1 Thiab tus Tswv tau txib Tsales tus tij laugnqis tawm saum roob ncaim ntawm tus Tswv xub ntiag mus, thiab sau tej yam uas nws tau pom lawm cia; thiab lawv tau raug txwv tsis pub los rau noob neej mus txog tom qab uas nws raug muab dai rau saum tus ntoo khaub lig; thiab vim yog qhov no vaj ntxwv Mauxiyas thiaj tau muab lawv ceev tseg, kom lawv yuav tsis tau los rau lub ntiaj teb mus txog tom qab uas Khetos yuav ua nws tus kheej rau nws cov neeg pom.

2 Thiab tom qab uas Khetos tau ua nws tus kheej rau nws cov neeg pom tiag lawm nws tau txib kom lawv yuav tsum raug ua kom paub.

3 Thiab nim no, tom qab ntawd, tag nrho lawv tau tso txoj kev ntseeg tseg zuj zus; thiab tsis tshuav leej twg li lawm tsuas tshuav cov Neeg Lamas xwb, thiab lawv tau tsis kam lees yuav Khetos txoj moo zoo; yog li ntawd kuv raug txib kom kuv yuav tsum muab lawv zais dua rau hauv av.

4 Saib seb, kuv tau sau rau saum cov phiaj no tej uas Tsales tus tij laugtau pom kiag; thiab tsis tau muaj tej yam loj tshaj uas tau raug ua paub dua li cov uas tau ua paub rau Tsales tus tij laug.

5 Yog li ntawd tus Tswv tau txib kom kuv muab lawv sau cia; thiab kuv tau muab lawv sau cia. Thiab nws tau txib kuv tias kuv yuav tsum muab lawv zwm tseg; thiab kuj tau txib kom kuv yuav tsum muab tej uas txhais lawv zwm tseg cia thiab; yog li ntawd kuv tau muab tej txhais lus zwm tseg cia, raws li tus Tswv txoj lus txib.

6 Vim tus Tswv tau hais rau kuv tias: Lawv yuav tsum tsis tawm mus rau Lwm Haiv Neeg mus txog thaum hnub uas lawv yuav hloov siab lees txim txog lawv txoj kev tsis ncaj, thiab rais los mus huv ua ntej tus Tswv.

7 Thiab nyob rau hnub ntawd uas lawv yuav coj txoj kev ntseeg kuv, tus Tswv hais li, tib yam li Tsales tus tij laugtau ua, kom lawv yuav rais los mus dawb huv nyob hauv kuv, ces thaum ntawd kuv yuav ua kom lawv paub tej yam uas Tsales tus tij laugtau pom, twb yuav qhib rau lawv tag nrho kuv tej kev tshwm sim, Yexus Khetos, Vajtswv Leej Tub, Leej Txiv saum ntuj thiab hauv ntiaj teb, thiab tag nrho txhua yam uas nyob hauv lawv.

8 Thiab tus uas yuav cav tawm tsam tus Tswv txoj lus, cia kom nws raug foom tsis zoo; thiab tus uas tsis kam lees txais tej yam no, cia kom nws raug foom tsis zoo; vim rau lawv cov ntawd kuv yuav tsis ua tej yam loj dua rau pom li, Yexus Khetos hais li; vim kuv yog tus uas hais.

9 Thiab nyob ntawm kuv lo lus txib lub ntuj twb raug qhib thiab raug kaw; thiab nyob ntawm kuv txoj lus lub ntiaj teb yuav ua zog koog; thiab nyob ntawm kuv lo lus txib tej neeg nyob hauv yuav tuag mus, twb tib yam li hluav taws kub.

10 Thiab tus uas tsis ntseeg kuv tej lus yeej tsis ntseeg kuv cov pab coj tej; thiab yog hais tias kuv tsis tau hais, nej sim txiav txim seb; vim nej yuav paub tias kuv twb yog tus uas hais, nyob rau hauv hnub kawg.

