Te ’ōrama a Lehi nō te tumu rā’au nō te ora

Te moemoeā a Lehi, nā Steven Lloyd Neal

13–19 nō Tēnuare

1 Nephi 8–10

« ’Ia haere mai… e ’amu i taua hotu ra »

Hau atu i te hi’ora’a ia ’outou iho i roto i te ’ōrama a Lehi, ’a tāmata i te hi’o i te mau tamari’i tā ’outou e ha’api’i nei. Nāhea teie ’ōrama e tano ai nō rātou ?

Pāpa’i i te mau mana’o e tae mai

ītona fa’a’itera’a

Fa’a’ite i te mana’o

’A fārerei atu i te tahi mau tamari’i nā mua a’e ’e e ani ia rātou ’ia feruri i te mau ’itera’a ’e ’aore rā, i te mau pāpa’ira’a mo’a tā rātou e nehenehe e fa’a’ite mai tei tauturu ia rātou ’ia ’ite i te here o te Atua.

ītona ha’api’ira’a

Ha’api’i i te ha’api’ira’a tumu : Mau tamari’i ’āpī

1 Nephi 8:2 , 5–34

E arata’i te parau a te Atua iā’u i te Atua ra, ’e e tauturu te reira iā’u ’ia ’ite i tōna here.

I roto i te ’ōrama a Lehi, ’ua anihia ia tātou ’ia rave mai i te here o te Atua, tei fa’ahōho’ahia i te tumu rā’au ’e tōna mau hotu. Nāhea e ti’a ai ia ’outou ’ia tauturu i te mau tamarii ’ia fāri’i i teie anira’a ?

Mau ’ohipa e nehenehe e rave

• E ani i te mau tamari’i ’ia tauturu mai ia ’outou ’ia fa’ati’a i te ’ā’amu nō te ’ōrama a Lehi i roto i te 1 Nephi 8:10–34. Nō te tauturu ia rātou ’ia hi’o hōho’a i te ’ā’amu, e nehenehe ’outou e fa’a’ite i te hō’ē hōho’a nō te ’ōrama a Lehi (hi’o te fa’anahora’a nō teie hepetoma i roto Mai, pe’e mai—nō te ta’ata hō’ē ’e te ’utuāfare) ’e ’aore rā, te mau hōho’a i roto i te « Pene 6 : Te moemoeā a Lehi » (Te mau ’ā’amu nō te Buka a Moromona, 18–20, ’e ’aore rā, te video e tano i ni’a i te ChurchofJesusChrist.org). ’Ia pāpū ē, ’ua ’ite te mau tamari’i ē e fa’ahōho’a te mea ’auri i te parau a te Atua, ’o tā tātou e tai’o ra i roto i te mau pāpa’ira’a mo’a ’e ’o tā tātou e fa’aro’o nā roto mai i te mau peropheta ora. Tauturu ia rātou ’ia hāro’aro’a ē, e fa’ahōho’a te tumu rā’au i te here o te Atua nō tātou.

• Hōpoi mai i te hō’ē taura nō te fa’ahōho’a i te mea ’auri i roto i te ’ōrama a Lehi. E ani i te mau tamari’i ’ia tāpe’a i te reira ’a arata’i ai ’outou ia rātou nā roto i te piha e tae atu i te hō’ē hōho’a o te hō’ē tumu rā’au. Tauturu ia rātou ’ia hāro’aro’a ē, e arata’i fātata roa te parau a te Atua ia tātou iāna ra, mai te taura i fa’ahōho’ahia i te mea ’auri e arata’i nei ia tātou i te tumu rā’au ra. Nō te fa’a’ite ē, e fa’ahōho’a te tumu rā’au i te here o te Atua, e nehenehe tā ’outou e vauvau i te mau hōho’a o te mau mea tā te Atua i hōro’a mai ia tātou ’o tē fa’a’ite ra i tōna here nō tātou, mai te Fa’aora, tō tātou ’utuāfare, ’e te ao nehenehe.

