1 Thiab nim no kuv, Maulaunais, txuas ua kom tag kuv phau ceev xwm txheej txog txoj kev puas tsuaj ntawm cov neeg uas kuv tau sau los lawm.

2 Vim saib seb, lawv tau tsis kam txais yuav tag nrho Ethaws tej lus; vim nws tau qhia rau lawv tseeb txog tag nrho txhua yam, txij thaum chiv keeb ntawm tib neeg los; thiab tias tom qab tej dej tau lau saum thaj av no nws tau rais los mus ua ib thaj av zoo dua li tag nrho lwm thaj av, ib thaj av uas tau xaiv tseg los ntawm tus Tswv; yog li ntawd tus Tswv tau xav kom tag nrho tej neeg sawv daws uas nyob rau saum thaj av yuav tsum ua hauj lwm rau nws;

3 Thiab tias nws tau yog qhov chaw ntawm Yeluxalees Tshiab, uas yuav nqis tawm saum ntuj ceeb tsheej los, thiab yog qhov chaw dawb huv ntawm tus Tswv.

4 Saib seb, Ethaws tau pom Khetos lub caij, thiab nws tau hais txog ib lub Yeluxalees Tshiab nyob rau saum thaj av no.

5 Thiab nws kuj tau hais txog tsev neeg Ixayees, thiab lub Yeluxalees uas Lihais yuav tuaj—tom qab uas nws raug puas tsuaj lawm nws yuav raug rhawv dua, ib lub nroog dawb huv rau tus Tswv; yog li ntawd, nws yuav ua tsis tau ib lub Yeluxalees tshiab vim nws tau muaj nyob txheej thaum ub los; tiam sis nws yuav raug muab rhawv dua, thiab rais los mus ua ib lub nroog dawb huv ntawm tus Tswv; thiab nws yuav raug rhawv rau tsev neeg Ixayees—

6 Thiab tias ib lub Yeluxalees Tshiab yuav raug rhawv rau saum thaj av no, rau cov seem tshuav ntawm cov noob ntawm Yauxej, vim tej yam no twb tau muaj ib lub cim lawm.

7 Vim ib yam li Yauxej tau coj nws txiv nqis mus rau hauv thaj av Iyiv, nws twb tau tuag tid; yog li ntawd, tus Tswv tau coj ib cov seem tshuav ntawm Yauxej cov noob tawm ntawm thaj av Yeluxalees, xwv kom nws yuav hlub tshua rau Yauxej cov noob kom lawv yuav tsis piam sij, tib yam li nws twb tau hlub tshua rau Yauxej txiv kom nws yuav tsis piam sij.

8 Yog li ntawd, cov seem tshuav ntawm Yauxej tsev neeg yuav raug txhim tsa rau saum thaj av no; thiab nws yuav yog ib thaj av ntawm lawv tej qub txeeg qub teg; thiab lawv yuav txhim tsa ib lub nroog dawb huv rau tus Tswv, tib yam li lub Yeluxalees qub; thiab lawv yuav tsis raug sib txuam ntxiv lawm, mus txog thaum qhov kawg los thaum uas lub ntiaj teb yuav dua mus.

9 Thiab yuav muaj dua ib lub ntuj tshiab thiab ib lub ntiaj teb tshiab; thiab lawv yuav zoo li cov qub tsuas yog cov qub tau dua mus lawm xwb, thiab tag nrho txhua yam rais los mus tshiab.

10 Thiab tom qab ntawd yuav muaj lub Yeluxalees Tshiab los; thiab lawv cov uas nyob hauv yuav tau koob hmoov, vim lawv yog cov uas tej ris tsho raug dawb huv dhau los ntawm tus Me Nyuam Yaj cov ntshav; thiab lawv yog lawv cov uas raug suav nyob hauv cov seem tshuav ntawm Yauxej cov noob, uas tau yog los ntawm tsev neeg Ixayees.

11 Thiab tom qab ntawd lub Yeluxalees qub kuj yuav muaj los; thiab cov neeg nyob hauv, lawv yuav tau koob hmoov, vim lawv tau raug ntxuav nyob hauv tus Me Nyuam Yaj cov ntshav; thiab lawv yog lawv cov uas tau tawg ri niab thiab raug sau ua ke los ntawm plaub ceg kaum ntawm lub ntiaj teb, thiab los ntawm tej teb chaws qaum teb, thiab yog cov uas nyob hauv txoj kev muaj puv npo ntawm txoj kev khi lus uas Vajtswv tau khi nrog lawv yawg koob, Anplaham.

12 Thiab thaum tej yam no los, yuav muaj raws li tej vajlugkub uas hais tias, lawv cov uas ua ntej, yuav tau ua qab; thiab lawv cov uas ua qab, yuav tau ua ntej.

13 Thiab kuv tau yuav luag sau ntau ntxiv, tiam sis kuv tau raug txwv; tiam sis loj thiab zoo kawg uas xav tsis thoob yog Ethaws tej kev qhia tej uas yuav muaj los yav tom ntej; tiam sis lawv tau saib nws yam tsis muaj nuj nqis, thiab tau muab nws ntiab tawm; thiab nruab hnub nws tau mus nkaum hauv ib lub qhov tsua, thiab hmo ntuj nws tau tawm mus saib tej uas yuav los rau saum cov neeg.

14 Thiab thaum uas nws tau nyob hauv ib lub qhov tsua nws tau sau qhov seem tshuav ntawm phau ceev xwm txheej no, tau saib tej kev puas tsuaj uas tau los rau saum cov neeg, thaum hmo ntuj.

