“30 Nōvema–6 Tīsema. Molonai 1–6: ‘Ke Tauhi ʻa Kinautolu ʻi he Hala Totonú,’” Haʻu, ʻo Muimui ʻIate Au—Maʻá e Palaimelí: Tohi ʻa Molomoná 2020 (2020)
“30 Nōvema–6 Tīsema. Molonai 1–6,” Haʻu, ʻo Muimui ʻIate Au—Maʻá e Palaimelí: 2020
Minerva Teichert (1888–1976), Papitaiso ʻe ʻAlamā ʻi he Vai ʻo Molomoná, 1949–1951, lolo ʻi ha papa (masonite), 35⅞ x ʻinisi ʻe 48. Brigham Young University Museum of Art, 1969
Nōvema 30–Tīsema 6
Molonai 1–6
“Ke Tauhi ʻa Kinautolu ʻi he Hala Totonú”
Kimuʻa pea kamata hoʻo palani ha ngaahi ʻekitivitī ako maʻá e fānaú, ako ʻi he faʻalotu ʻa e Molonai 1–6, ʻo kumi ki ha ngaahi tefitoʻi moʻoni pe ngaahi veesi ʻokú ke ongoʻi ʻoku fie maʻu ke mahino kiate kinautolu.
Lekooti ʻa e Ngaahi Ongo ʻOkú ke Maʻú
Fakaafeʻi Ke Vahevahe
Fakaafeʻi ʻa e fānaú ke nau vahevahe ʻa e meʻa kuo nau ako kau kia Molonaí. Te ke lava ʻo fakaʻaongaʻi ʻa e “Vahe 53: Ko Molonai mo ʻEne Ngaahi Akonakí” (Ngaahi Talanoa ʻo e Tohi ʻa Molomoná, 154–55, pe ko e vitiō kaunga ki ai ʻi he ChurchofJesusChrist.org) ke tokoniʻi kinautolu ke nau manatuʻi.
Akoʻi e Tokāteliné: Fānau Iiki Angé
ʻOku ou toʻo ʻa e sākalamēnití ke fakahaaʻi te u manatuʻi maʻu pē ʻa Sīsū Kalaisi.
ʻE lava ke hoko ʻa e sākalamēnití ko ha aʻusia toputapu fakalaumālie—ʻo aʻu ki he fānau īkí. Te ke tokoniʻi fēfē ʻa e fānau ʻokú ke akoʻí ke nau fakaʻaongaʻi ʻa e taimi lolotonga ʻa e sākalamēnití ke nau fakakaukau ai kia Sīsū?
Ngaahi ʻEkitivitī ʻe Ala Fakahokó
-
Fakaʻaliʻali ha fakatātā ʻo ha niʻihi ʻoku nau maʻu ʻa e sākalamēnití (vakai ki he Tohi Fakatātā ʻo e Ongoongoleleí, fika 108). Kole ki he fānaú ke nau talaatu ʻa e meʻa ʻoku hoko lolotonga ʻa e sākalamēnití. Ko e hā ʻoku totonu ke tau fai lolotonga ʻa e sākalamēnití?
-
Fakaafeʻi ha mēmipa ʻe toko ua ʻi he uōtí ke na haʻu ki he kalasí ʻo lau ʻa e Molonai 4:3 mo e 5:2 ki he fānaú pea vahevahe ʻa e ʻuhinga ʻoku nau maʻu ai ʻa e sākalamēnití ʻi he uike kotoa. Kole ange ke nau fokotuʻu atu ha ngaahi meʻa ʻoku lava ke fai ʻe he fānaú ke tokoni ai kiate kinautolu ke nau fakakaukau kia Sīsū lolotonga ʻa e sākalamēnití mo manatu maʻu ai pē kiate Ia.
-
Hivaʻi ha foʻi hiva ʻokú ne tokoniʻi e fānaú ke nau fakakaukau kia Sīsū, hangē ko e “Loto ʻApasia” (Tohi Hiva ʻa e Fānaú, 11). Kole ki he fānaú ke nau akoako tangutu loto ʻapasia hangē ko ia te nau lava ʻo fai lolotonga ʻa e sākalamēnití.
Te u lava ʻo teuteu ke u papitaiso.
