“ວັນທີ 21–27 ເດືອນທັນວາ. ຄຣິດສະມາດ: ‘ພຣະອົງຈະສະເດັດມາໃນໂລກນີ້ເພື່ອໄຖ່ຜູ້ຄົນຂອງພຣະອົງ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 21–27 ເດືອນທັນວາ. ຄຣິດສະມາດ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ໂຢເຊັບ, ມາຣີ, ແລະ ກຸມມານນ້ອຍເຢຊູ ຢູ່ໃນຄອກສັດ

Behold the Lamb of God [ຈົ່ງເບິ່ງພຣະເມສານ້ອຍຂອງພຣະເຈົ້າ], ໂດຍ ວາວເຕີ ເຣນ

ວັນທີ 21–27 ເດືອນທັນວາ

ຄຣິດສະມາດ

“ພຣະອົງຈະສະເດັດມາໃນໂລກນີ້ເພື່ອໄຖ່ຜູ້ຄົນຂອງພຣະອົງ”

ເທດສະການຄຣິດສະມາດເປັນເວລາສະທ້ອນຄິດ ແລະ ສະແດງຄວາມຮູ້ບຸນຄຸນຕໍ່ການກຳເນີດຂອງພຣະຜູ້ຊ່ວຍໃຫ້ລອດ, ພຣະເຢຊູຄຣິດ. ຂະນະທີ່ທ່ານອ່ານ ແລະ ໄຕ່ຕອງໃນອາທິດນີ້ ກ່ຽວກັບການກຳເນີດ ແລະ ພຣະຊົນຊີບຂອງພຣະອົງ, ໃຫ້ພິຈາລະນາວ່າການສຶກສາພຣະຄຳພີມໍມອນໃນປີນີ້ຂອງທ່ານ ໄດ້ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງທ່ານແນວໃດ ວ່າພຣະອົງເປັນພຣະຜູ້ຊ່ວຍໃຫ້ລອດຂອງໂລກ. ບັນທຶກຄວາມປະທັບໃຈທີ່ມາສູ່ທ່ານ.

ບັນທຶກຄວາມປະທັບໃຈຂອງທ່ານ

ຈາກນີໄຟ ເຖິງ ໂມໂຣໄນ, ສາດສະດາທຸກຄົນຂອງພຣະຄຳພີມໍມອນໄດ້ເຮັດຄຳໝັ້ນສັນຍາຕໍ່ຈຸດປະສົງທີ່ສັກສິດ ຊຶ່ງສະຫລຸບຢູ່ໃນ ໜ້າວິເຄາະສະບັບ ຂອງພຣະຄຳພີ: “ເພື່ອໃຫ້ [ຜູ້ຄົນທັງປວງ] ຮັບຮູ້ວ່າ ພຣະເຢຊູຄື ພຣະຄຣິດ.” ສາດສະດາຄົນໜຶ່ງໄດ້ເຫັນພຣະອົງເປັນວິນຍານຢູ່ໃນສະຫວັນ, ແລະ ອີກຄົນໜຶ່ງໄດ້ເຫັນການກຳເນີດ ແລະ ການປະຕິບັດສາດສະໜາກິດຂອງພຣະອົງ ຢູ່ໃນພາບນິມິດ. ຄົນໜຶ່ງໄດ້ຢືນຢູ່ເທິງກຳແພງ ປະກາດເຄື່ອງໝາຍຂອງການກຳເນີດຂອງພຣະອົງ ແລະ ການສິ້ນພຣະຊົນຂອງພຣະອົງ, ແລະ ອີກຄົນໜຶ່ງໄດ້ຄຸເຂົ່າຢູ່ຕໍ່ພຣະພັກຂອງພຣະອົງທີ່ໄດ້ຟື້ນຄືນພຣະຊົນແລ້ວ, ຈັບບາຍຮອຍແຜຢູ່ໃນພຣະຫັດ, ພຣະບາດ, ແລະ ຂ້າງຂອງພຣະອົງ. ພວກເພິ່ນທັງໝົດຮູ້ເຖິງຄວາມຈິງທີ່ສຳຄັນນີ້ວ່າ: “ບໍ່ມີທາງ ຫລື ວິທີອື່ນໃດເລີຍທີ່ມະນຸດຈະລອດໄດ້, ນອກຈາກທາງໂລຫິດທີ່ຊົດໃຊ້ແທນຂອງພຣະເຢຊູຄຣິດຜູ້ … ໄດ້ມາໄຖ່ໂລກ” (ຮີລາມັນ 5:9).

