1 Nim no kuv, Maulaunais, sau tej yam uas kuv xav tias zoo; thiab kuv sau rau kuv cov kwv tij, cov Neeg Lamas; thiab kuv xav kom lawv yuav paub tias ntau dua li plaub puas thiab nees nkaum xyoo tau dhau mus txij li lub cim tau raug muab txog txoj kev los ntawm Khetos.

2 Thiab kuv yuav muab tej ceev xwm txheej no zwm cia, tom qab uas kuv tau hais ob peb lo lus los ntawm txoj kev ntuas nej.

3 Saib seb, kuv yuav ntuas nej tias thaum nej yuav nyeem tej yam no, yog Vajtswv pom zoo tias nej yuav tsum nyeem lawv, kom nej yuav nco txog saib tus Tswv tau hlub tshua rau noob neej npaum li cas, txij li thaum tsim Adas nqis los mus txog lub sij hawm uas nej yuav txais tej yam no, thiab xav zoo zoo tej ntawd nyob hauv nej tej siab.

4 Thiab thaum nej yuav tau txais tej yam no, kuv yuav ntuas nej kom nej yuav thov Vajtswv, Leej Txiv tus uas nyob mus ib txhis, los ntawm Khetos lub npe, saib tej yam no puas muaj tseeb; thiab yog nej yuav thov nrog lub siab dawb paug, nrog txoj kev thov tiag tiag, muaj txoj kev ntseeg Khetos, nws yuav ua kom nej paub qhov tseeb ntawm tej ntawd, los ntawm lub hwj chim ntawm tus Vaj Ntsuj Plig Dawb Huv.

5 Thiab los ntawm lub hwj chim ntawm tus Vaj Ntsuj Plig Dawb Huv nej yuav paub qhov tseeb ntawm tag nrho txhua yam.

6 Thiab txhua yam uas zoo yeej ncaj thiab tseeb; yog li ntawd, tsis muaj ib yam uas zoo uas yuav tsis lees txais Khetos, tiam sis tsuas qhia kom paub tias nws muaj nyob.

7 Thiab nej yuav paub tias nws tseem muaj nyob, los ntawm lub hwj chim ntawm tus Vaj Ntsuj Plig Dawb Huv; yog li ntawd kuv yuav ntuas nej kom nej tsis txhob tsis lees Vajtswv lub hwj chim; vim nws ua hauj lwm los ntawm lub hwj chim, raws li txoj kev ntseeg ntawm noob neej, hnub no thiab tag kis, thiab mus ib txhis los zoo tib yam nkaus.

8 Thiab ntxiv, kuv ntuas nej, kuv cov kwv tij, kom nej tsis txhob tsis lees Vajtswv tej txiaj ntsim, vim lawv muaj ntau; thiab tej ntawd los ntawm tib tug Vajtswv. Thiab muaj ntau txoj kev uas tej txiaj ntsim no yuav raug muab; tiam sis nws yog tib tug Vajtswv ua hauj lwm txhua yam rau sawv daws; thiab tej ntawd raug muab los ntawm tej kev tshwm sim ntawm Vajtswv tus Ntsuj Plig rau tib neeg, kom yuav pab tau lawv.

9 Vim saib seb, rau ib tug raug muab los ntawm Vajtswv Tus Ntsuj Plig, kom nws yuav txawj qhia lo lus txawj ntse;

10 Thiab rau lwm tus, kom nws yuav txawj qhia lo lus thoob tsib los ntawm tib tug Ntsuj Plig;

11 Thiab rau lwm tus, kom muaj kev ntseeg loj heev; thiab ho rau lwm tus, kom muaj tej txiaj ntsim ntawm txoj kev kho mob zoo los ntawm tib tug Ntsuj Plig;

