“ພາກຫ້ອຍທ້າຍ ກ: ພຣະວິນຍານເປັນພະຍານຕໍ່ເຮົາວ່າພຣະຄຳພີມໍມອນແມ່ນຈິງແທ້ແນວໃດ?” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ພາກຫ້ອຍທ້າຍ ກ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
ພາກຫ້ອຍທ້າຍ ກ
ພຣະວິນຍານເປັນພະຍານຕໍ່ເຮົາວ່າພຣະຄຳພີມໍມອນແມ່ນຈິງແທ້ແນວໃດ?
ທ່ານອາດເຄີຍໄດ້ຍິນກ່ຽວກັບຄຳສັນຍາຂອງໂມໂຣໄນຕໍ່ທຸກຄົນທີ່ອ່ານພຣະຄຳພີມໍມອນ ທີ່ວ່າ: “ຖ້າຫາກທ່ານທູນຖາມດ້ວຍໃຈຈິງ, ດ້ວຍເຈດຕະນາອັນແທ້ຈິງ, ໂດຍມີສັດທາໃນພຣະຄຣິດ, ພຣະອົງຈະສະແດງຄວາມຈິງຂອງ [ພຣະຄຳພີມໍມອນ] ໃຫ້ປະຈັກແກ່ທ່ານ, ໂດຍອຳນາດຂອງພຣະວິນຍານບໍລິສຸດ” (ໂມໂຣໄນ 10:4). ການຮູ້ຄວາມຈິງ “ໂດຍອຳນາດຂອງພຣະວິນຍານບໍລິສຸດ” ໝາຍຄວາມວ່າແນວໃດ? ທ່ານຈະຮູ້ຈັກຕອນທີ່ພຣະວິນຍານບໍລິສຸດກ່າວກັບທ່ານໄດ້ແນວໃດ?
ມັນອາດເປັນປະໂຫຍດທີ່ຈະຈື່ຈຳວ່າ ພຣະວິນຍານບໍລິສຸດສື່ສານກັບເຮົາ ໃນວິທີທາງທີ່ແຕກຕ່າງຈາກວິທີທາງທີ່ເຮົາເຄີຍສື່ສານກັບກັນແລະກັນ. ແຕ່ພຣະບິດາເທິງສະຫວັນຂອງທ່ານປະສົງຈະຊ່ວຍທ່ານໃຫ້ຮຽນຮູ້ທີ່ຈະຮັບຮູ້ພຣະວິນຍານ. ພຣະອົງໄດ້ປະທານພຣະຄຳພີມໍມອນໃຫ້ທ່ານ, ຊຶ່ງໃນນັ້ນ ຜູ້ຮັບໃຊ້ທີ່ຊື່ສັດຫລາຍຄົນ ໄດ້ບັນຍາຍປະສົບການຂອງເຂົາເຈົ້າດ້ວຍສຸລະສຽງຂອງພຣະຜູ້ເປັນເຈົ້າ.
ຍົກຕົວຢ່າງ, ນີໄຟໄດ້ບອກພວກອ້າຍຂອງເພິ່ນວ່າ ພຣະຜູ້ເປັນເຈົ້າໄດ້ກ່າວກັບພວກເຂົາ “ດ້ວຍສຽງອັນເບົາໆ,” ເຖິງແມ່ນບໍ່ໄດ້ເປັນສຸລະສຽງທີ່ພວກເຂົາສາມາດໄດ້ຍິນ ດ້ວຍຫູຂອງຕົວເອງກໍຕາມ. ຕາມຈິງແລ້ວ, ນີໄຟໄດ້ກ່າວວ່າພວກອ້າຍຂອງເພິ່ນ “ມີໃຈແຂງ” ແລະ “ຮູ້ສຶກ ໃນພຣະຄຳຂອງພຣະອົງບໍ່ໄດ້” (1 ນີໄຟ 17:45, ເນັ້ນຄຳເນີ້ງ). ເອໂນດໄດ້ບັນຍາຍຄຳຕອບຕໍ່ຄຳອະທິຖານຂອງເພິ່ນວ່າ “ສຸລະສຽງຂອງພຣະຜູ້ເປັນເຈົ້າ” ໄດ້ “ເຂົ້າສູ່ຈິດໃຈ [ຂອງເພິ່ນ]” (ເອໂນດ 1:10). ແລະ ໃຫ້ພິຈາລະນາຖ້ອຍຄຳເຫລົ່ານີ້ ທີ່ບັນຍາຍກ່ຽວກັບສຽງດັງວ່າ ມັນມາຈາກຟ້າສະຫວັນ ເມື່ອພຣະຜູ້ຊ່ວຍໃຫ້ລອດທີ່ຟື້ນຄືນພຣະຊົນໄດ້ມາປະກົດ ຢູ່ໃນແຜ່ນດິນອຸດົມສົມບູນ ທີ່ວ່າ: “ມັນບໍ່ແມ່ນສຽງໂຫດຫ້ຽມ, ທັງບໍ່ແມ່ນສຽງດັງ; ເຖິງຢ່າງໃດກໍຕາມ, … ມັນໄດ້ສຽບແທງພວກເຂົາຈົນເຖິງຮອດຈິດວິນຍານທຸກສ່ວນ, ແລະ ໄດ້ເຮັດໃຫ້ໃຈຂອງພວກເຂົາຮ້ອນໄໝ້” (3 ນີໄຟ 11:3).
