“Kaum Ib Hlis Ntuj 2–8. Maumoos 7–9: ‘Kuv Hais Lus rau Nej Ib Yam Li Nej Nyob ntawm No,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Kaum Ib Hlis Ntuj 2–8. Maumoos 7–9”, Los, Nrog Kuv Mus—Rau Ib Leeg thiab Tsev Neeg: 2020
Maulaunais Sau rau cov Phiaj Kub, los ntawm Dale Kilborn
Kaum Ib Hlis Ntuj 2–8
Maumoos 7–9
“Kuv Hais Lus rau Nej Ib Yam Li Nej Nyob ntawm No”
Maumoos thiab Maulaunais ntseeg hais tias lawv cov ceev xwm txheej yuav tshoov cov neeg nyob hauv hnub nyoog kawg lub siab. Thaum koj nyeem Maumoos 7–9, cia li sau ntawv txog tej kev tshoov siab uas koj txais thiab qhov uas koj yuav siv tej yam uas koj kawm li cas.
Sau Ntawv txog Koj tej Kev Tshoov Siab
Maumoos thiab Maulaunais paub tias qhov uas yus nyob yus ib leeg hauv ib lub ntiaj teb phem zoo li cas. Ntshe Maulaunais txoj kev kho siab yeej loj heev tom qab nws txiv tuag thaum nws ua rog thiab cov Neeg Nifais raug puas tsuaj. Nws sau hais tias, “Kuv tib leeg nyob. Kuv twb tsis muaj phooj ywg thiab tsis pom qab yuav mus qhov twg” (Maumoos 8:3, 5). Tej zaum lwm tus yuav tsis muaj kev cia siab hlo li, tiam sis Maulaunais muaj kev cia siab los ntawm qhov uas nws paub tus Cawm Seej thiab paub tias “tus Tswv tej hom phiaj uas nyob mus ib txhis yuav dov mus” (Maumoos 8:22). Thiab Maulaunais paub tias ib qho tseem ceeb ntawm tej hom phiaj uas nyob mus ib txhis ntawd yuav los ntawm Phau Ntawv Maumoos—cov ceev xwm txheej uas nws tab tom rau siab sau, cov ceev xwm txheej uas yav tom ntej yuav “ci tawm hauv qhov tsaus ntuj los” thiab coj neeg coob “paub txog Khetos” (Maumoos 8:16; 9:36). Maulaunais txoj kev ntseeg tej lus cog tseg no ua rau nws txawj tshaj tawm rau cov uas yuav nyeem phau ntawv no hias tias, “Kuv hais lus rau nej ib yam li nej nyob ntawm no” thiab “kuv paub tias nej yuav tau kuv tej lus” (Maumoos 8:35; 9:30). Tam sim no peb yeej muaj nws tej lus, thiab tus Tswv txoj hauj lwm yeej mus tom ntej, feem ntau yog vim Maumoos thiab Maulaunais ua nkawd ntiag tug hauj lwm, tsis hais thaum nkawd nyob nkawd tus kheej xwb.
Tej lub Tswv Yim Kawm Vaj Lug Kub ntawm Yus Ib Leeg
Kuv yuav tsum ntseeg Yexus Khetos thiab “tuav nkaus” Nws txoj moo zoo.
Maumoos tej lus kawg, nyob hauv Maumoos 7, los hais rau cov neeg Lamas cov xeeb ntxwv hauv hnub nyoog kawg, tiam sis muaj tej lus tseeb uas hais rau peb txhua tus. Maumoos zaj lus qhia dab tsi rau koj txog Yexus Khetos thiab Nws txoj moo zoo? Vim li cas Maumoos tau txiav txim siab sau li no kom xaus nws tej lus?
Maumoos 7:8–10; 8:12–22; 9:31–37
Phau Ntawv Maumoos muaj nqis heev.
Thawj Tswj Hwm Russell M. Nelson tau nug hais tias: “Yog tias leej twg yuav muab ib co pov haum los sis Phau Ntawv Maumoos pub rau nej, nej yuav xaiv qhov twg? Tiag tiag, nej saib qhov twg muaj nqi ntau tshaj?” (“Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?” Ensign los sis Liahona, Kaum Ib Hlis Ntuj 2017, 61).
Maumoos thiab Maulaunais paub tias cov ceev xwm txheej uas nkawd sau yuav muaj nqis heev hauv peb lub caij nyoog, yog li ntawd lawv twb ua ntau yam heev kom npaj thiab pov hwm cov ceev xwm txheej ntawd. Thaum koj nyeem Maumoos 7:8–10; 8:12–22; thiab 9:31–37, xav seb vim li cas cov ceev xwm txheej muaj nqis heev hauv peb hnub nyoog kawg no. Tej zaum koj yuav nrhiav tau tej lub tswv yim tshiab nyob hauv 1 Nifais 13:38–41; 2 Nifais 3:11–12; thiab Lus Qhuab Qhia thiab Kev Khi Lus 33:16; 42:12–13. Phau Ntawv Maumoos tau pab koj li cas paub tias nws muaj nqis heev?
