Te ’utuāfare o Lehi e rātere ra nā roto i te medebara

Lehi e rātere ra nā pīha’i iho i te Miti Ute’ute, nā Gary Smith

6–12 nō Tēnuare

1 Nephi 1–7

« E haere atu vau, e rave ho’i »

’A tai’o ai ’outou i te 1 Nephi 1–7, ’e feruri i te mau ’īrava, te mau ’ohipa i tupu, te mau uira’a, ’e te tahi atu mau rāve’a tauturu ’o te fa’auru ia ’outou ’ia fa’a’ohipa nō te ha’api’i i te mau tamari’i. E nehenehe te mau ’ohipara’a i roto i teie arata’i e fa’atanohia i ni’a i te mau tamari’i pa’ari ’e ’aore rā, te mea ’āpī.

Pāpa’i i te mau mana’o e tae mai

ītona fa’a’itera’a

Tītau i te mana’o

E riro ’ua fa’aro’o a’ena te tahi mau tamari’i i roto i tā ’outou piha ha’api’ira’a ’e ’aore rā ’ua tai’o i te mau ’ohipa i tupu nō te ’utuāfare o Nephi i roto i te 1 Nephi 1–7. E ani ia rātou ’ia fa’a’ite mai e aha tā rātou i ’ite. Mai te mea ’aita te mau tamari’i i ’ite rahi nō ni’a i te mau ’ohipa i tupu i ni’a ia Nephi, e hōro’a ia rātou i te hō’ē taime i te pae hope’a o te ha’api’ira’a ’ia fa’a’ite mai e aha tā rātou i ha’api’i mai.

ītona ha’api’ira’a

Ha’api’i i te ha’api’ira’a tumu : Mau tamari’i ’āpī

1 Nephi 2:16

Hina’aro vau tō’u iho ’itera’a pāpū.

’Ua ti’aturi Nephi i te mau parau a tōna metua tāne nō te mea ’ua hina’aro ’oia e ’ite nā roto iāna iho ’e ’ua pure ’oia i te Fatu. Tauturu i te mau tamari’i ’ia ha’api’i mai nā roto i teie hi’ora’a.

Mau ’ohipa e nehenehe e rave

• Ta’ita’i mai i te hō’ē ’āfata ’ōpanihia ’e te hō’ē hōho’a o te Fa’aora i roto, ’e e hōro’a i te tamari’i tāta’itahi i te taime ’ia ’ite ’oia iho e aha tō roto i te ’āfata. E parau i te mau tamari’i ē, ’ua hina’aro Nephi ’ia fāri’i i tōna iho ’itera’a pāpū ē ’ua fa’aue te Fatu i tōna ’utuāfare ’ia fa’aru’e ia Ierusalema. E ani i te mau tamari’i ’ia fa’aro’o e aha tā Nephi i rave nō te fāri’i i tōna iho ’itera’a pāpū ’a tai’o ai ’outou i te 1 Nephi 2:16. E fa’a’ite pāpū ē, mai ia tātou tāta’itahi i tītauhia ’ia ’īriti i te ’āfata nō te ’ite e aha tō roto, tītau-ato’a-hia ’ia tātou ’ia ani i te Atua nō te fāri’i i tō tātou iho ’itera’a pāpū.

• Ta’ita’i mai i te mau hōho’a ’e ’aore rā i te mau tauiha’a e fa’ahōho’a i te mau mea ’o tā te mau tamari’i e ’imi i te hō’ē ’itera’a pāpū, mai te hō’ē hōho’a nō Iesu Mesia, te Buka a Moromona, ’e ’aore rā, hō’ē hōho’a o te peropheta ora. E ani i te mau tamari’i ’ia mā’iti i te hō’ē hōho’a ’e ’aore rā, i te hō’ē tauiha’a ’e ’ia fa’a’ite mai i tō rātou ’itera’a pāpū nō te reira mea i mua i te piha ha’api’ira’a.

