1 Txoj kev uas cov pab coj, uas tau raug hu ua cov txwj laug ntawm lub koom txoos, tau tsa cov pov thawj thiab cov xib hwb—

2 Tom qab uas lawv tau thov rau Leej Txiv los ntawm Khetos lub npe, lawv tau tso lawv tej tes rau saum lawv, thiab tau hais tias:

3 Los ntawm Yexus Khetos lub npe kuv tsa koj ua ib tug pov thawj (los sis yog nws yog ib tug xib hwb, kuv tsa koj ua ib tug xib hwb) mus qhuab qhia txoj kev hloov siab lees txim thiab txoj kev zam tej kev txhaum dhau los ntawm Yexus Khetos, los ntawm txoj kev ntseeg nws lub npe mus li kom txog thaum kawg. Amees.

4 Thiab raws li no lawv tau tsa cov pov thawj thiab cov xib hwb, raws li tej txiaj ntsim thiab tej kev hu ntawm Vajtswv rau tib neeg; thiab lawv tau tsa lawv los ntawm lub hwj chim ntawm tus Vaj Ntsuj Plig Dawb Huv, uas tau nyob hauv lawv.