15 Thiab tau muaj tias nyob rau hauv tib xyoos uas nws tau raug ntiab tawm hauv cov neeg tau pib muaj ib npluav rog loj heev nyob hauv cov neeg, vim tau muaj ntau tus uas tau sawv, uas tau yog tej neeg muaj zog, thiab tau nrhiav rhuav Khauli-athumaws los ntawm lawv tej kev ua hauj lwm ntsiag to ntawm txoj kev phem, uas tau hais txog lawm.

16 Thiab nim no Khauli-athumaws, nws tus kheej tau kawm, tag nrho tej kev ua rog thiab tag nrho kev ntxias ntawm lub ntiaj teb, yog li ntawd nws tau ua rog rau lawv cov uas tau nrhiav ua kom nws puas tsuaj.

17 Tiam sis nws tsis tau hloov siab lees txim, nws tej tub thiab tej ntxhais uas zoo nkauj zoo nraug los tib yam; Khauhos tej tub thiab tej ntxhais uas zoo nkauj zoo nraug los tib yam; Khaulihos tej tub thiab tej ntxhais uas zoo nkauj zoo nraug los tib yam; thiab thaum kawg, tsis muaj ib tug ntawm tej tub thiab tej ntxhais uas zoo nkauj zoo nraug nyob tag nrho saum lub ntiaj teb uas tau hloov siab lees txim txog lawv tej kev txhaum.

18 Yog li ntawd, tau muaj tias nyob hauv thawj xyoos uas Ethaws tau nyob hauv qhov tsua, tau muaj ntau leej neeg uas tau raug tua los ntawm ntaj los ntawm cov uas ua ke tuav hauv, tua tawm tsam Khauli-athumaws kom lawv yuav txeeb tau lub teb chaws.

19 Thiab tau muaj tias Khauli-athumaws tej tub tau tua heev thiab tau los ntshav ntau.

20 Thiab nyob hauv xyoo ob tus Tswv txoj lus tau los rau Ethaws, kom nws mus thiab qhia tej uas yuav muaj los yav tom ntej rau Khauli-athumaws tias, yog nws thiab tag nrho nws tsev neeg yuav hloov siab lees txim, tus Tswv yuav muab nws lub teb chaws rau nws thiab yuav tso cov neeg dim—

21 Tsis li ntawd lawv yuav raug puas tsuaj, thiab tag nrho nws tsev neeg tsuas yog yuav tshuav nws tus kheej xwb. Thiab nws tsuas yuav nyob kom pom txoj kev muaj puv npo ntawm tej kev qhia tej uas yuav muaj los yav tom ntej uas tau hais txog lwm cov neeg uas tau txais thaj av ua lawv qub txeeg qub teg; thiab Khauli-athumaws yuav tau txais ib qho kev faus los ntawm lawv; thiab txhua txhia tus yuav raug puas tsuaj tsuas yog tshuav Khauli-athumaws xwb.

22 Thiab tau muaj tias Khauli-athumaws tsis kam hloov siab lees txim, nws tsev neeg los tsis kam, cov neeg los tsis kam; thiab tej rog tsis tau tsum; thiab lawv tau nrhiav tua Ethaws, tiam sis nws tau khiav ntawm lawv mus thiab tau rov mus nkaum hauv lub qhov tsua dua.

23 Thiab tau muaj tias Seles tau sawv, thiab nws kuj tau ua rog rau Khauli-athumaws; thiab nws tau kov yeej nws, kawg tias nyob hauv xyoo peb nws tau coj nws mus rau hauv txoj kev rau txim.

24 Thiab Khauli-athumaws tej tub, nyob hauv xyoo plaub, tau kov yeej Seles, thiab rov txeeb tau lub teb chaws los rau lawv txiv dua.

25 Nim no tau pib muaj ib npluav rog nyob rau saum thaj av, txhua tus txiv neej nrog nws pab tau tawm tsam rau tej uas nws xav tau.

26 Thiab tau muaj tej tub sab, thiab thaum kawg, muaj tag nrho txhua yam kev phem nyob rau saum tag nrho thaj av.

27 Thiab tau muaj tias Khauli-athumaws tau npau taws heev nrog Seles, thiab nws tau tawm mus ua rog nrog nws tej tub rog tawm tsam nws; thiab lawv tau sib ntsib yam npau taws heev, thiab lawv tau sib ntsib hauv lub hav Kilakas; thiab npluav rog tau rais los mus mob heev.

28 Thiab tau muaj tias Seles tau tua tawm tsam nws tau ncua peb hnub. Thiab tau muaj tias Khauli-athumaws tau yeej nws, thiab tau caum nws mus txog thaum nws tau los txog lub tiaj Heloos.

29 Thiab tau muaj tias Seles rov ua rog rau nws nyob saum cov tiaj; thiab saib seb, nws tau kov yeej Khauli-athumaws, thiab tau raws nws rov qab los rau lub hav Kilakas.

30 Thiab Khauli-athumaws rov ua rog rau Seles dua nyob hauv lub hav Kilakas, nyob hauv qhov ntawd nws tau kov yeej Seles thiab muab nws tua.

31 Thiab Seles ua rau Khauli-athumaws raug mob hauv nws tus ncej puab, kom nws tsis tau rov mus ua rog tau ncua li ob xyoos, nyob hauv lub sij hawm ntawd tag nrho cov neeg uas nyob saum thaj av tau tab tom sib txo ntshav, thiab tsis muaj ib tug uas cheem tau lawv.