Hō’ē hōho’a nō te ha’api’ira’a

I roto i teie rāve’a tauturu, e ’ite ’outou i te hōho’a i roto e toru tuha’a tei tāpitihia i roto i te arata’ira’a ato’a : Tītau i te mana’o, ha’api’i i te ha’api’ira’a tumu, ’e fa’aitoito i te ha’api’ira’a mai i te fare. I roto i tā ’outou ha’api’ira’a i te rahira’a o te taime, e nehenehe te mau tuha’a o teie hōho’a e ’āno’ihia ’e ’aore rā e tupu nā roto i te tahi ’ana’ira’a ’ē atu. ’Ei hi’ora’a, e feruri ē te fa’a’itera’a, o te hō’ē ïa rāve’a nō te ha’api’i i te ha’api’ira’a tumu, ’e i roto i te ha’api’ira’a tumu e tītauhia ’ia rave i te mau anira’a ’ia fa’a’ite mai. ’Oia ato’a, e nehenehe te fa’aitoitora’a i te ’apora’a mai i te ha’api’ira’a i te fare e tupu nā roto i te hō’ē tau’ara’a parau i roto i te piha ha’api’ira’a. E vaiiho i teie mau fa’atanora’a ’ia tupu noa, mai te au i te mau muhumuhura’a a te Vārua nō te pāhono i te mau hina’aro o te mau tamari’i tā ’outou e ha’api’i ra.

Tītau i te mana’o

’Ei tuha’a nō te piha ha’api’ira’a tāta’itahi, e ani i te mau tamari’i ’ia fa’a’ite mai i tō rātou mau mana’o, mau hi’ora’a, ’e mau ’itera’a nō ni’a i te mau parau tumu tā ’outou e ha’api’i ra. I roto i tā rātou mau ’āparaura’a, e fa’a’ite mai rātou i tō rātou mau ’itera’a nō ni’a i te ’apora’a i te ha’api’ira’a i te fare. E ti’a ato’a ia ’outou ’ia hi’o fa’ahou i te mau mea tā rātou i ’apo mai i te hepetoma i ma’iri, ’e e ui e mea nāfea te reira i te fa’aurura’a i tō rātou orara’a.

Ha’api’i i te ha’api’ira’a tumu

E nehenehe Mai, pe’e mai—nō te ta’ata hō’ē ’e te ’utuāfare e tauturu ia ’outou ’ia hāro’aro’a maita’i a’e i te ha’api’ira’a tumu tā ’outou e ha’api’i atu i te mau tamari’i. E feruri e aha te mau ’īrava pāpa’ira’a mo’a, te mau fa’ahitira’a parau, te mau ’itera’a, te mau uira’a ’e te tahi atu mau rāve’a taururu, e ti’a ia ’outou ’ia fa’a’ite, nō te tauturu i te mau tamari’i ’ia ’apo mai, ’e ’ia ha’a i ni’a i te mau parau tumu o te ’evanelia. E ’imi i te mau rāve’a ’āpī nō te tauturu ia rātou ’ia ’ana’anatae i te mau mea tā rātou e ’apo mai nei.

Fa’aitoito i te ha’api’ira’a mai i te fare

Nō te mea ho’i, ’ua riro te fare ’ei pū nō te ’apora’a mai i te ’evanelia, hō’ē o tā ’outou mau ’ōpuara’a ’ei ’orometua ha’api’i nō te Paraimere o te fa’aitoitora’a ïa i te ’apora’a i te ha’api’ira’a i te fare. Nāhea e nehenehe ai ia ’outou ’ia tauturu i te mau tamari’i ’ia fa’a’ite i tō rātou ’utuāfare i te mau mea tā rātou i ’apo mai i roto i te piha ha’api’ira’a ? Nāhea e ti’a ai ia ’outou ’ia fa’aitoito i te mau tamari’i ’e tō rātou mau metua, ’ia tāmau noa i te ’apo mai nā roto mai i te Buka a Moromona i te fare ?