“ວັນທີ 30 ເດືອນພະຈິກ–ວັນທີ 6 ເດືອນທັນວາ. ໂມໂຣໄນ 1–6: ‘ເພື່ອຮັກສາເຂົາຢູ່ໃນທາງທີ່ຖືກຕ້ອງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 30 ເດືອນພະຈິກ–ວັນທີ 6 ເດືອນທັນວາ. ໂມໂຣໄນ 1–6,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ແອວມາໃຫ້ບັບຕິສະມາແກ່ຜູ້ຄົນຢູ່ທີ່ນ້ຳມໍມອນ

ມິເນີວາ ເຄ ໄທເກີດ (1888–1976), Alma Baptizes in the Waters of Mormon [ແອວມາໃຫ້ບັບຕິສະມາຢູ່ໃນນ້ຳມໍມອນ], 1949–1951, ສີນ້ຳມັນ ເທິງແຜ່ນໄມ້ອັດ, 35⅞ x 48 ນິ້ວ. ຫໍພິພິດທະພັນສິລະປະຂອງມະຫາວິທະຍາໄລບຣິກຳ ຢັງ, 1969.

ວັນທີ 30 ເດືອນພະຈິກ–ວັນທີ 6 ເດືອນທັນວາ

ໂມໂຣໄນ 1–6

“ເພື່ອຮັກສາເຂົາຢູ່ໃນທາງທີ່ຖືກຕ້ອງ”

ໂມໂຣໄນໄດ້ບັນທຶກສິ່ງທີ່ເພິ່ນຄິດວ່າຈະ “ມີຄຸນຄ່າ … ໃນມື້ໜຶ່ງຂ້າງໜ້າ” (ໂມໂຣໄນ 1:4). ທ່ານພົບເຫັນຫຍັງແດ່ຢູ່ໃນ ໂມໂຣໄນ 1–6 ທີ່ມີຄຸນຄ່າຕໍ່ທ່ານ? ໃຫ້ບັນທຶກສິ່ງທີ່ທ່ານພົບເຫັນ, ແລະ ໃຫ້ຄິດທີ່ຈະແບ່ງປັນມັນກັບບາງຄົນທີ່ພົບເຫັນວ່າມັນມີຄ່າຄວນຄືກັນ.

ບັນທຶກຄວາມປະທັບໃຈຂອງທ່ານ

ຫລັງຈາກໄດ້ສຳເລັດບັນທຶກຂອງບິດາຂອງເພິ່ນເລື່ອງຊາວນີໄຟແລ້ວ ແລະ ໄດ້ຫຍໍ້ບັນທຶກຂອງຊາວຢາເຣັດ, ທຳອິດໂມໂຣໄນຄິດວ່າ ການຮັກສາບັນທຶກຂອງເພິ່ນແມ່ນສຳເລັດຮຽບຮ້ອຍແລ້ວ (ເບິ່ງ ໂມໂຣໄນ 1:1). ມີຫຍັງອີກແດ່ທີ່ຈະເວົ້າກ່ຽວກັບສອງປະຊາຊາດນີ້ ທີ່ຖືກທຳລາຍຈົນໝົດສິ້ນ? ແຕ່ໂມໂຣໄນໄດ້ເຫັນວັນເວລາຂອງເຮົາ (ເບິ່ງ ມໍມອນ 8:35), ແລະ ເພິ່ນໄດ້ຮັບການດົນໃຈໃຫ້ “ຂຽນຕື່ມອີກເລັກນ້ອຍ, ເພື່ອບາງທີມັນອາດຈະມີຄຸນຄ່າ … ໃນມື້ໜຶ່ງຂ້າງໜ້າ” (ໂມໂຣໄນ 1:4). ເພິ່ນຮູ້ວ່າການປະຖິ້ມຄວາມເຊື່ອຢ່າງຫລວງຫລາຍຈະເກີດຂຶ້ນ, ຊຶ່ງຈະເກີດຄວາມສັບສົນກ່ຽວກັບພິທີການຂອງຖານະປະໂລຫິດ ແລະ ສາດສະໜາໂດຍທົ່ວໄປ. ສິ່ງນີ້ຈຶ່ງເປັນເຫດຜົນທີ່ເພິ່ນໄດ້ໃຫ້ຄວາມແຈ່ມແຈ້ງຢ່າງລະອຽດກ່ຽວກັບສິນລະລຶກ, ການບັບຕິສະມາ, ການມອບຂອງປະທານແຫ່ງພຣະວິນຍານບໍລິສຸດ, ແລະ ພອນຂອງການເຕົ້າໂຮມກັບຜູ້ທີ່ເຊື່ອຖືດ້ວຍກັນ ໃຫ້ “ຮັກສາ [ກັນແລະກັນ] ຢູ່ໃນທາງທີ່ຖືກຕ້ອງ, … ໂດຍເພິ່ງອາໄສແຕ່ໃນພຣະຄຸນຄວາມດີຂອງພຣະຄຣິດຢ່າງດຽວ, ອົງຜູ້ເປັນຜູ້ສ້າງ ແລະ ເປັນຜູ້ເຮັດໃຫ້ສັດທາ [ຂອງເຮົາ] ສົມບູນ” (ໂມໂຣໄນ 6:4). ຄວາມຮູ້ອັນລ້ຳຄ່າແບບນີ້ໄດ້ໃຫ້ເຮົາມີເຫດຜົນທີ່ຈະຂອບຄຸນທີ່ພຣະຜູ້ເປັນເຈົ້າໄດ້ຮັກສາຊີວິດຂອງໂມໂຣໄນໄວ້ ເພື່ອວ່າເພິ່ນຈະໄດ້ “ຂຽນຕື່ມອີກເລັກນ້ອຍ” (ໂມໂຣໄນ 1:4).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ໂມໂຣໄນ 1

