“21–27 Tīsema. Kilisimasí: Te Ne Hāʻele Mai ki he Māmaní ke Huhuʻi Hono Kakaí,’” Haʻu, ʻo Muimui ʻIate Au—Maʻá e Palaimelí: Tohi ʻa Molomoná 2020 (2020)
“21–27 Tīsema. Kilisimasí,” Haʻu, ʻo Muimui ʻIate Au—Maʻá e Palaimelí: 2020
Mamata ki he Lami ʻa e ʻOtuá, tā ʻe Walter Rane
21–27 Tīsema
Kilisimasí
“Te Ne Hāʻele Mai ki he Māmaní ke Huhuʻi Hono Kakaí”
ʻOku faʻa loto vēkeveke ʻa e fānaú ke nau talanoa ki he founga ʻoku nau fakafiefiaʻi ʻaki ʻa e Kilisimasí. Fakalaulauloto ki he meʻa te ke lava ʻo fai ke tokoni ai kiate kinautolu ke nau tokanga taha kia Sīsū Kalaisi mo ʻenau houngaʻia ʻi Hono ʻaloʻí.
Lekooti ʻa e Ngaahi Ongo ʻOkú ke Maʻú
Fakaafeʻi Ke Vahevahe
Fakaafeʻi ʻa e fānaú ke nau talanoa pe tā ha fakatātā ʻo ha meʻa ʻoku fai ʻe honau fāmilí ʻi he taimi Kilisimasí ke tokoni ke nau manatuʻi ʻa Sīsū Kalaisí.
Akoʻi e Tokāteliné: Fānau Iiki Angé
1 Nīfai 11:13–22; Mōsaia 3:5–8; ʻAlamā 7:9–13; Hilamani 14:1–6; 3 Nīfai 1:15, 19–21
Naʻe ʻaloʻi ʻa Sīsū Kalaisi ke hoko ko hoku Fakamoʻui.
ʻOku ʻiloʻi nai ʻe he fānau ʻokú ke akoʻí ʻa e ʻuhinga ʻoku tau fakafiefiaʻi ai ʻa e Kilisimasí? Te ke tokoni fēfē ke mahino kiate kinautolu ʻa e ʻuhinga ʻoku hoko ai hono ʻaloʻi ʻo Sīsū Kalaisí ko ha ʻuhinga ke tau fakafiefiaʻi?
Ngaahi ʻEkitivitī ʻe Ala Fakahokó
-
Talanoa kau ki he ʻaloʻi ʻo Sīsuú, fakaʻaliʻali ha ngaahi fakatātā ʻi hoʻo fai iá (hangē ko e Tohi Fakatātā ʻo e Ongoongoleleí, fika 28, 29, 30, 31). Tuku ki he fānaú ke nau vahevahe ʻa e meʻa ʻoku nau ʻiló. Fakaʻaongaʻi ʻa e peesi ʻekitivitī ʻo e uike ní ke akoʻi ki he fānaú, naʻe ʻilo ʻe he kakai ne nau moʻui ʻi he kuonga ʻo e Tohi ʻa Molomoná, kau ki he ʻaloʻi ʻo Sīsuú.
-
Lau ha ngaahi potufolofola mahuʻinga mei he ʻAlamā 7:11–12 ke akoʻi ki he fānaú ʻa e meʻa naʻe fai ʻe Sīsū Kalaisi maʻatautolú. Vahevahe ʻa e ʻuhinga ʻokú ke houngaʻia ai ʻi hono ʻaloʻi ʻo Sīsū Kalaisí, pea vahevahe hoʻo ongo fekauʻaki mo ʻEne feilaulau fakaleleí.
-
Fakaʻaliʻali ha ngaahi fakatātā ʻokú ne fakahaaʻi mai ai ʻa e feilaulau fakalelei ʻa e Fakamoʻuí—hangē ko ʻEne mamahi ʻi Ketisemaní, pekia ʻi he kolosí, mo e Toe Tuʻú (vakai ki he Tohi Fakatātā ʻo e Ongoongoleleí, fika 56, 57, 58, 59). Kole ki he fānaú ke nau talaatu ʻa e meʻa ʻoku nau mamata ki ai ʻi he fakatātaá. Tokoni ke mahino kiate kinautolu, naʻe fekauʻi mai ʻe he Tamai Hēvaní ʻa Sīsū Kalaisi ki he māmaní ke mamahi maʻa ʻetau ngaahi angahalá, pekia maʻatautolu, pea toetuʻu koeʻuhí kae lava ke tau toe foki ʻo nofo mo Ia.
-
Hivaʻi mo e fānaú ha foʻi hiva fekauʻaki mo e ʻaloʻi ʻo Sīsuú, hangē ko e “Naʻá Ne Fekau Hono ʻAló” pe “Naʻe ʻAloʻi Mai ʻa Sīsū Kalaisí” (Tohi Hiva ʻa e Fānaú, 20–21, 26–27). Fakamahinoʻi ange ki he fānaú ha ngaahi kupuʻi lea ʻi he hivá ʻokú ne fakamatalaʻi ʻa e ngahi tāpuaki ʻoku tau maʻu koeʻuhi ko hono ʻaloʻi ʻo Sīsuú.
