“ວັນທີ 14–20 ເດືອນທັນວາ. ໂມໂຣໄນ 10: ‘ຈົ່ງມາຫາພຣະຄຣິດ ແລະ ຖືກເຮັດໃຫ້ເປັນຄົນດີພ້ອມໃນພຣະອົງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 14–20 ເດືອນທັນວາ. ໂມໂຣໄນ 10,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
That Ye May Know [ເພື່ອພວກເຈົ້າຈະໄດ້ຮູ້], ໂດຍ ແກຣີ ແອວ ແຄບ
ວັນທີ 14–20 ເດືອນທັນວາ
ໂມໂຣໄນ 10
“ຈົ່ງມາຫາພຣະຄຣິດ ແລະ ຖືກເຮັດໃຫ້ເປັນຄົນດີພ້ອມໃນພຣະອົງ”
ເມື່ອທ່ານອ່ານພຣະຄຳພີມໍມອນຈົບຮຽບຮ້ອຍ, ໃຫ້ຄິດທີ່ຈະສະແຫວງຫາການເປັນພະຍານຕື່ມອີກຈາກພຣະວິນຍານບໍລິສຸດ ວ່າພຣະຄຳພີເປັນຄວາມຈິງ. ເມື່ອທ່ານເຮັດແນວນັ້ນ, ໃຫ້ບັນທຶກຄວາມປະທັບໃຈທີ່ທ່ານໄດ້ຮັບ.
ບັນທຶກຄວາມປະທັບໃຈຂອງທ່ານ
ພຣະຄຳພີມໍມອນເປີດດ້ວຍຄຳສັນຍາຂອງນີໄຟ ທີ່ສະແດງໃຫ້ເຮົາເຫັນວ່າ “ຄວາມເມດຕາອັນລະອຽດອ່ອນຂອງພຣະຜູ້ເປັນເຈົ້າມີຢູ່ເໜືອທຸກຄົນທີ່ພຣະອົງເລືອກໄວ້, ເປັນເພາະສັດທາຂອງພວກເຂົາ” (1 ນີໄຟ 1:20). ພຣະຄຳພີປິດດ້ວຍຂ່າວສານທີ່ຄ້າຍຄືກັນຈາກໂມໂຣໄນ ຂະນະທີ່ເພິ່ນກະກຽມທີ່ຈະ “ຜະນຶກ” ບັນທຶກໄວ້: ເພິ່ນໄດ້ເຊື້ອເຊີນເຮົາໃຫ້ “ຈື່ຈຳໄວ້ວ່າ ພຣະຜູ້ເປັນເຈົ້າເມດຕາຫລາຍພຽງໃດ” (ໂມໂຣໄນ 10:2–3). ເຖິງແມ່ນຖ້າຫາກເຮົາຄິດພຽງແຕ່ກ່ຽວກັບຄວາມເມດຕາຫລາຍຢ່າງທີ່ບັນທຶກຢູ່ໃນພຣະຄຳພີມໍມອນ, ມັນກໍຫລາຍພໍທີ່ຈະໃຫ້ເຮົາຄິດຢູ່ແລ້ວ. ມີຕົວຢ່າງໃດແດ່ທີ່ທ່ານຄິດອອກ? ທ່ານອາດໄຕ່ຕອງກ່ຽວກັບຄວາມເມດຕາຕ່າງໆທີ່ພຣະເຈົ້າໄດ້ນຳພາຄອບຄົວຂອງລີໄຮ ຜ່ານຜ່າຖິ່ນແຫ້ງແລ້ງກັນດານ ແລະ ຂ້າມຜືນນ້ຳອັນກວ້າງໃຫຍ່, ຄວາມເມດຕາອັນລະອຽດອ່ອນທີ່ພຣະອົງໄດ້ສະແດງຕໍ່ເອໂນດ ເມື່ອຈິດວິນຍານຂອງເພິ່ນຫິວໂຫຍສຳລັບການໃຫ້ອະໄພ, ຫລື ຄວາມເມດຕາທີ່ພຣະອົງໄດ້ສະແດງຕໍ່ແອວມາ, ສັດຕູທີ່ຂົມຂື່ນຂອງສາດສະໜາຈັກ ຜູ້ໄດ້ກາຍເປັນຜູ້ປົກປ້ອງຢ່າງບໍ່ມີຄວາມຢ້ານກົວຂອງສາດສະໜາຈັກ. ຫລື ທ່ານອາດຄິດກ່ຽວກັບຄວາມເມດຕາທີ່ພຣະຜູ້ຊ່ວຍໃຫ້ລອດສະແດງຕໍ່ຜູ້ຄົນ ເມື່ອພຣະອົງໄດ້ປິ່ນປົວຄົນເຈັບປ່ວຍ ແລະ ໃຫ້ພອນແກ່ເດັກນ້ອຍໆ. ບາງທີ ສິ່ງທີ່ສຳຄັນທີ່ສຸດ, ທັງໝົດນີ້ສາມາດເຕືອນທ່ານເຖິງ “ພຣະຜູ້ເປັນເຈົ້າເມດຕາຫລາຍພຽງໃດ” ຕໍ່ທ່ານ, ເພາະໜຶ່ງໃນຈຸດປະສົງຕົ້ນຕໍຂອງພຣະຄຳພີມໍມອນແມ່ນທີ່ຈະເຊື້ອເຊີນເຮົາແຕ່ລະຄົນໃຫ້ຮັບເອົາຄວາມເມດຕາຂອງພຣະເຈົ້າ—ຄຳເຊື້ອເຊີນຊຶ່ງມີຢູ່ພຽງແຕ່ໃນຄຳກ່າວອຳລາຂອງໂມໂຣໄນ ທີ່ວ່າ, “ຈົ່ງມາຫາພຣະຄຣິດ, ແລະ ຖືກເຮັດໃຫ້ເປັນຄົນດີພ້ອມໃນພຣະອົງ” (ໂມໂຣໄນ 10:32).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ເຮົາສາມາດຮູ້ຈັກຄວາມຈິງໂດຍອຳນາດຂອງພຣະວິນຍານບໍລິສຸດ.
ຄຳສັນຍາຢູ່ໃນ ໂມໂຣໄນ 10:3–7 ໄດ້ປ່ຽນແປງຊີວິດຂອງຫລາຍລ້ານຄົນຕະຫລອດທົ່ວໂລກ. ມັນໄດ້ປ່ຽນແປງຊີວິດຂອງທ່ານແນວໃດ? ບໍ່ວ່າທ່ານຈະສະແຫວງຫາຜົນປະໂຫຍດ ຫລື ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງທ່ານເຖິງພຣະຄຳພີມໍມອນ, ແຕ່ຄຳເຊື້ອເຊີນຂອງໂມໂຣໄນແມ່ນກ່ຽວກັບທ່ານ. ຂະນະທີ່ທ່ານອ່ານ ໂມໂຣໄນ 10:3–7, ໃຫ້ຄິດທີ່ຈະອ່ານຢ່າງລະອຽດຫລາຍກວ່າທີ່ຜ່ານມາ. ທ່ານສາມາດກວດກາເບິ່ງແຕ່ລະສຳນວນ, ຖາມຕົວເອງດັ່ງເຊັ່ນ: ສິ່ງນີ້ໝາຍຄວາມວ່າແນວໃດ? ເຮົາຈະເຮັດສິ່ງນີ້ໄດ້ດີກວ່າເກົ່າແນວໃດ? ເຮົາມີປະສົບການໃດແດ່ກັບສິ່ງນີ້? ພຣະວິນຍານບໍລິສຸດໄດ້ສະແດງຄວາມຈິງກ່ຽວກັບພຣະຄຳພີມໍມອນໃຫ້ປະຈັກຕໍ່ເຮົາແນວໃດ?