ʻE lava ke tokoni ʻa e fakamatala ʻa Molonai ki he kakai naʻe papitaiso ʻi hono kuongá, ke teuteu ʻa e fānaú ke nau maʻu ʻa e ouau mahuʻinga ko ʻení ʻi he kuongá ni.
Ngaahi ʻEkitivitī ʻe Ala Fakahokó
-
Lau ha ngaahi kupuʻi lea mei he Molonai 6:1–3 ʻokú ne akoʻi mai ko hai ʻe lava ke papitaisó. Fakamatalaʻi ange ha ngaahi foʻi lea he ʻikai ala mahino ki he fānaú. Hangē ko ʻení, ko e ʻuhinga ʻe taha ʻo e “loto-mafesifesi mo e laumālie fakatomalá” ko e ongoʻi halaia ʻi heʻetau ngaahi angahalá (Molonai 6:2). Fakamatala ki he founga naʻá ke teuteu ai ki he papitaisó, pea kole ki ha taha naʻe toki papitaiso kimuí ni mai ke fakamatala kau ki he founga naʻá ne teuteu aí. Tokoniʻi ʻa e fānaú ke nau fakakaukau ki ha ngaahi founga te nau lava ai ʻo teuteu ke papitaiso ʻi ha ʻaho.
-
Fakaʻaliʻali ha ngaahi fakatātā ʻo ha niʻihi ʻoku papitaiso (vakai ki he Tohi Fakatātā ʻo e Ongoongoleleí, fika 103, 104), pea tuku ki he fānaú ke nau talanoa kau ki he meʻa ʻoku nau sio ki ai ʻi he ngaahi fakatātaá. Tokoniʻi kinautolu ke nau fakatokangaʻi ha ngaahi meʻa ikiiki, hangē ko e vaí pe ko e vala hiná. Fehuʻi ki he fānaú pe ko e hā ʻa e ʻuhinga ʻoku tau papitaiso aí, pea fakamatalaʻi ange ʻa e ʻuhinga naʻá ke fili ai ke papitaisó.
ʻOku tāpuekina au ʻi he taimi ʻoku ou ʻalu ai ki he lotú.
ʻOku mahino nai ki he fānau ʻokú ke akoʻí ʻa e ʻuhinga ʻoku tau ʻalu ai ki he lotú ʻi he uike kotoa peé? ʻOku ʻomi ʻe he Molonai 6 ha ngaahi ʻuhinga mahuʻinga ʻe niʻihi.
Ngaahi ʻEkitivitī ʻe Ala Fakahokó
-
Fehuʻi ki he fānaú pe ko e hā ʻa e ʻuhinga ʻoku nau manako ai he ʻalu ki he lotú, pea tokoniʻi kinautolu ke nau talaatu ha niʻihi ʻo e ngaahi meʻa ʻoku tau fai ʻi he lotú. Lau kiate kinautolu ha niʻihi ʻo e ngaahi meʻa ko ʻení mei he Molonai 6:4–6, 9, pea fakaafeʻi kinautolu ke nau faʻifaʻitakiʻi pe tā ha ngaahi fakatātā ʻo kinautolu ʻoku nau fai ha niʻihi ʻo e ngaahi meʻá ni (hangē ko e lotu, malanga, hiva, mo e maʻu ʻo e sākalamēnití).
-
Tokoniʻi ʻa e fānaú ke nau hiva ha foʻi hiva fekauʻaki mo e ʻalu ki he lotú, ʻo hangē ko e “When I Go to Church” (Children’s Songbook, 157). Talaange ki e fānaú ʻa e ʻuhinga ʻokú ke manako ai ke ʻalu ki he lotú pea mo hono tāpuekina koe ʻe hoʻo maʻulotú.
Akoʻi e Tokāteliné: Fānau Lalahi Angé
Ko e Laumālie Māʻoniʻoní ko ha meʻafoaki toputapu.
ʻOku tuʻo lahi ʻa e lave e Molonai 2–6 kau ki he Laumālie Māʻoniʻoní. Te ke fakaʻaongaʻi fēfē ʻa e ngaahi vahe ko ʻení ke tokoniʻi ai e fānaú ke mahino kiate kinautolu ʻa e founga ʻoku tokoniʻi ai kinautolu ʻe he Laumālie Māʻoniʻoní?
