1 Kuv tus me tub uas kuv hlub es, kuv sau ntawv rau koj dua kom koj yuav paub tias kuv tseem muaj sia nyob; tiam sis kuv yuav sau txog tej yam uas tu siab heev.

2 Vim saib seb, kuv tau muaj ib npluav rog mob heev nrog cov Neeg Lamas, uas yog npluav uas peb tsis yeej; thiab Aki-eetus tau ntog los ntawm ntaj, thiab Lulas thiab Eloos los tib yam; muaj tseeb tiag, thiab peb tau xiam peb ib co neeg zoo heev.

3 Thiab nim no saib seb, kuv tus me tub, kuv ntshai nyob tsam cov Neeg Lamas yuav ua kom cov neeg no puas tsuaj; vim lawv yeej tsis kam hloov siab lees txim, thiab Dab Ntxwg Nyoog pheej txhib kom lawv ib leeg npau taws rau ib leeg tsis tu ncua li.

4 Saib seb, kuv tab tom ua hauj lwm nrog lawv tsis tu ncua; thiab thaum kuv hais Vajtswv txoj lus nrog txoj kev nruj lawv tau ua tshee na thiab npau taws nkaug kuv; thiab thaum kuv tsis siv txoj kev nruj lawv ua lawv tej siab tawv tawm tsam tej ntawd; yog li ntawd, kuv ntshai nyob tsam tus Tswv tus Ntsuj Plig yuav tseg tsis nrog lawv nyob lawm.

5 Vim lawv yeej npau taws heev kawg nkaus kuv saib yam li lawv tsis muaj txoj kev ntshai txog txoj kev tuag li; thiab lawv ib leeg tau poob lawv txoj kev hlub, rau ib leeg; thiab lawv xav tua neeg thiab pauj txiaj ntsig tsis tu ncua xwb.

6 Thiab nim no, kuv tus me tub uas kuv hlub es, txawm tias lawv muaj siab tawv los, cia peb rau siab ntso ua hauj lwm; vim yog peb tsum tsis ua hauj lwm, peb yuav raug coj los rau hauv qab txoj kev raug txim; vim peb muaj ib txoj hauj lwm ua thaum tseem nyob hauv lub cev av no, xwv kom peb yuav kov yeej tus yeeb ncuab ntawm tag nrho tej kev ncaj ncees, thiab cia peb tej ntsuj plig so nyob hauv Vajtswv lub nceeg vaj.

7 Thiab nim no kuv sau tej yam txog tej kev txom nyem ntawm cov neeg no. Vim raws li txoj kev paub uas kuv tau txais los ntawm Amauloos, saib seb, cov Neeg Lamas tau ntau leej neeg raug txim, uas lawv txhom tau los ntawm tus pej thuam Selixas; thiab tau muaj tej txiv neej, tej poj niam, thiab tej me nyuam yaus.

8 Thiab lawv tau tua tej ua txiv thiab tej txiv ntawm cov poj niam thiab tej me nyuam ntawd; thiab lawv tau muab tej nqaij ntawm lawv cov txiv rau tej poj niam noj, thiab muab tej nqaij ntawm lawv tej txiv rau tej me nyuam noj; thiab tsis muaj dej, lawv tsuas muab me rau lawv xwb.

9 Thiab txawm tias cov Neeg Lamas ua txoj kev qias loj npaum li no los, nws tseem tsis tau npaum li tej uas peb cov neeg ua nyob hauv Mauli-atus. Vim saib seb, ntau tus ntxhais ntawm cov Neeg Lamas tau raug lawv txhom tau ua neeg raug txim; thiab tom qab uas tau muab lawv tej uas tshua tshaj thiab muaj nuj nqis tshaj plaws txhua yam huv tib si, uas yog txoj kev coj dawb huv thiab tsim txiaj—

10 Thiab tom qab uas lawv tau ua tej yam no tas, lawv tau muab lawv tua yam ua phem kawg nkaus, tau tsim txom lawv tej cev mus txog thaum tuag; thiab tom qab uas lawv tau ua li no tas, lawv tau noj lawv tej nqaij zoo ib yam li tej tsiaj qus, vim yog txoj kev tawv ntawm lawv tej siab; thiab lawv tau ua tej no rau ib lub cim ntawm txoj kev tsis ntshai.

11 Au kuv tus me tub uas kuv hlub es, vim li cas ib co neeg zoo li no, uas yuav tsis muaj kev vam meej li—

12 (Thiab nyuam qhuav yog tau ob peb xyoos dhau los lawm xwb, thiab lawv tau yog ib co neeg uas muaj kev zoo thiab txaus nyiam)

13 Tiam sis Au kuv tus me tub, vim li cas cov neeg uas zoo li no, cov uas muaj txoj kev zoo ho nyob hauv txoj kev qias tag npaud—

14 Peb yuav xav tau li cas tias Vajtswv yuav tsis tso nws txhais tes nyob hauv txoj kev txiav txim tawm tsam peb?

15 Saib seb, kuv lub siab quaj tias: Kev txom nyem raug rau cov neeg no. Cia li tawm los rau hauv txoj kev txiav txim, Au Vajtswv es, thiab zais lawv tej kev txhaum, thiab tej kev phem, thiab tej kev qias tawm ntawm koj lub ntsej muag!