ບາງທີທ່ານອາດເຄີຍໄດ້ມີປະສົບການທີ່ຄ້າຍຄືກັນນີ້, ຫລື ປະສົບການຂອງທ່ານອາດແຕກຕ່າງ. ພຣະວິນຍານບໍລິສຸດສື່ສານໃນຫລາຍໆວິທີທາງ, ແລະ ການເປີດເຜີຍສາມາດມາສູ່ເຮົາແຕ່ລະຄົນໃນວິທີທາງທີ່ແຕກຕ່າງກັນ. ແລະ ເມື່ອພຣະວິນຍານສະຖິດຢູ່ໃນຊີວິດຂອງເຮົາ, ເຮົາຈະເຫັນອິດທິພົນຂອງພຣະອົງຕໍ່ເຮົາໃນຫລາຍວິທີທາງ. ອັກຄະສາວົກໂປໂລ ໄດ້ກ່າວເຖິງ “ຜົນຂອງພຣະວິນຍານ”—ຄວາມຮູ້ສຶກເຖິງ “ຄວາມຮັກ, ຄວາມຊື່ນຊົມຍິນດີ, ສັນຕິສຸກ, ຄວາມອົດທົນດົນນານ, ຄວາມເມດຕາປານີ, ຄວາມດີ, ສັດທາ, ຄວາມສຸພາບອ່ອນຫວານ, ການຮູ້ຈັກບັງຄັບຕົນ,” ຢູ່ໃນບັນດາຈຳນວນອື່ນໆ (ຄາລາເຕຍ 5:22–23).
ຕໍ່ໄປນີ້ແມ່ນຄຳສອນຢ່າງອື່ນໆຈຳນວນໜຶ່ງ ແລະ ຕົວຢ່າງຈາກພຣະຄຳພີມໍມອນກ່ຽວກັບພຣະວິນຍານບໍລິສຸດ. ຂະນະທີ່ທ່ານອ່ານ, ທ່ານອາດເຫັນວ່າ ພຣະວິນຍານບໍລິສຸດໄດ້ກ່າວກັບທ່ານ ຫລາຍກວ່າທີ່ທ່ານຮັບຮູ້, ເປັນພະຍານຕໍ່ທ່ານວ່າ ພຣະຄຳພີມໍມອນແມ່ນພຣະຄຳຂອງພຣະເຈົ້າຢ່າງຈິງແທ້ແນ່ນອນ.
