Parau hi’u B

« Mau parau mau pāpū ’e te faufa’a »

’Ua fa’aineinehia te Buka a Moromona ’ia tae mai i roto i te mau mahana hope’a nei, e tau e parare te ta’a ’ore nō ni’a i te ha’api’ira’a tumu, ’aore rā te mau parau mau mure ’ore. Hō’ē pae o te fā hanahana o te buka, mai tā Nephi i ’ite ātea ra, ’oia ho’i, « e fa’ati’a i te [parau mau o te Bibilia] », nō te « fa’a’ite ho’i i tō te reira mau mea pāpū ra ’e te faufa’a » i mo’e i roto i te mau tenetere, ’e nō te « fa’a’ite atu i te mau ’ōpu ato’a, ’e te mau nūna’a ato’a, ’e te mau reo ato’a ē, ’o te ’Ārenio o te Atua, ’o te Tamaiti ïa a te Metua hau mure ’ore, ’e te Fa’aora ho’i o te ao nei » (1 Nephi 13:40).

Tē fa’a’ite nei te Buka a Moromona i te mau parau mau mure ’ore tei mo’e i roto i te Tāivara’a ’e tē ’āmui nei i te piti o te ’ite nō te ha’apāpū i te mau parau mau i ha’api’ihia i roto i te Bibilia. Teie ri’i te tahi o te reira mau parau mau. E ’imi i te reira ’e te tahi atu mau parau mau pāpū ’e te faufa’a ’a tuatāpapa ai ’outou i te Buka a Moromona.

Te Atuara’a

• E tino ta’a ’ē tō te Metua i te Ao ra, tō Iesu Mesia ’e tō te Vārua Maita’i, ’ua hō’ē rā rātou i roto i te fā (hi’o 3 Nephi 11:32, 36).

• E tino tō te Fa’aora tei ti’afa’ahou e nehenehe te rima e fāfā (hi’o 3 Nephi 11:10–17).

Te tahi atu mau ’īrava pāpa’ira’a mo’a nō ni’a i te Atuara’a : 2 Nephi 31:6–8 ; Etera 12:41

Te tāra’ehara a Iesu Mesia

• ’Ua mamae Iesu Mesia nō tā tātou mau hara ’e mau ’ati ’ia ti’a iāna ’ia ’ite e nāhea i te fa’aora ia tātou (hi’o Alama 7:11–13).

• E ti’a ia tātou ’ia riro ’ei mea maita’i roa nā roto i te aroha o Iesu Mesia (hi’o Moroni 10:32–33).

Te tahi atu mau ’īrava pāpa’ira’a mo’a nō ni’a i te tāra’ehara a te Fa’aora : 1 Nephi 10:6 ; 2 Nephi 2:6–9 ; Iakoba 4:11–12 ; Mosia 3:1–19 ; Alama 34: 8–16

Te fa’anahora’a nō te fa’aorara’a

• ’Ua riro na te hi’ara’a o Adamu ’e o Eva ’ei tuha’a faufa’a tumu nō te fa’anahora’a a te Metua i te Ao ra (hi’o 2 Nephi 2:22–27).

• Tītauhia nā pae e piti o te mau mea ’ia ti’a ia tātou ’ia fa’a’ohipa i te ti’amāra’a ’ia mā’iti (hi’o 2 Nephi 2:11–16).

• E ha’avāhia tātou mai te au i tā tātou mau ’ohipa ’e te hia’ai o tō tātou nei ’ā’au (hi’o Alama 41:3–7).

• E hōho’a te « roto auahi ’e te gopheri » nō te ahoaho o te ta’ata tātarahapa ’ore (hi’o 2 Nephi 9:16–19 ; Mosia 3:24–27).

Te tahi atu mau ’īrava pāpa’ira’a mo’a nō ni’a i te fa’anahora’a nō te fa’aorara’a : 2 Nephi 9:11–26 ; Alama 22:12–14 ; 34: 31–35 ; 42:1–26

Te Tāivara’a ’e te Fa’aho’i-fa’ahou-ra’a mai

• ’Ua tupu te Tāivara’a rahi nō te ’ino ’e te fa’aro’o ’ore (hi’o Moromona 8:28, 31–41).

• Tē ha’amau nei te Buka a Moromona i te mau parau mau i ha’api’ihia i roto i te Bibilia (hi’o 1 Nephi 13:19–41 ; 2 Nephi 3:12).

• ’Ia pi’ihia te ’Ēkālesia a te Mesia i tōna i’oa (hi’o 3 Nephi 27: 3–9).

