« 6–12 nō Tēnuare. 1 Nephi 1–7 : ‘E haere atu vau, e rave ho’i’ », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)
« 6–12 nō Tēnuare. 1 Nephi 1–7 », Mai, pe’e mai—nō te ta’ata hō’ē ’e te ’utuāfare : 2020
Lehi e rātere ra nā pīha’i iho i te Miti ute’ute, nā Gary Smith
6–12 nō Tēnuare
1 Nephi 1–7
« E haere atu vau, e rave ho’i »
’Ua pāpa’i Nephi i te « mau mea a te Atua ra » (1 Nephi 6:3). ’Ia tuatāpapa ’outou i te mau parau a Nephi, e ha’apa’o maita’i i te mau mea a te Atua e ’ite mai ’outou, te mau mana’o iho ā rā nō ’ō mai i te Vārua.
Pāpa’i i te mau mana’o e tae mai
E ha’amata te Buka a Moromona ma te hō’ē fa’ati’ara’a nō te mau fifi i tupu mau i ni’a i te hō’ē ’utuāfare mau. ’Ua tupu te reira i te matahiti ra 600 HM, te mau mea rā nō ni’a i teie fa’ati’ara’a e au ra e mea mātauhia e te mau ’utuāfare i teie mahana. Tē ora ra teie ’utuāfare i roto i te hō’ē ao tē rahi noa atu ra te ’ino, ’ua fafau rā te Fatu ia rātou ē, mai te peu e pe’e rātou iāna, nāna e arata’i ia rātou i te vāhi paruruhia. I ni’a i te tere, tē vai ra tō rātou mau taime maita’i ’e te mau taime ’ino ; ’ua tupu te mau ha’amaita’ira’a rahi ’e te mau temeio, ’ua tupu ato’a rā te mārōra’a ’e te tama’i. E mea varavara i roto i te mau pāpa’ira’a mo’a tē vai ra te hō’ē fa’ati’ara’a roroa nō te hō’ē ’utuāfare e tāmata nei e ora i te ’evanelia : hō’ē metua tāne e fifi nei i te fa’atupu i te fa’aro’o i roto i tōna ’utuāfare, te mau tamaiti e fa’aoti nei e ti’aturi ānei rātou iāna, hō’ē metua vahine e mata’u ra nō te pārurura’a o tāna mau tamari’i ’e te mau taea’e e pohehae ra ’e e tātama’i ra—’e i te tahi taime, te fa’a’orera’a i te hapa te tahi ’e te tahi. ’Ia hi’ohia, tē vai ra hō’ē mana mau i te pe’era’a i te mau hi’ora’a o te fa’aro’o ’o tā teie ’utuāfare i fa’a’ite—noa atu ā tō rātou mau hapehape.
Mau mana’o nō te tuatāpapara’a pāpa’ira’a mo’a a te ta’ata hō’ē
E faufa’a rahi tō te mau pāpa’ira’a mo’a.
I roto i nā pene mātāmua e ono o te Buka a Moromona, e rave rahi fa’ahitira’a nō ni’a i te mau buka mo’a, te mau papa’a parau mo’a ’e te parau a te Fatu. ’Ia tai’o ’oe i te 1 Nephi 1–6 e aha tā ’oe i ’apo mai nō ni’a i te tumu e mea « faufa’a rahi » te parau a te Atua ? E aha tā teie mau ’īrava e ha’api’i nei nō ni’a i te mau pāpa’ira’a mo’a ? E aha te mea tā ’oe i ’ite mai ’o tē fa’auru ia ’oe ’ia ’imi ma te ’ana’anatae rahi i te mau pāpa’ira’a mo’a ?
Hi’o ato’a « Scriptures Legacy » (video, ChurchofJesusChrist.org).
Tē fa’a’ite pāpū nei te Buka a Moromona nō Iesu Mesia
Mai te au i te parau i fa’ahitihia i ni’a i te ’api upo’o parau—nō te fa’a’ite-pāpū-ra’a ’o Iesu te Mesia—tē ’ōmua nei te Buka a Moromona nā roto i te ’ōrama fa’ahiahia a Lehi nō te Fa’aora. E aha tā ’oe i ’apo mai nō ni’a ia Iesu Mesia, maoti te mea tā Lehi i ’ite ? E aha te tahi o te mau mea « rahi ’e te māere » tā te Fa’aora i rave i roto i tō ’oe orara’a ?(1 Nephi 1:14).