ເຖິງແມ່ນມີການຕໍ່ຕ້ານ ແຕ່ອັກຄະສາວົກຂອງພຣະເຢຊູຄຣິດກໍຍັງຊື່ສັດຢູ່ຄືເກົ່າ.

ສຳລັບບາງຄົນ, ມັນເປັນສິ່ງງ່າຍທີ່ຈະຊື່ສັດໃນຊ່ວງເວລາທີ່ສຸກສະບາຍ. ແຕ່ໃນຖານະສານຸສິດຂອງພຣະເຢຊູຄຣິດ, ເຮົາຕ້ອງຊື່ສັດຢູ່ຄືເກົ່າ ແມ່ນແຕ່ໃນຊ່ວງເວລາທີ່ເຮົາປະເຊີນກັບການທົດລອງ ແລະ ການຕໍ່ຕ້ານ. ຂະນະທີ່ທ່ານອ່ານ ໂມໂຣໄນ 1, ແມ່ນຫຍັງທີ່ດົນໃຈທ່ານກ່ຽວກັບຄວາມຊື່ສັດຂອງໂມໂຣໄນຕໍ່ພຣະຜູ້ເປັນເຈົ້າ ແລະ ຕໍ່ການເອີ້ນຂອງເພິ່ນ? ເຮົາຈະເຮັດຕາມຕົວຢ່າງຂອງເພິ່ນໄດ້ແນວໃດ?

ໂມໂຣໄນ 2–6

ພິທີການຂອງຖານະປະໂລຫິດຈະຕ້ອງຖືກປະຕິບັດຕາມທີ່ພຣະຜູ້ເປັນເຈົ້າບັນຊາ.

