30 nō Tītema–5 nō Tēnuare

Mau ’api ’ōmuara’a o te Buka a Moromona

« Te tahi fa’ahou ’ite nō Iesu Mesia »

Ha’amata i tā ’outou fa’aineinera’a nō te ha’api’i nā roto i te tai’ora’a i te ’api upo’o parau o te Buka a Moromona ’e te ’ōmuara’a ; te mau ’itera’a pāpū o nā ’ite to’otoru, nā ’ite to’ova’u, ’e o te peropheta Iosepha Semita ; ’e « Hō’ē fa’ata’ara’a poto nō ni’a i te Buka a Moromona ». Feruri e nāhea e nehenehe ai ia ’outou e fa’auru i te mau tamari’i ’ia ha’api’i mai nā roto mai i te Buka a Moromona.

Pāpa’i i te mau mana’o e tae mai

Fa’a’ite i te mana’o

Ani i te mau tamari’i ’ia fa’a’ite mai i te mau ’ā’amu tā rātou i ’ite nō roto mai i te Buka a Moromona, ma te fa’a’ohipa i te mau hōho’a 67–86 i roto i te Buka hōho’a nō te ’evanelia ’e ’aore rā, te tahi atu mau hōho’a tā ’outou.

Ha’api’i i te ha’api’ira’a tumu : Mau tamari’i ’āpī

’Api upo’o parau o te Buka a Moromona

E nehenehe te Buka a Moromona e tauturu iā’u ’ia roa’a te fa’aro’o ia Iesu Mesia.

Tauturu i te mau tamari’i ’ia hi’o ē te fā o te Buka a Moromona ’o te fa’a’ite-pāpū-ra’a ïa nō Iesu Mesia.

Mau ’ohipa e nehenehe e rave

• Fa’a’ite i te hō’ē Buka a Moromona, ’e ’a fa’atoro i ni’a i te upo’o parau na’ina’i, Te Tahi Fa’ahou ’Ite nō Iesu Mesia. Vaiiho i te mau tamari’i, te tahi i muri mai i te tahi ’ia parau ē, « Te tahi fa’ahou ’ite nō Iesu Mesia ». ’A parau poto noa i te mau tamari’i ē mea nāhea tō te Buka a Moromona ha’apūaira’a i tō ’outou fa’aro’o nō Iesu Mesia.

• Fa’ati’a i te hō’ē ’ā’amu nō roto mai i te Buka a Moromona ’o tē ha’api’i ra nō ni’a ia Iesu Mesia, mai te ’ā’amu nō Samuela te ’ati Lamana i te tohura’a nō ni’a i te Mesia (hi’o Helamana 14–16), tō te Fa’aora ha’amaita’ira’a i te mau tamari’i (hi’o 3 Nephi 17), ’e ’aore rā, te taea’e o Iareta i te ’itera’a ia Iesu Mesia (hi’o Etera 2–3). E nehenehe te mau pene nō roto mai i Te mau ’ā’amu o te Buka a Moromona (’e te mau video e tano i ni’a i te ChurchofJesusChrist.org) e tauturu. Fa’a’ite i te mau tamari’i e aha tā tātou e ha’api’i nei nō ni’a ia Iesu nā roto mai i teie mau ’ā’amu. ’A parau ia rātou ē e ha’api’i mai rātou e rave rahi mau mea nō ni’a ia Iesu Mesia nā roto mai i te Buka a Moromona i teie matahiti.

• Hīmene i te hō’ē hīmene nō ni’a i te Buka a Moromona, mai te « Dans le Livre de Mormon » (Chants pour les enfants, 62). Hīmene ’āmui i te hīmene e rave rahi taime, ’e ’a vaiiho i te mau tamari’i, te tahi i muri mai i te tahi, ’ia tāpe’a i te hōho’a o te Fa’aora ’a hīmene ai ’outou.

’Ōmuara’a o te Buka a Moromona

’O te Buka a Moromona te ’ōfa’i tua nō tā tātou ha’apa’ora’a.

’Ua fa’ata’a mai te peresideni Thomas S. Monson ē : « Mai te peu ē, e parau mau te [Buka a Moromona]—’e tē fa’a’ite pāpū hanahana nei au ē, e parau mau—e peropheta mau ’o Iosepha Semita …  Te ’Ēkālesia a Iesu Mesia i te Feiā Mo’a i te mau Māhana Hope’a nei ’o te ’Ēkālesia ïa a te Fatu i ni’a i te fenua nei, ’e ’ua fa’aho’i-fa’ahou-hia mai te autahu’ara’a mo’a o te Atua » (« Te mana o te Buka a Moromona », Ensign ’e ’aore rā, Liahona, Mē 2017, 86–87).