ສະນັ້ນ ລະຫວ່າງເທດສະການຄຣິດສະມາດນີ້, ຂະນະທີ່ຜູ້ເຊື່ອຕະຫລອດທົ່ວໂລກສະເຫລີມສະຫລອງພຣະກະລຸນາທິຄຸນ ແລະ ຄວາມຮັກຂອງພຣະເຈົ້າ ໃນການສົ່ງພຣະບຸດຂອງພຣະອົງມາ, ໃຫ້ໄຕ່ຕອງວິທີທີ່ພຣະຄຳພີມໍມອນໄດ້ເພີ່ມຄວາມເຂັ້ມແຂງໃຫ້ສັດທາຂອງທ່ານໃນພຣະຄຣິດແນວໃດ. ຂະນະທີ່ທ່ານຄິດກ່ຽວກັບການກຳເນີດຂອງພຣະອົງ, ໃຫ້ໄຕ່ຕອງເຖິງເຫດຜົນທີ່ພຣະອົງໄດ້ສະເດັດມາ ແລະ ການມາຂອງພຣະອົງໄດ້ປ່ຽນແປງຊີວິດຂອງທ່ານແນວໃດ. ແລ້ວທ່ານຈະສາມາດປະສົບຄວາມສຸກທີ່ແທ້ຈິງຂອງບຸນຄຣິດສະມາດ—ຂອງປະທານທີ່ພຣະເຢຊູຄຣິດໄດ້ປະທານໃຫ້ທ່ານ.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

1 ນີໄຟ 11:13–36; ໂມໄຊຢາ 3:5–10; ຮີລາມັນ 14:1–13; 3 ນີໄຟ 1:4–22

ພຣະເຢຊູຄຣິດໄດ້ມາສູ່ໂລກ ເພື່ອເປັນພຣະຜູ້ຊ່ວຍໃຫ້ລອດຂອງເຮົາ.

ມັນເປັນປະເພນີທີ່ຈະອ່ານເລື່ອງການກຳເນີດຂອງພຣະຜູ້ຊ່ວຍໃຫ້ລອດ ຢູ່ໃນພຣະຄຳພີໃໝ່ ໃນຊ່ວງເວລາຂອງບຸນຄຣິດສະມາດ, ແຕ່ທ່ານກໍສາມາດຊອກຫາຄຳທຳນາຍທີ່ປະທັບໃຈກ່ຽວກັບເຫດການທີ່ສັກສິດນີ້ ຢູ່ໃນພຣະຄຳພີມໍມອນນຳອີກ. ຍົກຕົວຢ່າງ, ການທຳນາຍເຖິງການກຳເນີດ ແລະ ການປະຕິບັດສາດສະໜາກິດຂອງພຣະຜູ້ຊ່ວຍໃຫ້ລອດ ຢູ່ໃນ 1 ນີໄຟ 11:13–36; ໂມໄຊຢາ 3:5–10; ຮີລາມັນ 14:1–13; ແລະ 3 ນີໄຟ 1:4–22. ຄວາມປະທັບໃຈຢ່າງໃດແດ່ກ່ຽວກັບພຣະເຢຊູຄຣິດທີ່ມາສູ່ທ່ານ ຂະນະທີ່ທ່ານອ່ານຂ່າວສານເຫລົ່ານີ້ ແລະ ໄຕ່ຕອງກ່ຽວກັບຄວາມໝາຍທີ່ເປັນໄປໄດ້ຂອງເຄື່ອງໝາຍເຖິງການກຳເນີດຂອງພຣະອົງ? ປະຈັກພະຍານຂອງສາດສະດາຢູ່ອາເມຣິກາໃນສະໄໝບູຮານ ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງທ່ານກ່ຽວກັບພຣະຄຣິດ ແລະ ພາລະກິດຂອງພຣະອົງແນວໃດ?