ʻOku fakamoʻoni e Tohi ʻa Molomoná kia Sīsū Kalaisi.
ʻI hoʻo fakaʻosi hoʻo ako ʻo e Tohi ʻa Molomoná he taʻu ní, fakamanatu ki he fānaú ko e tohi ko ʻení “Ko ha Fakamoʻoni ʻe Taha ʻo Sīsū Kalaisi,” naʻe hiki ia ke tokoniʻi kitautolu ke tau haʻu kiate Ia.
Ngaahi ʻEkitivitī ʻe Ala Fakahokó
-
Puke hake ha tatau ʻo e Tohi ʻa Molomoná ke mamata ki ai ʻa e fānaú. Lau ʻa e tefitó pea tuhu ki he ngaahi lea “Ko ha Fakamoʻoni ʻe Taha ʻo Sīsū Kalaisi.” Tuku ki he fānaú ke nau taufetongi hono puke ʻa e tohí, pea tokoniʻi kinautolu ke nau kumi e huafa ʻo e Fakamoʻuí ʻi he takafí. Talaange ki he fānaú ʻa hoʻo ongo kau ki he Tohi ʻa Molomoná mo e founga kuó ne tokoniʻi ai koe ke ke ako kau kia Sīsū Kalaisí.
-
ʻOange ki he tamasiʻi takitaha ha fakatātā ʻo Sīsū, pe tuku ke nau tā haʻanau fakatātā ʻo Ia. Fakaafeʻi kinautolu ke nau puke hake ʻenau ngaahi fakatātaá ʻi he taimi kotoa pē te nau fanongo ai ki he huafa ʻo Sīsuú ʻi hoʻo lau ʻa e 2 Nīfai 25:23, 26. Fakamoʻoniʻi ange naʻe hiki ʻa e Tohi ʻa Molomoná ke tokoniʻi kitautolu ke tau “tui kia Kalaisi” (2 Nīfai 25:23).
-
Vahevahe mo e fānaú ha taha ʻo hoʻo ngaahi potufolofola manakó pe ngaahi talanoa mei he Tohi ʻa Molomoná ʻokú ne tokoniʻi koe ke ke ako kau kia Sīsū Kalaisi. Fehuʻi ki he fānaú fekauʻaki mo ʻenau ngaahi talanoa manako ʻi he Tohi ʻa Molomoná, pea tokoniʻi kinautolu ke ʻiloʻi ʻa e founga kuo tokoniʻi ai kitautolu ʻe he ngaahi talanoa ko ʻení ke tau ako kau ki he Fakamoʻuí mo ʻunuʻunu ke ofiange kiate Iá. ʻE lava ke tokoni ʻa e vakai ki ha niʻihi ʻo e ngaahi fakatātā ʻi he Ngaahi Talanoa ʻo e Tohi ʻa Molomoná ke nau manatuʻi ʻa e ngaahi talanoá.
Akoʻi e Tokāteliné: Fānau Lalahi Angé
1 Nīfai 11:13–22; Mōsaia 3:5–8; ʻAlamā 7:10–13; Hilamani 14:1–6; 3 Nīfai 1:15, 19–21
Naʻe ʻaloʻi ʻa Sīsū Kalaisi ke hoko ko hoku Fakamoʻui.
Fakalaulauloto ki he founga ʻe lelei taha ai hoʻo tokoni ke mahino ki he fānaú ʻa e mahuʻinga ʻo e ʻaloʻi ʻo Kalaisí pea mo ʻene ʻuhinga kiate kinautolú.
Ngaahi ʻEkitivitī ʻe Ala Fakahokó
-
ʻOange ki he tamasiʻi takitaha ha taha ʻo e ngaahi fakamoʻoni folofola ʻoku maʻu ʻi he peesi ʻekitivitī ki he uike ní. Fakaafeʻi kinautolu takitaha ke nau lau ʻenau folofolá, feinga ke ʻiloʻi ʻa e palōfita naʻe leá, pea vahevahe ha meʻa ʻe taha naʻe ʻilo ʻe he palōfita ko ʻení fekauʻaki mo Sīsū Kalaisí. ʻOange pe tuku kiate kinautolu ke nau ngāue fakataha ʻo ka fie maʻu.
-
Lisi ʻi he palakipoé ha niʻihi ʻo e ngaahi meʻa naʻe hoko ʻi he taimi ʻo e ʻaloʻi ʻo Sīsuú, ʻo hangē ko ia naʻe fakamatalaʻi ʻi he Luke 2:4–14; Mātiu 2:1–2; mo e 3 Nīfai 1:15, 19–21. Tokoniʻi ʻa e fānaú ke nau kumi ʻi he ngaahi potufolofola ko ʻení ke ʻiloʻi pe naʻe hoko ʻa e ngaahi meʻá ʻi Pētelihema, ʻi he ongo ʻAmeliká, pe ʻi he ongo feituʻú fakatouʻosi. Ko e hā e ʻuhinga ʻoku tau houngaʻia ai ke maʻu ʻa e Tohi ʻa Molomoná ko ha fakamoʻoni hono ua ki he ʻaloʻi ʻo Sīsū Kalaisí mo ʻEne ngāue ko e Fakamoʻuí?
