“Kaum Ob Hlis Ntuj 21–27. Christmas: ‘Nws Yuav Los rau hauv lub Ntiaj Teb Los Txhiv Nws cov Neeg Dim,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)

“Kaum Ob Hlis Ntuj 21–27. Christmas,” Los, Nrog Kuv Mus—Rau Ib Leeg thiab Tsev Neeg: 2020

Daim Duab

Yauxej, Maivliag, thiab tus me nyuam mos liab Yexus nyob hauv lub tsev rau tsiaj nyob

Saib Vajtswv tus Me Nyuam Yaj, los ntawm Walter Rane

Kaum Ob Hlis Ntuj 21–27

Christmas

“Nws Yuav Los rau hauv lub Ntiaj Teb Los Txhiv Nws cov Neeg Dim”

Lub caij Christmas no yog ib lub caij rau peb xav txog thiab ua Vajtswv tsaug rau peb tus Cawm Seej, Yexus Khetos, txoj kev yug los. Lub lim tiam no thaum koj nyeem thiab xav txog Nws txoj kev yug los thiab lub neej, cia li xav seb koj txoj kev kawm Phau Ntawv Maumoos xyoo no tau pab koj li cas kom txhawb nqa koj zaj lus tim khawv paub hais tias Nws yog tus Cawm Seej ntawm lub ntiaj teb. Cia li sau ntawv txog tej kev tshoov siab uas los rau koj.

Sau Ntawv txog Koj tej Kev Tshoov Siab

Txij ntawm Nifais txog Maulaunais, txhua tus yaj saub hauv Phau Ntawv Maumoos yeej ua raws li lub hom phiaj dawb ceev uas hais hauv phau ntawv no phab ntawv qhia npe: “Yaum [txhua tus neeg] tias Yexus yog tus Khetos.” ib tug yaj saub pom Nws thaum Nws tseem yog ib tug ntsuj plig ua ntej yug los, thiab lwm tus ua yog toog pom Nws txoj kev yug los thiab Nws txoj kev qhuab qhia. Ib tug tau sawv saum ib phab ntsa kom tshaj tawm txog tej lub cim ntawm Nws txoj kev yug los thiab Nws txoj kev tuag, thiab lwm tus tau txhos caug rau ntawm Nws lub cev uas tau sawv rov los, kov tej qhov txhab hauv Nws txhais tes, txhais taw, thiab ib sab. Lawv txhua tus paub qhov tseeb tseem ceeb no: “Yeej tsis muaj dua lwm txoj kev los sis lwm yam uas yuav cawm tau neeg dim, tsuas yog los ntawm Yexus Khetos, tus uas … yuav los txhiv neeg ntiaj teb dim” (Hilamas 5:9).

Yog li ntawd hauv lub caij Christmas no, thaum cov ntseeg nyob thoob plaws lub ntiaj teb ua koob tsheej txog Vajtswv txoj kev zoo thiab txoj kev hlub vim Nws txib Nws Leej Tub, cia li xav txog qhov uas Phau Ntawv Maumoos tau txhawb koj txoj kev ntseeg Khetos dag zog li cas. Thaum koj xav txog Nws txoj kev yug los, cia li xav seb vim li cas Nws tau los thiab qhov uas Nws los tau hloov koj lub neej li cas. Ces koj yuav paub kev xyiv fab tseeb ntawm lub caij Christmas—yog lub txiaj ntsim uas Yexus Khetos pub rau koj.

Daim Duab

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

1 Nifais 11:13–36; Mauxiyas 3:5–10; Hilamas 14:1–13; 3 Nifais 1:4–22

Yexus Khetos tau los rau hauv lub ntiaj teb los ua kuv tus Cawm Seej.

Peb yeej ib txwm nyeem zaj txog tus Cawm Seej txoj kev yug los hauv Phau Tshiab thaum txog lub Caij Christmas, tiam sis koj kuj nrhiav tau tej lus uas qhia txog lub sij hawm dawb ceev no nyob hauv Phau Ntawv Maumoos. Piv txwv hais tias, muaj tej kev qhia tej yuav muaj los yav tom ntej txog tus Cawm Seej txoj kev yug los thiab txoj kev qhuab qhia nyob hauv 1 Nifais 11:13–36; Mauxiyas 3:5–10; Hilamas 14:1–13; thiab 3 Nifais 1:4–22. Koj txais kev tshoov siab twg txog Yexus Khetos thaum koj nyeem tej zaj no thiab xav txog lub ntsiab ntawm tej cim ntawm Nws txoj kev yug los? Cov yaj saub puag thaum ub hauv Amelikas tej zaj lus tim khawv pab txhawb koj zaj lus tim khawv txog Khetos thiab Nws ntiag tug hauj lwm li cas?

Kuj saib Mathais 1:18–25; 2; Lukas 2.

2 Nifais 2:6; Amas 7:7–13; 11:40; Hilamas 5:9; 14:16–17

Yexus Khetos yog noob neej tus txhiv dim.