Phau Ntawv Maumoos cov yaj saub tej lus uas lawv sau cia muaj nqis rau peb.
Phau Ntawv Maumoos yeej yog ib phau rau peb lub caij nyoog.
Yexus Khetos tau qhia Maulaunais tias yuav muaj li cas thaum Phau Ntawv Maumoos yuav tawm los (saib Maumoos 8:34–35), thiab qhov uas Maulaunais pom ua rau nws ceeb toom peb hauv peb hnub nyoog. Thaum koj nyeem Maumoos 8:26–41 thiab 9:1–30, cia li xav seb puas muaj tej lub cim txog tej cwj pwm thiab tej yam no hauv koj lub neej. Koj yuav ua dab tsi txawv?
Piv txwv hais tias, Maumoos 9:1–30 muaj Maulaunais zaj lus rau peb thaum nws pom tias tsis muaj neeg ntseeg Yexus Khetos pes tsawg hauv peb hnub nyoog kawg no. Cia li xav seb koj puas sau ntawv txog tej uas koj kawm los ntawm nws tej lus txog tej yam no:
-
Tej xwm txheej uas raug vim tsis ntseeg Khetos (nqe 1–6, 26)
-
Qhov uas yus yuav tsum ntseeg Vajtswv uas muab kev tshwm sim thiab ua txuj ci tseem ceeb (nqe 7–20)
-
Maulaunais tej lus ntuas rau peb (nqe 21–30)
Koj tau kawm dab tsi los ntawm Maulaunais uas pab tau koj coj lwm tus los ze Leej Txiv Saum Ntuj Ceeb Tsheej thiab Yexus Khetos?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Maumoos 7:5–7, 10; 9:11–14
Tej nqe no qhia dab tsi rau peb txog Leej Txiv Saum Ntuj Ceeb Tsheej txoj hau kev thiab vim li cas peb xav tau ib tug Cawm Seej?
Maumoos 7:8–10
Peb tau kawm dab tsi thaum peb kawm txog Phau Ntawv Maumoos xyoo no uas tau pab txhawb nqa peb txoj kev ntseeg phau Npaivnpaum? Kom pib sib tham txog qhov no, tej zaum nej yuav xav koom ua ke nyeem tej nqe vaj lug kub los ntawm Phau Ntawv Maumoos thiab phau Npaivnpaum uas qhia tej lus tseeb zoo ib yam Amas 7:11–13 thiab Yaxayas 53:3–5 los sis 3 Nifais 15:16–24 thiab Yauhas 10:16.
Maumoos 8:1–9
Nej yuav xav li cas yog nej nyob nej ib leeg zoo li Maulaunais? Peb txais kev tshoov siab twg txog tej yam nws tau ua?
Maumoos 8:12, 17–21; 9:31
Xav seb nej tsev neeg puas xav nyeem tej nqe no ces nyeem tej lus los ntawm Txwj Laug Jeffrey R. Holland: “Tsuas yog Nws Tib Leeg Tub uas zoo tag nrho xwb, Vajtswv tsuas siv tau cov neeg tsis zoo tag nrho xwb. … Thiab thaum nej pom tej yam tsis zoo tag nrho, cia li nco ntsoov tias qhov tsis zoo tag nrho ntawd tsis yog ib feem ntawm Vajtswv txoj hauj lwm” (“Lord, I Believe,” Ensign los sis Liahona, Tsib Hlis Ntuj 2013, 94). Vim li cas yog ib qho tsis zoo xav txog tej yam tsis zoo tag nrho ntawm lwm tus, tsis hais cov uas sau Phau Ntawv Maumoos los yog?
Maumoos 8:36–38
Qhov uas peb ris Yexus Khetos lub npe txhais li cas? Vim li cas ib tug neeg yuav txaj muag ris Yexus Khetos lub npe? Peb yuav ua li cas kom ua siab loj hais lus tim khawv txog tus Cawm Seej?
Maumoos 9:16–24
Yuav tsum muaj tej yam khoom kom ua kev tshawb fawb science los sis ua mov qab heev. Xav seb nej tsev neeg puas yuav ua kev tshawb fawb los sis ua mov ua ntej nej nyeem Maumoos 9:16–24. Thaum nej nyeem (qhov tseem ceeb nqe 20–21), nrhiav tej yam uas ua rau nej txais tau tej txuj ci tseem ceeb. Peb tsev neeg txawj pom tau tej txuj ci tseem ceeb twg nyob hauv lub ntiaj teb no?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Cia li siv tej ntaub ntawv pab los ntawm lub Koom Txoos. Yog koj muaj tej lus nug txog txoj moo zoo, tej yam uas pab tau zoo tshaj plaws yog kev thov Vajtswv, cov vaj lug kub, cov yaj saub tej lus, thiab lwm yam ntaub ntawv uas lub Koom Txoos luam tawm (saib Teaching in the Savior’s Way, 17–18, 23–24).
Maumoos Sau Ntsiab Lus hauv cov Phiaj, los ntawm Jon McNaughton