• Hōpoi mai i te tahi mau hotu ma te tā’amuhia te hō’ē māfatu i ni’a iho. E hōro’a i te hō’ē tuha’a o te hotu nō te tāmata, ’e e ani ia rātou e aha te hotu tā rātou mea au a’e. Fa’ata’a ’ē, te hotu i roto i te ’ōrama a Lehi ’o te hotu monamona roa a’e ïa tāna i tāmata, ’e ’ua fa’a’ī te reira i tōna vārua i te ’oa’oa. Mai te mau hotu monamona i fa’a’oa’oa ia tātou, e tupu ato’a te ’oa’oa i roto ia tātou ’ia pe’e ana’e tātou ia Iesu ’e ’ia ora fa’ahou i pīha’i iho i te Metua i te ao ra.

• Tai’o i te 1 Nephi 8:12, ’e e ani i te mau tamari’i ’ia fa’aro’o maita’i e aha te mea tā Lehi i hina’aro e rave i muri a’e i tōna tāmatara’a i te hotu. E vaiiho i te mau tamari’i, te tahi i muri iho i te tahi, ’ia fa’ahua ē ’o Lehi rātou ’o tē ani ra ia vetahi ’ē ’ia haere mai ’e ’ia ’amu i te hotu. E aha tā tātou e nehenehe e rave nō te ani ia vetahi ’ē ’ia haere mai ’e ’ia fāna’o i te mau ha’amaita’ira’a o te ’evanelia i pīha’i iho ia tātou ?

1 Nephi 10:17, 19

E heheu mai te Atua i te parau mau iā’u nā roto i te mana o te Vārua Maita’i.

I muri a’e i tōna fa’aro’ora’a i te ’ōrama a tōna metua tāne, ’ua tupu te hina’aro i roto ia Nephi, e tano ato’a paha ’ia tupu te reira hina’aro i roto ia tātou pā’āto’a—’ia ’ite i te parau mau nā roto iāna iho.

Mau ’ohipa e nehenehe e rave

• Tai’o i te 1 Nephi 10:19, ’e e ani i te mau tamari’i ’ia ’āfa’i i tō rātou rima i ni’a ’ia fa’aro’o ana’e rātou i te mau ta’o ra « fa’a’ite » ’e « Vārua Maita’i ». Tauturu i te mau tamari’i ’ia hāro’aro’a i teie pāpa’ira’a mo’a, ’o tē ha’api’i nei ē, e tauturu mai te Vārua Maita’i ia tātou ’ia ’ite i te mau pāhonora’a i tā tātou mau uira’a. Nō te tauturu i te mau tamari’i ’ia feruri e aha te aura’a e « fa’a’itehia mai » te parau mau, ’a hōpoi mai i te hō’ē ’ahu ta’oto tūfetuhia ’e te hō’ē hōho’a o te Fa’aora i roto, ’e e ani i te mau tamari’i ’ia hōhora i te ’ahu ta’oto.

• Hīmene i te hō’ē hīmene ’e te mau tamari’i nō ni’a i te ’imira’a i te parau mau, mai te « Quand je lis l’Ecriture sainte » (Chants pour les enfants, 66). Fa’a’ite i te mau hōho’a e fa’ahōho’a ra i te mau parau i roto i te hīmene nō te tauturu i te mau tamari’i ’ia ha’amana’o e mea nāhea te Vārua Maita’i i te ha’api’i ia tātou.

• E nehenehe e fa’a’ite i te hō’ē ’ohipa i tupu i reira tō te Vārua Maita’i tāuturura’a ia ’outou ’ia ’ite ē e parau mau te hō’ē mea. Parau i te mau tamari’i ē, e mea nāhea tō te Vārua Maita’i paraparaura’a ia ’outou.

