30 nō Tītema–5 nō Tēnuare.

Mau ’api ’ōmuara’a o te Buka a Moromona

« Te tahi fa’ahou ’ite nō Iesu Mesia »

E fa’ananaea atu ā tā ’outou tuatāpapara’a o te Buka a Moromona mai te mea e ha’amata ’outou nā roto i te tai’ora’a i te mau ’api nā mua mai i te 1 Nephi. E aha te mea tā ’outou e ’apo mai ’o te nehenehe e ha’apūai i tō ’outou ’itera’a pāpū ?

Pāpa’i i te mau mana’o e tae mai

Hou roa ’outou e ha’amata ai i te 1 Nephi pene 1, e mea pāpū ē, e ’ere roa atu te Buka a Moromona i te hō’ē buka mai terā noa. Tei roto i te mau ’api ’ōmuara’a te tahi fa’ati’ara’a ’aifāito ’ore—mai te mau fārereira’a melahi, te pāpa’a parau tahito i hunahia e rave rahi tenetere i ni’a i te hō’ē pae ’aivi, ’e te hō’ē ta’ata fa’a’apu tei huri i te parau o te pāpa’a parau nā roto i te mana o te Atua. E ’ere te Buka a Moromona i te ’ā’amu noa nō te mau ta’ata i Amerika tahito ra. I roto i te reira te « ’īra’a o te ’evanelia mure ’ore » (’ōmuara’a o te Buka a Moromona), ’e nā te Atua iho i fa’atere i tō te reira pūharara’a—te huru i pāpa’ihia, te huru i fa’ahereherehia ’e te huru i matara mai te reira i tō tātou nei ’anotau. I teie matahiti, ’a tai’o ai ’outou i te Buka a Moromona, ’a pure ai nō te reira ’e ’a fa’a’ohipa ai i tō te reira mau ha’api’ira’a, e riro ’outou i te tītau mai i tō te reira mana i roto i tō ’outou orara’a, ’e e parau paha ’outou mai nā ’ite to’otoru tei parau i roto i tō rātou ’itera’a pāpū : « E mea māere ho’i [i tō’u nei mata] ».

Mau mana’o nō tā ’oe iho tuatāpapara’a pāpa’ira’a mo’a

’Api upo’o parau o te Buka a Moromona

E ti’a i te Buka a Moromona i te ha’apūai i tō’u fa’aro’o ia Iesu Mesia.

’Ua rahi atu ā i ni’a i te ’api upo’o parau o te Buka a Moromona i te upo’o parau noa. Ta’a ’ē noa atu i te tahi atu mau mea, tē tāpura nei te reira i te mau fā o teie pāpa’a parau mo’a. E ’imi i te reira mau fā ’ei reira, ’a tuatāpapa ai ’oe i te Buka a Moromona i teie matahiti, ’a tāpa’opa’o i te mau parau tā ’oe e mana’o ra ē, tē fa’atupu nei te reira i teie mau fā. ’Ei hi’ora’a, e aha te mau parau e tauturu nei i te ha’apāpū ia ’oe ē, « ’o Iesu te Mesia, te Atua mure ’ore » ?

’Ōmuara’a o te Buka a Moromona

Tē hōhora nei te Buka a Moromona « i te fa’anahora’a nō te fa’aorara’a ».

Te fa’anahora’a nō te fa’aorara’a, ’o tā te Metua i te Ao ra ïa fa’anahora’a nō te tauturu i tāna mau tamari’i ’ia tae i te fa’ateiteira’a, mai iāna ho’i, ’e ’ia noa’a te ’oa’oa tāna e ’oa’oa nei (hi’o 2 Nephi 2:25–26). Nā te tāra’ehara a Iesu Mesia e fa’atupu i teie fa’anahora’a, e ’ua ’ōpuahia te mau ha’api’ira’a tumu ato’a, te mau ’ōro’a, te mau fafaura’a ’e te mau fa’auera’a tā te Atua i hōro’a mai nō te fa’atupu i te fa’anahora’a.

Mai te mea e hina’aro ’oe i te māramarama i te fa’anahora’a nō te fa’aorara’a, ’aita e buka maita’i a’e e tai’o maori rā te Buka a Moromona. E fa’ahiti te reira i te fa’anahora’a a te Atua—ma te fa’a’ohipa e rave rahi i’oa—hau atu i te 20 taime. I roto i tā ’oe tuatāpapara’a i teie matahiti, ’a hi’o maita’i i te taime e fa’ahitihia ai te parau nō te fa’anahora’a a te Atua ma te hi’o e aha tā te Buka a Moromona e parau nei nō te reira.

Teie te hō’ē ’ohipa e rave nō te tauturu ia ’oe ’ia ha’amata. Tai’o i te mau ’īrava i muri nei ’e e tāpura i te mau i’oa ta’a ’ē i topahia nō te fa’anahora’a a te Atua : 2 Nephi 9:13 ; 11:5 ; ’e Alama 12:32–34 ; 24:14 ; 41:2 ; 42:15–16. E aha tā te i’oa tāta’itahi e parau nei nō ni’a i te fa’anahora’a a te Metua ?

« Te ’itera’a pāpū o nā ’ite to’otoru » ; « Te ’itera’a pāpū o nā ’ite to’ova’u »

E ti’a iā’u ’ia riro ’ei ’ite nō te Buka a Moromona.

E ti’a i te Vārua Maita’i ’ia fa’a’ite pāpū ia ’oe ē, e parau mau te Buka a Moromona, noa atu ā ’aita ’oe i ’ite i te mau ’api ’auro mai nā ’ite to’otoru ’e to’ova’u. Nāhea tō rātou ’itera’a pāpū e ha’apūai ai i tō ’oe ’itera’a pāpū ? Nāhea e ti’a ai ia ’oe ’ia « tu’u atu i tō [’oe] i’oa i tō te ao nei, ’ei fa’a’ite i tō te ao nei » i te mea tā ’oe i ’ite nō ni’a i te Buka a Moromona ? (« Te ’itera’a pāpū o nā ’ite to’ova’u »).

