1 Thiab tau muaj tias thaum Khauli-athumaws tau zoo nws tej mob tas, nws tau pib nco txog tej lus uas Ethaws tau hais rau nws lawm.

2 Nws tau pom tias twb tau raug tua tuag los ntawm ntaj ze ob plhom ntawm nws cov neeg lawm, thiab nws tau pib tu nws lub siab; muaj tseeb tiag, tau raug tua tuag ob plhom ntawm cov neeg muaj zog, thiab lawv tej poj niam thiab lawv tej me nyuam.

3 Nws tau pib hloov siab lees txim txog txoj kev phem uas nws tau ua lawm; nws tau pib nco txog tej lus uas tau hais los ntawm tej qhov ncauj ntawm tag nrho tej yaj saub, thiab nws tau pom lawv tias lawv tau muaj puv npo zuj zus, txhua txhia yam; thiab nws tus ntsuj plig tau txom nyem siab thiab tsis kam kom nplij.

4 Thiab tau muaj tias nws tau sau ib tsab ntawv rau Siv, tau xav kom nws yuav tseg cov neeg, thiab nws yuav muab lub teb chaws rau txoj kev uas tseg cov neeg txoj sia.

5 Thiab tau muaj tias thaum Siv tau txais nws tsab ntawv nws tau sau ib tsab ntawv rau Khauli-athumaws, tias yog nws yuav kam nws tus kheej, xwv kom Siv yuav tau xuas nws rab ntaj kiag tua nws, ces nws yuav tseg cov neeg txoj sia.

6 Thiab tau muaj tias cov neeg tsis kam hloov siab lees txim txog lawv txoj kev tsis ncaj; thiab Khauli-athumaws cov neeg tau raug txhib kom npau taws tawm tsam Siv cov neeg; thiab Siv cov neeg tau raug txhib kom npau taws tawm tsam Khauli-athumaws cov neeg; yog li ntawd, Siv cov neeg tau ua rog rau Khauli-athumaws cov neeg.

7 Thiab thaum Khauli-athumaws tau pom tias nws twb yuav swb nws tau rov khiav ua ntej Siv cov neeg.

8 Thiab tau muaj tias nws tau los txog rau cov dej Lipliakhas uas txhais tias, loj, los sis loj dua lwm cov tag nrho; yog li ntawd, thaum lawv tau los txog cov dej no lawv tau rub lawv tej tsev pheeb suab ntaub; thiab Siv kuj tau rub nws tej tsev pheeb suab ntaub ze lawv; thiab yog li ntawd nyob rau tag kis lawv tau tuaj ua rog.

9 Thiab tau muaj tias lawv tau sib tua ib npluav rog uas mob heev, nyob hauv qhov ntawd Khauli-athumaws rov qab raug mob dua, thiab nws tau qaug zog lawm vim ntshav xiam ntau.

10 Thiab tau muaj tias Khauli-athumaws cov tub rog tau txiv rau saum Siv cov tub rog ces lawv tau kov yeej lawv, ces lawv tau ua rau lawv khiav ua ntej lawv; thiab lawv tau khiav mus rau sab nram hav, thiab tau rub lawv tej tsev pheeb suab ntaub nyob hauv ib qho chaw uas hu ua Ankas.

11 Thiab tau muaj tias Khauli-athumaws cov tub rog tau rub lawv tej tsev pheeb suab ntaub ze lub roob Lamas; thiab nws tau yog tib lub roob uas kuv txiv Maumoos tau muab cov ceev xwm txheej zais rau tus Tswv, uas yog tej uas dawb ceev.

12 Thiab tau muaj tias lawv tau sau ua ke tag nrho cov neeg uas nyob saum thaj av huv tib si, uas tsis tau raug tua tuag, tsuas yog tshuav Ethaws xwb.

13 Thiab tau muaj tias Ethaws tau pom tag nrho tej kev ua ub ua no ntawm cov neeg; thiab nws tau pom tias cov neeg uas yeem rau Khauli-athumaws raug sib sau ua ke rau Khauli-athumaws pab tub rog; thiab cov neeg uas yeem rau Siv tau raug sib sau ua ke rau Siv pab tub rog.

14 Yog li ntawd, lawv tau sau tej neeg ua ke tau ncua li plaub xyoos, xwv kom lawv yuav tau tag nrho cov uas nyob saum thaj av, thiab kom lawv yuav tau txais tag nrho tej zog uas lawv yuav muaj peev xwm txais tau.

15 Thiab tau muaj tias thaum lawv tau sau tag nrho sawv daws tuaj ua ke, txhua tus rau pab tub rog uas nws tau xaiv, nrog lawv tej poj niam thiab lawv tej me nyuam—txiv neej, poj niam thiab me nyuam yaus tau coj tej cuab yeej ua rog, tau muaj tej phiaj hlau, thiab tej phiaj thaiv hauv siab, thiab tej kaus mom hlau, thiab tau hnav tej ris li yuav mus ua rog—lawv ib leeg tau tawm mus ua rog rau ib leeg; thiab lawv tau sib tua hnub ntawd ib hnub, thiab tsis muaj tog yeej.

16 Thiab tau muaj tias thaum hmo ntuj lawv tau lim heev, thiab tau mus so rau tom lawv tej yeej; thiab tom qab uas lawv tau mus so rau tom lawv tej yeej tas lawv tau pib quaj thiab nyiav rau txoj kev xiam ntawm lawv cov neeg uas raug tua tuag lawm; thiab qhov loj heev tau yog lawv tej kev qw, lawv tej kev quaj thiab tej kev nyiav, ua rau lawv tau ua ncha tej cua heev kawg nkaus.