ຄວາມກະຕັນຍູ ແລະ ຄວາມຊື່ນຊົມ
ພຣະຄຳພີມໍມອນ ເລີ່ມຕົ້ນດ້ວຍຄຳທຳນາຍຂອງລີໄຮ ເຫັນພາບນິມິດທີ່ມະຫັດສະຈັນ. ຢູ່ໃນພາບນິມິດນີ້, ເພິ່ນໄດ້ຮັບປຶ້ມເຫລັ້ມໜຶ່ງ ແລະ ຖືກເຊື້ອເຊີນໃຫ້ອ່ານມັນ. “ເມື່ອເພິ່ນອ່ານໜັງສື,” ບັນທຶກບອກກ່າວ, “ເພິ່ນກໍເຕັມໄປດ້ວຍພຣະວິນຍານຂອງພຣະຜູ້ເປັນເຈົ້າ.” ປະສົບການນີ້ໄດ້ເຮັດໃຫ້ລີໄຮສັນລະເສີນພຣະເຈົ້າ ສຳລັບ “ອຳນາດ, ແລະ ພຣະກະລຸນາທິຄຸນ, ແລະ ຄວາມເມດຕາ” ຂອງພຣະອົງ, ແລະ “ຈິດວິນຍານ [ຂອງລີໄຮ] ປິຕິຍິນດີ, ແລະ ສຸດໃຈຂອງເພິ່ນອີ່ມເອີບ” (1 ນີໄຟ 1:12, 14–15).
ທ່ານເຄີຍມີປະສົບການທີ່ຄ້າຍຄືກັນນີ້ບໍ? ການອ່ານພຣະຄຳພີມໍມອນ ເຄີຍເຮັດໃຫ້ໃຈຂອງທ່ານເຕັມໄປດ້ວຍຄວາມກະຕັນຍູສຳລັບພຣະກະລຸນາທິຄຸນ ແລະ ຄວາມເມດຕາຂອງພຣະເຈົ້າບໍ? ຂໍ້ຄວາມໃນພຣະຄຳພີມໍມອນ ເຄີຍເຮັດໃຫ້ຈິດວິນຍານຂອງທ່ານປິຕິຍິນດີບໍ? ຄວາມຮູ້ສຶກເຫລົ່ານີ້ ຄືອິດທິພົນຂອງພຣະວິນຍານ, ເປັນພະຍານຕໍ່ທ່ານວ່າ ຖ້ອຍຄຳທີ່ທ່ານກຳລັງອ່ານຢູ່ ມາຈາກພຣະເຈົ້າ ແລະ ສິດສອນຄວາມຈິງຂອງພຣະອົງ.
ຫົວໃຈທີ່ປ່ຽນແປງ
ຫລັງຈາກໄດ້ເທດສະໜາສັ່ງສອນຢ່າງໜ້າອັດສະຈັນໃຈ ກ່ຽວກັບການຊົດໃຊ້ຂອງພຣະເຢຊູຄຣິດແລ້ວ (ເບິ່ງ ໂມໄຊຢາ 2–4), ກະສັດເບັນຢາມິນປາດຖະໜາຢາກຮູ້ວ່າຜູ້ຄົນຂອງເພິ່ນ “ເຊື່ອຄຳເວົ້າທີ່ເພິ່ນກ່າວໄປຫລືບໍ່.” ພວກເຂົາໄດ້ຕອບວ່າ ພວກເຂົາເຊື່ອຄຳເວົ້າຂອງເພິ່ນ. ເປັນຫຍັງ? “ເພາະພຣະວິນຍານຂອງພຣະຜູ້ເປັນເຈົ້າອົງຊົງລິດອຳນາດຍິ່ງໃຫຍ່ ໄດ້ກະທຳໃຫ້ມີການປ່ຽນແປງອັນໃຫຍ່ຫລວງໃນພວກເຮົາ, ຫລື ໃນໃຈຂອງພວກເຂົາ, ຈົນວ່າພວກເຮົາບໍ່ມີໃຈທີ່ຈະກະທຳຄວາມຊົ່ວອີກຕໍ່ໄປ, ແຕ່ປາດຖະໜາຈະເຮັດແຕ່ຄວາມດີໂດຍຕະຫລອດ” (ໂມໄຊຢາ 5:1–2).
