas nyob ntawm ntug hiav txwv.

13 Thiab tau muaj tias Khauli-athumaws tau raws nws qab; thiab Lis tau ua rog rau nws nyob saum ntug hiav txwv.

14 Thiab tau muaj tias Lis tau tua Khauli-athumaws cov tub rog, ua rau lawv tau rov khiav los rau lub hav zoov Akis.

15 Thiab tau muaj tias Lis tau caum nws mus txog thaum nws tau los txog lub tiaj Ankos. Thiab Khauli-athumaws tau coj tag nrho cov neeg nrog nws thaum uas nws tau khiav ua ntej Lis nyob hauv ces kaum av uas nws tau khiav mus rau ntawd.

16 Thiab thaum nws tau los txog rau lub tiaj Ankos nws tau ua rog rau Lis, thiab nws tau tua nws mus txog thaum nws tuag; txawm li ntawd los, Lis ib tug kwv tij tau tuaj tawm tsam Khauli-athumaws nyob hauv qhov chaw ntawd, thiab npluav rog tau rais los mus mob heev, nyob hauv qhov ntawd Khauli-athumaws tau rov khiav ua ntej Lis tus kwv tij cov tub rog dua.

17 Nim no Lis tus kwv tij lub npe hu ua Siv. Thiab tau muaj tias Siv tau caum Khauli-athumaws qab, thiab nws ntxeev tau ntau lub nroog, thiab nws tau tua tej poj niam thiab tej me nyuam, thiab tau hlawv tej nroog.

18 Thiab tau muaj ib qho kev ntshai txog Siv mus thoob plaws rau thaj av tag nrho; muaj tseeb tiag, ib qho kev quaj tau tawm mus thoob plaws thaj av—Leej twg yuav sawv thaiv tau ntawm Siv tej tub rog? Saib seb, nws tau cheb tej av du lug ua nws ntej!

19 Thiab tau muaj tias cov neeg tau pib txoos tej tub rog ua ke, thoob plaws saum thaj av huv tib si.

20 Thiab lawv tau raug muab faib; thiab ib feem ntawm lawv tau khiav mus rau Siv tej tub rog, thiab ib feem ntawm lawv tau khiav mus rau Khauli-athumaws cov tub rog.

21 Thiab qhov npluav rog tau loj heev thiab tsis txawj kawg, thiab txoj kev nqaij ntuag ntshav nrog thiab txoj kev puas tsuaj tau ntev heev, kawg tias tag nrho saum thaj av tau raug cov neeg tuag tej cev npog tas.

22 Thiab qhov npluav rog tau ceev thiaj nrawm heev kawg tias tsis muaj ib tug tseg los faus cov neeg tuag, tiam sis lawv tau mus ntawm ib qhov kev txo ntshav mus rau ib qhov kev txo ntshav, tso tej cev ntawm tej txiv neej, tej poj niam, thiab tej me nyuam ua sab ua suab rau saum thaj av, kom rais los ua zaub rau tej kas ntawm cev nqaij daim tawv.

23 Thiab txoj kev tsw ntawm qhov ntawd tau tawm mus rau saum thaj av, twb mus rau tag nrho saum thaj av; yog li ntawd cov neeg tau rais los nyuaj siab nruab hnub thiab hmo ntuj, vim yog txoj kev tsw ntawm qhov ntawd.

24 Tiam sis, Siv tsis tau tsum caum Khauli-athumaws; vim nws tau cog lus muab nws tus kheej pauj txiaj ntsig ntawm Khauli-athumaws rau nws tus kwv tij cov ntshav, uas tau raug tua tuag, thiab tus Tswv txoj lus uas tau los rau Ethaws tias Khauli-athumaws yuav tsis raug ntog los ntawm ntaj.

25 Thiab li no peb pom tias tus Tswv tau los xyuas lawv nyob hauv nws txoj kev npau taws puv nkaus, thiab lawv txoj kev phem thiab tej kev qias tau npaj ib txoj kev rau lawv txoj kev puas tsuaj uas kav ib txhis.

26 Thiab tau muaj tias Siv tau caum Khauli-athumaws mus rau sab hnub tuaj, twb mus txog rau tej ciam teb ze ntug hiav txwv, thiab nyob qhov ntawd nws tau ua rog rau Siv tau ncua li peb hnub.

27 Thiab txoj kev puas tsuaj nyob hauv Siv tej tub rog tau phem kawg nkaus tias nws ua rau cov neeg tau pib poob siab, thiab tau pib khiav ua ntej Khauli-athumaws tej tub rog; thiab lawv tau khiav mus rau thaj av Khaulihos, thiab tau cheb cov neeg hauv tawm ua ntej lawv, tag nrho lawv cov uas tsis kam koom lawv.

28 Thiab lawv tau rub lawv tej tsev pheeb suab ntaub nyob hauv lub hav Khaulihos; thiab Khauli-athumaws tau rub nws tej tsev pheeb suab ntaub nyob hauv lub hav Sawm. Nim no lub hav Sawm nyob ze lub roob Khaunos; yog li ntawd, Khauli-athumaws tau sau nws tej tub rog los ua ke rau saum lub roob Khaunos, thiab tau tshuab ib lub hom rau Siv cov tub rog caw kom lawv tuaj ua rog.

29 Thiab tau muaj tias lawv tau tawm tuaj, tiam sis raug raws rov qab; thiab lawv tau tuaj zaum ob, thiab tau raug raws rov qab zaum ob. Thiab tau muaj tias lawv tau rov tuaj dua zaum peb, thiab npluav rog tau rais los mus mob heev.

30 Thiab tau muaj tias Siv tau tua raug Khauli-athumaws uas nws tau ua rau nws raug ntau qhov mob tob; thiab Khauli-athumaws, tau xiam nws cov ntshav, tau qaug zog tas lawm, thiab tau raug ev mus yam li nws twb tuag lawm.

31 Nim no txoj kev xiam tej txiv neej, poj niam thiab me nyuam ntawm ob tog tau coob heev kawg tias Siv tau txib nws cov neeg kom lawv tsis txhob caum Khauli-athumaws cov tub rog lawm; yog li ntawd, lawv tau rov qab mus rau lawv lub yeej.