1 Thiab tau muaj tias Se, tus uas yog ib tug xeeb ntxwv ntawm Hes—vim Hes tau piam sij los ntawm txoj kev tshaib nqhis, thiab tag nrho nws tsev neeg tsuas yog tshuav Se xwb—yog li ntawd, Se tau rov pib txhim tsa ib co neeg uas tau tawg tas lawm dua.

2 Thiab tau muaj tias Se tau nco ntsoov txoj kev puas tsuaj ntawm nws tej yawg koob, thiab nws tau txhim tsa ib lub teb chaws uas ncaj ncees; vim nws tau nco ntsoov yam uas tus Tswv tau ua nyob hauv txoj kev coj Tsales thiab nws tus tij laughla hiav txwv; thiab nws tau mus li tus Tswv tej kev; thiab nws yug tau tub thiab ntxhais.

3 Thiab nws tus tub hlob, uas npe hu ua Se, tau ntxeev siab tawm tsam nws; tiam sis Se tau raug tua tuag los ntawm ib tug tub sab tes, vim yog nws txoj kev nplua nuj heev, qhov ntawd tau rov coj txoj kev nyab xeeb los rau nws txiv dua.

4 Thiab tau muaj tias nws txiv tau txhim tsa ntau lub nroog rau saum thaj av, thiab cov neeg tau pib ri mus rau saum thaj av tag nrho. Thiab Se tau ua neej nyob mus muaj hnub nyoog laus heev; thiab nws yug tau Lilakis. Thiab nws tau tuag, thiab Lilakis tau kav nyob hauv nws qhov chaw.

5 Thiab tau muaj tias Lilakis tsis tau ua tej uas ncaj nyob hauv tus Tswv lub qhov muag, vim nws tau muaj ntau tus poj niam thiab niam yau, thiab tau tso tej uas tsis yooj yim ris rau saum tej neeg tej xub pwg; muaj tseeb tiag, nws tau sau lawv se hnyav heev; thiab nws tau siv tej se ua ntau lub tsev uas dav heev.

6 Thiab nws tau ua ib lub rooj zaum zoo nkauj heev rau nws; thiab nws tau ua ntau lub qhov taub, thiab leej twg uas tsis kam them se nws tau muab pov rau hauv qhov taub; thiab leej twg uas them tsis tau se nws tau muab pov rau hauv qhov taub; thiab nws tau ua kom lawv yuav tsum ua hauj lwm tsis tseg rau lawv txoj kev pab; thiab leej twg tau tsis kam ua hauj lwm nws tau ua kom muab tua.

7 Yog li ntawd nws tau muab tag nrho nws tej hauj lwm zoo, muaj tseeb tiag, nws tej kub zoo nws twb tau ua kom raug muab nchuav nyob hauv qhov taub; thiab tag nrho txhua yam ntawm tej qauv tes zoo nws tau ua kom raug ua nyob hauv qhov taub. Thiab tau muaj tias nws tau ua tsim txom cov neeg nrog nws tej kev sib daj sib deev thiab tej kev qias.

8 Thiab thaum nws tau kav tau plaub caug thiab ob xyoos cov neeg tau sawv ntxeev siab tawm tsam nws; thiab tau rov pib muaj rog nyob hauv thaj av dua, kawg tias thaum kawg Lilakis tau raug tua, thiab nws tej xeeb leej xeeb ntxwv tau raug raws tawm ntawm thaj av.

9 Thiab tau muaj tias tom qab tau ncua ntau xyoo lawm, Mauli-atoos, (nws yog Lilakis ib tug xeeb ntxwv) tau sib sau ua ke ib pab tub rog ntawm cov neeg sab nraud, thiab tau tawm mus thiab tau ua rog rau cov neeg; thiab nws txeeb tau ntau lub nroog; thiab nplua rog tau rais los mus mob heev, thiab tau tsis kawg tau ntau xyoo; thiab nws tau muaj hwj chim rau saum tag nrho thaj av, thiab tau tsa nws tus kheej ua vaj ntxwv kav tag nrho thaj av.

