“Kaum Ob Hlis Ntuj 7–13. Maulaunais 7–9: ‘Thov Kom Khetos Tsa Koj Sawv,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Kaum Ob Hlis Ntuj 7–13. Maulaunais 7–9”, Los, Nrog Kuv Mus—Rau Ib Leeg thiab Tsev Neeg: 2020
Minerva K. Teichert (1888–1976), Amoos Cawm tus Vaj Ntxwv Pab Yaj, 1949–1951, pleev roj rau pob zeb, 34¾ x 47 yas tes. Brigham Young University Museum of Art, 1969
Kaum Ob Hlis Ntuj 7–13
Maulaunais 7–9
“Thov Kom Khetos Tsa Koj Sawv”
Thaum koj kawm Maulaunais 7–9, cia li mloog tus Vaj Ntsuj Plig Dawb Huv tej kev tshoov siab, thiab sau ntawv txog tej uas Nws hais rau koj. Nws yeej qhia tau koj tej yam koj yuav tsum paub thiab tej yam koj yuav tsum ua.
Sau Ntawv txog Koj tej Kev Tshoov Siab
Ua ntej Maulaunais xaus Phau Ntawv Maumoos nrog nws tej lus kawg, nws tau sau peb zag los ntawm nws txiv, Maumoos: ib zaj rau “cov uas nyob kaj siab lug coj raws li Khetos” (Maulaunais 7:3) thiab ob tsab ntawv uas Maumoos tau sau rau Maulaunais. Tej zaum Maulaunais tau tso peb zag no hauv Phau Ntawv Maumoos vim nws pom tias yuav muaj xwm txheej hauv peb lub caij nyoog ib yam nws pom nyob hauv nws lub caij nyoog. Thaum nws tau sau tej lus no, cov Neeg Nifais tag nrho tab tom tso qhov tseeb tseg. Lawv feem coob “twb tsis muaj kev hlub, ib leeg rau ib leeg” thiab nyiam “txhua yam tsuas yog tshuav tej uas zoo xwb” (Maulaunais 9:5, 19). Tiam sis Maumoos tseem muaj kev cia siab—nws qhia peb tias kev cia siab tsis txhais hais tias yus tsis paub txog lub ntiaj teb tej teeb meem; kev cia siab txhais tias yus ntseeg Leej Txiv Saum Ntuj Ceeb Tsheej thiab Yexus Khetos, ob tug uas muaj hwj chim loj tshaj plaws thiab kav ntev tshaj tej teeb meem ntawd. Kev cia siab txhais tias yus “ua txhua yam uas zoo” (Maulaunais 7:19). Kev cia siab txhais tias yus cia Yexus Khetos txoj Kev Theej Txhoj “thiab txoj kev cia siab ntawm nws lub yeeb koob thiab ntawm txoj sia nyob mus ib txhis, nyob rawv hauv koj lub siab” (Maulaunais 9:25). Thiab mus txog hnub uas Khetos Los Zaum Ob, kev cia siab txhais tias peb yeej yuav ua “txoj hauj lwm [peb yuav tsum] ua … xwv kom peb yuav kov yeej tus yeeb ncuab ntawm tag nrho kev ncaj ncees” (Maulaunais 9:6).
Tej lub Tswv Yim Kawm Vaj Lug Kub ntawm Yus Ib Leeg
Khetos txoj kev kaj pab kuv txiav txim paub qhov twg yog qhov zoo thiab yog qhov phem.
Lub ntiaj teb niaj hnub no yeej muaj tej zaj lus ntau kawg; peb yuav ua li cas kom paub zaj twg hais qhov yog thiab zaj twg hais qhov tsis yog? Maumoos tej lus nyob hauv Maulaunais 7 qhia ob peb lub ntsiab cai rau peb uas peb siv tau kom tsis txhob “txiav txim yuam kev” (Maulaunais 7:18). Thaum koj kawm Maulaunais 7:12–20, nrhiav tej lus tseeb uas yuav pab koj paub tias tej yam twg yuav ua rau koj nyob ze Vajtswv thiab tej yam twg yuav tsis ua li ntawd. Tej zaum koj yuav siv tej yam tseeb no pab koj ntsuam xyuas tej zaj lus uas koj hnov thiab tej uas koj raug lub lim tiam no thiab txiav txim siab seb tej ntawd puas pab koj ua zoo (saib Maulaunais 7:13).
Kuj saib “Judging Others,” Gospel Topics, topics.ChurchofJesusChrist.org; Bible Dictionary, “Light of Christ.”
Los ntawm kev ntseeg Khetos, kuv yuav “ua txhua yam uas zoo”
Tom qab nws qhia txog kev paub qhov zoo thiab qhov phem, Maumoos nug ib lo uas muaj nqis rau peb niaj hnub no: “Yuav ua li cas nej thiaj yuav ua tau txhua yam uas zoo?”—qhov tseem ceeb yog thaum tus yeeb ncuab txawj ntxias kom txaus nyiam (Maulaunais 7:20). Maumoos tej lus teb los muaj nyob thoob plaws tshooj 7. Thaum koj nyeem nqe 20–48, nrhiav tej lus tseeb uas pab koj paub “txhua yam uas zoo” koj muaj vim yog los ntawm Yexus Khetos. Qhov uas koj ntseeg Nws pab koj li cas kom nrhiav tej yam uas zoo? Koj yuav ua li cas kom “ua txhua yam” uas zoo ntxiv?
Kuj saib Tej Nqe Kev Ntseeg 1:13.
