“Kaum Ob Hlis Ntuj 14–20. Maulaunais 8–10: ‘Cia Li Los Cuag Khetos, thiab Los Ua Neeg Zoo Tag Nrho Vim Yog Los ntawm Nws,’” Los, Nrog Kuv Mus—Rau Ib Leeg thiab Tsev Neeg: Phau Ntawv Maumoos 2020 (2020)
“Kaum Ob Hlis Ntuj 14–20. Maulaunais 10,” Los, Nrog Kuv Mus—Rau Ib Leeg thiab Tsev Neeg: 2020
Xwv Kom Nej Yuav Paub, los ntawm Gary L. Kapp
Kaum Ob Hlis Ntuj 14–20
Maulaunais 10
“Cia Li Los Cuag Khetos, thiab Los Ua Neeg Zoo Tag Nrho Vim Yog Los ntawm Nws”
Thaum koj nyeem Phau Ntawv Maumoos tiav tas lawm, cia li xav seb koj puas yuav thov kom tus Vaj Ntsuj Plig Dawb Huv ua tim khawv rau koj phau no muaj tseeb. Thaum koj ua li ntawd, sau ntawv txog tej kev tshoov siab uas koj txais.
Sau Ntawv txog Koj tej Kev Tshoov Siab
Phau Ntawv Maumoos pib thaum Nifais cog lus tias nws yuav qhia peb tias “tus Tswv txoj kev hlub tshua muaj nyob nrog txhua tus uas nws tau xaiv tseg, vim lawv txoj kev ntseeg” (1 Nifais 1:20). Phau ntawd no xaus thaum Maulaunais hais zoo ib yam thaum nws tab tom npaj muab cov phiaj ceev cia: nws caw peb “nco qab tias tus Tswv tau hlub tshua noob neej npaum li cas” (Maulaunais 10:2–3). Tsuas yog peb xav txog tej kev hlub tshua uas muaj hauv Phau Ntawv Maumoos xwb, ces ua rau peb muaj ntau yam xav txog. Ua rau nej xav txog tej zaj twg? Tej zaum koj yuav xav txog Vajtswv txoj kev hlub tshua thaum Nws coj Lihais hla roob moj sab qhua thiab hla cov dej hiav txwv, tej kev hlub tshua uas Nws muab rau Enos thaum Enos xav tau kev zam txim, los sis kev hlub tshua Nws muab rau Amas, lub Koom Txoos ib tug yeeb ncuab uas tau los ua ib tug uas tsis muaj kev ntshai tiv thaiv lub Koom Txoos. Los sis koj yuav xav txog kev hlub tshua ntawm tus Cawm Seej uas sawv rov los rau cov neeg thaum Nws kho lawv cov neeg mob thiab foom koob hmoov rau lawv cov me nyuam yaus. Tej zaum qhov tseem ceeb tshaj plaws yog qhov uas txhua tus yuav ua rau nej nco qab tias “tus Tswv tau hlub tshua [koj] npaum li cas,” vim ib lub hom phiaj ntawm Phau Ntawv Maumoos yog kom caw peb txhua tus txais Vajtswv txoj kev hlub tshua—kev caw uas hais nyob hauv Maulaunais tej lus xaus, “Cia li los cuag Khetos, thiab cia li los ua neeg zoo tag nrho vim yog los ntawm nws” (Maulaunais 10:32).
Tej lub Tswv Yim Kawm Vaj Lug Kub ntawm Yus Ib Leeg
Kuv yuav paub qhov tseeb los ntawm tus Vaj Ntsuj Plig Dawb Huv lub hwj chim.
Cov lus cog tseg nyob hauv Maulaunais 10:3–7 tau hloov tib neeg nyob thoob plaws lub ntiaj teb lub neej. Cov lus no tau hloov koj lub neej li cas? Txawm koj xav tau ib zaj lus tim khawv los sis ntxiv dag zog rau koj zaj lus tim khawv txog Phau Ntawv Maumoos los, Maulaunais txoj kev caw yog hais rau koj. Thaum koj nyeem Maulaunais 10:3–7, xav seb koj puas yuav ua tib zoo nyeem zoo dua li yav tas los. Tej zaum koj yuav xav saib txhua kab lus, thiab nug koj tus kheej tej yam li no: Qhov no txhais li cas? Kuv yuav ua li cas kom ua qhov no zoo dua? Kuv puas tau muaj li no hauv kuv lub neej? Tus Vaj Ntsuj Plig Dawb Huv tau ua li cas kom qhia kuv tias Phau Ntawv Maumoos muaj tseeb?
Cia li xav txog lwm tus uas xav mloog koj zaj lus tim khawv txog Phau Ntawv Maumoos. Koj yuav ua li cas pab tus ntawd txais tau nws zaj lus tim khawv?
“Tsis txhob xyeej Vajtswv tej txiaj ntsim.”
Muaj ntau yam uas ib tug neeg yuav “xyeej Vajtswv tej txiaj ntsim” (Maulaunais 10:8). Ib txhia neeg xyeej tias muaj tej txiaj ntsim no. Lwm tus xyeej hais tias lawv muaj tej txiaj ntsim ntawm sab ntsuj plig tiam sis lawv pom tias lwm tus muaj. Lwm tus xyeej lawv tej txiaj ntsim vim lawv tsis quav ntsej los yog lawv tsis ua dab tsi.
Thaum koj nyeem Maulaunais 10:8–25, nrhiav tej lus tseeb uas yuav pab koj kawm txog koj tej txiaj ntsim ntawm sab ntsuj plig thiab siv tej ntawd nrog hwj chim ntxiv kom koj thiab lwm tus tau koob hmoov. Nrhiav tswv yim txog tej txiaj ntsim uas Vajtswv tau muab rau koj los sis tej txiaj ntsim uas Nws xav kom koj nrhiav tau. Vim li cas peb yuav tsum “nco ntsoov tias txhua lub txiaj ntsim zoo yog los ntawm Khetos los”? (Maulaunais 10:18).