ລະຫວ່າງການປະຕິບັດສາດສະໜາກິດຢູ່ໃນໂລກຂອງພຣະອົງ, ພຣະຜູ້ຊ່ວຍໃຫ້ລອດໄດ້ຮັບ ແລະ ໄດ້ປະຕິບັດພິທີການສັກສິດ, ດັ່ງເຊັ່ນການບັບຕິສະມາ (ເບິ່ງ ມັດທາຍ 3:13–17; ການແປຂອງໂຈເຊັບ ສະມິດ, ໂຢຮັນ 4:1–3 [ໃນ Bible appendix]), ການແຕ່ງຕັ້ງຂອງຖານະປະໂລຫິດ (ເບິ່ງ ມາຣະໂກ 3:13–19), ແລະ ສິນລະລຶກ (ເບິ່ງ ມັດທາຍ 26:26–28). ເຖິງຢ່າງໃດກໍຕາມ, ເປັນເພາະການປະຖິ້ມຄວາມເຊື່ອອັນຍິ່ງໃຫຍ່, ຜູ້ຄົນຢ່າງຫລວງຫລາຍໃນທຸກວັນນີ້ ຈຶ່ງສັບສົນກ່ຽວກັບວິທີປະຕິບັດພິທີການ—ແລະ ແມ່ນແຕ່ຕ້ອງການພິທີການເຫລົ່ານັ້ນຫລືບໍ່. ໃນ ໂມໂຣໄນ 2–6, ໂມໂຣໄນໄດ້ໃຫ້ລາຍລະອຽດທີ່ສຳຄັນກ່ຽວກັບພິທີການໃດໜຶ່ງໂດຍສະເພາະຂອງຖານະປະໂລຫິດ ທີ່ສາມາດຊ່ວຍໃຫ້ຄວາມແຈ່ມແຈ້ງຕໍ່ຄວາມສັບສົນນັ້ນ. ແມ່ນຫຍັງທີ່ປະທັບໃຈທ່ານ ຂະນະທີ່ທ່ານຮຽນຮູ້ກ່ຽວກັບພິທີການ ຢູ່ໃນບົດເຫລົ່ານີ້? ຕໍ່ໄປນີ້ແມ່ນຄຳຖາມຈຳນວນໜຶ່ງທີ່ທ່ານອາດຖາມ ເພື່ອຊ່ວຍທ່ານໃຫ້ຮຽນຮູ້:

ການຢືນຢັນ (ໂມໂຣໄນ 2; 6:4).ພຣະຜູ້ຊ່ວຍໃຫ້ລອດໄດ້ແນະນຳສິ່ງໃດ ຢູ່ໃນ ໂມໂຣໄນ 2:2 ທີ່ສິດສອນທ່ານກ່ຽວກັບພິທີການຂອງການຢືນຢັນ? ທ່ານຄິດວ່າ “ອຳນາດຂອງພຣະວິນຍານບໍລິສຸດໄດ້ກະທຳ ແລະ ຊຳລະລ້າງເຂົາໃຫ້ສະອາດ” ໝາຍຄວາມວ່າແນວໃດ? (ໂມໂຣໄນ 6:4).

ການແຕ່ງຕັ້ງຂອງຖານະປະໂລຫິດ (ໂມໂຣໄນ 3).ທ່ານພົບເຫັນຫຍັງແດ່ຢູ່ໃນບົດນີ້ ທີ່ສາມາດຊ່ວຍບາງຄົນໃຫ້ກະກຽມສຳລັບການແຕ່ງຕັ້ງສູ່ຖານະປະໂລຫິດ? ທ່ານພົບເຫັນຫຍັງແດ່ທີ່ຊ່ວຍບາງຄົນໃຫ້ປະຕິບັດການແຕ່ງຕັ້ງ?

ສິນລະລຶກ (ໂມໂຣໄນ 4–5; 6:6).ໃຫ້ສັງເກດເບິ່ງຄຳສັນຍາຢູ່ໃນຄຳອະທິຖານສຳລັບສິນລະລຶກ (ເບິ່ງ ໂມໂຣໄນ 4:3; 5:2), ແລະ ໄຕ່ຕອງສິ່ງທີ່ທ່ານກຳລັງເຮັດເພື່ອຮັກສາຄຳສັນຍາຂອງທ່ານ. ທ່ານສາມາດເຮັດຫຍັງແດ່ເພື່ອເຊື້ອເຊີນອິດທິພົນຂອງພຣະວິນຍານຢ່າງມີພະລັງຫລາຍກວ່າເກົ່າ ຂະນະທີ່ທ່ານມີພາກສ່ວນໃນພິທີສິນລະລຶກ?

ການບັບຕິສະມາ (ໂມໂຣໄນ 6:1–3).ທ່ານສາມາດເຮັດສິ່ງໃດ ເພື່ອໃຫ້ມີຄວາມເໝາະສົມຕໍ່ໄປສຳລັບການບັບຕິສະມາທີ່ມອບໃຫ້ຢູ່ໃນຂໍ້ເຫລົ່ານີ້, ແມ່ນແຕ່ຫລັງຈາກທ່ານໄດ້ຮັບບັບຕິສະມາແລ້ວ. ຂໍ້ເຫລົ່ານີ້ແນະນຳທ່ານຫຍັງແດ່ກ່ຽວກັບຄວາມໝາຍຂອງການເປັນສະມາຊິກຂອງສາດສະໜາຈັກຂອງພຣະເຢຊູຄຣິດ?