ເບິ່ງ ມັດທາຍ 1:18–25; 2; ລູກາ 2 ນຳອີກ.

2 ນີໄຟ 2:6; ແອວມາ 7:7–13; 11:40; ຮີລາມັນ 5:9; 14:16–17

ພຣະເຢຊູຄຣິດເປັນພຣະຜູ້ໄຖ່ຂອງມວນມະນຸດທັງປວງ.

ເຮົາຄົງບໍ່ມີເຫດຜົນທີ່ຈະສະເຫລີມສະຫລອງການກຳເນີດຂອງພຣະເຢຊູຄຣິດ ຖ້າຫາກມັນບໍ່ເປັນເພາະການເສຍສະລະຊົດໃຊ້ຂອງພຣະອົງ, ຊຶ່ງຜ່ານທາງນັ້ນ ພຣະອົງໄດ້ໂຜດເຮົາຈາກບາບ ແລະ ຄວາມຕາຍ, ປອບໂຍນເຮົາໃນຄວາມທຸກຍາກລຳບາກ, ແລະ ຊ່ວຍເຫລືອເຮົາ “ເພື່ອໃຫ້ເປັນຄົນດີພ້ອມໃນພຣະອົງ” (ໂມໂຣໄນ 10:32). ທ່ານຮຽນຮູ້ຫຍັງແດ່ຈາກພຣະຄຳພີມໍມອນໃນປີນີ້ກ່ຽວກັບອຳນາດຂອງພຣະຜູ້ຊ່ວຍໃຫ້ລອດ ທີ່ຈະໄຖ່ທ່ານ? ມີເລື່ອງໃດ ຫລື ຄຳສອນໃດບໍທີ່ປະທັບໃຈທ່ານ? ໃຫ້ພິຈາລະນາສິ່ງທີ່ຕົວຢ່າງດັ່ງຕໍ່ໄປນີ້ສິດສອນທ່ານກ່ຽວກັບພາລະກິດແຫ່ງການໄຖ່ຂອງພຣະຜູ້ຊ່ວຍໃຫ້ລອດ: 2 ນີໄຟ 2:6; ແອວມາ 7:7–13; 11:40; ແລະ ຮີລາມັນ 5:9; 14:16–17. ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ເພື່ອສະແດງໃຫ້ພຣະອົງເຫັນຄວາມຮູ້ບຸນຄຸນຂອງທ່ານ? (Christmas.ComeuntoChrist.org ມີແນວຄິດບາງຢ່າງທີ່ສາມາດຊ່ວຍທ່ານເລີ່ມຕົ້ນ.)

1 ນີໄຟ 6:4; 19:18; 2 ນີໄຟ 25:23, 26; 33:4, 10

ພຣະຄຳພີມໍມອນເປັນພະຍານເຖິງພຣະເຢຊູຄຣິດ.

“ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ” ແມ່ນເກີນກວ່າຫົວເລື່ອງຍ່ອຍເທົ່ານັ້ນສຳລັບພຣະຄຳພີມໍມອນ; ມັນເປັນບົດຄວາມເຖິງຈຸດປະສົງແຫ່ງສະຫວັນຂອງພຣະຄຳພີ. ໃຫ້ໄຕ່ຕອງເຖິງສິ່ງທີ່ທ່ານຮຽນຮູ້ຈາກຂໍ້ພຣະຄຳພີດັ່ງຕໍ່ໄປນີ້ ກ່ຽວກັບພາລະກິດຂອງພຣະຄຳພີມໍມອນ ໃນການເປັນພະຍານເຖິງພຣະຄຣິດ: 1 ນີໄຟ 6:4; 19:18; ແລະ 2 ນີໄຟ 25:23, 26; 33:4, 10.