ພ້ອມນີ້ກໍໃຫ້ຄິດກ່ຽວກັບບາງຄົນທີ່ຢາກໄດ້ຍິນປະຈັກພະຍານຂອງທ່ານກ່ຽວກັບພຣະຄຳພີມໍມອນ. ທ່ານຈະຊ່ວຍບຸກຄົນນັ້ນໃຫ້ຊອກຫາການເປັນພະຍານຂອງຕົວເອງໄດ້ແນວໃດ?
“ບໍ່ໃຫ້ປະຕິເສດຂອງປະທານຂອງພຣະເຈົ້າ.”
ມີຫລາຍວິທີທາງທີ່ບຸກຄົນອາດ “ປະຕິເສດ … ຂອງປະທານຂອງພຣະເຈົ້າ” (ໂມໂຣໄນ 10:8). ບາງຄົນປະຕິເສດວ່າ ມັນບໍ່ມີຂອງປະທານເຫລົ່ານີ້. ບາງຄົນອາດປະເສດວ່າ ຕົວເອງບໍ່ມີຂອງປະທານທາງວິນຍານ ແຕ່ຍອມຮັບວ່າຄົນອື່ນມີ. ບາງຄົນກໍປະຕິເສດຂອງປະທານຂອງຕົນ ໂດຍການບໍ່ສົນໃຈກັບມັນ ຫລື ບໍ່ພັດທະນາມັນ.
ຂະນະທີ່ທ່ານອ່ານ ໂມໂຣໄນ 10:8–25, ໃຫ້ຊອກຫາຄວາມຈິງທີ່ຈະຊ່ວຍທ່ານໃຫ້ຄົ້ນພົບຂອງປະທານທາງວິນຍານຂອງທ່ານ ແລະ ໃຊ້ມັນດ້ວຍອຳນາດທີ່ຍິ່ງໃຫຍ່ກວ່າ ເພື່ອເປັນພອນໃຫ້ຕົວທ່ານເອງ ແລະ ຄົນອື່ນໆ. ໃຫ້ຊອກຫາຄວາມຮູ້ກ່ຽວກັບຂອງປະທານທີ່ພຣະເຈົ້າໄດ້ມອບໃຫ້ທ່ານ ຫລື ຂອງປະທານທີ່ພຣະອົງປະສົງໃຫ້ທ່ານຊອກຫາ. ເປັນຫຍັງມັນຈຶ່ງສຳຄັນທີ່ຈະ “ຈຳໄວ້ວ່າຂອງປະທານທີ່ດີທຸກຢ່າງມາຈາກພຣະຄຣິດ”? (ໂມໂຣໄນ 10:18).
ໃຫ້ພິຈາລະນາຄຳແນະນຳນີ້ອີກ ຈາກແອວເດີ ຈອນ ຊີ ພິງກຣີ ຜູ້ລູກ ທີ່ວ່າ: “ສະນັ້ນ ເຮົາຈະຮູ້ຈັກຂອງປະທານຂອງເຮົາໄດ້ແນວໃດ? ເຮົາສາມາດອ່ານເບິ່ງຢູ່ໃນປິຕຸພອນຂອງເຮົາ, ສອບຖາມຜູ້ຄົນທີ່ຮູ້ຈັກເຮົາດີ, ແລະ ຈຳແນກເປັນການສ່ວນຕົວ ສິ່ງທີ່ເຮົາເຮັດໄດ້ເກັ່ງຕາມທຳມະຊາດ ແລະ ມັກເຮັດ. ສຳຄັນກວ່າທຸກສິ່ງ, ເຮົາສາມາດທູນຖາມພຣະເຈົ້າໄດ້ (ເບິ່ງ ຢາໂກໂບ 1:5; ຄຳສອນ ແລະ ພັນທະສັນຍາ 112:10). ພຣະອົງຮູ້ຈັກຂອງປະທານຂອງເຮົາ, ເພາະວ່າພຣະອົງໄດ້ມອບມັນໃຫ້ແກ່ເຮົາ” (“I Have a Work for Thee,” Ensign ຫລື Liahona, Nov. 2017, 33).