1 Nephi 2:2–4 3–4

E tauturu mai te Atua iā’u ’ia ha’apa’o i tāna mau fa’auera’a.

Nāhea e ti’a ai ia ’outou ’ia fa’a’ohipa i teie mau ’ā’amu nō te tauturu i te mau tamari’i ’ia māramarama ē, e tauturu te Atua ia tātou ’ia ha’apa’o i tāna mau fa’auera’a, noa atu e mea teimaha ’ia ha’apa’o ?

Mau ’ohipa e nehenehe e rave

• Tai’o i te 1 Nephi 2:2–4 i te mau tamari’i, ’e e pia i te tahi mau hōho’a nō te mau tauiha’a tā te ’utuāfare o Lehi i rave nō te haere i roto i te medebara, mai te fare ’ie, te ’ahu ta’oto, ’e te fana ’e te te’a. E ani ia rātou ’ia feruri, e aha tō rātou mana’o ’āhiri e tītauhia rātou ’ia fa’aru’e i tō rātou fare ’e ’ia haere i roto i te medebara. E aha tā te Fatu e ani nei ia tātou ’ia rave nō te ha’apa’o i tāna parau i teie mahana ?

• Tauturu i te mau tamari’i ’ia fa’a’ū ’e ’ia tāpūpū i te mau hōho’a pāpie i ni’a i te ’api ’ohipara’a o teie hepetoma ; i muri iho, e ani ia rātou ’ia fa’a’ohipa i te mau hōho’a pāpie nō te ha’apoto mai i te ’ā’amu o Nephi ’e tōna mau taea’e i te haerera’a e ti’i i te mau ’api veo (hi’o 1 Nephi 3–4). E nehenehe te hīmene « Le courage de Nephi » (Chants pour les enfants,64–65) ’e te « Pene 4 : Te mau ’api veo » (Te mau ’ā’amu o te Buka a Moromona, 8–12 ; hi’o ato’a te video tāno i ni’a ChurchofJesusChrist.org) e tauturu ia ’outou ’ia fa’ati’a i teie ’ā’amu.

• Fa’a’ohipa i te mau hōho’a 103–15 i roto i te Vaira’a hōho’a ’evanelia nō te tauturu i te mau tamari’i ’ia feruri i te mau mea tā te Fatu i fa’aue mai ia tātou ’ia rave. Nāhea tātou i te ha’amaita’ihia ’ia ha’apa’o ana’e tātou i tāna parau ? Tauturu ’ia rātou ’ia fa’a’una’una i te mau tāreta e tāmauhia ’o tē parau ra ē, E haere atu vau, e rave ho’i i te mau mea tā te Fatu i fa’aue mai ra (1 Nephi 3:7). Fa’ahiti ’āmui e rave rahi taime i te pereota.

1 Nephi 3:19–21 ; 5:19–22

E tao’a faufa’a rahi te mau pāpa’ira’a mo’a.

Nāhea e ti’a ai ia ’outou e tauturu ’ia fa’auru i te mau tamari’i ’ia poihere i te mau pāpa’ira’a mo’a, ’e ’aore rā, i te parau a te Atua ?

Mau ’ohipa e nehenehe e rave

• Fa’a’ite i te hō’ē mea i te mau tamari’i (’e ’aore rā, hō’ē hōho’a nō te hō’ē ’ohipa) tei riro ’ei mea faufa’a rahi roa nō ’outou. E parau nāhea tō ’outou ha’apa’ora’a ’e te ’atu’atura’a i te reira. E fa’ata’a ē, nō te ’utuāfare o Lehi, e mea faufa’a rahi roa te mau pāpa’ira’a mo’a, mai te hō’ē tao’a faufa’a rahi.