Te tahi atu mau ’īrava pāpa’ira’a mo’a nō ni’a i te tāivara’a : 1 Nephi 13:1–9, 24–29 ; 2 Nephi 27–28.

Te tahi atu mau ’īrava pāpa’ira’a mo’a nō ni’a i te fa’aho’i-fa’ahou-ra’a mai : 1 Nephi 14:7–12 ; 22:7–11 ; 2 Nephi 3:7–24 ; 25: 17–18

Te mau peropheta ’e te heheura’a

• Tē fa’a’ite pāpū nei te mau peropheta ato’a nō Iesu Mesia (hi’o Mosia 13:33–35).

• E tae mai te ’ite nō te parau mau pae vārua nā roto i te Vārua Maita’i (hi’o Alama 5:45–47).

• ’Aita i roto i te Bibilia te tā’āto’ara’a o te mau parau a te Atua (hi’o 2 Nephi 29: 10–13).

• ’Aita te heheura’a nō ’ō mai i te Atua i fa’aea i tō tātou nei ’anotau (hi’o Moromona 9:7–9).

Te tahi atu mau ’īrava pāpa’ira’a mo’a nō ni’a i te mau peropheta : 1 Nephi 22:1–2 ; Mosia 8:16–18 ; Helamana 13:24–33

Te tahi atu mau ’īrava pāpa’ira’a mo’a nō ni’a i te heheura’a : Iakoba 4:8 ; Alama 12:9–11 ; 17:2–3 ; Moroni 10:5

Autahu’ara’a

• ’Ua pi’ihia ’e ’ua fa’aineinehia te feiā i mau i te autahu’ara’a mai te hāmanira’ahia mai ā o te ao nei (hi’o Alama 13:1–3).

• Tītauhia i te hō’ē ta’ata ’ia fāri’i i te ha’amanara’a a te Atua nō te poro i te ’evanelia (hi’o Mosia 23:17).

Te tahi atu mau ’īrava pāpa’ira’a mo’a nō ni’a i te autahu’ara’a: Mosia 18:17–20 ; Alama 13 ; Helamana 10: 7.

Te mau ’ōro’a ’e te mau fafaura’a

• E mea faufa’a roa te bāpetizora’a nō te fāri’i i te ora mure ’ore (hi’o 2 Nephi 31: 4–13, 17–18).

• E mea tītauhia ’ia ravehia te bāpetizora’a utuhi (hi’o 3 Nephi 11:23–27).

• ’Aita i tītauhia ’ia bāpetizo i te mau tamari’i ri’i (hi’o Moroni 8:8–12).

• E mea tītauhia ’ia fa’aterehia te mau ’ōro’a ’ia au i te mau fa’auera’a a te Mesia ’e nā te hō’ē ta’ata tei mau i te ha’amanara’a ti’a (hi’o Mosia 18:17–18 ; 3 Nephi 11:21–27 ; Moroni 4:1).

Te tahi atu mau ’īrava pāpa’ira’a mo’a nō ni’a i te mau ’ōro’a : Mosia 18:8–17 ; 21:33–35 ; Alama 13:16 ; 3 Nephi 18:1–11 ; Moroni 2–6 ; 8:4–26

Te tahi atu mau ’īrava pāpa’ira’a mo’a nō ni’a i te mau fafaura’a : 2 Nephi 11:5 ; Mosia 5:1–9 ; Alama 24:17–18

Te fa’aipoipora’a ’e te ’utuāfare

• ’Ia here te tāne fa’aipoipo ’e te vahine fa’aipoipo te tahi ’e te tahi (hi’o Iakoba 3:5–7).

• ’Ia ’atu’atu te mau metua i tā rātou mau tamari’i i te Fatu ra (hi’o 1 Nephi 7:1).

Te tahi atu mau ’īrava pāpa’ira’a mo’a nō ni’a i te fa’aipoipora’a ’e te ’utuāfare : 1 Nephi 1:1 ; 2 Nephi 25: 26 ; Iakoba 2:23–28 ; Enosa 1:1 ; Mosia 4:14–15 ; 3 Nephi 18:21

Te mau fa’auera’a

• E riro te Fatu i te fa’aineine i te rāve’a nō tātou nō te fa’atupu i tāna mau fa’auera’a (hi’o 1 Nephi 3:7).

• Tē parau fafau nei te Atua e ha’amaita’i ’oia ia tātou ’ia ha’apa’o tātou i tāna mau fa’auera’a (hi’o Mosia 2:22–24).

Te tahi atu mau ’īrava pāpa’ira’a mo’a nō ni’a i te mau fa’auera’a : 1 Nephi 17:3 ; 22:30–31 ; Alama 37:13, 35 ; 50:20