“Kaum Ib Hlis Ntuj 30–Kaum Ob Hlis Ntuj 6. Maulaunais 1–6: ‘Kom Ceev Tau Lawv Taug txoj Kev Yog,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Kaum Ib Hlis Ntuj 30–Kaum Ob Hlis Ntuj 6. Maulaunais 1–6”, Los, Nrog Kuv Mus—Rau Ib Leeg thiab Tsev Neeg: 2020
Minerva K. Teichert (1888–1976), Amas Muab Neeg Ua Kev Cai Raus Dej hauv cov Dej Maumoos, 1935–1945, pleev roj rau pob zeb, 35 x 48 yas tes. Brigham Young University Museum of Art, 1969.
Kaum Ib Hlis Ntuj 30–Kaum Ob Hlis Ntuj 6
Maulaunais 1–6
“Kom Ceev Tau Lawv Taug txoj Kev Yog”
Maulaunais tau sau txog tej yam uas nws cia siab tias yuav “muaj nuj nqis … nyob rau lub caij yav tom ntej” (Maulaunais 1:4). Koj nrhiav dab tsi nyob hauv Maulaunais 1–6 uas muaj nqis rau koj? Cia li sau ntawv txog tej yam uas koj kawm, thiab xav seb koj puas qhia rau lwm tus uas yuav saib qhov ntawd muaj nqis thiab.
Sau Ntawv txog Koj tej Kev Tshoov Siab
Tom qab nws sau nws txiv cov ceev xwm txheej txog cov Neeg Nifais tas lawm thiab sau ntsiab lus txog cov Neeg Yales cov ceev xwm txheej, Maulaunais xav tias nws twb ua nws hauj lwm tas lawm (saib Maulaunais 1:1). Muaj dab tsi ntxiv uas nws tau hais txog ob haiv neeg uas raug puas tsuaj tas lawm? Tiam sis Maulaunais tau pom peb lub caij nyoog (saib Maumoos 8:35), thiab nws tau txais kev tshoov siab “sau ob peb yam ntxiv, [vim] tej zaum tej uas kuv sau no yuav muaj nuj nqis … nyob rau lub caij yav tom ntej” (Maulaunais 1:4). Nws paub tias tib neeg yuav tso qhov tseeb tseg tag nrho, yuav ua rau tib neeg tsis paub meej txog cov kab ke pov thawj hwj thiab kev teev ntuj. Tej zaum yog vim li no nws tau qhia meej txog lub cim nco txog, kev cai raus dej, kev muab lub txiaj ntsim Vaj Ntsuj Plig Dawb Huv rau neeg, thiab cov koob hmoov uas los tau cov ntseeg koom ua ke kom “ceev tau [peb] taug txoj kev yog, … cia siab ntsoov rau Khetos tej kev ua zoo xwb, tus uas yog lub hauv paus ntawm [peb] txoj kev ntseeg thiab tus ua kom [peb] txoj kev ntseeg tiav” (Maulaunais 6:4). Tej lub tswv yim zoo li no pab peb ua tus Tswv tsaug vim Nws ceev Maulaunais txoj sia nws thiaj li tau “sau ob peb yam ntxiv” (Maulaunais 1:4).
Tej lub Tswv Yim Kawm Vaj Lug Kub ntawm Yus Ib Leeg
Yexus Khetos cov thwj tim yeej yuav tsum rau siab ntseeg tsis hais thaum raug tawm tsam los yog.
Ib txhia neeg los yeej yooj yim rau lawv rau siab ntseeg thaum yooj yim thiab txaus siab ua xwb. Tiam sis vim peb yog Yexus Khetos cov thwj tim, peb yuav tsum rau siab ntseeg tsis hais thaum peb raug kev sim siab thiab kev tawm tsam. Thaum koj nyeem Maulaunais 1, koj txais kev tshoov siab li cas txog Maulaunais txoj kev rau siab ntseeg tus Tswv thiab qhov uas Vajtswv tau hu nws? Koj yuav ua li cas kom coj raws li nws tus yam ntxwv?
Yuav tsum ua cov kab ke pov thawj hwj raws li tus Tswv txib ua.
Thaum Nws ua Nws txoj hauj lwm qhuab qhia, tus Cawm Seej tau txais thiab ua cov kab ke dawb ceev, xws li kev cai raus dej (saib Mathais 3:13–17; Joseph Smith Kev Txhais, Yauhas 4:1–3 [nyob hauv phau Npaivnpaum cov ntawv ntxiv tom kawg]), kev tsa rau lub pov thawj hwj (saib Malakaus 3:13–19), thiab lub cim nco txog (saib Mathais 26:26–28). Tiam sis, vim tau muaj lub Caij Tso Qhov Tseeb Tseg Loj, neeg coob niaj hnub no tsis paub tseeb yuav tsum ua cov kab ke li cas—thiab tsis paub xyov puas yuav tsum ua los tsis tas ua hlo li. Nyob hauv Maulaunais 2–6, Maulaunais tau qhia tej yam meej txog cov kab ke pov thawj hwj uas pab tau txoj kev tsis paub meej ploj mus. Tej kev tshoov siab twg los rau koj thaum koj kawm txog cov kab ke hauv tej tshooj no? Tej yam nram qab no yog tej lus nug uas tej zaum yuav pab koj kawm:
-
Kev pom zoo (Maulaunais 2; 6:4).Tus Cawm Seej tej lus qhia nyob hauv Maulaunais 2:2 qhia dab tsi rau koj txog cov kab ke pom zoo? Koj xav tias cov lus no “tus Vaj Ntsuj Plig Dawb Huv lub hwj chim tau los tshoov lawv lub siab thiab ntxuav lawv lawm” txhais li cas?? (Maulaunais 6:4).