• E ani i te mau tamari’i ’ia tauturu ia ’outou ’ia fa’ati’a ’e ’aore rā, ’ia ha’uti e aha tā Nephi ’e tōna mau taea’e i rave nō te fāri’i i te mau ’api veo : ’Ua rātere ātea rātou, ’ua hōro’a i tā rātou ’auro ’e te moni, ’e ’ua tāpuni i roto i te hō’ē ana nō te pāruru i tō rātou ora. Tai’o 1 Nephi 5:21. Nō te aha te mau pāpa’ira’a mo’a i riro ai ’ei mea faufa’a roa nō te ’utuāfare o Lehi ? Nāhea e ti’a ’ia tātou ’ia fa’ariro i te mau pāpa’ira’a mo’a ’ei hō’ē tao’a faufa’a rahi ?

Tē tai’o ra Lehi i te mau ’api veo

Te fāri’ira’a Lehi i te mau ’api veo, nā Clark Kelley Price

ītona ha’api’ira’a

Ha’api’i i te ha’api’ira’a tumu : Mau tamari’i pa’ari

1 Nephi 2:16, 19–20

E nehenehe au e fāri’i i tō’u iho ’itera’a pāpū.

E aha tā ’outou i ha’api’i mai nā roto mai i te hi’ora’a o Nephi nō ni’a i te fāri’ira’a i te hō’ē ’itera’a pāpū nō ’outou iho ? Nāhea e ti’a ai ia ’outou ’ia tauturu i te mau tamari’i ’ia ha’api’i mai, nā roto i tōna hi’ora’a ?

Mau ’ohipa e nehenehe e rave

• E ani i te mau tamari’i ’ia ’imi i te 1 Nephi 2:16, 19 nō te ’ite e mea nāhea tō Nephi fāri’ira’a i te hō’ē ’itera’a pāpū nō te mau parau a tōna metua tāne. E ani ia rātou ’ia pāpa’i i te mau ’ohipa tā Nephi i rave i ni’a i te tahi mau ’āta’a (bloc) ’e ’aore rā, i ni’a i te tahi atu mau tauiha’a ’e i muri iho e hāmani i te hō’ē mea i tāua mau tauiha’a ra nō te fa’a’ite nāhea te reira mau mea i te tauturu ia tātou ’ia patu i te hō’ē ’itera’a pāpū.

• Parau i te mau tamari’i nāhea tō ’outou fāri’ira’a i tō ’outou ’itera’a pāpū nō te ’evanelia. E ani ia rātou ’ia fa’a’ite mai i te hō’ē ā ’itera’a tā rātou i fāri’i, ’e e fa’aitoito ia rātou ’ia pe’e i te hi’ora’a o Nephi nō te patu tāmau noa i tō rātou ’itera’a pāpū. Nāhea te fāri’ira’a i tō tātou iho ’itera’a pāpū e tauturu ia tātou ?

1 Nephi 3:1–8

E nehenehe au e pāhono ma te fa’aro’o i te mau fa’auera’a a te Fatu.

Te fa’ananeara’a i te hō’ē huru mai tō Nephi, e tauturu i te mau tamari’i ’ia ani ana’e mai te Fatu ia rātou ’ia rave i te hō’ē ’ohipa teimaha.

Mau ’ohipa e nehenehe e rave

• Vāhi te mau tamari’i nā roto e piti pupu. E ani i te hō’ē pupu ’ia tai’o i te pāhonora’a a Lamana rāua ’o Lemuela ia Lehi (hi’o 1 Nephi 3:2–5) ’e te tahi pupu ’ia tai’o i te pāhonora’a a Nephi (hi’o 1 Nephi 3:2–4, 7). E ani i te hō’ē tamari’i ’ia fa’ahua ē ’o Lehi ’oia, ’e e ani i te tahi atu mau tamari’i ’ia fa’ahua tē ho’i ra rātou i Ierusalema nō te ti’i i te mau ’api veo. E ani i te pupu tāta’itahi ’ia pāhono nā roto i tā rātou iho mau parau mai te huru ē, ’o rātou iho te mau ta’ata tā rātou e tai’o ra i te ’ā’amu. E aha te tahi mau mea tā te Atua i fa’aue ia tātou ’ia rave ? Nāhea e ti’a ai ia tātou ’ia riro mai ia Nephi te huru ?