ໃຫ້ຄິດທີ່ຈະບັນທຶກວິທີທີ່ທ່ານສຶກສາພຣະຄຳພີມໍມອນໃນປີນີ້ ໄດ້ເຮັດໃຫ້ທ່ານເຂົ້າໃກ້ຊິດພຣະຄຣິດຫລາຍກວ່າເກົ່າແນວໃດ. ການກະຕຸ້ນດັ່ງຕໍ່ໄປນີ້ອາດຊ່ວຍໄດ້:

“ສິ່ງໃໝ່ບາງຢ່າງທີ່ເຮົາຮຽນຮູ້ກ່ຽວກັບພຣະຜູ້ຊ່ວຍໃຫ້ລອດ ໃນປີນີ້ແມ່ນ …”
“ການອ່ານ [ຂໍ້ທີ່ກ່ຽວກັບພຣະຜູ້ຊ່ວຍໃຫ້ລອດ] ໄດ້ປ່ຽນແປງວິທີທີ່ເຮົາ …”
“ບຸກຄົນ [ຫລື ເລື່ອງລາວ] ທີ່ເຮົາມັກຢູ່ໃນພຣະຄຳພີມໍມອນ ສິດສອນເຮົາວ່າ ພຣະຜູ້ຊ່ວຍໃຫ້ລອດ …”

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

1 ນີໄຟ 11:13–23; ໂມໄຊຢາ 3:5–10; ຮີລາມັນ 14:1–13; 3 ນີໄຟ 1:4–22

ເດັກນ້ອຍອາດມັກແຕ້ມຮູບ ຕາມສິ່ງທີ່ພວກເຂົາໄດ້ຍິນ ຂະນະທີ່ທ່ານອ່ານເລື່ອງລາວກ່ຽວກັບການກຳເນີດ ແລະ ການປະຕິບັດສາດສະໜາກິດຂອງພຣະຄຣິດ ໃນ 1 ນີໄຟ 11:13–23; ໂມໄຊຢາ 3:5–10; ຮີລາມັນ 14:1–13; ແລະ 3 ນີໄຟ 1:4–22. ແລ້ວລູກໆຂອງທ່ານສາມາດເລົ່າເລື່ອງເຫລົ່ານັ້ນຄືນ ໂດຍການໃຊ້ຮູບທີ່ພວກເຂົາແຕ້ມ.

“ພຣະອົງເປັນຂອງຂວັນ”

ເພື່ອຊ່ວຍຄອບຄົວຂອງທ່ານເນັ້ນເລື່ອງຂອງປະທານທີ່ພຣະບິດາເທິງສະຫວັນປະທານໃຫ້ເຮົາ ໂດຍການສົ່ງພຣະບຸດຂອງພຣະອົງມາ, ທ່ານສາມາດຫໍ່ຮູບພຣະເຢຊູຄຣິດ ຄືກັບວ່າພຣະຄຣິດເປັນຂອງຂວັນ. ສະມາຊິກໃນຄອບຄົວສາມາດເວົ້າລົມກັນກ່ຽວກັບຂອງຂວັນຄຣິດສະມາດທີ່ຕົນມັກ ທີ່ໄດ້ຮັບ ຫລື ຫວັງຈະໄດ້ຮັບ. ແລ້ວເຂົາເຈົ້າສາມາດເປີດຫໍ່ຮູບພຣະຄຣິດ ແລະ ສົນທະນາວິທີທີ່ພຣະອົງໄດ້ເປັນຂອງຂວັນທີ່ມີຄ່າສຳລັບເຮົາແນວໃດ. ວິດີໂອ “He Is the Gift” (ChurchofJesusChrist.org) ສາມາດຊ່ວຍພວກທ່ານໃຫ້ສົນທະນາວິທີທີ່ພວກທ່ານສາມາດຄົ້ນຫາ, ຮັບເອົາ, ແລະ ແບ່ງປັນຂອງຂວັນທີ່ເປັນພຣະຜູ້ຊ່ວຍໃຫ້ລອດ ນຳກັນເປັນຄອບຄົວໃນຊ່ວງບຸນຄຣິດສະມາດນີ້.

