Mau mana’o nō te ha’amaita’i i tā ’oe iho tuatāpapara’a pāpa’ira’a mo’a

Teie te tahi mau rāve’a ’ōhie nō te ha’amaita’i i tā ’oe iho tuatāpapara’a i te parau a te Atua i roto i te mau pāpa’ira’a mo’a.

’Imi i te parau mau nō ni’a ia Iesu Mesia

Tē ha’api’i nei te mau pāpa’ira’a mo’a ē, tē fa’a’ite pāpū nei te mau mea ato’a nō te Mesia (hi’o 2 Nephi 11:4 ; Mose 6:63), nō reira, e ’imi iāna i roto i te mau ’ohipa i tupu, i roto i te mau ’ā’amu ’e i roto i te mau ha’api’ira’a o te Buka a Moromona. E nehenehe e tāpa’opa’o ’aore rā e fa’a’ū i te mau ’īrava e ha’api’i ra nō ni’a i te Fa’aora ’e nāhea e pe’e iāna.

’Imi i te mau parau fa’auru ’e te mau pereota fa’auru

E ’ite paha ’oe ē, e mea fa’ahiahia nō ’oe te tahi mau parau ’e mau pereota i roto i te mau pāpa’ira’a mo’a, mai te huru ra ē, ’ua pāpa’i-ta’a-’ē-hia te reira nō ’oe. Penei a’e e ’ite ’oe i te huru ta’a ’ē o te reira ’e ’o tē fa’auru ’e ’o tē fa’aitoito ia ’oe. E nehenehe e fa’a’ū i te reira i roto i tā ’oe pāpa’ira’a mo’a ’aore rā e pāpa’i i te reira i roto i te hō’ē buka tuatāpapara’a.

’Imi i te mau parau mau o te ’evanelia

I te tahi taime e parau-’āfaro-hia te mau parau mau o te ’evanelia (tei parau-pinepine-hia te ha’api’ira’a tumu ’aore rā te mau parau tumu), ’e i te tahi atu taime, tei roto i te hō’ē hi’ora’a ’aore rā te hō’ē ’ā’amu. E ui ia ’oe iho ē : « E aha te mau parau mau mure ’ore i ha’api’ihia i roto i teie mau ’īrava ? »

Faʼaroʼo i te Vārua

E vai ara i te mau mana’o i roto i tō ’oe ferurira’a ’e i tō ’oe ’ā’au, noa atu ā ’aita e tū’atira’a i te mau mea tā ’oe e tai’o ra. Penei a’e ’o te reira mau mana’o te mea mau tā te Metua i te Ao ra e hina’aro ra ’ia ha’api’i mai ’oe.

Fa’aau i te mau pāpa’ira’a mo’a i tō ’oe orara’a

’A feruri nāhea te mau ’ā’amu ’e te mau ha’api’ira’a tā ’oe i tai’o e tū’ati ra i tō ’oe orara’a. ’Ei hi’ora’a, e ui ’oe i roto ia ’oe ē : « E aha te ’ohipa i tupu nō’u e tū’ati i te mea tā’u e tai’o ra ? » ’aore rā « Nāhea vau e nehenehe e pe’e i te hi’ora’a o teie ta’ata i roto i te mau pāpa’ira’a mo’a ? »

Ui i te mau uira’a ’a tuatāpapa noa ai

’A tuatāpapa ai ’oe i te mau pāpa’ira’a mo’a, e tae mai paha te tahi mau uira’a i tō ’oe ferurira’a. E tū’ati teie mau uira’a i te mea tā ’oe e tai’o ra ’aore rā i tō ’oe orara’a. E feruri i teie mau uira’a ’e e ’imi i te pāhonora’a ’a tāmau noa ai i te tuatāpapa i te mau pāpa’ira’a mo’a.

Fa’a’ohipa i te mau mātēria tauturu nō te tuatāpapara’a pāpa’ira’a mo’a

Nō te ’apo mai i te tahi atu ā hi’ora’a e au i te mau ’īrava tā ’oe e tai’o ra, e fa’a’ohipa i te mau fa’ata’ara’a raro, te Arata’i nō te mau pāpa’ira’a mo’ascriptures.ChurchofJesusChrist.org ’e te tahi atu mau mātēria tauturu tuatāpapara’a.

