“Kaum Ib Hlis Ntuj 9–15. Ethaws 1–5: ‘Dua daim Ntaub Thaiv ntawm Kev Tsis Ntseeg,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Kaum Ib Hlis Ntuj 9–15. Ethaws 1–5”, Los, Nrog Kuv Mus—Rau Ib Leeg thiab Tsev Neeg: 2020
Cov Neeg Yales Ncaim Npanpes, los ntawm Albin Veselka
Kaum Ib Hlis Ntuj 9–15
Ethaws 1–5
“Dua daim Ntaub Thaiv ntawm Kev Tsis Ntseeg”
Phau ntawv Ethaws yog cov Neeg Yales cov ceev xwm txheej, cov neeg uas tuaj txog thaj av cog lus cia ntau xyoo ua ntej cov Neeg Nifais. Vajtswv tau tshoov Maulaunais lub siab kom ntxiv Ethaws cov ceev xwm txheej hauv Phau Ntawv Maumoos vim tias nws yuav muaj nqis hauv peb hnub nyoog. Koj xav tias phau no muaj nqis li cas rau koj lub neej?
Sau Ntawv txog Koj tej Kev Tshoov Siab
Vajtswv tej kev yeej siab dua li peb tej kev, thiab peb yeej yuav tsum ywj rau Nws lub siab nyiam, tiam sis Nws kuj yaum peb kom xav thiab ua tej yam ntawm peb tus kheej. Nov yog ib zaj uas Yales thiab nws tus tij laug tau kawm. Piv txwv hais tias, lub tswv yim mus rau ib thaj av tshiab uas “zoo tshaj txhua thaj hauv lub ntiaj teb” los zoo li twb pib hauv Yales lub siab, thiab tus Tswv “muaj kev khuv leej” thiab tau cog lus ua raws li nws thov, hais tias, “Thiab kuv yuav ua li no rau koj vim yog koj tau thov kuv ntev npaum li no” (saib Ethaws 1:38–43). Thiab thaum Yales tus tij laug paub tias yuav tsaus nti npaum li cas hauv cov nkoj uas yuav thauj lawv mus rau thaj av uas cog lus cia, tus Tswv tau caw nws tawm ib lub tswv yim, thiab nug ib lo lus uas peb ib txwm xav nug Nws hais tias: “Koj xav kom kuv ua dab tsi?” (Ethaws 2:23). Zoo li zaj no qhia peb tias peb yuav tsum tsis txhob xav tias Vajtswv yuav txib peb ua txhua yam. Peb yeej qhia tau Nws txog peb tej kev xav thiab peb tej lub tswv yim, thiab Nws yuav mloog thiab pom zoo los sis ntuas peb kom txhob ua li ntawd. Tej lub sij hawm tib qho uas muab peb cais ntawm cov koob hmoov uas peb xav tau yog peb “daim ntaub thaiv ntawm kev tsis ntseeg,” thiab yog peb yuav “dua daim ntaub thaiv” (Ethaws 4:15), tej zaum peb yuav xav tsis thoob txog tej uas tus Tswv txaus siab ua rau peb.
Tej lub Tswv Yim Kawm Vaj Lug Kub ntawm Yus Ib Leeg
Thaum kuv thov tus Tswv, Nws yuav muaj kev khuv leej rau kuv.
Ethaws 1:33–43 hais txog peb zag lus thov Vajtswv uas Yales tus tij laug hais. Koj kawm dab tsi los ntawm tus Tswv tej lus teb peb zag lus thov no? Cia li xav txog ib lub sij hawm thaum koj tau txais tus Tswv txoj kev khuv leej rau koj thaum koj thov Nws. Tej zaum koj yuav xav sau ntawv txog tej lub sij hawm no thiab qhia rau lwm tus uas xav hnov koj zaj lus tim khawv.
Kuv txais tau kev tshwm sim rau kuv lub neej.
Thawj Tswj Hwm Russell M. Nelson hais tias: “Kuv taij thov kom nej sab ntsuj plig yuav haj yam muaj peev xwm txais kev tshwm sim. … Xaiv los ua tej hauj lwm ntawm sab ntsuj plig uas nej yuav tsum ua kom thiaj txais tau lub txiaj ntsim ntawm tus Ntsuj Plig Dawb Huv thiab haj yam hnov tus Ntsuj Plig lub suab kom meej zog.” (“Tshwm Sim rau lub Koom Txoos, Tshwm Sim rau Peb lub Neej,” Ensign los sis Liahona, Tsib Hlis Ntuj 2018, 96).
Thaum koj kawm Ethaws 2; 3:1–6; thiab 4:7–15, koj nrhiav tau tej lus tseeb twg uas pab koj to taub yuav ua li cas nrhiav kev tshwm sim? Tej zaum koj yuav xav siv muab ib lub xim kos rau tej lus nug los sis tej kev txhawj xeeb ntawm Yales tus tij laug thiab nws tau ua li cas, thiab siv lwm lub xim sau lub cim rau tej yam uas tus Tswv ua kom pab nws thiab qhia tias tus Tswv lub siab nyiam yog dab tsi. Koj txais kev tshoov siab twg txog qhov uas Yales tus tij laug tau nrog tus Tswv tham li cas, thiab koj kawm dab tsi los ntawm qhov no txog kev txais kev tshwm sim ntxiv hauv koj lub neej?