11 Tiam sis tus uas ntseeg tej yam no uas kuv tau hais lawm, kuv yuav los xyuas nws nrog tej kev tshwm sim ntawm kuv tus Ntsuj Plig, thiab nws yuav paub thiab ua tim khawv. Rau qhov vim yog kuv tus Ntsuj Plig nws yuav paub tias tej yam no muaj tseeb; vim nws yuav yaum kom tib neeg ua zoo.

12 Thiab txhua yam uas yaum kom neeg ua zoo yeej los ntawm kuv; vim yam zoo yeej tsis los ntawm tus twg tsuas yog los ntawm kuv xwb. Kuv twb yog tus uas coj tib neeg mus rau txhua yam uas zoo; tus uas tsis ntseeg kuv tej lus yeej tsis ntseeg kuv—tias kuv tseem muaj nyob; thiab tus uas yuav tsis ntseeg kuv yeej yuav tsis ntseeg Leej Txiv tus uas tau xa kuv los. Vim saib seb, kuv yog Leej Txiv, kuv yog qhov kaj, thiab yog txoj sia, thiab yog qhov tseeb ntawm lub ntiaj teb.

13 Cia li los cuag kuv, Au nej cov uas yog Lwm Haiv Neeg es, thiab kuv yuav ua rau nej pom tej yam uas tseem ceeb dua, tej kev paub uas tau raug muab zais cia vim yog txoj kev tsis ntseeg.

14 Cia li los cuag kuv, Au nej cov uas yog tsev neeg Ixayees, thiab nws yuav ua rau nej pom tej yam tseem ceeb uas Leej Txiv tau tseg cia rau nej, txij li thaum chiv keeb ntawm lub ntiaj teb; thiab tej ntawd tseem tsis tau los rau nej, vim yog txoj kev tsis ntseeg.

15 Saib seb, thaum nej yuav dua daim ntaub thaiv ntawm txoj kev tsis ntseeg uas pheej ua kom nej nyob rau hauv nej txoj kev phem kawg nkaus, thiab txoj kev ua siab tawv, thiab tej siab tsis to taub, thaum ntawd tej yam tseem ceeb thiab zoo kawg uas xav tsis thoob uas tau raug muab zais txij li thaum chiv keeb ntawm lub ntiaj teb yuav ua rau nej pom—muaj tseeb tiag, thaum nej yuav thov Leej Txiv los ntawm kuv lub npe, nrog ib lub siab mob thiab lub siab xav ua zoo, thaum ntawd nej yuav paub tias Leej Txiv yuav nco txog txoj kev khi lus uas nws tau khi rau nej tej yawg koob, Au tsev neeg Ixayees es.

16 Thiab thaum ntawd kuv tej kev tshwm sim uas kuv tau kom raug muab sau cia los ntawm kuv tus tub qhe Yauhas yuav raug muab qhib rau ntawm tag nrho cov neeg tej qhov muag. Nco ntsoov, thaum nej pom tej yam no, nej yuav paub tias lub sij hawm twb txog lawm kom tej ntawd yuav raug ua kom muaj tseeb tiag.

17 Yog li ntawd, thaum nej tau txais phau ceev xwm txheej no nej yuav paub tias txoj hauj lwm ntawm Leej Txiv tau pib lawm rau txhua txhia qhov uas nyob saum thaj av.

18 Yog li ntawd, cia li hloov siab lees txim tag nrho nej sawv daws uas nyob thoob plaws hauv ntiaj teb, thiab cia li los cuag kuv, thiab ntseeg kuv txoj moo zoo, thiab ua kev cai raus dej nyob ntawm kuv lub npe; vim tus uas ntseeg thiab ua kev cai raus dej yuav raug cawm dim; tiam sis tus uas tsis ntseeg yuav raug txim; thiab tej cim yuav raws lawv cov uas ntseeg kuv lub npe qab.

19 Thiab koob hmoov yuav tau raug tus uas nrhiav pom muaj txoj kev ntseeg rau kuv lub npe nyob rau hauv hnub kawg, vim tus ntawd yuav raug tsa sawv mus nyob hauv lub nceeg vaj uas tau npaj rau nws txij li thaum chiv keeb ntawm lub ntiaj teb. Thiab saib seb kuv yog tus uas tau hais tej ntawd. Amees.