-
Kev tsa rau lub pov thawj hwj (Maulaunais 3).Koj kawm dab tsi hauv tshooj no uas yuav pab ib tug neeg npaj siab raug tsa rau lub pov thawj hwj? Koj kawm dab tsi uas yuav pab ib tug ua kab ke tsa?
-
Lub cim nco txog (Maulaunais 4–5; 6:6).Cia li xav txog tej lus cog tseg hauv ob zaj lus thov Vajtswv foom koob hmoov rau lub cim nco txog (saib Maulaunais 4:3; 5:2), thiab xav txog tej yam uas koj ua kom ua raws li koj tej lus cog tseg. Koj yuav ua dab tsi kom caw tus Ntsuj Plig los muaj hwj huam hauv koj lub neej thaum koj txais lub cim nco txog?
-
Kev cai raus dej (Maulaunais 6:1–3).Koj yuav ua dab tsi kom tsim nyog ua kev cai raus dej raws li tej nqe no qhia, tsis hais tom qab koj twb ua kev cai raus dej lawm? Tej nqe no qhia dab tsi rau koj txog qhov uas kev ua mej zeej hauv Yexus Khetos lub Koom Txoos txhais li cas?
Raws li koj tau kawm, koj yuav hloov koj tej kev xav, tej yam koj ua, los sis kev npaj lwm tus thaum yuav ua cov kab ke no? Vim li cas yuav tsum ua cov kab ke no kom ua raws li “Khetos tej lus txib”? (Maulaunais 4:1).
Kuj saib “Ordinances,” Gospel Topics, topics.ChurchofJesusChrist.org.
Yexus tau qhia tias yuav tsum ua cov kab ke li cas.
Yexus Khetos cov thwj tim ib leeg saib xyuas ib leeg.
Qhov uas peb txhua tus “ua hauj lwm rau [peb] txoj kev cawm seej” (Maumoos 9:27), Maulaunais kuj qhia tias yog peb “sib ntsib ua ke tsis tu ncua” nrog cov ntseeg ces qhov ntawd yuav pab peb “taug txoj kev yog” (Maulaunais 6:4–5). Thaum koj nyeem Maulaunais 6:4–9, cia li xav txog cov koob hmoov uas los rau koj vim “yuav suav [koj] nrog cov neeg ntawm Khetos lub koom txoos” (Maulaunais 6:4). Koj yuav ua li cas kom pab koj thiab lwm tus muaj lub sij hawm zoo thaum nyob hauv lub koom txoos kom zoo li Maulaunais piav, tsis hais koj yog ib tug thawj coj los yog koj yog ib tug uas mus koom ua ke xwb?
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Maulaunais 1; Maulaunais 6:3
Qhov uas yus “xyeej Khetos” txhais li cas? (Maulaunais 1:2–3). Peb yuav ua li cas kom qhia tias peb yuav “txiav txim siab los ua hauj lwm rau nws kom mus txog thaum kawg”? (Maulaunais 6:3). Cia li qhia txog cov neeg nej paub uas tau txiav txim siab ua hauj lwm rau Nws li no.
Maulaunais 4:3; Maulaunais 5:2
Tej zaum yog nej tsev neeg nyeem tej zaj lus thov Vajtswv foom koob hmoov rau lub cim nco txog yuav pab nej sib tham txog qhov uas nej yuav ua li cas kom saib lub cim nco txog rau nqi ntxiv. Tej zaum nej tsev neeg yuav xav sib tham txog tej lus los ntawm ob zag lus thov uas muaj nqi rau lawv. Tej zaum lawv yuav xav sau ntawv txog lawv tej kev xav txog tej lus no los sis kos duab uas pab lawv xav txog tus Cawm Seej. Tej zaum lawv yuav nqa cov ntawv lawv sau los sis kos dua rau kev sib ntsib txais lub cim nco txog kom pab lawv tsom ntsoov rau Nws. Qhia nej tsev neeg nej xav li cas txog lub cim nco txog thiab tus Cawm Seej txoj kev txi.
Maulaunais 6:1–4
Qhov uas yus muaj “ib lub siab puas tas thiab lub siab xav ua zoo” txhais li cas? (Maulaunais 6:2). Qhov no ua li cas pab peb npaj ua kev cai raus dej? Yuav pab peb li cas tom qab peb ua kev cai raus dej?
Maulaunais 6:4–9
Raws li tej nqe no hais, peb tau cov koob hmoov twg los ntawm qhov uas “yuav suav [peb] nrog cov neeg ntawm Khetos lub koom txoos”? (Maulaunais 6:4). Vim li cas peb yuav tsum muaj lub Koom Txoos?
Maulaunais 6:8
Nqe no qhia dab tsi rau nej txog kev hloov siab lees txim? Qhov uas yus “muaj siab ua tiag tiag” nrhiav kev zam txim txhais li cas? (Maulaunais 6:8). Xav seb nej puas xav hu ib zaj nkauj txog kev zam txim, xws li “Help Me, Dear Father” (Children’s Songbook, 99).
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Nrhiav tau tej yam uas qhia tias Vajtswv hlub peb. Thawj Tswj Hwm M. Russell Ballard tau qhia hais tias, “Txoj moo zoo yog ib txoj moo zoo ntawm kev hlub—kev hlub Vajtswv thiab kev hlub lwm tus” (“God’s Love for His Children,” Ensign, Tsib Hlis Ntuj 1988, 59). Thaum koj nyeem vaj lug kub, cia li xav seb koj puas sau tej lub cim txog tej uas qhia tias Vajtswv hlub koj thiab tag nrho Nws cov me nyuam.
Maulaunais Nyob hauv lub Qhov Tsua, los ntawm Jorge Cocco