Ke Mou ʻIlo ʻEni, tā ʻe Gary L. Kapp

14–20 Tīsema

Molonai 10

“Haʻu kia Kalaisi, pea Hoko ʻo Haohaoa ʻiate Ia”

Mahalo ʻoku ʻi ai ha fānau ʻe niʻihi ʻi hoʻo kalasí ʻoku nau maʻu ha ngaahi aʻusia ʻuhingamālie ʻi hono ako ʻo e Tohi ʻa Molomoná mei ʻapí. Te ke fakaʻaongaʻi fēfē ʻa e ngaahi aʻusia ko iá ke poupouʻi ʻaki e kotoa ʻo e fānaú ke nau lau ʻa e folofolá ʻi ʻapi?

Lekooti ʻa e Ngaahi Ongo ʻOkú ke Maʻú

Fakaafeʻi Ke Vahevahe

Paasi takai ha tatau ʻo e Tohi ʻa Molomoná. ʻI he puke ʻe he taha kotoa ʻa e tohí, kole ange ke ne vahevahe ha meʻa ʻoku manako ai ʻi he Tohi ʻa Molomoná—ko ha talanoa manako, fakamoʻoni, pe ko ha aʻusia fakaako mei ai ʻi ʻapi pe ʻi he lotú.

Akoʻi e Tokāteliné: Fānau Iiki Angé

Molonai 10:3–5

Te u lava ʻo ʻiloʻi ʻiate au pē ʻoku moʻoni ʻa e Tohi ʻa Molomoná.

Kumi ki ha ngaahi founga ke tokoniʻi ai ʻa e fānaú ke nau tali ʻa e fakaafe ʻa Molonai ke kole ki he ʻOtuá pe ʻoku moʻoni ʻa e Tohi ʻa Molomoná.

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo hono tanu ʻe Molonai ʻa e ʻū lauʻi peleti koulá (vakai ki he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí), pea kole ki he fānaú ke nau fakamatalaʻi ʻa e meʻa ʻoku nau mamata ki aí. Fakaafeʻi kinautolu ke nau tuhu ki he ʻū lauʻi peletí, pea fakamatalaʻi ange naʻe tohi ʻi he ʻū lauʻi peleti ko ʻení ʻa e ngaahi lea ʻoku tau lau he taimí ni ʻi he Tohi ʻa Molomoná. Tuku ki he fānaú ke nau pehē pē ko Molonai kinautolu ʻoku nau tohi ʻi he ʻū lauʻi peletí pea tanu kinautolu. Hivaʻi fakataha ʻa e “Ko e Peleti Koulá” (Tohi Hiva ʻa e Fānaú, 61).

• Fakaʻaliʻali ʻa e Tohi ʻa Molomoná, pea lau ʻa e Molonai 10:4. Fakamamafaʻi ange ʻe lava ke tau kole ki he ʻOtuá pe ʻoku moʻoni nai ʻa e Tohi ʻa Molomoná pe ʻikai, pea te Ne ʻomi ʻa e Laumālie Māʻoniʻoní ke fakamoʻoniʻi mai kiate kitautolu. Te ke lava foki ʻo fakaʻaongaʻi ʻa e “Vahe 54: Ko e Talaʻofa ʻo e Tohi ʻa Molomoná” (Ngaahi Talanoa ʻo e Tohi ʻa Molomoná, 156, pe ko e vitiō kaunga ki ai ʻi he ChurchofJesusChrist.org). Vahevahe ki he founga kuo tokoniʻi ai koe ʻe he Laumālie Māʻoniʻoní ke ke maʻu ha fakamoʻoni ki he Tohi ʻa Molomoná. Tokoniʻi ke mahino ki he fānaú ʻa e ongo ʻoku maʻu ʻe ha taha ʻokú ne maʻu ha fakamoʻoni mei he Laumālié. Hivaʻi ha foʻi hiva fekauʻaki mo e moʻoní, hangē ko e “Fekumi, Fifili pea mo Lotu” (Tohi Hiva ʻa e Fānaú, 66).