Feruri i te ’ohipa e tupu ra i taua taime ra

E tāpe’a mai ’oe i te tahi mea nō ni’a i te hō’ē ’īrava mai te peu e feruri ’oe i te ’ohipa e tupu ra i taua taime ra—te orara’a ’aore rā te vaira’a i te taime o taua ’īrava ra. ’Ei hi’ora’a, ’ia ’ite ’oe i te mau ’ohipa i tupu ’e te mau ti’aturira’a o te ta’ata tā te hō’ē peropheta e paraparau ra, e ti’a ïa ia ’oe ’ia māramarama i te fā o tāna mau parau.

Tāpa’o i te mau mana’o o tō ’oe ferurira’a ’e o tō ’oe ’ā’au

’Ua rau te rāve’a nō tē tāpa’o i te mau fa’aurura’a e tae mai i roto i te tuatāpapara’a. ’Ei hi’ora’a, e nehenehe tā ’oe e fa’a’ū i te hō’ē parau ’aore rā te hō’ē pereoda faufa’a rahi ’e e tāpa’o i tō ’oe mau mana’o ’ei parau fa’ata’ara’a i roto i tā ’oe pāpa’ira’a mo’a. E nehenehe ato’a e tāpe’a i te hō’ē buka tāpa’opa’o nō te mau mea i ’apohia mai, te mau mana’o ’e te mau fa’aurura’a tā ’oe i fāri’i.

Tuatāpapa i te mau parau a te mau peropheta ’e a te mau ’āpōsetolo i te mau mahana hope’a nei

E tai’o i te mea tā te mau peropheta ’e te mau ’āpōsetolo i te mau mahana hope’a nei i ha’api’i nō ni’a i te mau parau tumu tā ’oe i ’ite i roto i te mau pāpa’ira’a mo’a (’ei hi’ora’a, hi’o conference.ChurchofJesusChrist.org ’e te mau ve’a a te ’Ēkālesia).

Fa’a’ite i te mau hi’ora’a

’Ua riro te ’āparaura’a i te mau mea i ’apohia mai i roto i tā ’oe tuatāpapara’a ’ei rāve’a maita’i nō te ha’api’i i te ta’ata, e ’ere noa rā terā, e tauturu ato’a te reira ’ia ha’apūai i tō ’oe māramaramara’a i te mea tā ’oe i tai’o.

Ora mai te au i te ha’api’ira’a tā ’oe i ’apo mai

’Eiaha te tuatāpapara’a pāpa’ira’a mo’a e fa’auru noa ia tātou—’ia arata’i ato’a rā ia tātou i te tauira’a i tō tātou orara’a. Fa’aro’o i te mea tā te Vārua e muhumuhu ia ’oe ’a tai’o ai ’oe, ’ei reira, ’a fafau ’ia rave mai te au i te reira mau muhumuhu.

’Ua nā ’ō te peresideni Russell M. Nelson : « ’Ia haere ti’a tātou i mua ma te ‘[rave i te fa’a’amua] i te parau a te Mesia, ma te tāpe’a ho’i ē tae noa atu i te hope’a ra… e ora mure ’ore [ïa] tō tātou i reira’ [2 Nephi 31:20].

« Rave i te fa’a’amua e ’ere ïa i te tāmata noa. Rave i te fa’a’amua, ’o te ’amu-monamona-ra’a ïa. E ’amu monamona tātou i te mau pāpa’ira’a mo’a ’ia tuatāpapa tātou i te reira nā roto i te vārua au o te ’ite ’e te ha’apa’o maita’i. ’Ia rave tātou i te fa’a’amua i te parau a te Mesia, « ’ei ni’a [roa te reira] i te papa ta’ata ra i te ’ā’au »’ [2 Korinetia 3:3]. ’Ua riro te reira ’ei tuha’a tāmau nō tō tātou nātura » (« Living by Scriptural Guidance », Ensign, Nov. 2000, 17).