Ngaahi ʻEkitivitī ʻe Ala Fakahokó
-
Kole ki he fānaú ke nau kumi e veesi kotoa pē ʻi he Molonai 2–6 ʻoku hā ai ʻa e Laumālie Māʻoniʻoní pe ko e Laumālié. Lau fakataha ʻa e veesi kotoa ko ʻení, pea kole ki he fānaú ke nau lisi ʻi he palakipoé ʻa e ngaahi meʻa ʻoku nau ako fekauʻaki mo e Laumālie Māʻoniʻoní. ʻOku tokoniʻi fēfē kitautolu ʻe he Laumālie Māʻoniʻoní?
-
Talanoa ki he fānaú kau ki ha taimi naʻá ke ongoʻi ai e tākiekina ʻa e Laumālie Māʻoniʻoní, ʻi he lotú pe ʻi ha feituʻu kehe. Fakamatalaʻi ange ʻa e founga naʻá ke ʻiloʻi ai ko e Laumālie Māʻoniʻoní pea naʻe founga fēfē ʻEne tokoniʻi koé. Fakaafeʻi ʻa e fānaú ke nau vahevahe ha faʻahinga aʻusia pē naʻa nau maʻu mo e Laumālie Māʻoniʻoní, pea poupouʻi kinautolu ke nau fekumi ki he ʻEne tākiekiná.
ʻOku foaki ʻa e meʻafoaki ʻo e Laumālie Māʻoniʻoní ʻo fakafou ʻi he hilifaki ʻo e nimá.
ʻOku ou toʻo ʻa e sākalamēnití ke fakahaaʻi te u manatuʻi maʻu pē ʻa Sīsū Kalaisi.
ʻI he taimi ʻoku mahino ai ki he fānaú ʻa e toputapu ʻo e sākalamēnití, ʻoku meimei ke nau tauhi ia ʻaki ʻa e loto ʻapasia pea nau ongoʻi ofi ai ki he ʻOtuá lolotonga ʻa e ouau ko ʻení.
Ngaahi ʻEkitivitī ʻe Ala Fakahokó
-
Hiki ha ngaahi kupuʻi lea mei he Molonai 4:3 mo e 5:2 ʻi ha ngaahi laʻi pepa kehekehe, pea kole ki he fānaú ke nau fokotuʻutuʻu e ngaahi kupuʻi leá ki hono hokohoko totonú. Fakatatau ki he ngaahi veesi ko ʻení, ko e hā e ʻuhinga ʻoku mahuʻinga ai ʻa e sākalamēnití?
-
Fakaafeʻi ʻa e fānaú ke nau fakakaukauloto pē ʻoku haʻu hanau kaungāmeʻa ki he sākalamēnití ko haʻane fuofua taimi ia ke fai pehē ai. Te nau fakamatalaʻi fēfē nai ki honau kaungāmeʻá ʻa e ʻuhinga ʻo e sākalamēnití mo e ʻuhinga ʻoku tau maʻu ai iá? Poupouʻi kinautolu ke nau fakaʻaongaʻi ʻa e Molonai 4:3 mo e 5:2 ʻi heʻenau ngaahi fakamatalá.
-
Fakaafeʻi ʻa e fānaú ke nau vahevahe ha ngaahi meʻa ʻoku fai ʻe honau fāmilí lolotonga ʻa e sākalamēnití, ke nau loto ʻapasia mo fakakaukau ai kia Sīsū Kalaisi. Ko e hā ha ngaahi fakakaukau kehe ʻoku nau maʻu? Fakaafeʻi kinautolu ke nau fili ha taha ʻo e ngaahi fakakaukau ko ʻení pea fokotuʻu ha taumuʻa ke nau fakakaukau ai ki he Fakamoʻuí lolotonga ʻa e sākalamēnití.
ʻOku tau ʻalu ki he lotú ke tau maʻu ʻa e sākalamēnití mo fepoupouaki mo e niʻihi kehé.
ʻE lava ʻo tokoni ʻa e ngaahi lea ʻa Molonaí ke maʻu ʻe he fānau ʻokú ke akoʻí ha taumuʻa lahi ange ʻo e ʻalu ki he lotú ʻi he uike kotoá.