Molonai 10:8–20

ʻOku ʻomi ʻe he Tamai Hēvaní ha ngaahi meʻafoaki fakalaumālie kiate au.

Naʻe fakamatalaʻi ʻe Molonai ʻa e ngaahi meʻafoaki ʻoku foaki ʻe he ʻOtuá ki Heʻene fānaú ʻi he taimi ʻoku nau maʻu ai ʻa e tui kiate Iá. Te ke lava ʻo tokoniʻi ʻa e fānaú ke nau maʻu ʻa e tui ʻe foaki ʻe he ʻOtuá ha ngaahi meʻafoaki fakalaumālie kiate kinautolu.

Ngaahi ʻEkitivitī ʻe Ala Fakahokó

• Hikiʻi ʻa e mataʻifika 9 ki he 16 ʻi ha ngaahi laʻipepa kehekehe, pea kofu ʻa e laʻipepa takitaha ʻo hangē ha meʻaʻofá. Tuku ki he fānaú ke nau taufetongi ʻi hono vete ʻa e meʻaʻofá. ʻI heʻenau fai iá, lau fakataha ha ngaahi veesi mei he Molonai 10:9–16 ʻoku fekauʻaki mo e ngaahi mataʻifiká, pea tokoniʻi e fānaú ke nau feinga ke ʻiloʻi ʻa e meʻafoaki fakalaumālie takitaha. Fakamatalaʻi ange ko e ngaahi meʻaʻofa ʻeni ʻoku foaki ʻe he Tamai Hēvaní ki Heʻene fānaú kae lava ke tau fetokoniʻaki mo fai ʻEne ngāué.

• Tuku ki he fānaú ke nau talanoa nounou fekauʻaki mo e ngaahi meʻaʻofa manako kuo nau maʻú. Talaange ki he fānaú fekauʻaki mo ha ngaahi meʻafoaki fakalaumālie kuó ke fakatokangaʻi kuo foaki ange ʻe he Tamai Hēvaní kiate kinautolu, hangē ko ha ngaahi meʻafoaki ʻo e tui, poto, fakamoʻoni, manavaʻofa, mo e malava ko ia ke akó.

Molonai 10:32

ʻOku finangalo ʻa Sīsū Kalaisi ke haʻu ʻa e tokotaha kotoa kiate Ia.

Fakakaukau ki he ngaahi founga te ke tokoni ai ke mahino ki he fānaú ʻa e ʻuhinga ʻo e “haʻu kia Kalaisí.”

Ngaahi ʻEkitivitī ʻe Ala Fakahokó

• Lau ki he fānaú mei he Molonai 10:32, “Haʻu kia Kalaisi, pea hoko ʻo haohaoa ʻiate ia,” pea fakaafeʻi ʻa e fānaú ke nau toutou lau mo koe ʻa e kupuʻi leá. Kole kiate kinautolu ke kuikui honau matá lolotonga hoʻo hili ha fakatātā ʻo Sīsū ʻi ha feituʻu pē ʻi he lokí. Tuku leva ke nau ʻāʻā hake, kumi ʻa e fakatātaá, pea fakatahataha atu ki ai. Aleaʻi mo e fānaú ʻa e ngaahi founga te tau lava ai ʻo haʻu kia Kalaisí (ki ha sīpinga, vakai ki he , Tefito ʻo e Tuí 1:3–4). Toutou fai ʻa e ʻekitivitī ko ʻení, ʻo tuku ki he fānaú ke nau tuku ʻa e fakatātaá ʻi ha feituʻu kehe ʻi he lokiakó.

• Tokoniʻi ʻa e fānaú ke nau teuteuʻi ha fakaʻilonga haati ʻoku pehē “ʻOku ou ʻofa ki he ʻOtuá ʻaki hoku iví, ʻatamaí, mo e mālohi kotoa pē” (vakai ki he Molonai 10:32). ʻOku tau fakahaaʻi fēfē nai ki he ʻOtuá ʻoku tau ʻofa ʻiate Ia?