10 Thiab tom qab uas nws tau pleev roj tsa nws tus kheej ua vaj ntxwv tas lawm nws tau ua kom cov neeg lub nra sib, los ntawm qhov uas nws tau ua kom cov neeg nyiam nyob hauv lawv tej qhov muag, thiab lawv tau tsa nws ua lawv tus vaj ntxwv.

11 Thiab nws tau ua kev ncaj ncees rau cov neeg, tiam sis tsis rau nws tus kheej vim yog nws tej kev sib daj sib deev ntau; yog li ntawd nws tau raug txiav tawm ntawm tus Tswv lub xub ntiag mus.

12 Thiab tau muaj tias Mauli-atoos tau ua ntau lub nroog, thiab cov neeg tau rais los mus nplua nuj heev nyob hauv nws txoj kev kav, uas nyob hauv tej vaj tse, thiab nyob hauv tej kub thiab tej nyiaj dawb, thiab hauv txoj kev cog qoob loos, thiab hauv tej pab yaj, thiab tej tsiaj txhu, thiab tej yam uas tau rov qab los txum tim rau lawv.

13 Thiab Mauli-atoos tau ua neej nyob muaj hnub nyoog loj kawg nkaus li, thiab tom qab ntawd nws yug tau Kis; thiab Kis tau kav nyob hauv nws txiv qhov chaw; thiab nws tau kav yim xyoo, thiab nws txiv tau tuag. Thiab tau muaj tias Kis tsis tau kav ncaj ncees, yog li ntawd nws tsis raug tus Tswv nyiam.

14 Thiab nws tus kwv tij tau sawv ntxeev siab tawm tsam nws, los ntawm qhov ntawd nws tau coj nws los mus rau txim; thiab nws tau nyob raug txim tag nws lub neej; thiab nws yug tau tub thiab ntxhais nyob hauv kev raug txim, thiab thaum nws hnub nyoog laus lawm nws yug tau Levis; thiab nws tau tuag.

15 Thiab tau muaj tias Levis tau ua hauj lwm nyob hauv kev raug txim tom qab uas nws txiv tuag lawm, tau ncua li plaub caug thiab ob xyoos. Thiab nws tau ua rog tawm tsam tus vaj ntxwv ntawm thaj av, los ntawm qhov ntawd nws txeeb tau lub teb chaws los rau nws tus kheej.

16 Thiab tom qab uas nws txeeb tau lub teb chaws los rau nws tus kheej lawm nws tau ua tej yam uas ncaj nyob ntawm tus Tswv lub qhov muag; thiab cov neeg tau vam meej nyob hauv thaj av; thiab nws tau ua neeg nyob muaj hnub nyoog laus zoo, thiab yug tau tej tub thiab tej ntxhais; thiab nws kuj yug tau Khaulas, tus uas nws tau pleev roj tsa ua vaj ntxwv nyob hauv nws qhov chaw.

17 Thiab tau muaj tias Khaulas tau ua tej uas zoo nyob ntawm tus Tswv lub qhov muag tag nrho nws lub neej; thiab nws yug tau ntau tus tub thiab ntxhais; thiab tom qab uas nws tau pom ntau hnub nws tau tuag, zoo tib yam li sawv daws ntawm lub ntiaj teb; thiab Khisaws tau kav nyob hauv nws qhov chaw.

18 Thiab tau muaj tias Khisaws kuj tau tuag lawm thiab, thiab Lis tau kav nyob hauv nws qhov chaw.

19 Thiab tau muaj tias Lis kuj tau ua tej yam uas zoo nyob ntawm tus Tswv lub qhov muag. Thiab nyob lub sij hawm ntawm Lis cov nab muaj taug tau raug puas tsuaj tas. Yog li ntawd lawv tau mus rau nram thaj av qab teb, mus plob nqaij rau cov neeg ntawm thaj av, vim thaj av tau muaj tej tsiaj hav zoov puv nkaus. Thiab Lis tus kheej kuj tau rais los ua ib tug neeg plob zoo heev.

20 Thiab lawv tau ua ib lub nroog loj ze ntawm lub caj dab nqaim ntawm thaj av, ze ntawm qhov chaw uas hiav txwv faib thaj av.

