Tej Ntaub Ntawv Ntxiv tom Kawg A

Tus Ntsuj Plig Ua Li Cas Kom Ua Tim Khawv rau Kuv tias Phau Ntawv Maumoos Muaj Tseeb?

Tej zaum koj twb hnov txog Maulaunais txoj kev cog lus rau txhua tus uas nyeem Phau Ntawv Maumoos: “Yog nej thov nrog lub siab dawb paug, nrog kev mob siab ntso, thiab muaj kev ntseeg Khetos, nws yuav qhia rau nej tias tej no muaj tseeb, los ntawm tus Vaj Ntsuj Plig Dawb Huv lub hwj chim” (Maulaunais 10:4). Tiam sis qhov uas yus paub qhov tseeb “los ntawm tus Vaj Ntsuj Plig Dawb Huv lub hwj chim” txhais li cas? Koj yuav ua li cas kom paub thaum twg tus Vaj Ntsuj Plig Dawb Huv hais lus rau koj?

Tej zaum yuav pab koj kom nco ntsoov tias tus Vaj Ntsuj Plig Dawb Huv txoj kev hais lus rau peb yeej tsis zoo ib yam li txoj kev uas peb txhua tus sib txuas lus. Tiam sis koj Leej Txiv Saum Ntuj Ceeb Tsheej xav pab koj kawm kom paub tus Ntsuj Plig. Nws tau muab Phau Ntawv Maumoos rau koj, es nyob haud muaj ob peb tug tub qhe uas rau siab ntseeg uas piav txog thaum twg lawv hnov tus Tswv lub suab.

Piv txwv hais tias, Nifais qhia nws ob tug tij laug hais tias tus Tswv tau “maj mam ua suab yau yau” hais lus rau nkawd, txawm yog tsis yog ib lub suab uas nkawd hnov tau los ntawm nkawd pob ntseg. Muaj tseeb tiag, Nifais hais tias nws ob tug tij laug “lub siab tsis xeev li” thiab “hnov tsis tau nws cov lus” (1 Nifais 17:45, ntxiv qhov uas ntawv qaij). Enos piav txog qhov uas tus Tswv tau teb nws tej lus thov thaum nws hais tias “tus Tswv lub suab” tau “los rau hauv [nws] lub siab dua” (Enos 1:10). Thiab xav txog tej lus no uas piav txog lub suab los saum ntuj los thaum tus Cawm Seej uas sawv rov los lawm tshwm sim hauv thaj av Huaj Vam: “Twb tsis yog ib lub suab nchav, thiab kuj tsis yog ib lub suab nrov; tiam sis, … lub suab tau chob lawv mus rau puag hauv nruab siab, thiab ua rau lawv lub siab kub lug” (3 Nifais 11:3).

Tej zaum twb muaj zoo li no rau koj lawm, los sis tej zaum tej yam uas muaj los rau koj txawv me ntsis. Tus Vaj Ntsuj Plig Dawb Huv siv ntau txoj kev hais lus, thiab kev tshwm sim yeej los rau peb txhua tus ib leeg txawv ib leeg. Thiab thaum tus Ntsuj Plig nyob hauv peb lub neej, peb yuav pom Nws lub hwj huam pab peb los ntawm ntau yam. Tus Tim Thawj Povlauj tau hais txog tej yam uas yog los ntawm tus Ntsuj Plig—“muaj lub siab sib hlub, zoo siab, nyob kaj siab lug, ua siab ntev, muaj lub siab dawb siab zoo, zoo siab hlo pab lwm tus, ua siab ncaj, tsis khav theeb thiab paub tswj yus lub siab,” thiab lwm yam ntxiv (Kalatias 5:22–23).

Nov yog tej lus qhia thiab tej yam ntxwv los ntawm Phau Ntawv Maumoos hais txog tus Vaj Ntsuj Plig Dawb Huv. Thaum koj nyeem tej no, tej zaum koj yuav nco qab tias tus Vaj Ntsuj Plig Dawb Huv tau hais lus rau koj ntau tshaj koj xav, ua tim khawv rau koj tias Phau Ntawv Maumoos yog Vajtswv txoj lus tiag tiag.

Kev Ris Txiaj thiab Kev Xyiv Fab

Phau Ntawv Maumoos pib thaum tus yaj saub Lihais ua yog toog pom ib qho zoo kawg nkaus. Nyob hauv txoj kev ua yog toog no, tus Tswv tau muab ib phau ntawv rau nws thiab hais kom nws nyeem. Phau Ntawv Maumoos hais tias “Thaum nws nyeem, nws muaj tus Tswv tus Ntsuj Plig puv npo.” Lub sij hawm no ua rau Lihais qhuas Vajtswv rau Nws “lub hwj chim, thiab qhov zoo, thiab lub siab hlub tshua,” thiab “ua rau [Lihais] zoo siab kawg nkaus, thiab tag nrho nws lub siab puv npo” (1 Nifais 1:12, 14–15).

Koj puas tau muaj ib lub sij hawm zoo li no? Koj txoj kev nyeem Phau Ntawv Maumoos puas tau ua rau koj lub siab puv npo muaj kev ris txiaj rau Vajtswv txoj kev zoo thiab lub siab hlub tshua? Puas tau muaj tej nqe hauv Phau Ntawv Maumoos uas ua rau koj zoo siab kawg nkaus? Tej kev xav no yog tus Ntsuj Plig lub hwj huam, uas ua tim khawv rau koj tias tej lus uas koj nyeem yog los ntawm Vajtswv thiab qhia Nws txoj kev tseeb.