ເບິ່ງ ຄູ່ມືພຣະຄຳພີ, “ຂອງປະທານແຫ່ງພຣະວິນຍານ,” scriptures.ChurchofJesusChrist.org.
ເຮົາສາມາດດີພ້ອມຜ່ານທາງພຣະຄຸນຂອງພຣະເຢຊູຄຣິດ.
ຄຳແນະນຳຂອງໂມໂຣໄນ ໃຫ້ “ມາຫາພຣະຄຣິດ” ແມ່ນກ່ຽວຂ້ອງຫລາຍກວ່າການພຽງແຕ່ຮຽນຮູ້ກ່ຽວກັບພຣະອົງ ຫລື ຄິດກ່ຽວກັບພຣະອົງເລື້ອຍໆເທົ່ານັ້ນ ຫລື ແມ່ນແຕ່ພະຍາຍາມຫລາຍກວ່າເກົ່າທີ່ຈະຮັກສາພຣະບັນຍັດຂອງພຣະອົງ, ເຖິງແມ່ນວ່າສິ່ງເຫລົ່ານີ້ກໍສຳຄັນຄືກັນ. ແຕ່, ສິ່ງນີ້ເປັນຄຳເຊື້ອເຊີນໃຫ້ມາຫາພຣະຄຣິດ ໃນຄວາມໝາຍທີ່ສົມບູນທີ່ສຸດ—ກາຍເປັນເໝືອນດັ່ງພຣະອົງ. ຂະນະທີ່ທ່ານອ່ານ ໂມໂຣໄນ 10:30–33, ໃຫ້ສັງເກດເບິ່ງສຳນວນທີ່ຊ່ວຍທ່ານໃຫ້ເຂົ້າໃຈຄວາມໝາຍຂອງການມາຫາພຣະຄຣິດແທ້ໆ, ດັ່ງເຊັ່ນ “ຍຶດຖືຂອງປະທານທີ່ດີ ທຸກ ຢ່າງ,” “ປະຕິເສດຕົນຈາກຄວາມບໍ່ເປັນເໝືອນດັ່ງພຣະເຈົ້າ ທຸກ ຢ່າງ,” ແລະ, ແນ່ນອນ, “ດີພ້ອມ ໃນພຣະອົງ” (ເນັ້ນຄຳເນີ້ງ).
ຈະເປັນໄປໄດ້ແນວໃດ? ໃຫ້ຊອກຫາຄຳຕອບຢູ່ໃນ ໂມໂຣໄນ 10:30–33. ພຣະວິນຍານບອກໃຫ້ທ່ານເຮັດສິ່ງໃດ ເພື່ອຈະໄດ້ “ມາຫາພຣະຄຣິດ, ແລະ ຖືກເຮັດໃຫ້ເປັນຄົນດີພ້ອມໃນພຣະອົງ” ແທ້ໆ?
ເບິ່ງ ອອມໄນ 1:26; ຄູ່ມືພຣະຄຳພີ, “ດີພ້ອມທຸກຢ່າງ,” scriptures.ChurchofJesusChrist.org.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
ໂມໂຣໄນ 10
ໃຫ້ອ່ານບົດນີ້ນຳກັນ, ຊອກຫາທຸກເທື່ອທີ່ໂມໂຣໄນໃຊ້ຄຳວ່າ ຂໍແນະນຳ. ໃຫ້ຂຽນ ຫລື ໝາຍສິ່ງທີ່ໂມໂຣໄນແນະນຳ—ຫລື ຊຸກຍູ້ຢ່າງຈິງຈັງ—ເພື່ອໃຫ້ເຮົາເຮັດ. ເຮົາສາມາດເຮັດຫຍັງໄດ້ແດ່ ເພື່ອຈະເຮັດຕາມຄຳແນະນຳຂອງເພິ່ນ?