ອີງຕາມສິ່ງທີ່ທ່ານໄດ້ຮຽນຮູ້, ທ່ານຈະປ່ຽນແປງວິທີທີ່ທ່ານຄິດ, ມີພາກສ່ວນ, ຫລື ກະກຽມຄົນອື່ນສຳລັບພິທີການເຫລົ່ານີ້ແນວໃດ? ເປັນຫຍັງມັນຈຶ່ງສຳຄັນທີ່ພິທີການເຫລົ່ານີ້ຖືກ “ປະຕິບັດ … ຕາມພຣະບັນຍັດຂອງພຣະຄຣິດ”? (ໂມໂຣໄນ 4:1).

ເບິ່ງ “Ordinances,” Gospel Topics, topics.ChurchofJesusChrist.org ນຳອີກ.

ພຣະເຢຊູໄດ້ສິດສອນເຖິງວິທີທີ່ຄວນປະຕິບັດພິທີການ.

ໂມໂຣໄນ 6:4–9

ສານຸສິດຂອງພຣະເຢຊູຄຣິດໄດ້ດູແລຄວາມຜາສຸກຂອງຈິດວິນຍານຂອງກັນແລະກັນ.

ເຖິງແມ່ນວ່າມັນເປັນຄວາມຈິງທີ່ເຮົາທຸກຄົນ “ເຮັດວຽກງານຂອງຄວາມລອດ [ຂອງເຮົາ] ເອງ” (ມໍມອນ 9:27), ແຕ່ໂມໂຣໄນກໍຍັງໄດ້ສິດສອນວ່າ “ການຊຸມນຸມກັນຢູ່ເລື້ອຍໆ” ກັບຜູ້ທີ່ເຊື່ອຖືດ້ວຍກັນ ສາມາດຊ່ວຍເຮົາໃຫ້ຢູ່ “ໃນທາງທີ່ຖືກຕ້ອງ” (ໂມໂຣໄນ 6:4–5). ຂະນະທີ່ທ່ານອ່ານ ໂມໂຣໄນ 6:4–9, ໃຫ້ໄຕ່ຕອງເຖິງພອນທີ່ມາຈາກການ “ຖືກນັບເຂົ້າຢູ່ໃນບັນດາຜູ້ຄົນຂອງສາດສະໜາຈັກຂອງພຣະຄຣິດ” (ໂມໂຣໄນ 6:4). ທ່ານຈະສາມາດຊ່ວຍເຮັດໃຫ້ປະສົບການທີ່ທ່ານ ແລະ ຄົນອື່ນໆມີໃນສາດສະໜາຈັກ ເປັນຄືກັນກັບສິ່ງທີ່ໂມໂຣໄນໄດ້ບັນຍາຍໄດ້ແນວໃດ, ບໍ່ວ່າທ່ານເປັນຜູ້ນຳ ຫລື ເປັນຜູ້ມາຮ່ວມກໍຕາມ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

ໂມໂຣໄນ 1; ໂມໂຣໄນ 6:3

ຄຳວ່າ “ປະຕິເສດພຣະຄຣິດ” ໝາຍຄວາມວ່າແນວໃດ? (ໂມໂຣໄນ 1:2–3). ເຮົາຈະສະແດງ “ຄວາມຕັ້ງໃຈ [ຂອງເຮົາ] ທີ່ຈະຮັບໃຊ້ພຣະອົງຈົນເຖິງທີ່ສຸດ” ແນວໃດ? (ໂມໂຣໄນ 6:3). ແບ່ງປັນຕົວຢ່າງຂອງຜູ້ຄົນທີ່ທ່ານຮູ້ ຜູ້ທີ່ມີຄວາມຕັ້ງໃຈທີ່ຈະຮັບໃຊ້ພຣະອົງ.