“Kev siab hlub twb yog Khetos txoj kev hlub uas dawb paug.”
Thawj Tswj Hwm Dallin H. Oaks qhia tias: “Kev siab hlub yeej tsis ploj mus thiab kev siab hlub yeej zoo tshaj txhua yam yus ua zoo … vim kev siab hlub yog ‘Khetos txoj kev hlub uas dawb paug’ (Maulaunais 7:47), uas tsis yog ib yam yus ua tiam sis ib yam hauv yus lub siab. … Kev siab hlub yog ib tug yam ntxwv yus coj” (“The Challenge to Become,” Ensign, Kaum Ib Hlis Ntuj 2000, 34). Thaum koj nyeem Maulaunais 7:44–48, cia li xav txog Maumoos cov lus piav txog kev siab hlub, thiab mloog seb tus Vaj Ntsuj Plig Dawb Huv tshoov koj lub siab li cas; Nws yuav pab koj nrhiav kev ua zoo dua ntxiv. Vim li cas peb yuav tsum muaj kev ntseeg thiab cia siab tias peb yuav txais lub txiaj ntsim muaj siab hlub?
Kuv txoj kev coj dawb huv thiab kev tsim txiaj puas yog ib qho uas lwm tus txeeb tau?
Maumoos tej lus piav txog cov Neeg Nifais tej kev txhaum phem heev twb ua rau ib txhias xav yuam kev tias cov uas raug yuam deev tau ua txhaum kev cai coj dawb huv. Tiam sis, Txwj Laug Richard G. Scott piav meej tias tsis yog li ntawd. Nws qhia tias “Kuv ua tim khawv tseeb tiag thaum nej raug lwm tus tej kev ua lim hiam, ua plees ua yi, los sis ua phem loj heev, thaum tsis yog raws li koj lub siab xav, ces nej tsis lav ris qhov ntawd thiab nej yuav tsum tsis txhob xav tias nej muaj txim” (“Healing the Tragic Scars of Abuse,” Ensign, Tsib Hlis Ntuj 1992, 32).
Kuv muaj kev cia siab rau Khetos txawm kuv lub neej zoo li cas los yog.
Tom qab nws piav txog tej kev phem uas nws tau pom, Maumoos qhia nws tus tub kom nws tsis txhob tu siab. Maumoos zaj lus txog kev cia siab tshoov koj lub siab li cas? Qhov uas Khetos “tsa [koj] sawv” muaj nqis li cas rau koj? Khetos tej cwj pwm thiab cov ntsiab cai ntawm Nws txoj moo zoo twg “nyob rawv hauv koj lub siab” thiab ua rau koj muaj kev cia siab? (Maulaunais 9:25).
Kuj saib Dieter F. Uchtdorf, “Kev Cia Siab ntawm Vajtswv txoj Kev Kaj,” Ensign los sis Liahona, Tsib Hlis Ntuj 2013, 70, 75–77.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Maulaunais 7:5–11
Raws li Maulaunais 7:5–11 qhia, vim li cas peb yuav tsum ua qhov yog vim peb xav ua? Peb yuav ua li cas thiaj li paub tias peb thov Vajtswv thiab ua raws li Nws cov lus txib thaum peb “muaj siab ua … tiag tiag”? (nqe 6).
Maulaunais 7:12–19
Maumoos tej lus ntuas yuav pab peb li cas kom xaiv qhov zoo thaum peb yuav siv sij hawm thiab koom nrog lwm tus? Tej zaum nej yuav xav caw nej tsev neeg nrhiav hauv nej lub tsev thiab nqa “txhua yam uas zoo” (Maulaunais 7:19), los sis nqa tej yam uas caw lawv kom “ua zoo, thiab hlub Vajtswv, thiab ua hauj lwm rau nws” (Maulaunais 7:13). Qhuas lawv rau tej yam zoo uas lawv nrhiav tau.
Maulaunais 7:29
Tom qab nej nyeem nqe no, tej zaum nej tsev neeg yuav xav sib tham txog tej txuj ci tseem ceeb uas lawv tau pom los sis lwm yam uas ua rau lawv pom Vajtswv txhais tes pab hauv lawv lub neej.
Maulaunais 8:5–26
Cov Neeg Nifais uas muab cov me nyuam yaus ua kev cai raus dej tsis tau to taub dab tsi txog Yexus Khetos txoj Kev Theej Txhoj? Peb kawm dab tsi txog txoj Kev Theej Txhoj los ntawm Maumoos tej lus qhia?
Maulaunais 8:16–17
Qhov uas peb muaj “kev hlub uas zoo tag nrho” txhais li cas? Kev hlub li ntawd pab peb li cas kom peb kov yeej kev ntshai? Kev hlub li ntawd pab peb li cas kom peb ua siab loj qhia qhov tseeb? Peb yuav ua li cas kom ua tau li no?
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Qhia Zoo Dua Ntxiv
Siv cov nkauj caw tus Ntsuj Plig los qhia cov lus qhuab qhia. “Cov nkauj muaj hwj chim loj kawg nkaus rau kev pab [peb] sab ntsuj plig loj hlob tuaj” (“Thawj Pawg Thawj Tswj Hwm Lus Cev,” Cov Nkauj Qhuas Vajtswv, x) Ib zaj nkauj txog kev hlub, xws li “Ib Leeg Hlub Ib Leeg” (Cov Nkauj Qhuas Vajtswv, zaj 145), could enhance a family discussion about charity nyob hauv Maulaunais 7:44–48.
Daim Duab txog Khetos tus Cawm Seej, los ntawm Heinrich Hofmann