’Ia ’imi ana’e au ’e ’ia ti’aturi i te Fatu, e tāmarū ’oia i tō’u ’ā’au.
Noa atu ā ’ua pa’ari Lamana, Lemuela ’e Nephi i roto i te hō’ē ā ’utuāfare ’e ’ua tupu te hō’ē ā mau ’ohipa nō rātou, e ’ohipa ta’a ’ē mau e vai ra i roto i tā rātou huru pāhonora’a i te arata’ira’a hanahana tā tō rātou metua tāne i fāri’i i roto i teie pene. ’Ia tai’o ’oe i te 1 Nephi 2, e hi’o ē, ’ua ta’a ānei ia ’oe nō te aha i tāmarūhia ai te ’ā’au o Nephi, e ’aita ho’i tō tōna mau taea’e. E nehenehe ato’a tā ’oe e feruri i tā ’oe iho mau pāhonora’a i te mau arata’ira’a a te Fatu, e mea nā roto ānei i te Vārua Maita’i ’aore rā tāna peropheta. E aha te taime tō ’oe ’itera’a i te Fatu i te tāmarūra’a i tō ’oe ’ā’au ’ia ti’a ia ’oe ’ia fāri’i ma te hina’aro mau i tāna arata’ira’a ’e tāna parau a’o ?
E fa’aineine te Atua i te hō’ē rāve’a nō’u nō te rave i tōna hina’aro.
I tō te Fatu fa’auera’a ia Lehi ’e tōna ’utuāfare e ti’i i te mau ’api veo ia Labana ra, ’aita ’oia i hōro’a i te tahi mau arata’ira’a ta’a ’ē nō te fa’atupu i tāna fa’auera’a. Pinepine roa e mea nā reira ato’a nō te tahi atu mau fa’auera’a ’aore rā te mau heheura’a nō ’ō mai i te Atua ra tā tātou e fāri’i nei nō tātou iho, e penei a’e e fa’atupu ato’a te reira i te mana’o ē, e « mea rave tai’atā » tāna i ani mai (1 Nephi 3:5). E aha tō ’oe mana’o i te pāhonora’a a Nephi i te fa’auera’a a te Fatu, tei ’itehia i roto i te 1 Nephi 3:7, 15–16 ? Tē vai ra ānei te tahi mana’o i tae mai e « haere atu, e rave ho’i » ?
’Ia tuatāpapa ’oe i te 1 Nephi 1–7, e hi’o i te mau rāve’a tā te Atua i fa’aineine i te ’ē’a nō Lehi ’e tōna ’utuāfare. Mea nāhea tōna ravera’a nō ’oe ?
Hi’o ato’a Maseli 3:5–61 Nephi 17:3
1 Nephi 4:1–3 ; 5:1–8 ; 7:6–21
E ti’a i te ha’amana’ora’a i te mau ’ohipa a te Atua i te hōro’a mai iā’u i te fa’aro’o nō te ha’apa’o i tāna mau fa’auera’a.
I te taime e hina’aro Lamana ’e o Lemuela e amuamu, tei pīha’i iho noa ’o Nephi ’e ’o Lehi nō te fa’aitoito ia rāua ’e nō te a’o ia rāua. I te taime e hina’aro ’oe e amuamu, e riro te tai’ora’a i te mau parau a Nephi ’e a Lehi ’ei parau a’o faufa’a rahi ’e ’ei hi’ora’a ātea. Nāhea tō Nephi ’e o Lehi tauturura’a i te mau melo o tō rāua ’utuāfare ’ia patu i te fa’aro’o i ni’a i te Atua ?(hi’o 1 Nephi 4:1–3; 5:1–8; 7:6–21). E aha tā ’oe i ’apo mai nā roto mai i tō rāua hi’ora’a ’o tē nehenehe e tauturu mai ia ’oe i te taime e fa’ahemahia ’oe ’ia amuamu ’e ’ia ’ōrure hau ?
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e tō ’outou ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o tō ’outou ’utuāfare. Teie te tahi mau mana’o.