ບາງທີທ່ານອາດສັງເກດເຫັນບາງສິ່ງທີ່ຄ້າຍຄືກັນ ຢູ່ໃນໃຈຂອງທ່ານ ຂະນະທີ່ທ່ານອ່ານພຣະຄຳພີມໍມອນ. ຍົກຕົວຢ່າງ, ທ່ານອາດຮູ້ສຶກໄດ້ຮັບການດົນໃຈໃຫ້ເປັນຄົນດີຂຶ້ນກວ່າເກົ່າ, ໃຫ້ຫັນໜີຈາກບາບ, ຫລື ໃຫ້ເຮັດບາງສິ່ງທີ່ດີໃຫ້ບາງຄົນ. ສິ່ງນີ້ຄືການເປັນພະຍານທາງວິນຍານ ທີ່ທ່ານຊອກຫາ ວ່າພຣະຄຳພີເຫລັ້ມນີ້ ແມ່ນມາຈາກການດົນໃຈຈາກພຣະເຈົ້າ. ເພາະມໍມອນໄດ້ສອນວ່າ, “ທຸກສິ່ງທຸກຢ່າງທີ່ເຊື້ອເຊີນ ແລະ ຊັກຈູງໃຫ້ເຮັດຄວາມດີ, ແລະ ໃຫ້ຮັກພຣະເຈົ້າ ແລະ ໃຫ້ຮັບໃຊ້ພຣະອົງ, ແມ່ນມາຈາກການດົນໃຈຈາກພຣະເຈົ້າ” (ໂມໂຣໄນ 7:13; ເບິ່ງ 2 ນີໄຟ 33:4, 10; ແອວມາ 19:33; ອີເທີ 4:11–12 ນຳອີກ).
ຄວາມຄິດທີ່ໄດ້ຮັບຄວາມສະຫວ່າງ
ຕອນແອວມາຢາກຊ່ວຍຊາວໂຊຣຳໃຫ້ “ທົດລອງຄຳເວົ້າ [ຂອງເພິ່ນ]” ແລະ ຮູ້ດ້ວຍຕົວເອງວ່າ ປະຈັກພະຍານຂອງເພິ່ນເປັນຄວາມຈິງ, ເພິ່ນຈຶ່ງໄດ້ປຽບທຽບພຣະຄຳຂອງພຣະເຈົ້າ ໃສ່ກັບເມັດພືດ ດັ່ງນີ້: “ມັນຈະເລີ່ມພອງຢູ່ໃນເອິກຂອງພວກທ່ານ, ແລະ ເມື່ອພວກທ່ານຮູ້ສຶກເຖິງການພອງນີ້, ພວກທ່ານຈະເລີ່ມກ່າວຢູ່ພາຍໃນຕົວເອງວ່າ—ມັນຕ້ອງເປັນເມັດດີ ຫລື ວ່າພຣະຄຳນີ້ດີ ເພາະມັນເລີ່ມເຮັດໃຫ້ຈິດວິນຍານຂອງເຮົາຂະຫຍາຍອອກ; ແທ້ຈິງແລ້ວ, ມັນເລີ່ມເຮັດໃຫ້ຄວາມເຂົ້າໃຈຂອງເຮົາແຈ້ງອອກ, ແທ້ຈິງແລ້ວ, ມັນເລີ່ມມີລົດແຊບສຳລັບເຮົາ” (ແອວມາ 32:27–28).