Ib lub Siab uas Tau Hloov

Tom qab nws qhia ib zaj lus zoo kawg txog Yexus Khetos txoj Kev Theej Txhoj (saib Mauxiyas 2–4), Vaj Ntxwv Npeyamis xav paub seb nws cov neeg puas “ntseeg tej lus uas nws tau hais rau lawv.” Lawv teb hais tias lawv ntseeg nws tej lus tiag. Vim li cas? “Vim yog tus Tswv uas Muaj Hwj Chim Loj Tshaj Plaws tus Ntsuj Plig, uas ua rau peb hloov loj heev, los sis hloov peb lub siab, xwv kom peb tsis txhob muaj siab xav ua phem ntxiv, tiam sis xav ua zoo tsis tu ncua mus li” (Mauxiyas 5:1–2).

Tej zaum koj twb pom ib yam zoo li no nyob hauv koj lub siab thaum koj nyeem Phau Ntawv Maumoos. Piv txwv hais tias, tej zaum koj txais kev tshoov siab kom koj ua ib tug neeg zoo dua, kom tso kev txhaum tseg, los sis ua ib yam dab tsi zoo rau lwm tus. Nov yog qhov pov thawj ntawm sab ntsuj plig uas koj nrhiav kom paub tias phau no yog los ntawm Vajtswv los. Vim zoo li Maumoos qhia hais tias, “Txhua yam uas caw thiab yaum kom ua zoo, thiab hlub Vajtswv, thiab ua hauj lwm rau nws, yog tej kev tshoov siab uas los ntawm Vajtswv” (Maulaunais 7:13; kuj saib 2 Nifais 33:4, 10; Amas 19:33; Ethaws 4:11–12).

Ib lub Siab uas To Taub Ntxiv

Thaum Amas xav pab cov Neeg Xaulas “los sim ua li [nws] tej lus” thiab paub ntawm lawv tus kheej hais tias nws zaj lus tim khawv muaj tseeb, nws tau muab Vajtswv txoj lus piv rau ib lub noob: Nws piav hais tias, “Yog tias nej cia ib qho chaw, xwv kom cog tau ib lub noob rau hauv nej lub siab, … lub noob yuav pib loj hlob nyob hauv nej lub hauv siab; thiab thaum nej hnov lub noob no loj hlob tuaj, nej yuav pib hais rau nej tus kheej tias—Yeej yog ib lub noob zoo, los sis txoj lus yeej zoo, vim lub noob pib ua rau kuv tus ntsuj plig loj hlob tuaj; muaj tseeb tiag, pib ua rau kuv to taub zoo tuaj, muaj tseeb tiag, lub noob no pib qab heev rau kuv” (Amas 32:27–28).

Yus “cia ib qho chaw” hauv yus lub siab rau cov lus los ntawm Phau Ntawv Maumoos thaum yus cia tej lus ntawd hloov yus lub neej thiab pab yus xaiv tej yam zoo. Thiab cov lus no yuav ua li cas kom ua rau koj “tus ntsuj plig loj hlob tuaj” thiab ua rau koj “to taub zoo tuaj”? Tej zaum koj yuav xav tias koj sab ntsuj plig haj yam muaj zog. Tej zaum koj yuav xav tias koj haj yam hlub thiab qhib siab rau lwm tus. Tej zaum koj kuj yuav to taub tej yam zoo dua ntxiv, qhov tseem ceeb yog tej yam ntawm sab ntsuj plig—zoo li muaj ib lub teeb uas ci ci rau hauv koj lub siab. Thiab tej zaum koj yuav xav tias cov lus qhuab qhia uas nyob hauv Phau Ntawv Maumoos “qab heev.” Tej kev xav zoo li no yuav pab koj to taub thaum twg koj tau txais pov thawj txog qhov tseeb los ntawm sab ntsuj plig, xws li Amas hais: “Auj yog li ntawd, qhov no puas muaj tseeb? Kuv hais rau nej tias, Yeej muaj tseeb, vim qhov no yog qhov kaj; thiab txhua yam uas kaj yeej zoo, vim yus txawj to taub yam ntawd, yog li ntawd nej yuav tsum paub tias yam ntawd yeej zoo” (Amas 32:35).

Koj Tsis Tas Xav Seb

Tej uas hais no yog ib txhia ntawm tej kev uas tus Ntsuj Plig siv kom hais lus. Muaj ntau txoj kev ntxiv. Cia li nrhiav tej cib fim mloog tus Ntsuj Plig lub suab tsis tu tsis tseg, thiab koj yuav txais Nws txoj kev ua tim khawv txog qhov uas Phau Ntawv Maumoos muaj tseeb.

Thawj Tswj Hwm Russell M. Nelson tau cog lus tias: “Nej tsis tas xav seb yam twg muaj tseeb. Nej tsis tas xav seb nej yuav tso siab taus rau leej twg. Los ntawm txoj kev tshwm sim, nej txais tau nej zaj lus tim khawv hais tias Phau Ntawv Maumoos yeej yog Vajtswv txoj lus, Yauxej Xamiv yog ib tug yaj saub, thiab nov yog tus Tswv lub Koom Txoos. Txawm hais tias luag lwm tus yuav hais los sis ua li cas los, tsis muaj leej twg uas tshem tau ib qho lus tim khawv thaum twg twb nkag mus hauv nej lub siab lub ntsws txog qhov tseeb lawm” (“Kev Tshwm Sim rau lub Koom Txoos, Kev Tshwm Sim rau Peb lub Neej,” Ensign los sis Liahona, Tsib Hlis Ntuj 2018, 95)