ītona ha’api’ira’a

Ha’api’i i te ha’api’ira’a tumu : Mau tamari’i pa’ari

1 Nephi 8:2 , 5–34

E arata’i te parau a te Atua iā’u i te Atua ra ’e e tauturu iā’u ’ia ’ite i tōna here.

’A ha’api’i ai te mau tamari’i i roto i tā ’outou piha ha’api’ira’a i te parau nō te ’ōrama a Lehi, ’a fa’aitoito ia rātou ’ia tuatāpapa i te parau a te Atua ’e ’ia fa’a’ite i te here o te Atua ia vetahi ’ē.

Mau ’ohipa e nehenehe e rave

• ’A tai’o ai te mau tamari’i i te mau ’īrava i mā’itihia i roto i te 1 Nephi 8, e ani ia rātou ’ia ’imi i te mau fa’ata’ara’a o teie mau ’īrava i roto i te hō’ē hōho’a nō te ’ōrama a Lehi (mai te hō’ē i roto i te fa’anahora’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare). ’E ’aore rā e ani ia rātou ’ia pāpa’i i te hōho’a i ni’a i te tāpura ’ere’ere nō te mau fa’ata’ara’a tā rātou i tai’o. I muri iho, e tauturu i te mau tamari’i ’ia ’ite e aha tā te mau tāpa’o i roto i te moemoeā e fa’ahōho’a nei (hi’o 1 Nephi 11:21–22; 12:16–18; 15:23–33, 36).

• Mai te peu e nehenehe, e hōpoi mai i te hō’ē tāpū ’auri ’e ’aore rā, te tahi atu metara i roto i te piha ha’api’ira’a, ’e e ani i te mau tamari’i ’ia fa’ata’a mai i te tahi o tōna huru ’e i te mau mea e ti’a ’ia fa’a’ohipa i te reira. Nāhea te parau a te Atua e riro ai ’ei mea ’auri ? I hea tātou e ’ite ai i te parau a te Atua ? Nō te aha te mea ’auri i riro ai ’ei mea faufa’a rahi i roto i te ’ōrama a Lehi ?

  Tē ’amu nei Lehi i te hotu nō te tumu rā’au nō te ora

  Tē ’amu nei Lehi i te hotu nō te tumu rā’au nō te ora. Tumu rā’au nō te ora, nā Marcus Alan Vincent

• E ani i te mau tamari’i ’ia pāpa’i i ni’a i te hō’ē ’api parau i te hō’ē ’ohipa i tupu ’a tauturu ai te parau a te Atua ia rātou ’ia ’ite e aha tē ti’a ia rātou ’ia rave ’e ’aore rā, tei tāuturu ia rātou ’ia ha’afātata atu ā i te Metua i te Ao ra. ’A fa’a’ite ai rātou i te mea tā rātou i pāpa’i, e ani ia rātou ’ia ’ōtaro i tā rātou ’āpī parau mai te ’auri te huru. E nehenehe ato’a tā ’outou e tāpiri ’āmui i te mau « ’auri » a te mau tamari’i ’ei fa’ahōho’ara’a i te mea ’auri i roto i te moemoeā a Lehi.

• E ani i te tahi mau tamari’i ’ia tai’o i te 1 Nephi 8:10–12 ’e ’ia fa’ata’a mai e aha tā Lehi i ’ite. E ani i te tahi atu mau tamari’i ’ia tai’o i te 1 Nephi 11:20–23 ’e ’ia fa’ata’a mai e aha tā Nephi i ’ite. Nō te aha te melahi i fa’a’ite ai ia Nephi i te ’aiū Iesu nō te ha’api’i iāna nō ni’a i te here o te Atua ? Nō te tauturu i te pāhonora’a i teie uira’a, ’a tai’o ’āmui i te Ioane 3:16 ’e ’aore rā, e hīmene ’āmui i te hō’ē hīmene nō ni’a i te Fa’aora, mai te « Il envoya son Fils aimé » (Chants pour les enfants, 20–21). Parau i te mau tamari’i e mea nāhea tō ’outou ’itera’a i te here o te Metua i te Ao ra ’e o tāna Tamaiti ’o Iesu Mesia i roto i tō ’outou orara’a.