Cia li xav txog tej lus ntuas no los ntawm Txwj Laug John C. Pingree Jr.: “Yog li ntawd peb yuav ua li cas kom paub txog peb tej txiaj ntsim? Peb nyeem tau peb yawg suab txoj koob hmoov, nug cov uas paub peb zoo tshaj, thiab kawm ntawm peb tus kheej txog tej yam uas peb ua tau zoo thiab nyiam ua. Qhov tseem ceeb tshaj plaws, peb thov tau Leej Txiv (saib Yakaunpaus 1:5; Q&K 112:10). Nws paub peb tej txiaj ntsim, vim Nws yog tus uas muab tej ntawd rau peb” (“Kuv Muaj Ib txoj Hauj Lwm rau Koj Ua,” Ensign los sis Liahona, Kaum Ib Hlis Ntuj 2017, 33).
Saib Phau Qhia txog Vaj Lug Kub, “Txiaj Ntsim ntawm tus Ntsuj Plig,” scriptures.ChurchofJesusChrist.org.
Kuv yuav los ua neeg zoo tag nrho los ntawm Yexus Khetos txoj kev tshav ntuj.
Maulaunais txoj kev qhuab ntuas kom “los cuag Khetos” tsis yog kev kawm txog Nws los sis xav txog Nws ntau xwb thiab tsis yog kev sim ua raws li Nws cov lus txib xwb, txawm tias tej no tseem ceeb heev los yog. Tiam sis, cov lus no yog kev caw kom los cuag Khetos tas yus lub siab lub ntsws—hloov los ua neeg zoo li Nws. Thaum koj nyeem Maulaunais 10:30–33, cia li pom tej kab lus uas pab koj to taub tias kev los cuag Khetos tag nrho txhais li cas, xws li “siv txhua lub txiaj ntsim uas zoo,” “xyeej txhua yam uas tsis los ntawm Vajtswv,” thiab “los ua neeg zoo tag nrho vim yog los ntawm nws” (ntxiv qhov uas ntawv qaij).
Yuav ua li cas kom muaj li no? Nrhiav tej lus teb nyob hauv Maulaunais 10:30–33. Tus Ntsuj Plig qhia rau koj tias koj yuav tsum ua dab tsi kom thiaj li “cia li los cuag Khetos, thiab cia li los ua neeg zoo tag nrho vim yog los ntawm nws”?
Saib Oonis 1:26; Phau Qhia txog Vaj Lug Kub, “Zoo Tag Nrho,” scriptures.ChurchofJesusChrist.org.
Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke
Thaum nej nyeem vaj lug kub nrog nej tsev neeg, tus Ntsuj Plig pab tau nej paub tias nej yuav tsum qhia txog tej ntsiab cai twg thiab yuav tsum sib tham txog tej yam twg kom pab nej tsev neeg. Ntawm no yog ob peb lub tswv yim.
Maulaunais 10
Nyeem tshooj no ua ke, mloog seb txhua zaus Maulaunais hais lo lus ntuas. Sau ntawv los sis sau lub cim txog tej uas Maulaunais ntuas—los sis yaum—kom peb ua. Peb yuav ua li cas kom ua raws li nws tej lus ntuas?
Maulaunais 10:3
Peb tau kawm dab tsi txog tus Tswv txoj kev hlub tshua thaum peb tau nyeem Phau Ntawv Maumoos xyoo no? Tus Tswv tau ua dab tsi qhia tias nws hlub tshua peb tsev neeg?
Maulaunais 10:3–5
Tom qab nej nyeem tej nqe no, tej zaum nej yuav xav hais kom nej tsev neeg qhia tias lawv tau ua li cas thiaj paub tias Phau Ntawv Maumoos muaj tseeb. Xav seb nej puas hu ib zaj nkauj txog kev nrhiav qhov tseeb xws li “Search, Ponder, and Pray” (Children’s Songbook, 109). Tej zaum nej kuj yuav xav caw nej tsev neeg sau lawv zaj lus tim khawv nyob hauv tsev neeg phau ceev xwm txheej.
Maulaunais 10:8–18
Christmas yog ib lub sij hawm zoo xav txog kev txais khoom plig. Tej zaum nej tsev neeg yuav xav muab khoom plig qhwv ib leeg pub rau ib leeg kom piv txog “Vajtswv tej txiaj ntsim” uas hais nyob hauv Maulaunais 10:9–16. Tej zaum tej khoom plig no kuj yuav piv txog tej txiaj ntsim zoo los ntawm Khetos uas lawv ib leeg pom nyob hauv ib leeg.
Maulaunais 10:27–29, 34
Tej zaum nej tsev neeg yuav xav qhia tias lawv yuav hais li cas rau Maulaunais thaum lawv “los ntsib [nws] nyob ntawm Yehauvas tus uas zoo kawg nkaus lub rooj txiav txim.”
Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.
Kev Kawm Zoo Dua Ntxiv ntawm Yus Ib Leeg
Nrhiav Yexus Khetos Lub hom phiaj ntawm Phau Ntawv Maumoos—thiab tag nrho cov vaj lug kub—yog kom ua tim khawv txog Yexus Khetos. Koj kawm dab tsi txog Yexus Khetos nyob hauv Maulaunais 10? Koj txais kev tshoov siab ua dab tsi kom los cuag Nws?
Maulaunais Muab cov Phiaj Faus Cia, los ntawm Jon McNaughton