ໂມໂຣໄນ 10:3
ເຮົາໄດ້ຮຽນຮູ້ຫຍັງແດ່ກ່ຽວກັບຄວາມເມດຕາຂອງພຣະຜູ້ເປັນເຈົ້າ ຂະນະທີ່ເຮົາອ່ານພຣະຄຳພີມໍມອນ ໃນປີນີ້? ພຣະຜູ້ເປັນເຈົ້າໄດ້ເມດຕາຄອບຄົວຂອງເຮົາແນວໃດແດ່?
ໂມໂຣໄນ 10:3–5
ຫລັງຈາກການອ່ານຂໍ້ເຫລົ່ານີ້, ທ່ານອາດຂໍໃຫ້ສະມາຊິກໃນຄອບຄົວ ແບ່ງປັນບາງສິ່ງທີ່ເຂົາເຈົ້າໄດ້ຮຽນຮູ້ວ່າພຣະຄຳພີມໍມອນຈິງແທ້ແນວໃດ. ໃຫ້ຄິດທີ່ຈະຮ້ອງເພງນຳກັນກ່ຽວກັບການສະແຫວງຫາຄວາມຈິງ, ດັ່ງເຊັ່ນ “ສອນເຮົາຍ່າງໃນແສງ” (ເພງສວດ ແລະ ເພງຂອງເດັກນ້ອຍ, 72). ທ່ານສາມາດເຊື້ອເຊີນສະມາຊິກໃນຄອບຄົວໃຫ້ບັນທຶກປະຈັກພະຍານຂອງເຂົາເຈົ້າໄວ້ ຢູ່ໃນປຶ້ມບັນທຶກຂອງຄອບຄົວນຳອີກ.
ໂມໂຣໄນ 10:8–18
ຕາມປົກກະຕິ ບຸນຄຣິດສະມາດເປັນເວລາທີ່ຄິດກ່ຽວກັບການໄດ້ຮັບຂອງຂວັນ. ບາງທີສະມາຊິກໃນຄອບຄົວສາມາດຫໍ່ຂອງຂວັນໃຫ້ກັນ ທີ່ເປັນຕົວແທນໃຫ້ແກ່ “ຂອງປະທານຂອງພຣະເຈົ້າ” ທີ່ກ່າວເຖິງຢູ່ໃນ ໂມໂຣໄນ 10:9–16. ຂອງຂວັນເຫລົ່ານີ້ກໍສາມາດເປັນຕົວແທນໃຫ້ແກ່ຂອງປະທານທີ່ດີໆ ທີ່ມາຈາກພຣະຄຣິດ ຊຶ່ງເຂົາເຈົ້າເຫັນຢູ່ໃນກັນແລະກັນ.
ໂມໂຣໄນ 10:27–29, 34
ສະມາຊິກໃນຄອບຄົວສາມາດແບ່ງປັນສິ່ງທີ່ເຂົາເຈົ້າຈະເວົ້າກັບໂມໂຣໄນ ເມື່ອເຂົາເຈົ້າ “ພົບ [ເພິ່ນ] ຢູ່ຕໍ່ໜ້າບ່ອນພິພາກສາອັນພໍພຣະໄທຂອງພຣະເຢໂຮວາຜູ້ຍິ່ງໃຫຍ່.”
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສຶກສາສ່ວນຕົວ
ຊອກຫາພຣະເຢຊູຄຣິດ. ຈຸດປະສົງຂອງພຣະຄຳພີມໍມອນ—ແລະ ພຣະຄຳພີທັງໝົດ—ແມ່ນເພື່ອເປັນພະຍານເຖິງພຣະເຢຊູຄຣິດ. ທ່ານຮຽນຮູ້ຫຍັງແດ່ກ່ຽວກັບພຣະເຢຊູຄຣິດ ຢູ່ໃນ ໂມໂຣໄນ 10? ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ເພື່ອມາຫາພຣະອົງ?
Moroni Burying the Plates [ໂມໂຣໄນກຳລັງຝັງແຜ່ນຈາລຶກ], ໂດຍ ຈອນ ມິກນໍທັນ