-
Lau mo e fānaú ʻa e ʻAlamā 7:10–13. Ko e hā e meʻa ʻoku tau ako mei he ngaahi veesi ko ʻení fekauʻaki mo e ʻaloʻi ʻo Sīsuú? fekauʻaki mo Hono fakalangí? fekauʻaki mo ʻEne ngāue fakafaifekau ʻi he māmaní? Fakaafeʻi ʻa e fānaú ke nau vahevahe ʻa e ʻuhinga ʻoku nau houngaʻia ai ʻia Sīsū Kalaisí, pea vahevahe hoʻo fakamoʻoni kiate Iá.
ʻOku fakamoʻoni e Tohi ʻa Molomoná kia Sīsū Kalaisi.
ʻI he lau fekauʻaki mo e Tohi ʻa Molomoná, naʻe pehē ʻe he Palōfita ko Siosefa Sāmitá “ʻe ofi ange ha tangata ki he Otuá ʻi haʻane tauhi ki hono ngaahi akonakí, ʻi ha toe tohi kehe” (talateu ki he Tohi ʻa Molomoná). Te ke tokoni fēfē ke mahino ki he fānaú ʻa e talaʻofa ko ʻení?
Ngaahi ʻEkitivitī ʻe Ala Fakahokó
-
ʻOange ki he tamasiʻi takitaha ha taha ʻo e ngaahi veesi ko ʻení: 2 Nīfai 25:23, 26; 33:4, 10. Fakaafeʻi ʻa e fānaú ke nau lau ʻenau vēsí pea feinga ke ʻiloʻi ʻa e meʻa naʻe fie maʻu ʻe he palōfita ko Nīfai ʻo e Tohi ʻa Molomoná ke tau ʻiloʻí. Kole ke nau hiki he palakipoé e meʻa ʻoku nau ʻiló. Fakamatalaʻi ange ʻoku fakamatala ʻe he ngaahi meʻá ni ha taumuʻa mahuʻinga ʻo e Tohi ʻa Molomoná. Tuku ki he fānaú ke nau fakatātaaʻi ʻa e founga te nau fakamatalaʻi ai ki ha kaungāmeʻa ʻa e taumuʻa mahuʻinga ʻo e Tohi ʻa Molomoná.
-
Vahevahe mo e fānaú ha taha ʻo hoʻo ngaahi potufolofola manakó pe ngaahi talanoa mei he Tohi ʻa Molomoná ʻokú ne tokoniʻi koe ke ke ako kau kia Sīsū Kalaisi. Fehuʻi ki he fānaú fekauʻaki mo ʻenau ngaahi talanoa manako ʻi he Tohi ʻa Molomoná, pea tokoniʻi kinautolu ke ʻiloʻi ʻa e founga kuo tokoniʻi ai kitautolu ʻe he ngaahi talanoa ko ʻení ke tau ako kau ki he Fakamoʻuí mo ʻunuʻunu ke ofiange kiate Iá. Vahevahe mo e fānaú ʻa e founga kuo tokoniʻi ai koe ʻe he Tohi ʻa Molomoná ke ke ʻiloʻi ko Sīsū ʻa e Kalaisí. Poupouʻi ʻa e fānaú ke nau fakakaukau ki ha veesi pe talanoa mei he Tohi ʻa Molomoná ʻokú ne fakamālohia ʻenau tui kia Sīsū Kalaisí. Kole ange ke nau vahevahe ia mo ha kaungāmeʻa pe mēmipa ʻo e fāmilí ʻoku ʻikai ke ne ʻilo ha meʻa fekauʻaki mo e Tohi ʻa Molomoná.
Poupouʻi e Ako ʻi ʻApí
Fakaafeʻi ʻa e fānaú ke nau vahevahe mo honau ngaahi fāmilí ʻa e founga kuo tokoniʻi ai kinautolu ʻe he Tohi ʻa Molomoná ke nau ako lahi ange fekauʻaki mo Kalaisí. Poupouʻi kinautolu ke nau vahevahe ha veesi pe talanoa mei he Tohi ʻa Molomoná ko ha konga ʻo ʻenau fakamoʻoní.
Fakatupulaki ʻo ʻEtau Founga Akoʻí
ʻOku manako ʻa e fānaú ʻi he ngaahi talanoá. Ko e ngaahi talanoá ko ha taha ia ʻo e ngaahi founga lelei taha ke tokoniʻi ai ʻa e fānaú ke nau ako mo manatuʻi ʻa e ngaahi moʻoní. ʻI hoʻo vahevahe ʻa e talanoa ʻo hono ʻaloʻi ʻo Sīsuú, fakakaukau foki ke vahevahe mo ha ngaahi talanoa mei hoʻo moʻuí, ʻa ia kuo tokoniʻi ai koe ke ke fakamālohia hoʻo tui ki he Fakamoʻuí.