Vakai ko e Lami ʻa e ʻOtuá, tā ʻe Walter Rane

21–27 Tīsema

Kilisimasí

“Te Ne Hāʻele Mai ki he Māmaní ke Huhuʻi Hono Kakaí”

Ko e faʻahitaʻu Kilisimasí ko ha taimi ia ke fakamanatu mo fakahaaʻi e houngaʻia ʻi hono ʻaloʻi ʻo hotau Fakamoʻui ko Sīsū Kalaisí. ‘I hoʻo lau mo fakalaulauloto he uiké ni kau ki Hono ʻaloʻí mo ʻEne moʻuí, fakakaukau ki he founga kuo fakamālohia ai ʻe hoʻo ako e Tohi ʻa Molomoná he taʻu ní, hoʻo fakamoʻoni ko Ia ʻa e Fakamoʻui ʻo e māmaní. Hiki e ngaahi ongo ʻoku haʻu kiate koé?

Lekooti e Ngaahi Ongo ʻOkú ke Maʻú

Ko e palōfita kotoa pē ʻo e Tohi ʻa Molomoná, meia Nīfai kia Molonai, naʻa nau tauhi ki he taumuʻa toputapu ʻoku fakamatalaʻi fakanounou ʻi he peesi talamuʻaki ʻo e tohí: “Ki hono fakalotoʻi ʻo e [kakai kotoa pē] ko Sīsū ʻa e Kalaisí.” Naʻe mamata ha palōfita kiate Ia ko ha laumālie ʻi he maama fakalaumālié, pea mamata ha taha ki Hono ʻaloʻí mo ʻEne ngāue fakafaifekaú ʻi ha mata meʻa-hā-mai. Naʻe tuʻu ha taha ʻi ha funga ʻā ʻo malangaʻi e ngaahi fakaʻilonga ʻo Hono ʻaloʻí mo ʻEne pekiá, pea tūʻulutui ha taha ʻi he ʻao ʻo Hono sino toetuʻú, ʻo ala ki he ngaahi matakafo ʻi Hono toʻukupú, toʻukupu kelekelé, mo e vakavaká. Naʻa nau ʻiloʻi kotoa e moʻoni mahuʻinga ko ení: “ʻOku ʻikai mo ha toe hala kehe pe founga ʻe lava ʻo fakamoʻui ai ʻa e tangatá, kā ʻi he taʻataʻa fakalelei pē ʻo Sīsū Kalaisi, ʻa ia … ʻokú ne hāʻele maí ke huhuʻi ʻa e māmaní” (Hilamani 5:9).

Ko ia lolotonga e faʻahitaʻu Kilisimasi ko ení, ʻi hono fakamanatua ʻe he kakai tui he funga ʻo e māmaní e lelei mo e ʻofa ʻa e ʻOtuá ʻi hono foaki Hono ʻAló, fakalaulauloto ki he founga kuo fakamālohia ai ʻe he Tohi ʻa Molomoná hoʻo tui kia Kalaisí. ‘I hoʻo fakakaukau ki Hono ʻaloʻí, fakalaulauloto ki he ʻuhinga naʻá Ne hāʻele mai aí pea mo e founga kuo liliu ai ʻe Heʻene hāʻele maí hoʻo moʻuí. Pea te ke lava leva ʻo aʻusia e fiefia moʻoni ʻo e Kilisimasí—ʻa e meʻaʻofa kuo foaki atu ʻe Sīsū Kalaisi maʻaú.

Ngaahi Fakakaukau ki hono Ako Fakatāutaha ʻo e Folofolá

1 Nīfai 11:13–36; Mōsaia 3:5–10; Hilamani 14:1–13; 3 Nīfai 1:4–22

Naʻe hāʻele mai ʻa Sīsū Kalaisi ki he māmaní ke hoko ko hoku Fakamoʻui.

