1 Thiab tau muaj tias nws yug tau Aumaws, thiab Aumaws tau los kav nyob hauv nws qhov chaw. Thiab Aumaws yug tau Tsales; thiab Tsales yug tau tub thiab ntxhais.

2 Thiab Tsales tau ntxeev siab tawm tsam nws txiv, thiab tau los thiab nyob rau hauv thaj av Hes. Thiab tau muaj tias nws tau ntxias ntau cov neeg, vim yog nws tej lus txawj dag ntxias, txog thaum nws tau ib nrab ntawm lub teb chaws.

3 Thiab thaum nws tau muaj ib nrab ntawm lub teb chaws nws tau ua rog rau nws txiv, thiab nws tau cab nws txiv mus rau txim, thiab tau kom nws ua qhev;

4 Thiab nim no, nyob rau lub caij kav ntawm Aumaws nws raug nyob hauv txoj kev raug txim ib nrab ntawm nws lub caij. Thiab tau muaj tias nws yug tau tub thiab ntxhais, nyob hauv cov no tau muaj Henroos thiab Khauli-athumaws;

5 Thiab nkawd tau npau taws heev vim yog tej kev ua ntawm Tsales nkawd tus tij laug, kawg tias nkawd tau tsa ib pab tub rog thiab tau ua rog rau Tsales. Thiab tau muaj tias lawv tau ua rog rau nws thaum tsaus ntuj.

6 Thiab tau muaj tias thaum lawv tau tua Tsales cov tub rog tuag lawv twb yuav luag tua nws thiab; thiab nws tau thov lawv kom lawv tsis txhob tua nws, thiab nws yuav muab lub teb chaws rau nws txiv. Thiab tau muaj tias lawv tau muab nws txoj sia rau nws.

7 Thiab nim no Tsales tau tu siab heev vim yog txoj kev poob ntawm lub teb chaws, vim nws tau muab nws lub siab tso rau saum lub teb chaws thiab rau saum txoj kev qhuas ntawm lub ntiaj teb.

8 Nim no Tsales tus ntxhais tau txawj ntse heev, thiab tau pom tej kev tu siab ntawm nws txiv, tau xav ib txoj kev uas los ntawm qhov ntawd nws yuav txhiv tau lub teb chaws los rau nws txiv.

9 Nim no Tsales tus ntxhais tau zoo nkauj heev. Thiab tau muaj tias nws tau tham nrog nws txiv, thiab tau hais rau nws tias: Vim li cas kuv txiv yuav muaj kev tu siab heev ua luaj? Nws tsis tau nyeem phau ceev xwm txheej uas peb tej yawg koob tau coj hla hiav txwv tuaj los? Saib seb, tsis yog muaj ib zag txog lawv cov thaud, uas los ntawm lawv tej kev ua ntsiag to lawv txeeb tau tej teb chaws thiab muaj suab npe loj heev no los?

10 Thiab nim no, yog li ntawd, cia kuv txiv xa xov mus hais Akis tuaj, Khinaws tus tub; thiab saib seb, kuv twb zoo nkauj, thiab kuv yuav dhia muas caum rau nws saib, thiab kuv yuav ua kom nws zoo siab, kom nws yuav xav tau kuv ua poj niam; yog li ntawd yog nws yuav thov koj kom koj muab kuv ua nws tus poj niam, ces koj hais tias: Kuv yuav muab nws yog koj yuav coj kuv txiv, uas yog vaj ntxwv, lub taub hau los rau kuv.

11 Thiab nim no Aumaws tau yog Akis ib tug phooj ywg; yog li ntawd, thaum Tsales tau hu Akis tuaj, Tsales tus ntxhais tau dhia muas caum rau nws saib ces nws tau ua rau nws zoo siab, kawg tias nws tau xav yuav nws ua poj niam. Thiab tau muaj tias nws tau hais rau Tsales tias: Muab nws rau kuv ua poj niam.

12 Thiab Tsales tau hais rau nws tias: Kuv yuav muab nws rau koj, yog koj yuav coj kuv txiv, uas yog vaj ntxwv, lub taub hau los rau kuv.

13 Thiab tau muaj tias Akis tau sau tag nrho nws tej neeg txheeb ze tuaj rau hauv Tsales tsev, thiab tau hais rau lawv tias: Nej puas yuav cog lus rau kuv tias nej yuav rau siab ua rau kuv nyob rau hauv tej yam uas kuv xav kom nej ua?

14 Thiab tau muaj tias lawv tag nrho tau cog lus rau nws, los ntawm tus Vajtswv saum ntuj ceeb tsheej, thiab kuj los ntawm lub ntuj, thiab kuj los ntawm lub ntiaj teb, thiab los ntawm lawv tej taub hau, tias yog leej twg hloov ntawm txoj kev pab uas Akis xav tau yuav tsum poob nws lub taub hau; thiab yog leej twg yuav qhia tawm yam uas Akis yuav ua rau lawv paub, tus ntawd yuav tsum poob nws txoj sia mus.

15 Thiab tau muaj tias lawv tau yeem li no nrog Akis. Thiab Akis tau hais tej lus lav rau lawv tej uas tau raug muab los ntawm lawv txheej thaum ub cov uas kuj tau nrhiav kom muaj hwj chim, uas tau muab cev nqis los txij li thaum Kayees, uas tau yog ib tug neeg tua neeg txij li thaum chiv keeb los.