21 Thiab lawv tau tshwj thaj av qab teb ua ib thaj hav zoov qus, cia mus tua tsiaj. Thiab tag nrho thaj av qaum teb tau muaj neeg nyob puv nkaus.

22 Thiab lawv muaj txuj ci tsim ub tsim no heev, thiab lawv tau yuav thiab muag thiab ib leeg pauv khoom rau ib leeg, xwv kom lawv yuav muaj tuaj.

23 Thiab lawv ua txhua yam quav hlau, thiab lawv tau ua kub, thiab nyiaj dawb, thiab hlau, thiab tooj dag, thiab txhua yam hlau, thiab lawv tau khawb tej ntawd tawm hauv av los; yog li ntawd, lawv khawb av ntau heev kom muab tau quav hlau, kub, thiab nyiaj dawb, thiab hlau, thiab tooj liab. Thiab lawv tau ua txhua yam khoom zoo.

24 Thiab lawv tau muaj paj, thiab tej ntaub yaj pwm; thiab lawv tau ua txhua yam ntaub, xwv kom lawv yuav muaj ris tsho npog lawv tej kev liab qab.

25 Thiab lawv tau ua txhua yam twj khawb av, tsis hais laij thiab tseb, thiab sau thiab tsoo, thiab ntaus.

26 Thiab lawv tau ua txhua yam twj uas lawv ua hauj lwm nrog lawv tej tsiaj.

27 Thiab lawv tau ua txhua yam cuab yeej ua rog. Thiab lawv tau ua txhua yam uas muaj qauv tes ntaus zoo kawg li.

28 Thiab ib txwm tsis tau muaj ib co neeg uas tau koob hmoov ntau dua li lawv, thiab tau vam meej dua los ntawm tus Tswv tes. Thiab lawv tau nyob hauv ib thaj av uas zoo tshaj li txhua thaj av, vim tus Tswv tau hais li.

29 Thiab tau muaj tias Lis tau ua neej nyob ntau xyoo, thiab yug tau tub thiab ntxhais; thiab nws kuj yug tau Hiathoos.

30 Thiab tau muaj tias Hiathoos tau kav nyob hauv nws txiv qhov chaw. Thiab thaum Hiathoos kav tau nees nkaum thiab plaub xyoos, saib seb, lub teb chaws tau raug txeeb ntawm nws mus. Thiab nws tau raug ua hauj lwm ntau xyoo nyob hauv txoj kev raug txim, muaj tseeb tiag, twb nyob tag nrho nws lub neej uas tshuav.

31 Thiab nws yug tau Hes, thiab Hes ua neej nyob hauv txoj kev raug txim tag nws lub neej. Thiab Hes yug tau Aloos, thiab Aloos tau nyob hauv txoj kev raug txim tag nws lub neej; thiab nws yug tau Anikhadas, thiab Anikhadas kuj tau nyob hauv txoj kev raug txim tag nws lub neej; thiab nws yug tau Khauli-atoos, thiab Khauli-atoos tau nyob hauv txoj kev raug txim tag nws lub neej; thiab nws yug tau Khoos.

32 Thiab tau muaj tias Khoos txeeb tau ib nrab ntawm lub teb chaws. Thiab nws tau kav ib nrab ntawm lub teb chaws tau plaub caug thiab ob xyoos; thiab nws tau mus ua rog tawm tsam vaj ntxwv, Ankis, thiab lawv tau sib tua tau ncua ntau xyoo, nyob lub sij hawm ntawd Khoos tau kov yeej Ankis, thiab txeeb tau kav lub teb chaws qhov seem tshuav.

33 Thiab nyob rau hauv Khoos lub caij tau pib muaj tej tub sab nyob hauv thaj av; thiab lawv tau pib siv tej qub kev, thiab sib lav lus raws li txheej laus thaum ub, thiab tau rov nrhiav rhuav lub teb chaws dua.

34 Nim no Khoos tau tua tawm tsam lawv ntau heev; tiam sis nws cheem tsis tau lawv.