Akoʻi e Tokāteliné: Fānau Lalahi Angé

Molonai 10:3–5

Te u lava ʻo ʻiloʻi ʻa e moʻoní ʻaki ʻa e mālohi ʻo e Laumālie Māʻoniʻoní.

ʻOku finangalo ʻa e ʻOtuá ke tau takitaha ʻiloʻi kotoa ʻoku moʻoni ʻa e Tohi ʻa Molomoná. Tokoni ke mahino ki he fānaú ʻa e talaʻofa ʻa e ʻOtuá ke “fakahā ʻa hono moʻoní kiate kimoutolu, ʻi he mālohi ʻo e Laumālie Māʻoniʻoní.”

Ngaahi ʻEkitivitī ʻe Ala Fakahokó

• Hikiʻi ʻi he palakipoé ʻa e ngaahi foʻi lea Lau, Manatu, Fakalaulauloto, mo e Kole. Fakaafeʻi ʻa e fānaú ke nau kumi ʻa e ngaahi lea ko ʻení ʻi he Molonai 10:3–4. Ko e hā ʻoku totonu ke tau lau, manatuʻi, fakalaulaulotoa, mo kole kae lava ke maʻu pe fakamālohia ʻetau fakamoʻoni ki he Tohi ʻa Molomoná? Kole ki he fānaú ke nau kumi ki ha ngaahi faitatau ʻi he vahaʻa ʻo e ngaahi veesi ko ʻení pea mo e foʻi hiva “Fekumi, Fifili pea mo Lotu” (Tohi Hiva ʻa e Fānaú, 66).

• Tokoniʻi ʻa e fānaú ke nau manatuʻi ha niʻihi ʻo e ngaahi aʻusia kuo mou maʻu ʻi hono ako ʻo e Tohi ʻa Molomoná. Vahevahe hoʻo ngaahi ongo kau ki he Tohi ʻa Molomoná, kau ai ʻa e founga kuó ke maʻu pe fakamālohia hoʻo fakamoʻoni ʻoku moʻoni iá. Fakaafeʻi ʻa e fānaú ke nau vahevahe ʻenau ngaahi ongó mo e ngaahi fakamoʻoní.

• Talanoa ki ha taimi naʻe fakamoʻoniʻi atu ai kiate koe ʻe he Laumālié Māʻoniʻoní fekauʻaki mo ha meʻa. Fakamatalaʻi ʻa hoʻo ongó pea mo e founga naʻá ke ʻiloʻi ai ko e Laumālie Māʻoniʻoní iá? Tokoniʻi ʻa e fānaú ke nau ako mei he ngaahi folofola ko ʻení fekauʻaki mo e founga ʻoku lea mai ai ʻa e Laumālié kiate kitautolú: Sione 14:26–27; Tokāteline mo e Ngaahi Fuakava 6:15, 23; 8:2–3; 9:7–9; 11:12–14.

Molonai 10:8–19

ʻOku ʻomi ʻe he Tamai Hēvaní ha ngaahi meʻafoaki fakalaumālie kiate au.

ʻOku tokolahi ha niʻihi ʻi hotau kuongá ni ʻoku nau “fakaʻikaiʻi … ʻa e ngaahi meʻafoaki ʻa e ʻOtuá” (Molonai 10:8). Tokoniʻi ʻa e fānaú ke nau ʻiloʻi ʻoku kei hoko ʻa e ngaahi meʻafoaki ko ʻení ʻi he kuongá ni.

Ngaahi ʻEkitivitī ʻe Ala Fakahokó

• Tohi ʻa e ngaahi meʻafoaki ʻoku hiki ʻi he Molonai 10:9–16 ʻi ha ngaahi laʻipepa, pea faʻo kinautolu ʻi ha puha meʻaʻofa. Hikiʻi ʻa e fika 9 ki he 16 ʻi he palakipoé, pea fakaafeʻi ʻa e fānaú ke nau taufetongi ʻi hono toʻo ha laʻipepa mei he puhá ʻo fakatauhoa ki he fika ʻo e veesi ʻi he palakipoé. Ko e hā ʻoku tau ako fekauʻaki mo e ngaahi meʻafoaki ko ʻení ʻi he veesi 8 mo e 17–18?