1 Nephi 1–7
I te roara’a o te 1 Nephi 1–7, e nehenehe ’outou e fa’aitoito i te mau melo o te ’utuāfare ’ia hi’o maita’i i te mau ’ohipa i roto i te mau melo o te ’utuāfare o Lehi ’e o Saria. E aha tā tātou i ’apo mai nā roto mai i teie mau aura’a, ’o tē nehenehe e tauturu i tō tātou ’utuāfare ?
’Ua ha’afaufa’a Nephi ’e tōna ’utuāfare i te mau parau a te mau peropheta.
1 Nephi 2:20
Tē fa’ahiti-pinepine-hia nei te parau tumu i roto i te 1 Nephi 2:20 i roto i te Buka a Moromona. Nāhea te mau melo o tō ’outou ’utuāfare e nehenehe ai e fa’a’ohipa i te reira i roto i tō rātou orara’a ’a tuatāpapa ’āmui ai ’outou i te Buka a Moromona i teie matahiti ? Penei a’e e nehenehe tā ’outou e hāmani ’āmui i te hō’ē parau pia rahi tei ni’a iho te fafaura’a a te Fatu i roto i teie ’īrava, ’e ’ia piahia te reira i roto i te fare. E nehenehe te reira e riro ’ei fa’aha’amana’ora’a ’ia ’āparau pinepine nāhea tō ’outou ’itera’a i te Fatu i te ha’amanuiara’a i tō ’outou ’utuāfare i te taime ’ua ha’apa’o ’outou i tāna mau fa’auera’a. E nehenehe e tāpa’o i te reira mau ’ohipa i ni’a i te parau pia.
1 Nephi 2:11–13 ; 3:5–7
Penei a’e e ’āpī mai tō ’outou ’utuāfare i te tāpa’ora’a i te ta’a-’ē-ra’a i roto i tā Lamana ’e Lemuela pāhonora’a i te mau fa’auera’a a te Fatu ’e tā Nephi pāhonora’a. E aha tē nehenehe e ’apo mai i roto i te 1 Nephi 2:11–13 ; 3:5–7 nō ni’a i te ’ohipa amuamu ? E aha te mau ha’amaita’ira’a e tae mai ’ia fa’a’ohipa tātou i te fa’aro’o ?
1 Nephi 3:19–20 ; 5:10–22 ; 6
Penei a’e e fa’auru teie mau ’īrava i tō ’outou ’utuāfare ’ia pāpa’i i te mau ’ohipa faufa’a rahi i tupu ’e te mau ’itera’a i roto i tō ’outou orara’a. Penei a’e e nehenehe e ha’amata i te hō’ē buka ’ā’amu tāmahana nō te ’utuāfare, mai te mau papa’a parau tā Nephi ’e Lehi i rave nō te mau ’ohipa i tupu i ni’a i tō rātou ’utuāfare. E aha tē tu’u i roto i tā ’outou papa’a parau ’utuāfare ?
1 Nephi 7:19–21
I roto i teie mau ’īrava, e aha te mea fa’ahiahia i roto i te hi’ora’a o Nephi ? Nāhea tō tātou ’utuāfare i te ha’amaita’ihia ’ia « fa’a’ore hua » tātou te tahi i te tahi ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere
Ha’amaita’ira’a i tā tātou ha’api’ira’a
Tuatāpapa tāmau noa i te mau pāpa’ira’a mo’a. Hō’ē tāviri nō te ha’afaufa’a i te ha’api’ira’a i te fare, ’o te fa’atupura’a ïa i te mau rāve’a nō te ’apora’a mai e au nō tō ’outou ’utuāfare. ’Ua ha’api’i te peresideni Thomas S. Monson : « E ’ere roa te mau ha’api’ira’a vitiviti i te mea manuia roa, mai te au i te tai’ora’a ’e te fa’a’ohipara’a i te mau pāpa’ira’a mo’a i te mau mahana ato’a o tō tātou orara’a » (« A ti’a i ni’a i tō ’outou fāito maita’i a’eEnsignaore rā Liahona,Mē 2009, 68).
’Ua ha’apa’o vau i te reo o te Vārua, nā Walter Rane