Mau ’ohipa e nehenehe e rave

• Tai’o i mua i te mau tamari’i i teie fa’ahitira’a parau i muri nei nā Iosepha Semita i roto i te ’ōmuara’a o te Buka a Moromona : « ’O te Buka a Moromona te ’ōfa’i tua o tā tātou ha’apa’ora’a ». E fa’ata’a ē, mai te hō’ē ’ōfa’i tua e tāpe’a ’āmui i te tā’āto’ara’a o te ’āpou, e tāpe’a ’e e ha’apūai ato’a tō tātou ’itera’a pāpū nō ni’a i te Buka a Moromona i tō tātou ’itera’a pāpū nō ni’a i te tahi atu mau mea, mai ia Iosepha Semita ’e te ’evanelia.

• ’A ani i te hō’ē metua o te hō’ē o te mau tamari’i ’ia fa’a’ite mai e mea nāhea ’oia i te fāri’ira’a i te hō’ē ’itera’a pāpū nō ni’a i te Buka a Moromona. Tai’o ’e te mau tamari’i i te anira’a i te pae hōpe’a o te ’ōmuara’a o te Buka a Moromona, ’e ’a tauturu ia rātou ’ia ha’uti mai i te tahi mau mea e nehenehe tā rātou e rave nō te fāri’i i tō rātou iho ’itera’a pāpū.

« Te ’itera’a pāpū o te peropheta Iosepha Semita »

’Ua hōro’ahia mai te Buka a Moromona ia tātou nā roto i te mana o te Atua.

E nehenehe te fa’a’itera’a pāpū o Iosepha Semita e tauturu i te mau tamari’i ’ia māramarama i te fā hanahana o te Buka a Moromona.

Mau ’ohipa e nehenehe e rave

• Fa’ati’a poto noa i te mau tamari’i i te ’ā’amu o te fāra’a mai o te Buka a Moromona mai tei fa’ata’ahia i roto i « Te ’itera’a pāpū o te peropheta Iosepha Semita ». E nehenehe ato’a ’outou e fa’a’ohipa te « Pene 1: Nāhea tō tātou fāri’ira’a i te Buka a Moromona” »(’Ā’amu o te Buka a Moromona, 2–4, ’e ’aore rā, te video tano i ni’a i te ChurchofJesusChrist.org). Tauturu i te mau tamari’i ’ia ha’uti mai i terā ’ā’amu ma’a taime ri’i ’a fa’ati’a noa ai ’outou.

• Fa’a’ite i te mau tamari’i i te hō’ē hōho’a o te mau pāpa’ira’a i roto i te mau ’api ’auro. Fa’ata’a ē, ’ua tauturu te Atua ia Iosepha ’ia ’īriti i te reira mau pāpa’ira’a i roto i te mau ta’o tā tātou e nehenehe e tai’o ’e e ta’a.

  

  ’Ua ’īriti Iosepha Semita i te mau pāpa’ira’a i pāpa’ihia i ni’a i te mau ’api ’auro.

Ha’api’i i te ha’api’ira’a tumu : Mau tamari’i pa’ari

Upo’o parau o te Buka a Moromona

E tauturu te Buka a Moromona iā’u ’ia roa’a te fa’aro’o ia Iesu Mesia.

Ha’amana’o ē, tā ’outou ’ōpuara’a i roto i te ha’api’ira’a i te mau tamari’i nō ni’a i te Buka a Moromona ’o te patura’a ïa i tō rātou fa’aro’o i te Fa’aora.

Mau ’ohipa e nehenehe e rave

• ’A vāhi ’āpipiti i te piha ha’api’ira’a. E ani i te pea tamari’i tāta’itahi ’ia tai’o i te paratarāfa piti o te ’api upo’o parau o te Buka a Moromona, ma te ’imi i te hō’ē mea ’o tē fa’a’ite mai ia rātou i te ’ohipa i ’ōpuahia ai te Buka a Moromona. I muri iho, e ani i te pea tamari’i tāta’itahi ’ia fa’a’ite mai i te reira i te piha ha’api’ira’a.

• Tauturu i te mau tamari’i ’ia ’imi i roto i te ’api upo’o parau i te pereota « nō te fa’a’ite pāpū i tō te ’ati Iuda ’e te mau Etene ē, ’o Iesu te Mesia ». Nāhea te Buka a Moromona i te fa’a’ite pāpū ia tātou ē, ’o Iesu te Mesia ? E ani ia rātou ’ia fa’a’ite mai i te hō’ē ’ā’amu nō roto mai i te Buka a Moromona tei ha’apūai i tō rātou fa’aro’o i te Mesia, ’e ’aore rā, e fa’a’ite atu i te hō’ē o tō ’outou iho.

’Ōmuara’a o te Buka a Moromona

’O te Buka a Moromona te ’ōfa’i tua o tā tātou ha’apa’ora’a.