16 Thiab lawv tau raug tshwj tseg los ntawm lub hwj chim ntawm tus dab los muab tej lus lav no rau cov neeg, kom ceev tau lawv nyob hauv txoj kev tsaus ntuj, kom pab cov uas nrhiav hwj chim muaj hwj chim, thiab tua neeg, thiab ua lim hiam, thiab dag, thiab ua txhaum tag nrho txhua yam kev phem thiab kev plees kev yi.

17 Thiab nws tau yog Tsales tus ntxhais uas tau muab tej no rau hauv nws lub siab kom txheeb nrhiav tej yam thaum ub no; thiab Tsales tau muab tej no rau hauv Akis siab; yog li ntawd, Akis tau muab tej ntawd rau nws tej neeg txheeb ze thiab tej phooj ywg, tau coj lawv ncaim los ntawm tej kev cog lus ntxim nyiam ua tej uas nws tau xav ua.

18 Thiab tau muaj tias lawv tau txhim tsa ib pab neeg tuav hauv ua ke, tib yam li lawv txheej thaum ub; uas yog ib txoj kev tuav hauv uas qias thiab phem tshaj plaws, nyob ntawm Vajtswv lub qhov muag;

19 Vim tus Tswv tsis ua hauj lwm nyob hauv tej kev tuav hauv, thiab nws tsis xav kom neeg yuav tsum txo ntshav, tiam sis tau txwv tag nrho txhua yam, txij li thaum chiv keeb ntawm neeg los.

20 Thiab nim no kuv, Maulaunais, tsis sau lawv tej kev lav lus thiab tej kev tuav hauv saib zoo li cas, vim nws raug ua rau kuv paub lawm tias lawv twb muaj nyob rau hauv txhua haiv neeg tag nrho, thiab lawv twb muaj nyob hauv cov Neeg Lamas.

21 Thiab lawv tau ua muaj txoj kev puas tsuaj ntawm cov neeg no uas nim no kuv tab tom hais txog, thiab txoj kev puas tsuaj ntawm Nifais cov neeg.

22 Thiab haiv neeg twg uas yuav cia muaj tej kev tuav hauv li ntawd, kom muaj tau hwj chim thiab nplua nuj, mus txog thaum lawv yuav ri mus rau hauv tej haiv neeg, saib seb, lawv yuav raug puas tsuaj; vim tus Tswv yuav tsis cia kom tej ntshav ntawm nws cov neeg ntseeg, uas yuav raug hlais los ntawm lawv, yuav quaj tas mus li rau nws hauv av tawm los rau txoj kev pauj txiaj ntsig rau lawv thiab nws tseem tsis pauj lawv txiaj ntsig.

23 Yog li ntawd, Au nej cov uas yog Lwm Haiv Neeg es, nws yog txoj kev txawj ntse hauv Vajtswv kom tej yam no yuav tsum raug ua rau nej paub, xwv kom los ntawm qhov ntawd nej yuav hloov siab lees txim txog nej tej kev txhaum, thiab yuav tsis cia kom tej kev tuav hauv tua neeg no yuav maj yeej nej, tej uas yuav ua kom muaj hwj chim thiab nplua nuj—thiab txoj hauj lwm, muaj tseeb tiag, twb yog txoj hauj lwm ntawm txoj kev puas tsuaj yuav los rau saum nej, muaj tseeb tiag, twb yog rab ntaj ntawm txoj kev ncaj ncees ntawm Vajtswv Nyob Mus Ib Txhis yuav vau los rau nej, rau nej txoj kev poob vau thiab txoj kev puas tsuaj yog nej yuav cia kom muaj tej yam no.

24 Yog li ntawd, tus Tswv tau txib nej, thaum nej yuav pom tej yam no los rau hauv nej kom nej yuav ras paub txog nej qhov chaw phem heev, vim yog txoj kev tuav hauv no uas yuav muaj los rau hauv nej; los sis kev txom nyem yuav raug rau nws, vim yog tej ntshav ntawm lawv cov uas tau raug tua tuag lawm; vim lawv quaj hauv tej hmoov av los rau txoj kev pauj txiaj ntsig rau nws, thiab kuj rau cov uas tau txhim tsa nws.

25 Vim yuav tau muaj tias tus uas txhim tsa nws yeej yuav nrhiav ntxeev txoj kev ywj pheej ntawm tag nrho tej thaj av, tej haiv neeg, thiab tej teb chaws; thiab nws yuav coj kom muaj tau txoj kev puas tsuaj ntawm tag nrho cov neeg, vim nws raug txhim tsa los ntawm tus dab, tus uas yog leej txiv ntawm tag nrho kev dag; twb yog tib tug neeg dag uas tau ntxias peb thawj nkawg niam txiv, muaj tseeb tiag, twb yog tib tug neeg dag uas tau ua kom neeg tua neeg txij thaum chiv keeb los; tus uas tau ua rau tej neeg tej siab tawv kom lawv tau muab tej yaj saub tua, thiab xuas pob zeb ntaus lawv, thiab muab lawv ntiab tawm txij thaum chiv keeb los.

26 Yog li ntawd, kuv Maulaunais, tau raug txib kom sau tej yam no xwv kom txoj kev phem yuav muaj qhov kawg, thiab kom lub sij hawm yuav los kom Dab Ntxwg Nyoog yuav tsis muaj hwj chim rau saum tej siab ntawm noob neej, tiam sis kom lawv yuav raug yaum ua zoo tsis tu ncua, xwv kom lawv yuav los tau rau hauv qhov chaw txhawv ntawm tag nrho tej kev ncaj ncees thiab raug cawm dim.