17 Thiab tau muaj tias nyob rau tag kis lawv tau rov mus ua rog dua, thiab qhov loj thiab phem heev tau yog hnub ntawd; txawm li ntawd los, lawv tsis muaj tog yeej, thiab thaum tsaus ntuj tau tuaj dua lawv tau ua ncha tej cua nrog lawv tej kev qw, thiab lawv tej kev quaj, thiab lawv tej kev txom nyem siab, rau txoj kev xiam ntawm lawv cov neeg txoj kev tua tuag.

18 Thiab tau muaj tias Khauli-athumaws tau rov sau ib tsab ntawv mus rau Siv, tau xav kom nws tsis txhob rov tuaj ua rog lawm, tiam sis kom nws yuav txais yuav lub teb chaws, thiab tseg cov neeg txoj sia.

19 Tiam sis saib seb, tus Tswv tus Ntsuj Plig tau tsum tsis nrog lawv nyob lawm, thiab Dab Ntxwg Nyoog tau muaj hwj chim kav cov neeg tej siab; vim lawv tau zeem rau txoj kev tawv ntawm lawv tej siab, thiab lawv tej siab tsis to taub ua kom lawv yuav raug puas tsuaj; yog li ntawd lawv tau rov qab mus ua rog dua.

20 Thiab tau muaj tias lawv tau sib tua hnub ntawd ib hnub nkaus, thiab thaum tsaus ntuj tuaj lawm lawv tau pw tsaug zog nrog lawv tej ntaj.

21 Thiab nyob rau tag kis lawv tau sib tua mus txog thaum tsaus ntuj tuaj.

22 Thiab thaum tsaus ntuj tuaj lawv tau qaug nrog txoj kev npau taws, tib yam li ib tug txiv neej uas raug qaug cawv txiv hmab; thiab lawv tau rov pw tsaug zog nrog lawv tej ntaj.

23 Thiab nyob rau tag kis lawv tau rov sib tua dua; thiab thaum tsaus ntuj tuaj lawv sawv daws tau ntog tag los ntawm ntaj tsuas tshuav tsib caug thiab ob leeg ntawm Khauli-athumaws cov neeg xwb, thiab Siv cov neeg tshuav rau caum thiab cuaj leeg.

24 Thiab tau muaj tias lawv tau pw tsaug zog nrog lawv tej ntaj hmo ntawd, thiab nyob rau tag kis lawv tau rov sib tua, thiab lawv tau tawm tsam nyob hauv lawv tej zog nrog lawv tej ntaj thiab nrog lawv tej phiaj hlau, tag nrho hnub ntawd.

25 Thiab thaum tsaus ntuj tuaj tau muaj peb caug thiab ob leeg ntawm Siv cov neeg, thiab nees nkaum thiab xya leej ntawm Khauli-athumaws cov neeg.

26 Thiab tau muaj tias lawv tau noj thiab tau pw tsaug zog, thiab tau npaj rau txoj kev tuag nyob rau tag kis. Thiab lawv tau loj thiab yog neeg muaj zog yog muab piv rau tej neeg lub zog.

27 Thiab tau muaj tias lawv tau sib tua tau ncua li peb teev, thiab lawv tau qaug zog lawm vim txoj kev xiam ntshav.

28 Thiab tau muaj tias thaum Khauli-athumaws cov neeg tau txais zog txaus uas lawv mus taus kev, lawv twb yuav luag tau khiav rau lawv txoj sia; tiam sis saib seb, Siv, thiab nws cov neeg tau sawv, thiab nws tau cog lus nyob hauv nws txoj kev npau taws tias nws yuav tua Khauli-athumaws los sis nws yuav piam sij los ntawm ntaj.

29 Yog li ntawd, nws tau caum lawv, thiab nyob rau tag kis nws caum tau lawv; thiab lawv rov xuas ntaj sib tua dua. Thiab tau muaj tias thaum lawv sawv daws tau ntog tas los ntawm ntaj, tsuas yog tshuav Khauli-athumaws thiab Siv xwb, saib seb Siv tau qaug zog lawm vim txoj kev xiam ntshav.

30 Thiab tau muaj tias thaum Khauli-athumaws tau pheeb rau saum nws rab ntaj, es nws tau so me ntsis, nws tau txiav Siv lub taub hau.

31 Thiab tau muaj tias tom qab uas nws tau txiav Siv lub taub hau tawm, Siv tau tsa nws ob txhais tes thiab vau kiag; thiab tom qab uas nws tau ntswj huas pa, nws tau tuag.

32 Thiab tau muaj tias Khauli-athumaws tau ntog rau hauv av, thiab tau rais los mus zoo li nws tsis muaj sia.

33 Thiab tau muaj tias tus Tswv tau hais rau Ethaws, thiab tau hais rau nws tias: Cia li mus. Thiab nws tau tawm mus, thiab tau pom tias tus Tswv tej lus tau muaj puv npo tag nrho; thiab nws tau xaus nws phau ceev xwm txheej; (thiab kuv tsis tau sau ib feem pua) thiab nws tau muab lawv zais ncaj ke kom cov neeg Leehais nrhiav tau lawv.

34 Nim no cov lus kawg uas tau raug sau los ntawm Ethaws yog cov no: Txawm tias tus Tswv yuav kom kuv plhis, los sis kom kuv tiv li tus Tswv lub siab nyiam nyob hauv cev nqaij daim tawv, nws tsis ua li cas, yog hais tias kuv yuav raug cawm dim mus nyob hauv Vajtswv lub nceeg vaj xwb. Amees.