ຄອບຄົວຂອງທ່ານອາດໄດ້ຮັບຜົນປະໂຫຍດຈາກການຄິດກ່ຽວກັບ “ຂອງຂວັນ” ທີ່ເຂົາເຈົ້າຢາກມອບໃຫ້ພຣະຜູ້ຊ່ວຍໃຫ້ລອດ, ດັ່ງເຊັ່ນການໃຊ້ຄວາມພະຍາຍາມທີ່ຈະມີເມດຕາຫລາຍກວ່າເກົ່າກັບຄົນອື່ນ ຫລື ຄວາມພະຍາຍາມທີ່ຈະປະຖິ້ມນິໄສທີ່ບໍ່ດີ. ໃຫ້ຄິດທີ່ຈະເຊື້ອເຊີນສະມາຊິກໃນຄອບຄົວໃຫ້ຂຽນແນວຄິດຂອງເຂົາເຈົ້າ, ຫໍ່ມັນເປັນຂອງຂວັນ, ແລະ ວາງຂອງຂວັນຂອງເຂົາເຈົ້າໄວ້ອ້ອມຮອບຮູບຂອງພຣະຜູ້ຊ່ວຍໃຫ້ລອດ.

ວິນຍານຂອງບຸນຄຣິດສະມາດ

ມັນອາດເປັນສິ່ງສະໜຸກສະໜານທີ່ຈະວາງແຜນເຮັດກິດຈະກຳ ທີ່ຄອບຄົວຂອງທ່ານສາມາດເຮັດໃນຫລາຍມື້ ກ່ອນວັນຄຣິດສະມາດທີ່ຈະມາເຖິງນີ້ ເພື່ອຈະໄດ້ຮູ້ສຶກເຖິງພຣະວິນຍານຂອງພຣະຄຣິດ, ດັ່ງເຊັ່ນການຮັບໃຊ້ບາງຄົນ ຫລື ການຮ້ອງເພງຄຣິດສະມາດນຳກັນ. (ສຳລັບແນວຄິດບາງຢ່າງ, ໃຫ້ເບິ່ງ Christmas.ComeuntoChrist.org.)

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສິດສອນຂອງເຮົາ

ຕິດຕາມເບິ່ງການເຊື້ອເຊີນໃຫ້ກະທຳ. “ເມື່ອທ່ານຕິດຕາມເບິ່ງການເຊື້ອເຊີນໃຫ້ກະທຳ, ທ່ານໄດ້ສະແດງໃຫ້ [ສະມາຊິກໃນຄອບຄົວຂອງທ່ານ] ເຫັນວ່າ ທ່ານເອົາໃຈໃສ່ຕໍ່ເຂົາເຈົ້າ ແລະ ວິທີທີ່ພຣະກິດຕິຄຸນໄດ້ເປັນພອນໃຫ້ແກ່ເຂົາເຈົ້າແນວໃດ. ທ່ານກໍຍັງໃຫ້ໂອກາດເຂົາເຈົ້າແບ່ງປັນປະສົບການຂອງເຂົາເຈົ້ານຳອີກ, ຊຶ່ງໃຫ້ຄວາມເຂັ້ມແຂງແກ່ຄຳໝັ້ນສັນຍາຂອງເຂົາເຈົ້າ ແລະ ປ່ອຍໃຫ້ເຂົາເຈົ້າສົ່ງເສີມກັນແລະກັນ ໃນການດຳລົງຊີວິດຕາມພຣະກິດຕິຄຸນ” (Teaching in the Savior’s Way, 35).