’O te fa’afāriura’a tā tātou fā

Te fā nō te ’apora’a mai ’e te hōro’ara’a i te ha’api’ira’a, ’o te fa’ahōhonura’a ïa i tō tātou fa’afāriura’a ’e te tauturura’a ia tātou ’ia riro mai ia Iesu Mesia te huru. Nō reira, ’ia tuatāpapa tātou i te ’evanelia, ’aita tātou e ’imi noa nei i te ’ite ’āpī ; tē hina’aro ra tātou ’ia riro mai ’ei « mea ’āpī » (hi’o 2 Korinetia 5:17). Te aura’a ra, e tūru’i ïa i ni’a i te Mesia nō te taui i tō tātou ’ā’au, tā tātou huru hi’ora’a, tā tātou mau ’ohipa ’e tō tātou nei nātura.

E’ita rā te huru ’apora’a mai i te ’evanelia e ha’apūai i tō tātou fa’aro’o ma te fa’atupu i te tauira’a temeio nō te fa’afāriura’a e tupu i terā iho taime. E tupu te reira i muri iho i te piha ha’api’ira’a, i roto iho i te ’ā’au o te ta’ata ’e i te fare. Tītauhia te tauto’ora’a tāmau ’e tāmahana nō te māramaramara’a ’e nō te orara’a i te ’evanelia. E tītau te fa’afāriura’a mau i te mana fa’auru o te Vārua Maita’i.

E arata’i te Vārua Maita’i ia tātou i te parau mau ma tē fa’a’ite pāpū ia tātou i terā parau mau (hi’o Ioane 16:13). E tūrama ’oia i tō tātou ferurira’a, e ha’avitiviti ’oia i tō tātou māramaramara’a ’e e ha’aputapū ’oia i tō tātou ’ā’au i te heheura’a nō ’ō mai i te Atua ra, te puna nō te tā’āto’ara’a o te parau mau. E tāmā te Vārua Maita’i i tō tātou ’ā’au. E fa’auru ’oia i roto ia tātou i te hia’ai ’ia ora mai te au i te parau mau, ’e e muhumuhu mai ’oia i te mau rāve’a nō te rave i te reira. ’Oia mau, e riro te Vārua Maita’i i tē « ha’api’i mai ia [tātou] i te mau mea ato’a » (Ioane 14:26).

Nō reira, i roto i tā tātou mau tauto’ora’a nō te ora, nō te ’apo mai ’e nō te ha’api’i i te ta’ata i te ’evanelia, ’ia ’imi tātou nā mua roa i te hoara’a i te Vārua. ’Ia fa’atere te reira fā i tā tātou mau mā’itira’a ’e ’ia arata’i ho’i i tō tātou mau mana’o ’e tā tātou mau ’ohipa. ’Ia ’imi tātou i te mau mea ato’a e tītau i te fa’aurura’a a te Vārua ’e ’ia pāto’i ho’i i te mau mea ato’a e fa’aātea ’ē atu i te fa’aurura’a—inaha ’ua ’ite tātou ē, ’ia ti’amā tātou i mua i te aro o te Vārua Maita’i, e ti’amā ato’a ïa tātou nō te ora i mua i te aro o te Metua i te Ao ra ’e o tāna Tamaiti, ’o Iesu Mesia.