• Vahevahe ʻa e talanoa ʻo hono maʻu mai ʻo e Tohi ʻa Molomoná (vakai ki he “Vahe 3: Ko e ʻĀngelo ko Molonaí mo e ʻŪ Lauʻi Peleti Koulá,” Ngaahi Talanoa ʻo e Tokāteline mo e Ngaahi Fuakavá, 13–17). Tokoniʻi ʻa e fānaú ke nau feinga ke ʻiloʻi ʻa e ngaahi meʻafoaki ʻoku ʻasi ʻi he Molonai 10:9–16 naʻe foaki ʻe he ʻOtuá kia Siosefa Sāmita ke ne lava ʻo ʻomi ʻaki ʻa e Tohi ʻa Molomoná. Ko e hā e ʻuhinga ʻoku finangalo ai ʻa e Tamai Hēvaní ke tau tui ki he ngaahi meʻafoaki fakalaumālie ʻi he kuonga ní?

Molonai 10:32–33

ʻOku finangalo ʻa Sīsū Kalaisi ke haʻu ʻa e tokotaha kotoa kiate Ia.

Te ke fakaafeʻi fēfē ʻa e fānaú ke nau “haʻu kia Kalaisi, pea hoko ʻo haohaoa ʻiate iá”?

Ngaahi ʻEkitivitī ʻe Ala Fakahokó

• Hikiʻi ʻi he palakipoé ha fehuʻi hangē ko e ʻOku ʻuhinga ki he hā ke haʻu kia Kalaisí? Tokoniʻi ʻa e fānaú ke nau kumi ʻi he Molonai 10:32–33 ki he ngaahi tali ʻe ala maʻú. Ngāue fakataha ke lisi ʻa e meʻa ʻoku finangalo ʻa Kalaisi ke tau faí pea mo e meʻa ʻokú Ne talaʻofa ke fai maʻatautolú.

• Vahevahe hoʻo veesi manakó pe ngaahi talanoa mei he Tohi ʻa Molomoná kuó ne tokoniʻi koe ke ke haʻu kia Kalaisí, pea fakaafeʻi ʻa e fānaú ke nau fai ʻa e meʻa tatau. Toe vakaiʻi mo e fānaú ʻa e ngaahi lea ʻa e Palōfita ko Siosefa Sāmitá mei he talateu ki he Tohi ʻa Molomoná: “ʻE ofi ange ha tangata ki he ʻOtuá ʻi haʻane tauhi ki [he] ngaahi akonaki [ʻa e Tohi ʻa Molomoná], ʻi ha toe tohi kehe.” Fai hoʻo fakamoʻoni ki he founga kuo hoko ai ʻa e meʻá ni ʻi hoʻo moʻuí.

Poupouʻi e Ako ʻi ʻApí

Fakaafeʻi ʻa e fānaú ke nau lotu ki ha fakamoʻoni mālohi ange ʻo e Tohi ʻa Molomoná pea ke nau vahevahe ʻenau ngaahi fakamoʻoní mo ha mēmipa ʻo honau fāmilí pe kaungāmeʻá.

Fakatupulaki ʻo ʻEtau Founga Akoʻí

Poupouʻi ʻa e feʻinasiʻakí. ʻOku faʻa maʻu ʻe he fānaú ha ngaahi fakakaukau ʻuhingamālie kau ki he ongoongoleleí. ʻE tokoni hono vahevahe ʻenau ngaahi fakakaukaú ke teuteuʻi ai kinautolu ke nau talanoa ki honau ngaahi kaungāmeʻá kau ki he ongoongoleleí (vakai ki he Ko e Faiako ʻi he Founga ʻa e Fakamoʻuí, 30.)