Ko ha tukufakaholo ia ke lau e talanoa ʻaloʻi ʻo e Fakamoʻuí ʻi he Fuakava Foʻoú he taimi Kilisimasí, ka te ke lava foki ʻo maʻu ha ngaahi kikite ongo moʻoni ʻo e meʻa toputapu naʻe hoko ko ʻení ʻi he Tohi ʻa Molomoná. Hangē ko ʻení, ʻoku maʻu e ngaahi kikite ʻo hono ʻaloʻi ʻo e Fakamoʻuí mo ʻEne ngāue fakafaifekaú ʻi he 1 Nīfai 11:13–36; Mōsaia 3:5–10; Hilamani 14:1–13; mo e 3 Nīfai 1:4–22. Ko e hā ha ngaahi ongo fekauʻaki mo Sīsū Kalaisi ʻokú ke maʻu ʻi hoʻo lau e ngaahi potufolofola ko ení mo fakakaukau ki he ngaahi ʻuhinga ʻe niʻihi ʻo e ngaahi fakaʻilonga ʻo Hono ʻaloʻí? ‘Oku fakamālohia fēfē ʻe he ngaahi fakamoʻoni ʻa e kau palōfita ko ʻeni ʻi ʻAmelika ʻi he kuonga muʻá, hoʻo fakamoʻoni kia Kalaisi mo Hono misioná?

Vakai foki, Mātiu 1:18–25; 2; Luke 2.

2 Nīfai 2:6; ʻAlamā 7:7–13; 11:40; Hilamani 5:9; 14:16–17

Ko Sīsū Kalaisi ʻa e Huhuʻi ʻo e faʻahinga kotoa ʻo e tangatá.

ʻE ʻikai ha ʻuhinga ke tau fakamanatua hono ʻaloʻi ʻo Sīsū Kalaisí kapau ne ʻikai ʻEne feilaulau fakaleleí, ʻa ia ʻoku fakafou ai ʻEne fakahaofi kitautolu mei he angahalá mo e maté, fakafiemālieʻi kitautolu ʻi hotau faingataʻaʻiá, pea tokoniʻi kitautolu ke tau “hoko ʻo haohaoa ʻiate Ia” (Molonai 10:32). Ko e hā kuó ke ako mei he Tohi ʻa Molomoná he taʻú ni fekauʻaki mo e mālohi ʻo e Fakamoʻuí ke huhuʻi koé? ʻOku ʻi ai nai ha ngaahi talanoa pe akonaki naʻe makehe kiate koe? Fakakaukau ki he meʻa ʻoku akoʻi atu ʻe he ngaahi sīpinga ko ení fekauʻaki mo e misiona huhuʻi ʻo e Fakamoʻuí: 2 Nīfai 2:6; ʻAlamā 7:7–13; 11:40; mo e Hilamani 5:9; 14:16–17. Ko e hā ʻokú ke ongoʻi ʻoku ueʻi koe ke fai ke fakahaaʻi hoʻo houngaʻia kiate Iá? ʻOku ʻi ai ha ngaahi fakakaukau ʻi he (Christmas.ComeUntoChrist.org te ke lava ʻo kamata ʻaki.)

1 Nīfai 6:4; 19:18; 2 Nīfai 25:23, 26; 33:4, 10

ʻOku fakamoʻoni e Tohi ʻa Molomoná kia Sīsū Kalaisi.

ʻOku loloto ange ʻa e “Ko Ha Fakamoʻoni ʻe Taha ʻo Sīsū Kalaisi” ʻi ha ʻuluʻi fakamatala pē ki he Tohi ʻa Molomoná; ko ha fakamatala ia ʻo hono taumuʻa fakalangí. Fakalaulauloto ki he meʻa kuó ke ako mei he ngaahi folofola ko ení kau ki he misiona ʻo e Tohi ʻa Molomoná ke fakamoʻoni kia Kalaisí: 1 Nīfai 6:4; 19:18; mo e 2 Nīfai 25:23, 26; 33:4, 10.

Fakakaukau ke ke hiki ʻi ha tohinoa ʻa e founga kuo ʻomi ai koe ke ke ofi ange kia Kalaisi ʻi hono ako e Tohi ʻa Molomoná he taʻu ní. Mahalo ʻe tokoni atu e ngaahi fokotuʻu ko ʻení:

• “Ko ha meʻa foʻou naʻá ku ako fekauʻaki mo e Fakamoʻuí he taʻu ní ko e …”

• “ʻI heʻeku lau e [ngaahi veesi fekauʻaki mo e Fakamoʻuí] naʻá ne liliu e founga naʻá ku …”

• “Naʻe akoʻi au ʻe he tokotaha [pe talanoa] ʻoku ou saiʻia taha ai ʻi he Tohi ʻa Molomoná ko e Fakamoʻuí ʻoku…”

Ngaahi Fakakaukau ki he Ako Fakafāmili e Folofolá mo e Efiafi Fakafāmili ʻi ʻApí

ʻI hoʻo lau e folofolá mo ho fāmilí, ʻe lava ke tokoni atu ʻa e Laumālié ke mou ʻiloʻi ʻa e ngaahi tefitoʻi moʻoni ke fakamamafaʻi mo aleaʻí kae lava ke feau e ngaahi fie maʻu homou fāmilí. Ko ha ngaahi fakakaukau ʻeni ʻe niʻihi.