• Pāpa’i i ni’a i te tāpura ’ere’ere : E aha tā tātou i ha’api’i mai nā roto mai i te hi’ora’a o Lehi ? E ani i te mau tamari’i ’ia feruri i te ’ōrama a Lehi ’e ’ia pāpa’i e rave rahi pāhonora’a e ti’a ia rātou. E ani ia rātou ’ia faʼaʼite mai i tā rātou mau pāhonora’a i te piha haʼapiʼiraʼa. I muri iho e ani i te mau tamari’i ’ia feruri i te hō’ē ta’ata tā rātou e nehenehe e fa’a’ite atu i te ’oa’oa o te ’evanelia.

1 Nephi 10:17–19; 11:1

E heheu mai te Atua i te parau mau iā’u nā roto i te mana o te Vārua Maita’i.

Mai te mea e ani tātou i te Metua i te Ao ra ma te fa’aro’o, « e fa’a’itehia mai te parau mau ia (tātou) nā roto i te mana o te Vārua Maita’i » (1 Nephi 10:19). Nāhea e ti’a ai ia ’outou ’ia tauturu i te mau tamari’i tā ’outou e ha’api’i nei ’ia māramarama i teie parau mau ?

Mau ’ohipa e nehenehe e rave

• Ani i te mau tamari’i ’ia paraparau mai nō ni’a i te mau rāve’a e ’itehia ai ia rātou te mau pāhonora’a i te hō’ē uira’a. Fa’aitoito i te mau tamari’i ’ia tai’o i te 1 Nephi 10:17–19 ’e te 11:1. E aha tā Nephi e parau mai te mea e ui te hō’ē ta’ata ’iāna nāhea ’ia ’imi i te mau pāhonora’a i te hō’ē uira’a nō ni’a i te ’evanelia ? Nāhea te Atua ’ia ha’api’i mai ia tātou nā roto i te Vārua Maita’i ? (hi’o PH&PF 8:2).

• E ani i te mau tamari’i ’ia paraparau mai nō ni’a i te hō’ē taime ’a tauturu ai te Vārua Maita’i ia rātou ’ia ’ite ē, e parau mau te hō’ē mea. E ani ia rātou ’ia feruri ē, e hoa tō rātou ’o tē mana’o nei ē e’ita tāna e nehenehe e fāri’i i te pāhonora’a nā roto i te Vārua Maita’i. E aha te ti’a ia rātou ’ia fa’a’ite atu nō ni’a i te 1 Nephi 10:17–19 ’e te 11:1 nō te tauturu i te reira hoa ?

ītona ’apora’a ha’api’ira’a

Fa’aitoito i te ha’api’ira’a mai i te fare

Fa’aitoito i te mau tamari’i ’ia fa’a’ohipa i te ’api ’ohipara’a nō teie hepetoma nō te fa’a’ite i tō rātou ’utuāfare i te mea tā rātou i ha’api’i mai nō ni’a i te ’ōrama a Lehi nō te tumu rā’au o te ora.

Ha’amaita’ira’a i tā tātou ha’api’ira’a

E ha’api’i mai te mau tamari’i nā roto e rave rau rāve’a. E ’oa’oa te mau tamari’i ’ia ha’api’i mai nā roto i te mau ’itera’a rau. E fa’a’ohipa i te mau ’ohipara’a ’o te tauturu ia rātou ’ia haere i mua, ’ia fa’a’ohipa i to rātou mau hōro’a ato’a, ’e ’ia tāmata i te mau mea ’āpī. (Hi’o Ha’api’ira’a mai tā te Fa’aora,25–26

ʼapi ʼohiparaʼa : E tauturu te parau a te Atua iā’u ’ia ʼite i tōna here