• E hīmene ’āmui i te hō’ē hīmene nō ni’a i te ha’apa’ora’a, mai te « Le courage de Nephi » ’e ’aore rā, « Pour trouver la paix » (Chants pour les enfants, 64–65, 68–69), ’e e ani i te mau tamari’i ’ia fa’aro’o i te mau pereota ’o te ha’api’i nei e nāhea tātou e pāhono i te Fatu.

1 Nephi 3–4

E arata’i te Vārua Maita’i iā’u ’a ’imi ai au i te rave i te hina’aro o te Fatu.

’Ua pe’e Nephi i te Vārua, « ’aore (’oia) i ’ite na i te mau mea (tāna) e rave ra » (1 Nephi 4:6). Nāhea ’outou ’ia tauturu i te mau tamari’i tā ’outou e ha’api’i ra ’ia ’imi i te arata’ira’a a te Vārua Maita’i ?

Mau ’ohipa e nehenehe e rave

• E ani i te mau tamari’i ’ia ha’uti mai i te ’ā’amu o Nephi ’e tōna mau taea’e i te tāmatara’a e haere e ti’i i te mau ’api veo (hi’o 1 Nephi 3–4). E ani i te mau tamari’i ’ia tai’o i te 1 Nephi 4:6, ’e e ani i te piha ha’api’ira’a ’ia fa’aro’o e aha tā Nephi i rave tei ha’amanuia ia rātou.

• Fa’a’ite i te mau tamari’i i te tahi mau hi’ora’a nō te mau mea tā te Atua e hina’aro ’ia rave rātou, mai te fa’ahoara’a i te hō’ē ta’ata e vai ’ōtahi noa ra i te fare ha’api’ira’a, fa’a’ore i te hapa a te taea’e ’aore rā tuahine, ’e ’aore rā, e fa’a’ite i te parau mau i muri a’e i te ravera’a i te hō’ē hape. E ani i te mau tamari’i ’ia fa’a’ite mai nāhea te Vārua Maita’i i te tauturura’a ia rātou i roto i taua mau taime ra. Nāhea e nehenehe ai ia tātou ’ia ani i te Vārua Maita’i ’ia tauturu ia tātou ’ia ha’apa’o i te parau a te Atua ?

ītona ’apora’a ha’api’ira’a

Fa’aitoito i te ha’api’ira’a mai i te fare

E ani i te mau tamari’i ’ia fa’a’ite i te mau ’itera’a i tō rātou ’utuāfare ’a ha’amaita’ihia ai rātou nō tō rātou ha’apa’ora’a i te mau fa’auera’a. Fa’aitoito ia rātou ’ia ani i te mau melo o tō rātou ’utuāfare ’ia fa’a’ite mai i te mau ’itera’a mai te reira.

Ha’amaita’iraʼa i tā tātou ha’api’ira’a

E tauturu i te mau tamari’i ’āpī ’ia ha’api’i mai nā roto mai i te mau pāpa’ira’a mo’a. Nō te tauturu i te mau tamari’i ’āpī ’ia ha’api’i mai nā roto mai i te mau pāpa’ira’a mo’a, e fa’atumu i ni’a i te hō’ē noa iho ’īrava o te pāpa’ira’a mo’a ’e ’aore rā, hō’ē noa a’e pereota tumu. E nehenehe ’outou e ani i te mau tamari’i ’ia ti’a i ni’a ’e ’aore rā, ’ia ’āfa’i i tō rātou rima i ni’a ’ia fa’aro’o ana’e rātou i te reira ta’o ’e ’aore rā, te reira pereota. (Hi’o ato’a Ha’api’ira’a mai tā te Fa’aora, 21

’api ’ohipara’a : E tauturu te Atua iā’u ’ia ha’apa’o i tāna mau fa’auera’a