1 Nīfai 11:13–23; Mōsaia 3:5–10; Hilamani 14:1–13; 3 Nīfai 1:4–22

Mahalo naʻa fiefia e fānaú ʻi hano tā ha ngaahi fakatātā ʻo e meʻa ʻoku nau fanongo ʻokú ke lau ʻi he ngaahi talanoa ʻo e ʻaloʻi mo e ngāue fakafaifekau ʻa Kalaisí ʻi he 1 Nīfai 11:13–23; Mōsaia 3:5–10; Hilamani 14:1–13; mo e 3 Nīfai 1:4–22. Hili iá pea ʻe lava ke toe fai ʻe hoʻo fānaú e ngaahi talanoá ʻo fakaʻaongaʻi e ngaahi fakatātā kuo nau taá.

“Ko Ia ʻa e Meʻaʻofá”

Ke tokoni ki ho fāmilí ke nofotaha ʻenau tokangá ʻi he meʻaʻofa kuo foaki mai ʻe he Tamai Hēvaní kiate kitautolu ʻi hono ʻomi Hono ʻAló, te ke lava ʻo kofukofuʻi ha fakatātā ʻo Sīsū Kalaisi ʻo hangē ha meʻaʻofa Kilisimasí. ʻE lava ke talanoa e kau mēmipa ʻo e fāmilí fekauʻaki mo e ngaahi meʻaʻofa Kilisimasi kuo nau maʻu pe fakaʻamu ke maʻú. Hili iá pea nau hae e kofukofu ʻo e fakatātā ʻo Kalaisí pea aleaʻi e founga kuó Ne hoko ai ko ha meʻaʻofa mahuʻinga maʻatautolú. ʻE lava ke tokoni atu e vitiō “He Is the Gift” (ChurchofJesusChrist.org) ke mou aleaʻi e founga te mou ʻilo, tali, pea vahevahe fakafāmili ai e meʻaʻofa ʻo e Fakamoʻuí ʻi he Kilisimasi ko ení.

Mahalo foki naʻa ʻaonga ki ho fāmilí ke nau fakakaukau ki ha “meʻaʻofa” te nau fie foaki maʻá e Fakamoʻuí, hangē ko ha feinga ke toe angaʻofa ange ki he niʻihi kehé pe ngāue ke ikunaʻi ha tōʻonga kovi. Fakakaukau ke fakaafeʻi e kau mēmipa ʻo e fāmilí ke nau hiki hifo ʻenau ngaahi fakakaukaú, kofukofuʻi kinautolu ʻo hangē ha meʻaʻofá, pea tuku takatakai ʻenau ʻū meʻaʻofá ʻi ha lauʻi tā ʻo e Fakamoʻuí.

“Ko e Laumālie ʻo e Kilisimasí”

Mahalo naʻa fakafiefia ke palani ha ngaahi ʻekitivitī ʻe lava ke fai ʻe homou fāmilí ʻi he ngaahi ʻaho kimuʻa ʻi he Kilisimasí ke nau ongoʻi e Laumālie ʻo e Kilisimasí, ʻo hangē ko ha ngāue tokoni ki ha taha pe hiva fakataha ha ngaahi himi Kilisimasi. (Vakai ki he christmas.ComeUntoChrist.org ki ha ngaahi fakakaukau.)

Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Palaimelí.

Fakatupulaki ʻEtau Akoʻí

Muimuiʻi e ngaahi fakaafe ke ngāué. “ʻI hoʻo muimui ʻi ha fakaafe ke ngāué, ʻokú ke fakahaaʻi ai ki [ho fāmilí] ʻokú ke tokanga kiate kinautolu mo e founga ʻoku faitāpuekina ai ʻe he ongoongoleleí ʻenau moʻuí. ʻOkú ke ʻoange foki ha ngaahi faingamālie ke nau vahevahe ʻenau aʻusiá, ʻo fakamālohia ai ʻenau moʻui mateakí pea lava ke nau fepoupouaki ai ʻi hono moʻui ʻaki ʻo e ongoongoleleí” (Faiako ʻi he Founga ʻa e Fakamoʻuí, 35).

Mata Meʻa-Hā-Mai ʻa Nīfai ki he Taupoʻou ko Melé, tā ʻe Judith A. Mehr