Tus Tswv yuav npaj kuv hla kuv “tej dej tob heev.”
Yog cov Neeg Yales xav mus txog thaj av uas cog lus tseg, lawv muaj ib yam loj heev uas tab kaum lawv: kev hla “tej dej tob heev” (Ethaws 2:25). Cov lus “tej dej tob heev” los tej zaum tsim nyog piav txog peb tej kev sim siab thiab tej teeb meem. Thiab tej lub sij hawm, ib yam li cov Neeg Yales, qhov uas peb hla peb “tej dej tob heev” yog tib txoj kev ua raws li Vajtswv lub siab nyiam rau peb. Koj puas pom tej yam zoo il no hauv koj lub neej nyob hauv Ethaws 2:16–25? Tus Tswv tau npaj koj li cas rau koj tej teeb meem? Nws yeej xav kom koj ua dab tsi tam sim no kom npaj rau tej yam Nws xav kom nej ua thaum yav tom ntej?
Vajtswv tau tsim kuv raws li Nws tus yam ntxwv.
Nyob pem Roob Seles, Yales tus tij laug tau kawm ntau txog Vajtswv thiab nws tus kheej. Koj kawm dab tsi los ntawm Ethaws 3 txog Vajtswv lub cev ntawm sab ntsuj plig thiab sab cev nqaij daim tawv? Tej yam tseeb no pab koj li cas kom to taub koj muaj peev xwm uas los saum ntuj los?
Peb txhua tus yog Vajtswv cov me nyuam.
Yales tus tij laug puas yog thawj tug neeg uas pom tus Tswv?
Vajtswv twb muab Nws tus kheej tshwm sim rau lwm tus yaj saub pom ua ntej Yales tus tij laug (ua piv txwv, saib Mauxes 7:4, 59), yog li ntawd vim li cas tus Tswv hais rau nws tias, “Kuv yeej ib txwm tsis tau ua kuv tus kheej rau tib neeg … pom li”? (Ethaws 3:15). Txwj Laug Jeffrey R. Holland tau piav li no: “Khetos hais rau Yales tus tij laug tias, ‘Kuv ib txwm tsis tau ua kuv tus kheej rau tib neeg pom zoo li no, raws li nws siab xav, vim tus uas pom muaj kev ntseeg heev xwb’” (Christ and the New Covenant [1997], 23).
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Ethaws 1:34–37
Peb kawm dab tsi los ntawm tej nqe no txog txoj kev thov Vajtswv pab lwm tus? Tej nqe no qhia tej lus tseeb dab tsi ntxiv txog kev thov Vajtswv?
Ethaws 2:16–3:6
Yales tus tij laug tus yam ntxwv qhia dab tsi rau peb txog txoj kev nrhiav tej lus teb rau peb tej teeb meem thiab tej lus nug? Tej zaum nej tsev neeg yuav xav qhia thaum twg lawv thov thiab txais lus teb los ntawm tus Tswv.
Ethaws 4:11–12
Tom qab nej nyeem tej nqe no, tej zaum nej tsev neeg yuav xav sau ntawv txog tej yam uas muaj niaj hnub uas ua rau nej tsev neeg xav tej yam (xws li movie, zaj nkauj, kev ua si, los sis lwm tus neeg) es sau ib qho rau ib daim thiab tso hauv ib lub tais. Ces lawv yuav xaiv ib daim ib leeg zuj zus thiab hais lus seb qhov ntawd puas “yaum [lawv] ua zoo” (Ethaws 4:12). Nej tsev neeg txais kev tshoov siab xav hloov dab tsi?
Ethaws 5
Tej zaum nej yuav xav muab ib yam khoom los sis khoom noj zais hauv ib lub phij xab thiab caw ib tug hauv nej tsev neeg saib haud thiab hais tej lus kom pab nej tsev neeg twv seb yog dab tsi. Thaum nej nyeem Ethaws 5 ua ke, cia li sib tham seb yog vim li cas tus Tswv siv cov neeg tim khawv thaum Nws ua Nws tej hauj lwm. Peb yuav ua li cas kom qhia peb zaj lus tim khawv txog Phau Ntawv Maumoos rau lwm tus?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Ua tib zoo npaj txhua lub sij hawm. “Tej lub sij hawm zoo qhia los dhau mus sai heev, yog li ntawd ua tib zoo qhia thaum muaj sij hawm. … Piv txwv tias, ib tug tub hluas los ntxhais hluas uas muaj kev txiav txim nyuaj tej zaum yuav npaj siab kawm tias nws yuav tsum ua li cas kom txais tau kev tshwm sim” (Teaching in the Savior’s Way, 16).
Koj Puas Pom Ntau Tshaj Nov? los ntawm Marcus Alan Vincent