16 Thiab ntxiv, kuv tus me tub, tau muaj ntau tus poj ntsuam thiab lawv tej ntxhais uas tseem nyob hauv Selixas; thiab tej zaub mov noj uas cov Neeg Lamas tsis tau coj mus, saib seb, Xenefais tej tub rog tau muab nqa lawm, thiab tau muab lawv cia lam theeb puas rau qhov txhia chaw uas lawv yuav nrhiav tau zaub mov; thiab ntau cov poj niam laus tau qaug zog tom tej kev thiab tuag.

17 Thiab tej tub rog uas nyob nrog kuv twb tsis muaj zog; thiab tej tub rog ntawm cov Neeg Lamas nyob nruab nrab ntawm Selixas thiab kuv; thiab txhua tus uas tau khiav mus rau Aloos tej tub rog tau poob raug txhom mus rau lawv tej kev raug tsim txom uas phem kawg nkaus.

18 Au txoj kev phem qias ntawm kuv cov neeg! Lawv nyob tsis muaj chaw rau thiab tsis muaj kev hlub tshua. Saib seb, kuv yog ib tug neeg xwb, thiab kuv tsuas muaj zog li ib tug neeg xwb, thiab kuv tsis muaj peev xwm hais kom lawv mloog kuv tej lus ntxiv lawm.

19 Thiab lawv tau rais los mus muaj zog nyob hauv lawv txoj kev lim hiam; thiab lawv kuj phem, tsis tseg leej twg li, yuav laus los hluas; thiab lawv nyiam txhua yam tsuas tshuav tej uas zoo xwb; thiab txoj kev txom nyem ntawm peb tej poj niam thiab peb tej me nyuam uas nyob saum thaj av no yeej phem tshaj txhua yam tsav; muaj tseeb tiag, tus nplaig tsis muaj peev xwm qhia tau, los sis tsis muaj peev xwm muab nws sau cia tau.

20 Thiab nim no, kuv tus me tub, kuv yuav tsis piav txog txoj kev phem heev no ntev ntxiv lawm. Saib seb, koj yeej paub txoj kev phem ntawm cov neeg no; koj yeej paub tias lawv nyob yam tsis muaj kev cai kav, thiab dhau qhov siab xav; thiab lawv txoj kev phem tseem phem tshaj li cov Neeg Lamas tej.

21 Saib seb, kuv tus me tub, kuv tsis muaj peev xwm hais tej yam zoo txog lawv rau Vajtswv nyob tsam nws yuav nplawm kuv.

22 Tiam sis saib seb, kuv tus me tub, kuv muaj tej yam zoo hais txog koj rau Vajtswv, thiab kuv cia siab rau Khetos xwv kom koj yuav raug cawm dim; thiab kuv thov Vajtswv kom nws yuav tseg koj txoj sia, ua tim khawv txog cov neeg no txoj kev tig rov mus cuag nws, los sis rau lawv txoj kev puas tsuaj huv tib si; vim kuv paub tias lawv yuav tsum piam sij tsuas yog lawv yuav hloov siab lees txim thiab tig rov mus cuag nws xwb.

23 Thiab yog lawv piam sij nws yuav raug zoo li cov Neeg Tsales, vim yog txoj kev xav ua puv npo ntawm lawv tej siab, nrhiav ntshis tua neeg thiab pauj txiaj ntsig xwb.

24 Thiab yog tias lawv piam sij, peb paub tias ntau tus ntawm peb cov kwv tij tau khiav mus koom cov Neeg Lamas, thiab ntau tus ntxiv kuj yuav khiav mus koom lawv thiab; yog li ntawd, sau tej yam me ntsis ntxiv, yog koj dim thiab kuv piam sij thiab tsis pom koj; tiam sis kuv cia siab tias nyaj kuv yuav tau pom koj tsis ntev no; vim kuv muaj tej ceev xwm txheej dawb ceev uas kuv yuav muab rau koj.

25 Kuv tus me tub, cia siab ntsoov rau Khetos; thiab tsis txhob cia tej yam uas kuv tau sau ua rau koj nyuaj siab, tsuam koj ntog rau txoj kev tuag; tiam sis thov Khetos tsa koj sawv, thiab thov kom nws tej kev raug txom nyem thiab txoj kev tuag thiab txoj kev ua nws lub cev rau peb tej yawg koob pom, thiab nws txoj kev hlub tshua thiab txoj kev ua siab ntev nyiaj, thiab txoj kev cia siab ntawm nws lub yeeb koob thiab ntawm txoj sia nyob mus ib txhis, nyob hauv koj siab mus ib txhis.

26 Thiab thov kom txoj kev hlub tshua ntawm Vajtswv Leej Txiv, tus uas lub rooj zaum nyob siab puag saum ntuj, thiab peb tus Tswv Yexus Khetos, tus uas zaum ntawm sab tes xis ntawm nws lub hwj chim, mus txog thaum tag nrho txhua yam rais los mus ua nws tug, yog, thiab nrog koj nyob tas mus li. Amees.