E tauturu te roa’ara’a te hō’ē ’itera’a pāpū nō ni’a i te Buka a Moromona i te mau tamari’i ’ia ’ite ē, Te ’Ēkālesia a Iesu Mesia i te Feiā Mo’a i te mau Māhana Hōpe’a nei, o te ’Ēkālesia mau ïa nā te Atua.

Mau ’ohipa e nehenehe e rave

• E ani i te mau tamari’i ’ia fa’ahua feruri ē ’aita ā ’outou i fa’aro’o a’e nei i te parau o te Buka a Moromona. E ani ia rātou ’ia ’ohipa ’e te hō’ē hoa nō te feruri i te mau rāve’a e ti’a ai ia rātou ’ia fa’ata’a mai ia ’outou, e aha te reira ’e nō hea mai te reira, ma te fa’a’ohipa i te mau fa’ata’ara’a i roto i te ’ōmuara’a. E vaiiho i te pea tamari’i tāta’itahi ’ia ha’api’i mai ia ’outou. E nehenehe ato’a te hōho’a Tē fa’a’ite pāpū nei te Bibilia ’e te Buka a Moromona i te Mesia (ChurchofJesusChrist.org) e tauturu.

• E ani i te hō’ē tamari’i ’ia tai’o mai i te fa’ahitira’a parau a Iosepha Semita i roto i te paratarāfa ono o te ’ōmuara’a. Ma te fa’a’ohipa i te ’api ’ohipara’a o teie hepetoma, ’a fa’ata’a ē nāhea te hō’ē ’ōfa’i tua e tāpe’a i te ’āpou. ’Ia au i te paratarāfa hōpe’a o te ’ōmuara’a, e aha te tahi atu mau mea tā tātou i ’ite i te taime ’a fāri’i ai tātou i te hō’ē ’itera’a pāpū ē, e parau mau te Buka a Moromona ?

« Te parau fa’a’ite a nā ’ite to’otoru » ; « Te parau fa’a’ite a nā ’ite to’ova’u »

E nehenehe au e riro ’ei ’ite nō te Buka a Moromona.

Nāhea e ti’a ai ia ’outou ’ia tauturu i te mau tamari’i ’ia fāri’i ’e ’ia fa’a’ite i tō rātou iho ’itera’a pāpū nō te Buka a Moromona ?

Mau ’ohipa e nehenehe e rave

• E ani i te mau tamari’i ’ia fa’ata’a mai i te hō’ē mea tā rātou i ’ite ’o te ’ore roa te hō’ē ta’ata ’ē atu i roto i te piha ha’api’ira’a i ’ite. Fa’ata’a ē, i roto i te Buka a Moromona tē vai ra te mau ’itera’a pāpū o nā ta’ata 11 ta’a ’ē atu ia Iosepha Semita tei ’ite i te mau ’api ’auro nō reira mai te ’īritira’ahia te Buka a Moromona. Tai’o ’āmui i te mau ’itera’a pāpū. Nō te aha teie mau ’ite i hina’aro ai ’ia ’ite te tahi atu mau ta’ata nō ni’a i tō rātou ’itera’a pāpū ?

• E ani ē tē hina’aro ra ānei te tahi mau tamari’i ia fa’a’ite ē, e mea nāhea tō rātou itera’a ē, e parau mau te Buka a Moromona. Tai’o ’āmui i te Moroni 10:3–5 , ’e e ani i te tamari’i tāta’itahi ’ia tai’o i te Buka a Moromona i teie matahiti ’e ’ia fāri’i ’e ’aore rā, ’ia ha’apūai i tōna ’itera’a pāpū ē, e parau mau te reira. Fa’a’ite i te mau tamari’i e mea nāhea tō ’outou fāri’ira’a i tō ’outou ’itera’a pāpū nō te Buka a Moromona.

Fa’aitoito i te ha’api’ira’a i te fare

Mai te mea e nehenehe, e ha’apāpū ē e Buka a Moromona tā te tamari’i tāta’itahi, ’e e ani ia rātou ’ia ha’amata i te tai’o i te reira rātou iho, ’e rātou ’e tō rātou ’utuāfare.

Ha’amaita’ira’a i tā tātou ha’api’ira’a

’Imi i tā ’outou iho fa’aurura’a. ʼEiaha e faʼariro i teie mau faʼanahoraʼa ʼei mau arataʼiraʼa tei tītauhia e peʼe ’a ha’api’i noa ai, e faʼaʼohipa rā i te reira ʼei mau manaʼo nō te faʼatupu i tō ʼoutou iho fa’aurura’a, ’a feruri ai ʼoutou i te mau hinaʼaro o te mau tamariʼi tā ʼoutou e haʼapiʼi nei.