Peb yeej yuav tsis ua koob tsheej txog Yexus Khetos txoj kev yug los yog tias Nws tsis tau theej peb lub txhoj. Los ntawm Nws txoj kev txi Nws tau cawm peb dim kev txhaum thiab kev tuag, Nws nplij peb lub siab thaum peb raug txom nyem, thiab Nws pab peb “ua neeg zoo tag nrho vim yog los ntawm Nws” (Maulaunais 10:32). Koj tau kawm dab tsi los ntawm Phau Ntawv Maumoos xyoo no txog tus Cawm Seej lub hwj chim txhiv koj dim? Puas muaj dab neeg los sis tej lus qhia uas koj nyiam? Xav seb tej nqe no qhia dab tsi rau koj txog tus Cawm Seej ntiag tug hauj lwm txhiv nej dim: 2 Nifais 2:6; Amas 7:7–13; 11:40; and Hilamas 5:9; 14:16–17. Koj xav tias koj yuav ua li cas kom qhia Nws tias koj ris Nws txiaj? (Christmas.ComeuntoChrist.org muaj tej lub tswv yim kom pab koj pib ua li ntawd.)

1 Nifais 6:4; 19:18; 2 Nifais 25:23, 26; 33:4, 10

Phau Ntawv Maumoos ua tim khawv txog Yexus Khetos.

“Ib zaj Tim Khawv Ntxiv txog Yexus Khetos” tsis yog ib lub npe rau Phau Ntawv Maumoos xwb; yeej yog ib cov lus uas qhia txog Phau Ntawv Maumoos lub hom phiaj. Xav seb koj tau kawm dab tsi los ntawm tej nqe vaj lug kub no hais txog Phau Ntawv Maumoos ntiag tug hauj lwm ua tim khawv txog Khetos: 1 Nifais 6:4; 19:18; and 2 Nifais 25:23, 26; 33:4, 10.

Xav seb koj puas yuav sau hauv ib phau ceev xwm txheej txog qhov uas koj txoj kev kawm Phau Ntawv Maumoos xyoo no tau pab koj paub Yexus Khetos ntxiv. Tej zaum tej yam no yuav pab koj sau:

“Ib yam tshiab kuv tau kawm txog tus Cawm Seej xyoo no yog …”
“Kev nyeem [tej nqe txog tus Cawm Seej] tau hloov kuv txoj kev …”
“Tus neeg [los sis zaj dab neeg] uas kuv nyiam tshaj hauv Phau Ntawv Maumoos tau qhia kuv tias tus Cawm Seej …”

Daim Duab

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.

1 Nifais 11:13–23; Mauxiyas 3:5–10; Hilamas 14:1–13; 3 Nifais 1:4–22

Tej zaum cov me nyuam yuav nyiam kos duab txog tej yam uas lawv hnov thaum nej nyeem tej zaj dab neeg txog Yexus Khetos txoj kev yug los thiab txoj kev qhuab qhia nyob hauv 1 Nifais 11:13–23; Mauxiyas 3:5–10; Hilamas 14:1–13; thiab 3 Nifais 1:4–22. Ces nej cov me nyuam yuav rov qab hais dab neeg thaum lawv muab daim duab uas lawv kos rau nej saib.

“Nws Yog lub Txiaj Ntsim”

Xwv kom pab nej tsev neeg tsom ntsoov rau lub txiaj ntsim uas Leej Txiv Saum Ntuj Ceeb Tsheej pub rau peb thaum Nws txib Nws Leej Tub los, tej zaum nej yuav xav muab ib daim duab txog Yexus Khetos qhwv zoo li khoom plig Christmas. Nej tsev neeg tej zaum yuav xav sib tham txog lub khoom plig zoo tshaj plaws uas lawv tau txais los sis xav txais. Ces lawv yuav muab khoom plig tev ntawv pom Khetos daim duab thiab sib tham txog qhov uas Nws yog lub txiaj ntsim muaj nqis heev uas Vajtswv tau pub rau peb. Daim video “He Is the Gift” (ChurchofJesusChrist.org) tej zaum yuav pab nej sib tham seb nej yuav ua li cas kom nrhiav, muab siab npuab, thiab qhia lwm tus txog lub txiaj ntsim uas yog tus Cawm Seej nyob hauv nej tsev neeg hauv lub caij Christmas no.

Tej zaum nej tsev neeg yuav tau zoo yog lawv xav txog ib lub “txiaj ntsim” uas lawv yuav pub rau tus Cawm Seej, xws li qhov uas ib leeg yuav ua siab zoo dua ntxiv rau ib leeg los sis kev kov yeej ib tug cwj pwm phem. Xav seb nej puas caw nej tsev neeg sau ntawv txog lawv lub tswv yim, muab daim ntawv ntawd qhwv zoo li ib khoom plig, thiab tso lawv khoom plig rau ntawm ib daim duab txog tus Cawm Seej.

Lub Hwj Huam ntawm Christmas

Tej zaum yuav muaj kev lom zem npaj tej yam nej tsev neeg ua tau ob peb hnub ua ntej Christmas kom hnov tau lub Hwj Huam ntawm Khetos, xws li kev pab lwm tus los sis kev hu tej zaj nkauj Christmas ua ke. (Yog xav tau tswv yim, saib Christmas.ComeuntoChrist.org.)

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Kev Qhia Zoo Dua Ntxiv

Rov qab nug txog tej yam uas nej caw nej tsev neeg ua. “Thaum nej rov qab nug txog tej yam uas nej caw nej tsev neeg ua, nej qhia nej tsev neeg tias nej hlub lawv thiab qhia vim li cas txoj moo zoo pab lawv tau koob hmoov. Nej kuj muab cib fim rau lawv hais txog lawv tej xwm txheej, uas pab lawv xav cog lus thiab cia lawv ib leeg txhawb nqa ib leeg ua raws li txoj moo zoo” (Teaching in the Savior’s Way, 35).