12 Thiab ntxiv, rau lwm tus, kom nws yuav ua tau tej txuj ci tseem ceeb loj heev;

13 Thiab ntxiv, rau lwm tus, kom nws yuav qhia tau tej uas yuav muaj los yav tom ntej txog txhua yam tsav;

14 Thiab ntxiv, rau lwm tus, kom pom tau tej tim tswv thiab tej kev qhuab qhia ntawm tej ntsuj plig;

15 Thiab ntxiv, rau lwm tus, kom txawj hais txhua yam lus;

16 Thiab ntxiv, rau lwm tus, kom txawj txhais tej lus thiab lwm yam lus uas txawv.

17 Thiab tag nrho txhua yam txiaj ntsim no tau los ntawm Khetos tus Ntsuj Plig los; thiab lawv los rau txhua tus neeg, raws li nws pom zoo.

18 Thiab kuv xav ntuas nej, kuv cov kwv tij uas kuv hlub, kom nej yuav nco ntsoov tias txhua yam txiaj ntsim zoo yeej los ntawm Khetos los.

19 Thiab kuv xav ntuas nej, kuv cov kwv tij uas kuv hlub, kom nej yuav nco ntsoov tias nws yeej zoo tib yam li nag hmo, hnub no, thiab mus ib txhis, thiab txhua yam txiaj ntsim uas kuv tau hais txog, uas yog sab ntsuj plig, yeej yuav tsis raug muab tshem mus li, twb yuav nyob ntev npaum li lub ntiaj teb yuav nyob, tsuas yog thaum noob neej tsis ntseeg lawm xwb.

20 Yog li ntawd, yuav tsum muaj kev ntseeg; thiab yog muaj kev ntseeg ces yuav tsum muaj txoj kev cia siab; thiab yog muaj txoj kev cia siab ces kuj yuav tsum muaj txoj kev siab hlub.

21 Thiab tsuas yog nej muaj txoj kev siab hlub xwb tsis yog li ntawd nej yuav tsis muaj peev xwm raug cawm dim los nyob hauv Vajtswv lub nceeg vaj; thiab nej kuj yuav tsis muaj peev xwm raug cawm dim los nyob hauv Vajtswv lub nceeg vaj yog nej tsis muaj txoj kev ntseeg; thiab nej kuj dim tsis taus yog nej tsis muaj txoj kev ntseeg.

22 Thiab yog nej tsis muaj txoj kev cia siab nej yuav tsum tau nyob hauv qhov chaw tsis muaj kev cia siab; thiab txoj kev tsis muaj chaw cia siab tau los vim yog txoj kev tsis ncaj.

23 Thiab Khetos tau hais tseeb rau peb tej yawg koob tias: Yog nej muaj txoj kev ntseeg nej yeej muaj peev xwm ua tau txhua yam uas kuv xav tias tsim nyog.

24 Thiab nim no kuv hais rau tag nrho txhua tus hauv qab ntuj kawg—tias yog muaj lub caij uas lub hwj chim thiab tej txiaj ntsim ntawm Vajtswv raug tshem ntawm nej mus ces twb vim yog txoj kev tsis ntseeg.

25 Thiab kev txom nyem yuav raug rau noob neej yog yuav muaj li no; vim yuav tsis muaj ib tug ua zoo nyob hauv nej li, tsis muaj ib tug li. Vim yog muaj ib tug nyob hauv nej uas ua zoo, nws yeej yuav ua hauj lwm los ntawm lub hwj chim thiab tej txiaj ntsim ntawm Vajtswv.

26 Thiab txoj kev txom nyem yuav raug rau lawv cov uas ua kom tsis muaj tej yam no thiab tuag mus, vim lawv tuag nyob hauv lawv tej kev txhaum, thiab lawv tsis muaj peev xwm raug cawm dim tau nyob hauv Vajtswv lub nceeg vaj; thiab kuv hais tej no raws li Khetos tej lus; thiab kuv tsis dag.

