Mau parau fafau a te mau peropheta

E riro te tuatāpapara’a i te Buka a Moromona i te taui ia ’oe. E taui te reira i tō ’oe ’utuāfare. ’Ua fa’ahiti te mau peropheta nō te mau mahana hope’a nei i te mau parau fafau nō ni’a i te mana o te Buka a Moromona mai te fa’aho’ira’ahia mai ā Te ’Ēkālesia a Iesu Mesia i te Feiā Mo’a i te mau Mahana Hope’a Nei. E feruri i te mau fa’ahitira’a parau i muri nei ’e e hi’o pinepine i te reira. E aha te mau ha’amaita’ira’a tā ’oe e hina’aro e fāri’i ? ’A tai’o ai ’oe i te Buka a Moromona, e nehenehe e pāpa’ipa’i ’e e fa’a’ite ia vetahi ’ē nāhea teie mau parau fafau i te tupura’a i roto i tō ’oe orara’a.

Te peropheta Iosepha Semita : « ’Ua parau vau i te mau taea’e ē, te Buka a Moromona, ’o te buka ïa tei hau roa a’e i te tano i te mau buka ato’a i te fenua nei, ’e e tāpe’a ’āpou nō tā tātou ha’apa’ora’a, ’e e fātata a’e te hō’ē ta’ata i te Atua nā roto i te ha’apa’ora’a i tāna mau ha’api’ira’a e’ita rā nā roto i te tahi ’ē atu buka » (Te Mau Ha’api’ira’a a te Mau Peresideni o te ’Ēkālesia : Iosepha Semita [2007], 73).

Te peresideni Ezra Taft Benson : « E ’ere noa ē tē ha’api’i nei te Buka a Moromona ia tātou i te parau mau, noa atu ē tē nā reira mau nei ’oia. E’ita te Buka a Moromona e fa’a’ite noa mai i te parau nō ni’a i te Mesia, noa atu ē, tē nā reira ato’a nei ’oia. Tē vai nei rā te tahi mea hau atu. Tē vai ra hō’ē mana i roto i te reira buka ’o tē ha’amata i te mani’i mai i roto i tō ’outou orara’a i te taime ’a hamata ai ’outou i te tuatāpapa māite i te reira buka. E ’iteahia ia ’outou te mana rahi a’e nō te pāto’i i te fa’a’amu’amura’a. E ’itehia ia ’outou te mana nō te ’ape i te fa’ahemara’a. E ’itehia ia ’outou te mana nō te haere tāmau noa nā ni’a i te ’ē’a tītī’aifaro ’e te piriha’o. ’Ua parauhia te mau pāpa’ira’a mo’a ‘te mau parau o te ora’, (hi’o PH&PF 84:85) ’e ’aita e vāhi ’ē atu i ti’a maita’i ai teie nei parau maori rā i roto i te Buka a Moromona. ’Ia ha’amata ana’e ’outou i te po’ia ’e i te po’iha i taua mau parau ra, e ’ite rahi atu ïa ’outou i te ora » (Te Mau Ha’api’ira’a a te Mau Peresideni o te ’Ēkālesia : Ezra Taft Benson [2014], 154).

Te peresideni Gordon B. Hinckley : « E te mau taea’e ’e te mau tuahine, ma te taiā ’ore tē fafau atu nei au ia ’outou ē, mai te mea ē, e tai’o ’outou i te Buka a Moromona ma te pure, ma te hi’o ’ore i te rahira’a taime tō ’outou tai’ora’a iāna nā mua a’enei, e tae mai ïa i roto i tō ’outou ’ā’au i te hō’ē fāito hau atu o te Vārua o te Fatu. E tupu mai te hō’ē fa’aotira’a pūai nō te haere ma te ha’apa’o i tāna mau fa’auera’a, ’e e fāri’i ’outou i te ’itera’a pāpū pūai a’e ē, tē ora mau nei te Tamaiti a te Atua » (Te Mau Ha’api’ira’a a te Mau Peresideni o te ’Ēkālesia : Gordon B. Hinckley [2016], 261).

Te peresideni Russell M. Nelson : « E au mau taea’e, e au mau tuahine, tē parau fafau atu nei au ia ’outou ē, ’ia tuatāpapa ’outou i te Buka a Moromona nā roto i te pure i te mau mahana ato’a, e rave ïa ’outou i te mau fa’aotira’a maita’i a’e—i te mau mahana ato’a. Tē parau fafau atu nei au ē, ’ia feruri māite ’outou i tā ’outou i tuatāpapa, e matara mai ïa te mau ha’amāramarama o te ra’i ’e e fāri’i mai ’outou i te pāhonora’a i tā ’outou iho mau uira’a ’e te arata’ira’a nō tō ’outou iho orara’a. Tē parau fafau atu nei au ē, ’ia utuhi ’outou ia ’outou i roto i te Buka a Moromona, i te mahana tāta’itahi, e nehenehe ’outou e pāruruhia i te mau ’ino o terā mahana, ’e tae noa atu i terā ma’i fifi nō te hōho’a faufau ’e te mau hia’ai fa’atītī ’e te fa’ata’ero » (« Te Buka a Moromona : E aha te huru tō ’outou orara’a ’āhani ’aita te reira ? » Ensign ’aore rā Liahona, Novema 2017, 62–63).