ທ່ານ “ໃຫ້ບ່ອນ” ຢູ່ໃນໃຈຂອງທ່ານແກ່ຖ້ອຍຄຳຂອງພຣະຄຳພີມໍມອນ ເມື່ອທ່ານປ່ອຍໃຫ້ຖ້ອຍຄຳເຫລົ່ານັ້ນມີອິດທິພົນຕໍ່ຊີວິດຂອງທ່ານ ແລະ ນຳພາການເລືອກຂອງທ່ານ. ແລະ ຖ້ອຍຄຳເຫລົ່ານີ້ຈະເຮັດໃຫ້ “ຈິດວິນຍານ [ຂອງທ່ານ]” ຂະຫຍາຍອອກ ແລະ ເຮັດໃຫ້ “ຄວາມເຂົ້າໃຈ [ຂອງທ່ານ] ແຈ້ງອອກແນວໃດ”? ທ່ານອາດຮູ້ສຶກວ່າ ທ່ານເລີ່ມເຂັ້ມແຂງຂຶ້ນທາງວິນຍານ. ທ່ານອາດຮູ້ສຶກມີຄວາມຮັກ ແລະ ເປີດໃຈຕໍ່ຄົນອື່ນຫລາຍກວ່າເກົ່າ. ທ່ານອາດສັງເກດເຫັນອີກວ່າ ທ່ານເຂົ້າໃຈສິ່ງຕ່າງໆດີຂຶ້ນກວ່າເກົ່າ, ໂດຍສະເພາະສິ່ງທີ່ເປັນທາງຝ່າຍວິນຍານ—ຄືກັນກັບວ່າ ມີແສງສ່ອງເຂົ້າໃນຄວາມຄິດຂອງທ່ານ. ແລະ ທ່ານອາດເຫັນດ້ວຍກັບຄຳສອນ ທີ່ສິດສອນຢູ່ໃນພຣະຄຳພີມໍມອນ ວ່າ “ມີລົດແຊບ.” ຄວາມຮູ້ສຶກເຊັ່ນນັ້ນ ສາມາດຊ່ວຍທ່ານໃຫ້ເຂົ້າໃຈວ່າ ທ່ານໄດ້ຮັບພະຍານທາງວິນຍານແທ້ໆ ເຖິງຄວາມຈິງ, ດັ່ງທີ່ແອວມາໄດ້ປະກາດວ່າ: “ໂອ້ ດັ່ງນັ້ນແລ້ວ, ນີ້ບໍ່ແມ່ນຄວາມຈິງບໍ? ຂ້າພະເຈົ້າກ່າວກັບພວກທ່ານວ່າ, ຖືກແລ້ວ, ເພາະມັນຄືຄວາມສະຫວ່າງ; ແລະ ອັນໃດກໍຕາມທີ່ເປັນຄວາມສະຫວ່າງຍ່ອມດີ, ເພາະຫລິງເຫັນໄດ້, ສະນັ້ນ ພວກທ່ານຕ້ອງຮູ້ວ່າມັນດີ” (ແອວມາ 32:35).
ທ່ານບໍ່ຈຳເປັນຕ້ອງສົງໄສ
ສິ່ງດັ່ງກ່າວແມ່ນບາງວິທີທາງທີ່ພຣະວິນຍານໃຊ້ສື່ສານ. ມີຫລາຍໆວິທີທາງອື່ນອີກ. ໃຫ້ຊອກຫາໂອກາດທີ່ຈະຮັບຟັງສຸລະສຽງຂອງພຣະວິນຍານ, ແລ້ວທ່ານຈະໄດ້ຮັບການເປັນພະຍານທີ່ຕໍ່ເນື່ອງຂອງພຣະອົງ, ຊຶ່ງຢືນຢັນການເປັນພະຍານເຖິງຄວາມຈິງແທ້ຂອງພຣະຄຳພີມໍມອນ.
ປະທານຣະໂຊ ເອັມ ແນວສັນ ໄດ້ສັນຍາວ່າ: “ທ່ານບໍ່ຈຳເປັນຕ້ອງສົງໄສກ່ຽວກັບຄວາມຈິງ. ທ່ານບໍ່ຈຳເປັນຕ້ອງສົງໄສວ່າ ທ່ານຄວນໄວ້ວາງໃຈຜູ້ໃດ. ຜ່ານທາງການເປີດເຜີຍສ່ວນຕົວ, ທ່ານສາມາດໄດ້ຮັບການເປັນພະຍານ ດ້ວຍຕົວເອງ ວ່າພຣະຄຳພີມໍມອນ ເປັນພຣະຄຳຂອງພຣະເຈົ້າ, ວ່າໂຈເຊັບ ສະມິດ ເປັນສາດສະດາ, ແລະ ວ່ານີ້ແມ່ນສາດສະໜາຈັກຂອງພຣະຜູ້ເປັນເຈົ້າ. ບໍ່ວ່າໃຜຈະເວົ້າຫຍັງ ຫລື ເຮັດຫຍັງ, ບໍ່ມີໃຜສາມາດເອົາປະຈັກພະຍານທີ່ກ່າວແກ່ໃຈທ່ານ ກ່ຽວກັບສິ່ງໃດທີ່ເປັນຄວາມຈິງ ໄປຈາກທ່ານໄດ້.” (“Revelation for the Church, Revelation for Our Lives,” Ensign ຫລື Liahona, May 2018, 95).