27 Thiab kuv ntuas nej kom nco ntsoov tej yam no; vim lub sij hawm yuav los sai heev uas nej yuav paub tias kuv tsis dag, vim nej yuav pom kuv nyob ntawm Vajtswv lub rooj txiav txim; thiab tus Tswv Vajtswv yuav hais rau nej tias: Kuv tau tshaj kuv tej lus rau nej, uas tau raug sau los ntawm tus txiv neej no, zoo li ib tug uas quaj hais tawm hauv qhov tuag los, muaj tseeb tiag, twb zoo li ib tug uas hais tawm hauv av los.

28 Kuv tshaj tawm tej yam no kom tej kev qhia tej uas yuav muaj los yav tom ntej yuav muaj puv npo. Thiab saib seb, lawv yuav tawm los ntawm Vajtswv tus uas kav ib txhis lub qhov ncauj; thiab nws txoj lus yuav tawm ntawm ib tiam neeg mus rau ib tiam neeg.

29 Thiab Vajtswv yuav ua rau nej paub, tias yam uas kuv tau sau yeej muaj tseeb.

30 Thiab ntxiv kuv yuav ntuas nej kom nej yuav los cuag Khetos, thiab cia li tuav txhua yam txiaj ntsim uas zoo, thiab tsis txhob kov tej txiaj ntsim phem, los sis tej yam uas tsis huv.

31 Thiab cia li tsim, thiab sawv hauv av los, Au Yeluxalees; muaj tseeb tiag, thiab cia li hnav nej tej ris tsho uas zoo zoo nkauj, Au Xi-oos tus ntxhais es; thiab kho nej tej tswg kom muaj zog thiab ua nej tej ciam dej ciam av kom loj tas mus li, xwv kom nej yuav tsis tau sib txuam ntxiv lawm, kom tej kev khi lus ntawm Leej Txiv tus Nyob Mus Ib Txhis uas nws tau khi rau nej, yuav muaj puv npo, Au tsev neeg Ixayees.

32 Muaj tseeb tiag, cia li los cuag Khetos, thiab cia li ua kom zoo tshaj plaws nyob hauv nws, thiab tswj nej tej siab tawm ntawm txhua yam uas tsis zoo; thiab yog nej yuav tswj nej tej siab tawm ntawm txhua yam uas tsis zoo, thiab hlub Vajtswv tag nej siab, nej ntsws thiab nej dag nej zog, ces nws txoj kev hlub tshua yeej muaj txaus rau nej, xwv kom los ntawm nws txoj kev hlub tshua nej yuav raug ua kom zoo tshaj plaws nyob hauv Khetos; thiab yog los ntawm txoj kev hlub tshua ntawm Vajtswv nej raug ua kom zoo tshaj plaws nyob hauv Khetos, ces nej yuav tsis kam tsis lees Vajtswv lub hwj chim.

33 Thiab ntxiv, yog nej raug ua kom zoo tshaj plaws nyob hauv Khetos los ntawm Vajtswv txoj kev hlub tshua, thiab tsis kam tsis lees nws lub hwj chim, ces nej yuav raug ua kom dawb huv nyob hauv Khetos los ntawm Vajtswv txoj kev hlub tshua, dhau los ntawm txoj kev ntshav nrog ntawm Khetos, uas muaj nyob hauv txoj kev khi lus ntawm Leej Txiv rau txoj kev zam nej tej kev txhaum, xwv kom nej yuav rais los mus dawb huv, tsis muaj qhov ceb.

34 Thiab nim no kuv hais rau nej sawv daws, nyob zoo mog. Tsis ntev no kuv yuav mus so nyob hauv Vajtswv qhov chaw uas nyob kaj siab lug, mus txog thaum kuv tus ntsuj plig thiab lub cev yuav rov los sib koom ua ke; thiab kuv raug coj los li tus uas kov yeej dhau tej cua, los ntsib nej nyob ntawm Yehauvas tus zoo kawg nkaus lub rooj txiav txim, tus Txiav Txim uas Nyob Mus Ib Txhis ntawm cov neeg uas muaj sia thiab cov neeg tuag. Amees.