ໂມໂຣໄນ 4:3; ໂມໂຣໄນ 5:2

ການອ່ານຄຳອະທິຖານສຳລັບສິນລະລຶກເປັນຄອບຄົວ ສາມາດນຳພາໄປສູ່ການສົນທະນາກ່ຽວກັບການນັບຖືສິນລະລຶກດ້ວຍຄວາມຄາລະວະຫລາຍກວ່າເກົ່າ. ບາງທີສະມາຊິກໃນຄອບຄົວສາມາດສົນທະນາສຳນວນຈາກຄຳອະທິຖານເຫລົ່ານີ້ ທີ່ມີຄວາມສຳຄັນຕໍ່ເຂົາເຈົ້າໂດຍສະເພາະ. ເຂົາເຈົ້າຍັງສາມາດບັນທຶກຄວາມຄິດກ່ຽວກັບສຳນວນເຫລົ່ານີ້ຂອງເຂົາເຈົ້າໄວ້ ຫລື ແຕ້ມຮູບທີ່ຊ່ວຍເຂົາເຈົ້າໃຫ້ຄິດກ່ຽວກັບພຣະຜູ້ຊ່ວຍໃຫ້ລອດ. ເຂົາເຈົ້າສາມາດນຳສິ່ງທີ່ເຂົາເຈົ້າຂຽນ ຫລື ແຕ້ມໄປກອງປະຊຸມສິນລະລຶກນຳ ເພື່ອຊ່ວຍເຂົາເຈົ້າສຸມຄວາມຄິດຂອງເຂົາເຈົ້າຢູ່ທີ່ພຣະອົງ. ໃຫ້ບອກຄອບຄົວຂອງທ່ານເຖິງສິ່ງທີ່ທ່ານຮູ້ສຶກກ່ຽວກັບສິນລະລຶກ ແລະ ການເສຍສະລະຂອງພຣະຜູ້ຊ່ວຍໃຫ້ລອດ.

ໂມໂຣໄນ 6:1–4

ຄຳວ່າ “ໃຈທີ່ຊອກຊ້ຳ ແລະ ວິນຍານທີ່ສຳນຶກຜິດ” ໝາຍຄວາມວ່າແນວໃດ? (ໂມໂຣໄນ 6:2). ສິ່ງນີ້ຊ່ວຍເຮົາໃຫ້ກະກຽມສຳລັບການບັບຕິສະມາແນວໃດ? ມັນຈະຊ່ວຍເຮົາແນວໃດແດ່ຫລັງຈາກເຮົາໄດ້ຮັບບັບຕິສະມາແລ້ວ?

ໂມໂຣໄນ 6:4–9

ອີງຕາມຂໍ້ເຫລົ່ານີ້, ມີພອນຢ່າງໃດແດ່ທີ່ມາຈາກການ “ຖືກນັບເຂົ້າຢູ່ໃນບັນດາຜູ້ຄົນຂອງສາດສະໜາຈັກຂອງພຣະຄຣິດ”? (ໂມໂຣໄນ 6:4). ເປັນຫຍັງເຮົາຈຶ່ງຕ້ອງການສາດສະໜາຈັກ?

ໂມໂຣໄນ 6:8

ຂໍ້ເຫລົ່ານີ້ສິດສອນຫຍັງແດ່ກ່ຽວກັບການກັບໃຈ? ການສະແຫວງຫາການໃຫ້ອະໄພ ດ້ວຍ “ເຈດຕະນາອັນແທ້ຈິງ” ໝາຍຄວາມວ່າແນວໃດ? (ໂມໂຣໄນ 6:8). ໃຫ້ຄິດທີ່ຈະຮ້ອງເພງກ່ຽວກັບການໃຫ້ອະໄພ, ດັ່ງເຊັ່ນ “ສອນເຮົາຍ່າງໃນແສງ” (ເພງສວດ ແລະ ເພງຂອງເດັກນ້ອຍ, 72).

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສຶກສາສ່ວນຕົວ

ຊອກຫາຫລັກຖານຂອງຄວາມຮັກຂອງພຣະເຈົ້າ. ປະທານເອັມ ຣະໂຊ ບາເລີດ ໄດ້ສິດສອນວ່າ, “ພຣະກິດຕິຄຸນນີ້ເປັນພຣະກິດຕິຄຸນແຫ່ງຄວາມຮັກ—ຄວາມຮັກສຳລັບພຣະເຈົ້າ ແລະ ຄວາມຮັກສຳລັບກັນແລະກັນ” (“God’s Love for His Children,” Ensign, May 1988, 59). ຂະນະທີ່ທ່ານອ່ານພຣະຄຳພີ, ໃຫ້ຄິດທີ່ຈະໝາຍເຫດ ຫລື ໝາຍຫລັກຖານຂອງຄວາມຮັກຂອງພຣະເຈົ້າສຳລັບທ່ານ ແລະ ລູກໆທຸກຄົນຂອງພຣະອົງໄວ້.