« Te ’itera’a pāpū o te peropheta Iosepha Semita »

E temeio te taera’a mai te Buka a Moromona.

Mai te mea, e ui mai te hō’ē ta’ata ia ’oe nō hea mai te Buka a Moromona, e aha tā ’oe e pāhono atu ? Nāhea ’oe i te fa’ata’a i te rima o te Fatu i roto i te fa’ataera’a mai i te Buka a Moromona ? Nāhea Iosepha Semita i te fa’ata’ara’a nō te taera’a mai te Buka a Moromona ?

« Te ’itera’a pāpū o te peropheta Iosepha Semita »

Nāhea te Buka a Moromona i te ’īritira’ahia ?

’Ua ’īritihia te Buka a Moromona « nā roto i te hōro’a ’e te mana o te Atua ». ’Aita tātou i ’ite rahi roa nō ni’a i te ’ohipa temeio o te ’īritira’a, ’ua ’ite rā tātou ē, e ’ite ’o Iosepha Semita tei tauturuhia e te mau mauha’a tā te Atua i fa’aineine : e piti ’ōfa’i e nehenehe e hi’o nā roto tei parauhia te Urima ’e te Tumima, ’e te tahi atu ’ōfa’i tei parauhia te ’ōfa’i hi’o. ’Ua ’ite Iosepha i roto i teie nā ’ōfa’i e toru i te ’īritira’a reo peretāne o te mau tāpa’o i ni’a i te mau ’api, ’e ’ua tai’o pūai ’oia i te reira ’ia pāpa’i te pāpa’i parau i te reira. ’Ua ha’apāpū te pāpa’i parau tāta’itahi a Iosepha ē, ’ua ’itehia te mana o te Atua i roto i te ’īritira’a i teie ’ohipa mo’a.

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

’Api upo’o parau o te Buka a Moromona

Penei a’e e nehenehe tā tō ’outou ’utuāfare e ha’amata i te hō’ē tāpura ’īrava Buka a Moromona ’o tei patu i tō ’outou fa’aro’o, « ’o Iesu te Mesia », ma te tu’u i te tahi atu mau ’īrava i te roara’a o te matahiti. E taime tano ato’a paha nō te ha’amau i te hō’ē fa’anahora’a ’utuāfare nō te tai’o i te Buka a Moromona : Afea ’e i hea e putuputu ai nō te tai’o ? E aha te tuha’a a te melo tāta’itahi o te ’utuāfare i roto i te reira ? Nō te tahi atu tauturura’a, e hi’o i te vāhi ra « Mau mana’o nō te ha’amaita’i i te tuatāpapara’a pāpa’ira’a mo’a a te ’utuāfare », i te mau ’api mātāmua o teie buka.

’Ōmuara’a o te Buka a Moromona

Te hō’ē tāpe’a ’āpou, e ’ōfa’i tarai i te vāhi teitei roa a’e o te hō’ē ’āpou e tāpe’a i te tahi atu mau ’ōfa’i. Nō te tauturu i tō ’outou ’utuāfare ’ia māramarama nāhea te Buka a Moromona i te rirora’a ’ei « tāpe’a ’āpou nō tō tātou ha’apa’ora’a fa’aro’o », e nehenehe tā ’outou e hāmani ’aore rā e pāpa’i i te hōho’a o te hō’ē ’āpou ma tōna tāpe’a ’āpou i ni’a roa. E aha tē tupu mai te mea e tātarahia te tāpe’a ’āpou ? E aha ra mai te mea ’aita te Buka a Moromona ? Nāhea tātou e nehenehe ai e fa’ariro i te Buka a Moromona ’ei tāpe’a ’āpou nō tō tātou fa’aro’o ia Iesu Mesia ?

’O te Buka a Moromona te tāpe’a ’āpou nō tō tātou ha’apa’ora’a fa’aro’o.

« Te ’itera’a pāpū o nā ’ite to’otoru » ; « Te ’itera’a pāpū o nā ’ite to’ova’u »

E ti’a i te mau melo o tō ’outou ’utuāfare ’ia pāpa’i i tō rātou iho ’itera’a pāpū nō ni’a i te Buka a Moromona, e tu’urima i te reira ’e e feruri i te mau rāve’a nō te fa’a’ite atu i te reira ia vetahi ’ē.

« Te ’itera’a pāpū o te peropheta Iosepha Semita »

I roto i te fa’ati’ara’a a Iosepha Semita, e aha te mau tāpa’o e fa’a’ite nei ē, tei roto te Atua i te ’ohipa nō te fa’ataera’a mai i te Buka a Moromona ?

Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Ha’amaita’ira’a i te tuatāpapara’a pāpa’ira’a mo’a a te ta’ata iho

E fafaura’a a te peropheta. ’Ua parau te peresideni Russell M. Nelson : « Tē parau fafau atu nei au ē, ’ia feruri māite ’outou i tā ’outou i tuatāpapa [i roto i te Buka a Moromona], e matara mai te mau ha’amāramarama o te ra’i ’e e fāri’i mai ’outou i te pāhonora’a i tā ’outou iho mau uira’a ’e te arata’ira’a nō tō ’outou iho orara’a » (« Te Buka a Moromona : E aha ïa te huru tō ’outou orara’a ’āhani ’aita te reira ? » Ensign ’aore rā Liahona, Novema 2017, 62–63).

Tē hōro’a ra Moroni i te mau ’api ’auro,, nā Gary L. Kapp