Ngaahi ʻEkitivitī ʻe Ala Fakahokó
-
Hiki ʻa e Ko e hā e ʻuhinga ʻoku tau haʻu ai ki he lotú? ʻi he palakipoé, pea kole ki he fānaú ke nau hiki e ngaahi tali te nau ala maʻú. Fakaafeʻi kinautolu ke nau toe kumi mo ha ngaahi tali kehe ʻi he Molonai 6:4–6, 9 pea tānaki atu kinautolu ki heʻenau lisi ʻi he palakipoé. Fakaafeʻi ʻa e fānaú ke vahevahe ʻa e founga kuo tāpuekina ai kinautolu ʻi he ʻalu ki he lotú. Tuku ke nau fakatātaaʻi hono fakamatala ki ha kaungāmeʻa ʻi ha tui fakalotu kehe ʻa e ʻuhinga ʻoku nau houngaʻia ai ʻi he kau ki he Siasí.
-
Fakaʻaliʻali ha ngaahi fakatātā pe ngaahi sīpinga ʻo ha ngaahi meʻakai fakatupu ivi. Ko e hā e ʻuhinga ʻoku mahuʻinga ai ke fafangaʻi hotau ngaahi sinó? Lau fakataha ʻa e Molonai 6:4, pea fehuʻi ki he fānaú pe ʻoku nau pehē ʻoku ʻuhinga ki he hā ʻa e “fafanga ʻa kinautolu ʻaki ʻa e folofola lelei ʻa e ʻOtuá”. ʻOku founga fēfē hono fafangaʻi kitautolu ʻe he folofola lelei ʻa e ʻOtuá?
-
Fakaafeʻi ha taha ʻi he fānaú ke ne lau ʻa e lea ko ʻeni naʻe fai ʻe ʻEletā Sefilī R. Hōlaní, pea aleaʻi ʻa e meʻa ʻokú ne akoʻi mai kau ki he founga te tau lava ai ʻo fafangaʻi e niʻihi kehé: “ʻOku tokolahi ʻa e kakai ʻoku ʻikai ko ʻenau haʻu pē ki he lotú ko e kumi ki ha ngaahi moʻoni foʻou ʻi he ongoongoleleí pe ke feʻiloaki mo ha kaungāmeʻa fuoloa, neongo ʻoku mahuʻinga kotoa ia. ʻOku nau haʻu ko e fekumi ki ha aʻusia fakalaumālie. ʻOku nau fie maʻu ʻa e nongá. ʻOku nau fie maʻu ke fakamālohia ʻenau tuí pea fakafoʻou ʻenau ʻamanakí. ʻI hono fakanounoú, ʻoku nau fie maʻu ke fafanga fakalaumālie kinautolu ʻaki ʻa e folofola lelei ʻa e ʻOtuá, pea ke fakamālohia ʻaki ʻa e ngaahi mālohi ʻo e langí” (“A Teacher Come from God,” Ensign, May 1998, 26). Te tau lava fēfē ʻo tokoni ke tau fefafangaʻaki fakalaumālie ʻi he lotú?
Poupouʻi e Ako ʻi ʻApí
Poupouʻi ʻa e fānaú ke nau talanoa ki honau ngaahi fāmilí fekauʻaki mo e ngaahi ʻuhinga ʻoku nau manako ai ke ʻalu he uike kotoa ki he lotú.
Fakatupulaki ʻo ʻEtau Founga Akoʻí
Poupouʻi e Mātuʻá Fekumi ʻi he faʻa lotu ki ha ngaahi founga ke poupouʻi ai ʻa e ngaahi mātuʻa ʻo e fānau ʻokú ke akoʻí. Te ke lava fēfē ʻo poupouʻi ʻenau ngaahi feinga ko ia ke akoʻi ʻa e ongoongoleleí ki heʻenau fānaú? Hangē ko ʻení, te ke lava ʻo talanoa ki he ngaahi mātuʻá fekauʻaki mo e ngaahi fie maʻu mo e ngaahi meʻa ʻoku manako ai ʻenau fānaú, pe te ke vahevahe mo kinautolu e meʻa ʻoku ako ʻe heʻenau fānaú ʻi hoʻo kalasí (vakai ki he Ko e Faiako ‘i he Founga ‘a e Fakamoʻuí, 25).